B’lore Hmarnauhaiin BMA League Cup an Lawm

HSA, B’lore branch team Sinlung FC with host Pi Nancy Morton &family. For more pictures double click this picture.

BANGALORE, Nov 12, 2009(with inputs from Hmararasi): Tarik ni 8, kum 2009 khan Bangalore Hmarnauhai chun Bangalore Mizo Association Football League Champions Trophy 2009 an lak chu ropui takin lawmna an nei.

Prokram seson pahnih a the a ni a; seson hmasa hi Pathien thutak hrilna le thupuifun hai thawnaa hmang a ni h. Pastor Lalsandamin in sports/inkhel that zie le Kristien nuna ding khawma thil pawi a ni naw zie nasatakin a hril lang a. “Suol laka inthawka invengna hmangruo thatak a nih,” ti’n a hril bawk.

BMA Trophy Lawmna prokram ‘host’ Pi Nancy Morton hai sungkuo in Players tin ta dingin zakuo vut rawng mawi em em, a hnung tieng SINLUNG FOOTBALL FC ti in print an pek a, player han an hak nghal bawk. Mawi an inti hle.

Seson II chu insukhlimna hun a hmang a nih. Sinlung FC Players hai pakhat khat in an thiemnahai le talenthai hrilna hun pek an nih. Player tam lem chu fiemthu thaw an lo thiem hrep a, hun hmang an suk hoi em em.

Chun, HSA president Tv Randolf Amaw a inthokin  lawmthu thucha ngaithlak a ni a. Khawpui a Hmar organization sunga inhmang le inzieklut a poimaw zie a hril bakah HSA in “insukhlimna le social activities chauh ni loin inchukna le thiemna tiengpanga khawm hma nasataka lak ding” a ni thu a hril.

Insukhlimna tieng pangah chu Sinlung FC kepten Tv (Pi) Zairemthang le HSA ex-secretary Tv Solomon Hmar hai hlasakin mipui a chawm tha a, an ni khom inhoi an ti hle.

Hi khela hin fans aiaw in HSA adviser Pu Robert in Pathien thu besan in kum nawka Sinlung FC player han hratna an chang nawk dan ding thu tawite a hril a. Chunzo chun, nunghak Josephine (kut puor raka khuongte vuotu) chu ‘Hip... hurray’ thuoi dingin a ko a, mipui pungkhawm an hlim ie.

HSA le BHCF inthungkhawma prokram hi siem ni sien khawm, a lawmna hunser sengso le iengkim chu BHCF secretary Pu Jonathan Kungate le BHCF tresurer Pi Nancy Morton hai sungkuo in an hung tum a nih.

Prokram chu zan dar 7 velin zo a ni hnungin bawngsa-vawksa chartang le arsa-hmepawk  ruoi inhnik tak el kil a nih.