By The Zozam TimesAizawl, Oct 29, 2009: Mipat hmeichhiat (Sex) hman chungchangah inzirtirna tha neih tula a hriat avangin Social & Human Rights Activist, Ruatfela Nu (Vanramchhuangi) chuan a zirchianna atangin naupangten an inkhualtelemnaah sex an hmang lem thin tih a sawi a. Hemi chungchang hi ‘Sex Education ‘Fate Kaihhruai Nan’ tih lehkhabu-ah a ziakah a telh nghe nghe.
He lehkhabu-a a ziak dan chuan inkhualtelemnaa sex hman lem chungchangah hian mi 18 te zirchiangin, zawhna 10 a zawt a. “Mi pathum tih loh chuan sex hi an hmang lem thin tih an sawi vek a ni,” a ti. Heng hi nu leh paten an fate sex chungchangah zirtirna dik leh mumal tak pea an hrilhhriat pawimawh a tih em avanga ziak tel a nih thu The Zozam Times a hrilh.
Ruatfela Nu hian Sex Education A AW B (Naupangte Tan) tih leh Tleirawlte Tan tih chu a bu hranin a ziak bawk a. A, AW, B ah hian naupangte ngeiin an chhiara an hriatthiam theih turin a ziak a. “Inlemkhual leh pawntonaah nupa lem chan loh tur,” a ti. ‘Tleirawlte Tan’ tih bu-ah hian sex awmzia, sex hman khawloh chhan, sex chungchangah information dik dawn a pawimawh tihte chu a thuken laimu an ni a. Sex chungchanga tleirawlte zawhna leh chhanna thenkhat a tarlang bawk.
Pathian thu nen inhnerem taka ziak Sex Education chungchang lehkhabu 3 te hi October ni 28 khan I&PR Auditorium-ah School Education Minister Lalsawta’n a tlangzarh a. Hemi ni hian cheng singhnih chuang man hralhchhuah nghal a nih thu kan dawng.
Post a Comment
Comments not related to the news or article may be deleted.