Halloween party ideas 2015

Ziektu: Pu L.Keivom*, Inui.com Columnist

Cultural survival is not about preservation, sequestering indigenous peoples in enclaves like some sort of zoological specimens. Change itself does not destroy a culture. All societies are constantly evolving. Indeed a culture survives when it has enough confidence in its past and enough say in its future to maintain its spirit and essence through all the changes it will inevitably undergo.-Wade Davis ‘The Wayfinders’

Pherzawl Thar

Delhi tlanga umhmun nghet kum 1970-a inthoka ka khuor tran kha, kum 21 sung zet a zawnin India ram puo tieng sinthawin thangsan lang khom, 1997 khan hung kir nawkin, tu chen hin Delhi chu ka Pherzawl thlak songtu a hung ni ta a. Nuhmei ka neia inthoka kum ruk sung (1964-69) kha career siem tuma a kûl a tâia thrang ka lak hun, M.A inchuk zoa Indian Revenue Service (IRS) le Indian Foreign Service (IFS) ka buon thluk hun a ni leiin thu le hla tieng ka buoipui hman naw a ni tak. Parbunga 1964-a thla nga Headmaster-a ka um sunga mi hrât khawkheng Khuplal leh voi tam inpawla, thu le hla hlui tam tak ka lak khawm, a hnunga a hnam pumin a hung sor trangkai èm ém le Hmar Cultural Society Chairman ka nina hnuoia hnam làm le thuom le hnam thu le hla kan hung sukvul hlut leia intuoitharna hung tlung ti naw lem kha chu career hnota tlànbahrika tlân ka ni leiin, ni tin deuthawa hla thar phuok hlak kha, chêpchêp vuok thlak an ti angin, kum ruk sung vêl chu ka rè ta vang vang a nih.

Nun sîpa chuong kai

Khawvela tlang insang tak chu Mount Everest a ni angin, hringnun lampui kau dang danga hin a tawp, insang tak, a nêka insâng lem um ta lo, a lo um treu a. Inchukna tienga dikri insang tak chu ‘Master Degree’ a nih. A chung a um ta nawh. M.Phil amanih Ph.D dikri ei tihai dam hi thupui pakhat chauh thlang suoka thlûr bingtu mi tlawmtê chauh dong thei, general degree ni loin specialized degree an siem a nih. ‘Master Degree’ chu voi khat pieng manah nei ka tum hrim hrim a, 1966 khan ka hmu ta hrim a. Chu kum vĕk chun All India Competitive Exam-ah thrangin, a kum nawk IRS (Customs & Excise) ka zom a. Amiruokchu, India sorkar hnuoia service insang taka ngai IAS/IFS kai chu makmawa ka ngai a ni leiin ka tha nei sun sengin ka hnot ngar ngar a, 1970 khan IFS chu ka hmu a, Pherzawl tlanga inthoka thiphuhâka voi thum zet ka bei hnunga Matriculation ka chawm hlĕn hnung kum sawmnaah ka Zawlkhawpui, zawl um lona chu zawl ngot chunga rem, India Khawpui, Delhi tlanga Raisina Hills-a President in kota um, South Block tia ko, Prime Minister office chung chara pindan chu ka hluo ve tah a nih.

Tum hlen beidongumzie

Delhi tlanga ka chuong kai hin sorkara sin tak insang Mount Everest kai ka ni tak leiin thil dang hnota tlanbahrika tlàn a ngai ta naw a, hnot tum inla khom India rama ding chun a dang a um ta nawh. Sir Richard Francis Burton, kum 1853-a rûka Muslimhai hmun thienghlim Makkaa inzin a, dam taka a hung suok nawkin, “Khawpui Thienghlim-a him taka ka lut le suok thei leia ka lawmna pangsa chu lungrila beidongna le ngŭinain a zui nghal a. Sabengtung chunga ka chuong lai chun thaw tum hlawtling hang khawsawtumzie dam chu ka ngaituo neu neu a. Hlawsamna chun thapui insuoa thrang la dingin mihriem lungril a mor zing laiin, tum hlenna chun thil ei lo ngai ropui po po hi tak tling lo, hlimthla el a lo nizie thu beidongum chu a mi tiem khum lem a nih” (The exaltation of having penetrated and escaped the Holy City without damage was followed by languor and disappointment. I had time upon my mule for musing upon how melancholy a thing is success. Whilst failure inspirits a man, attainment reads the sad prosy lesson that all our glories are in shadows not substantial things) a ti ngirhmuna ka lo chuong ve dĕr tah a nih.

R.L.Stevenson-in, “To travel hopefully is a better thing than to arrive and the true success is to labour” (Beisei taka inzin hi tum ram zuon hma nêkin a hlimum lem a; hlawtling ei ti hi thokrim a lo nih) a ti le Lal Solomon-in nisa hnuoia thil po po hi iengma lo vong le thli hnot ang chauh a ni thu a lo hril kha mani nun ngeia tonhriet hnung chun ‘Beiseina Khamhrui’ ti thusep, ka thusep ziek tah lai po poa hlawtling le tiem hlaw taka ka ngai chu a cho suok bakah,

Sappui rŭn rem sŭngah kai a,

Ziekfung chela truon rĕl ni tin,

Lung a dam nawh, ningtel a na,

Hai ang tar hma rêng a ol ngei

ti dam hi a hung cho suok tah pei a nih.

Sungkuo poimawzie

Kei ka vangnei vèna chu naupang tè ka ni laia inthoka ka’n hnikna thu le hla bawzui theina ding le taima tak le zalen taka bawzui peina Pathienin a mi pĕk hi a nih. Career siem tuma theitawpa ka thrang san khom ka thil tum ka bawzui pei theina dinga sirbi poimaw an nia ka ngai lei a nih. Thla thum ka ni chaua pa thisan ka ni leiin ka nu duot bik le ka unauhai ditsak le hmangai hlaw ka ni a. Ka nuom zawng thaw theina dingin zalenna an mi pĕk a, ka ta dinga thil thra lo nia an hriet thila chauh an ngaidan an mi hril a, ka zawm le ka zawm naw chu ka thu tlûkna siemah an sie a, an mi khuokhir ngai nawh. Kan in sungah trong ki insanga inbiek amani, trong malsawm lo le mawi lo amanih, zamaw rong kai amanih, mi demna le mi chanchin a thra naw zawnga hril amanih ri hriet ding a um ngai naw a; in le lo tieng Pathien malsawmna kan dong nasa leiin bu kan fak seng lo kan tharsuok kum tin a, pûktu nêkin petu, mi ta bat nêkin mi bat theina kan ni hlak a; khawnbawl kan ni ngar ngar a; kohranah ka pieng hma kum kuo-a Pherzawla Independent Church a pienga inthok khan, tu lai fiemthu trong takah, ‘Krista zara ICI’ kan ni bakah kohran ban poimaw laia mi kan ni ve hlak a. Kum 2007-a Delhi le Senvon tlanga Baibul (Delhi Version), Pathien zara ka kut hmanga inlet le sut, kan tlangzar khan Pathien mi thruoina nasatzie ka hriet suok zuol.

Zalenna boruok poimawzie

A tawpna tak hi ka zuk săm san a um a, chu tieng chu zuiin fe ta lem inla. Kha hmaa inthok tah le tu chen khom hin kohran thil le khawtlang thil hi ui le kĕl anga thlung khop thei lo, kohran chu thlarau thil vonga bel tum, khawtlang thil hrim hrim chu hmu khawhri tum tlat, an um a. Kan makpa ngei khom kohran hotu lien laia pakhat, mi inza phur le a bul hnaia chu fiemthu khom an thaw ngam lo a nih. Chuong lai chu love song sak an hriet met khom kohrana inthoka hnot suok nghal nuoma an mel rum lai le pi le pu thu le hla le ringnawtuhai thaw dan hmang hrim hrim chu suola ngaia hnawmhnawl vong an tum lai kha a nih. Chuong lai chun kei chun zieklobu chawiin, pi le pu thu le hla, abîkin hla hrang hrang an lo neihai chu an inhmang zo el nawna dingin pitar putar a la hrehai chu panin ka khon khawm hlak a. Chun, kan hung tleirawl suok hun laia Mizoram tienga inthoka phuok hla lenglawng, sai hla (love song) le keilet hlahai chu ka khon khawm hnĕr hnŭr a. Ka uhai khan bau khat khomin an mi khap naw a, hieng thilhai poimawzie hi thlarau mita inthokin an lo hmu phak a nih ti a hnungin ka hung man phak chau a nih.

Thu le hla humtu Thangngur

Ka u Dotling (Remi Nu) ka pieng hnunga kan unau dam laia a upa tak le keini unau pieng 13-laia a pathumna mi hril dan chun, Thangngurin hla a phuok nasat vanglai chun tleirawl a ni ve ta a, Pherzawlah a hung inzin changin a hla phuok thar thralaihai a’n chuktir hlak a, ama khom a thrang ve hlak. A hril ka hriet zing laia pakhat chu, Thangngur khan upahai, thu le hla tienga inhnik mihai kha a pan a, an thu le hla hriethai a’n don a, a ziek thlak a, Semruk hla le Liendang hlahai a lak khawm a. ‘Semruk Hla’ thlûka a siem, ‘Adam suon le par lengna khawvel’ ti dam hi an sakhaw thar le ei suotlang hlui thiem taka a’n luong khawmtirna a nih. Chu chu thlaraua mit varna neihai thil hmu fie dan chu a nih. Ama bokin a hla pakhat “Aw Lalpa, i hmêl chu ka hmu tah” ti kharnaa taksa le thlarau thil hi thrè bur thei a ni nawzie “Thlarau le taksa inkal loin” a ti dam hi sak liem mei mei dinga a phuok chu naw top a tih. Sathu hmè ka hmè lei ela ka thlarau buoi dinga ka ngai chun dol le bal inaihal anga ngaitu ang ning ka tih.

Hieng hi ei khawsak dan a ni leiin Senvona kristien sakhuo a hung lut hnung khan pipu thu le hlahai hnawl hmangin, Lusei tronga phuok kristien thu le hlain a mi hung rŭn a, ei hmin dĕr a, Hmar trongin zung a kei nghet hman hmain phawi hmangin a um teu hle. Thlaraua mit varna nei Thangngur hai rawiin kum 1919-21 kara harnaa inthoka mani trong ngeia Pathien thu hril le inpak poimawzie an hung man chienga inthokin Hmar trongin hla an hung phuok tran a. Pi le pu nun dan, an kalchar hlimthla, an thu le hla an trong mawihai chu thiem takin Thangngur le a sangawi zawnpuihaiin kristien hlaah inrem takin an hung hlu lut a, taptebulah Bethlehem le Kalvari a hung intrumtir a. Chu an hnuoi buotsaia chun, dodalna tam tak karah, Hmar tronga thu le hla a hung inthrang lien a nih. Setanin kohran buoina remchanga hmangin, H.H.Coleman pawlhai laihai lem chu hieng hlahai hi kum 1960 lai bawr chen khom khan ineselna hlaa ngaiin an la sak nuom naw chauh khom ni loin vui liem chak dop dop pawl, kristien mitdel an la tam a nih.

Pherzawla inthokin sansuokna kut

Kum 1960 bawr tung vela thu le hla tienga kohran dai sak dai darh dinga thrang kan lak laia hmai sa kan tawng rawn tak chu kristien mitdel, mani kalchar le sakhuo hi inaihal tlata ngai pawl an nih. Kum 1943-a Thangngur a thia inthoka kum sawm vel sung chauhin kohran kutah ei thu le hla ei vui liem treu a. Chu laka inthoka hnam santu dinga Khuonu ruot chu Pherzawl a nih. Hmar History bu hmasa tak buotsaitu Hranglien Songate le hla phuok thiem, a naupaT.Khuma hai an hung suok bakah 1951 khan Pherzawl High School a hung ngir a, Mizorama inthokin mi tam tak an hung kai a, hnam hla, hla lenglawng, sai (lengzem) hla an hung phur lut truk truk a, perkhuong le ukulele rimawiin a hung zui a, kohran bang a hung nor chim a. Chutaka inthok chun ei khawvel hi pangngai ta naw sien khom, mawlna hi khawvela inthoka hnot hmang a ni hma chun indona hi tawp ngai naw nih.

Cultural revolution kakhawk fe pei

Chu indona chu nasa taka bawzui a, 1960 bawr tunga ‘cultural revolution’ a um leia tlangkhaw thu le hla (secular literature) hung suok truk truk a, chu chu a tak ngeia hmu thei chu voi hni (1979, 2005)zet sut hlaw tah Lenruol Hla Bu hi a nih. Hi thil hi a nih kum 1970-a Delhi tlang ka tlung thlaka thi le thau inpola ka bawzui ngat ngat chuh. Sir tinah ei hang bi a, a kawrong vong, a kawrong vong, hang thol bit phuor ding khoma, mi tam tak inthuruola bei fe ni inla khom, kum tam tak ngai thil a nih. Ei bi chieng po leh ei bei a dong a, Tuolte vanglaia pa chêr an hril ang el khan, hla tieng ti naw chu, ei thlirna tieng tieng a baua inthokin a mongkuo a’n lang kang vong a nih. Ei sakhaw bu, trong ziekna dinga entona hmang dinga mi ei hrilhmu hlak chu ‘Khawhe, Pathien thu hi Hmar trong ziek dan indik lo le tiemtuhaiin an hriet thei naw dan tak dingin hang suosam ei tih’ ti ni awm hiela an chokchawrawi a ni bok si. Hi lei ringota a neituin a hnam pum hi a hrem a lo ni khomin inthiem naw ding a ni nawh.

Ei ngirhmun hmu chieng bok sia thrung inzam mei mei chu thil thaw ding nia ka ngai naw leiin, kum sawmli liem ta sung hin ka hun awl po po deuthaw hi Zoram khawvela thu le hla tienga ei baksamna, abikin Hmar hnathlakhai kawrongna hruk bit tumin ka bei ve a, sienkhom hma ei sawn dan hi enin, trongsephur lu chunga kut innghata malsawmna thu insam khum khom ei hoiin ka hriet hlak. BA, MA tlung phak ta chen khom literachar hmasawn dan ding ei hril changa A AW B tiem le hmang dana ei la buoi tlat hi, ei Oxford-hai hi Sura’n operation a thawna Mongping khuoa khom a vêngkeltila um dam a lo ni pal am ti enfie a trûl el thei a nih.

(September 22, 2012 Delhi)

*The writer is retired Indian foreign diplomat and well-known author of the Zoram Khawvel series.

Ziektu: L.Rothanglien Khawbung

Zingkar dar 9 in Pu Dosang truck, Lungthulien chen a fe ding ti ka hriet chun, mani khuo tieng pan ding ti takah inhma takin ka tho a. Zing bu khom fa khop thra hman loin dar 8.30 ah Rengkai Road- motor innghatna hmun chu ka tlung ta chot a. Motor chu a suok el dim a ni ka ti a, hmun hran hrana mi an phur ding hai le thuomhnaw an phur ding la khawm dinga suok chauh kha an lo ni lem a. Sawt fe kan inphur kuol hnung chun chawhnung nisa inher rawtin Churachandpur kan suoksan thei chau a nih. Truck hnung tieng chun kan thrung ve ta ran a, intet bok boka fe peiin, lam inthiel malam le ‘Hung kumaw’ voi thum vel an mi ti a, an mi rau-trum hnung chun Santing chu zantieng nisa thlak tawm ruoi chun kan tlung ve ta hlol a.

Bu fa dingin hotel-ah kan lut a. Tleirawl bu du lai ti takah, kan hang trum a, rawtuoi sen vur le arsa hmin thra rak loa an lo suong, bu khom hmin inruol rak lo khom ni sien von mar trê vangin kan hang fak khop té tè phot a. Pasal ruol, insukparap a thren lem chun thur thum ka thur sa ti malamin kan truck-a chun an lawn kai nawk nghien nghien a. Chuonga fe dinga kan insiem lai chun driver le handyman hai chu motor hnuoiah an lut insawk sek el a. Iemani chen hnungah ka trum a, kan motor chu a lo se der a ni zing thu ka hriet a, chu chu inti bengvar deuin ka ruolhai chu ka hang hril tawl a. Pakhat khatin an hung trum a, an hung bi thram thram tawl bok a.

Nunau le sangse deu hai chun iengtin am ei riek ding aw! tia an buoi nak nak lai chun tlangval ruol iemani zat chun ‘pasal le chemte’n inleng nawna a nei nawh’ tiin lungkham lo deuin kan lo inhamru mek bok a. Zan a hung inthim a, motor dang a hung el rawi mawh tia kan hang dăk vel khom chun ri dang rêng rĕng a um naw leiin, riek hmun chu kan hang rem ta ngei a. Chu lai chun kan motor umnaa riek ding chun a upa deu hai le nunau hai chu an inrem mek a. Chulai chun Lungthuliena mi ka pu Khumvel Songate chun mi ngaituo deu hin nuthlawi bula riek lo dingin ami hung infui zing bok a. Kei hlak chun bengkhon lo zet hin truck hma tieng hnaia àlù, dailuo le bufai chunga chun ka thangsuo puon chu silin ka lo zal daih ta bok si. Chu laia ka ngaituona té tè chun, Kolkata khawpui, Presidency College-a Bengali nunghak ka classmate mi lo Star vĕtu hai khan mi hmu hai sien iengtin am an mi ngai ding aw! Ti ka ngaituo a, hriet naw karin ka lo in innghil ta der a.

Zingkar dar 7 vela thoin, mani toilet bag hai chu phorin kan hang insukhar tawl a. Motor hlak chu siem dan um ta bok lo, hril a hai nuom khop el. Bu fak man ding khom ka nei ta nawh ti hre zing chun bu khom chu ka zong ta chuong lem naw a. Chawhnung thlang her tah tia chun Tunga motor chu a hung tlung ve ta hlol a. A thren chun hmelhriet nei thrat insuoin an hriet hriet hai chu an lo ko nawk nawk a. Tlawmngai takin kan motor chu a mi hang enpui a. Zara Sungte nuhmei Lalnipui (keiin U Lalnipui ti ka ko hlak) chun inring mangkhĕng a mi hung koin, an motor chuongnaa hung chuong dingin ami ti a. Kei chun inphalam tak pumin “Chuong man ding khom ka pek vong ta a, a dang khom ka nei ta nawh” ka ti a. Ieng khom buoina um lo dinga ami hril leiin an motor a chun ka chuong ve ta chot a. Thimbutin Damdiei chu kan tlung ta hram a nih.

Damdieia chun bu hang fak muong a, hmelhriet le ruol le pai ina hang riek nek chun ka ruolpa Zaihmingthang le chun kan khuo kilometre sawm pasarih chu, chu ni lâ lăa ban tumin kan suok ta nghal a. Ruo a tla hmer hmer zing a. Nawtchok a nei le nei naw ti ka ruolpa kan don chun a chawi thu ami hril a, lungmuong deu chun kan inthok suok a. Zan a hung inthim chun ruopui vawnawnin ami hung nuoi a. Kìr hlak chuh kan tum bik ta bok si nawh.

Zan dar 10 beka tlung hman tumin hma tieng kan pan ta pei a. Damdiei ICI hai ngadil kan khela inthok chun lam a lo trŭlin a lo pik ta hle a. Invot le thrangthrâm lawm dinga suok ang elin, hmu thra hmu inti ni awm hrimin, an mi bawr luoi luoi a. Inthim ta bok, lam innâl bok, thrulbuk vong a ni leiin hma tieng ieng khom hmu thei a ni nawh. Nawtchok hmanga meiser hang sit kan tum chun a lo hu vong bok si. Lam harsat ti nâksapah, kan bag bàkah ka ruolpa chun motor spring bong pathum hi chem le tuthlawa sut ding tiin a lo put bok. Kan buoi chem chem.

Phing trâm le rawsur, lam innal, trul ber bur kara chun, van eng zawn zong malamin damté tèin kan fe pei a. Kei chun a upa lem intiin, hma ka thruoi pei a. Damdiei le Tuolbung inrǐna ramri kawn kan khel hnung chun, rampuiah kan lut a, iemani chen kan fe hnung chun sawl taluoin kan chawl ta hnok a. Chuonglai chun ka ruolpa kuoma chun, “Khawhri lo umhai sien sien i tri ding?” tiin ka fiem a. Tràm sawl leh, a lo tri awzawng naw a, zawlro rongkaiin, “An thil, an AK 47 khom hung phor hai sien khom ka tri teu nawh” ti in ami don a, zoi zotin kan la’n nui nghe nghe (Chulai hmun chu Meitei ramhnuoi mihai lo inthatna, thlahrang a um an tina hmun a nih ti a hnungin kan hriet chau a nih). Chuonga dam te tea fe pei a, voi hni ve ve lam hraw suol a, trena kan intol hnung le, kuta kan inkei kai hnung chun, Tuolbung chu zan dar khat vela tramsawlin kan invak lut ta hram a nih.

Chuonga harsa taka kan inzin kum chu kum 2001, BA 1st year ka zo kum nih. Kar khat ka cham hnung chun, sung le kuohaiin vok le ar thei ang ang sukthlawngin, poisa um ang ang chu mi’n chawitirin, Kolkata pan dingin Aizawl tieng ka pan a. Ni hni pumhlum kea ka lawn hnungin Sakawrdaia inthokin bus-in Aizawl ka chuong kai ve tah hràm a nih.

A tawizawngin hang hril tum ei tih. Kolkata ka tlung hnung chun, Damdiei a inthoka Tuolbung ban dinga kan lawn zana invot min hminna dam thra lo chu hmun sawm nêka tam ser ka la nei a. Class-a kai lai dam a hung inthak a, ei hang huot a, thisen dam a la suok hlak a. Ruolhaiin hmu pal an tih ti inlau a um thei hle.

Ka hril tum tak chu, chu inzin chanchin ni loin, khang laia rinumna le harsatna tamtak, zaa pakhat khom ka la hril lo, tuora ka lo pal tlang ve hai kha, tumrŭna nei loin lo tuor muolsuo pei naw lang chu, voisun hin hi artikul hi ziek naw ning. Delhi tlang khom hmu phak ngai bok naw ning. Khang laia ka lungrila um zing hlak chu, ka nu le pa le sung haiin rimsi taka an mi chawm san le ka chîn tĕta inthokin ‘Aw Lalpa Ofiicer-in mi siem rawh. Rimsikna chu mi’n tuoktir la, chu chu tuorzo dingin mi thrangpui la, lekha inchukna hun thra le hriselna mi pe rawh’ tia ka lo trongtrainahai kha ka hriet zing lei ni lem.

Tlangram lo neia kut sinthawin ruol ka phak naw ding ti ka hriet leiin, Pathienin ka thaw dinga ami pek chu lekha inchuka theitawpa thrang lak a nih ti ka hriet chieng a. Chu chu Pathienin ka thaw dinga ami ruotpek ‘Kona’ (Calling)a ka ring det bur leiin, sorkar sin hmu ding hin ami thrangpui ngei ding ti khom ka ring nghet bur el a nih. Amiruokchu Pathien malsawm tlak ni ding chun mani sin inrimsa fa dinga Edena inthoka trongsie ami law tah ti khom hriet sa a ngai. Thaw lotu chu fa dingin a mi ti naw hrim hrim. Ei inrim ra le ei thaw suok sa fa dinga ami ti a ni el khĕlah, iem a na ei thaw dinga a mi phŭt?

Pathien ringtu intihai hin, hi khawvela ei um sunga sin ami pekhai hi ei hriet chieng am? Ama inpâk a, thralai pawl amani le kohran thilthawna hrang hranga inhmang ringota hun khawral dingin inchuklaihai hi ami ti ring a um naw phot a. Kohran le thralai pawla inhmang hi a sie ka tina a ni naw a, amiruok chu mani sin ding tak LEKHA TIEM hre fu si loa ei lo ‘over’ deu a ni chun ami siemtu lawm chu ring naw phot inla, a fûk lem el naw dim a ni. Mani thaw ding seng thaw khela ei thei ang anga ama rongbawl hi Kristien-hai thaw ding seng lem a nih. Hi konga hin Nu le Pa le thralaihai ei rengin ei inen seng a trûl. Ei thaw ding tak thaw fu loa a bebawma ei intat song mei mei chun Pathienin hi khawvela a sin mi pek, kona indik ‘Calling’ hi ei hriet chieng a naw lei lem an naw maw?

Delhi tlang, India ram inchukna hmunpui el khela ram rorelna khawlpui innghatna le khawvel tukver po po thlir theina hmuna chenghai hin Pathienin hun thra a mi pek hi hmang thiema, thil dang po po nêka sung le kuo, khawtlang, hnam le kohranin beisei taka an mi thlir thrup san thiemna le varna hi nei ngei ding le ei tum ram tlung ngei dingin ei hun ei pek tawk am? Nu le pahai khomin in mani nauhai thralai pawl thilthaw a ni lei ela in sin inawltir a, vantirko hmua ei hmu a, zalen taka ei insuoktir el hai dam hi in en let a hun ta naw maw? Mani sin seng thaw hnunga weekend-a haia inhmang chu a thra taluo. Ram inthranglienna inlumlet vut vut kâra ei hun seng ei hmang fuk naw a ni chun, nakie thrang la hung thar peihaiin an la hril ding le ei hril tran mek ta chu ei unau sak le thlanga mihai ei phak nawzie a nih.

Taima taka mani tawka private khom nisien sorkar sinthaw khom ni inla ei hriet nawk ding tlawm hang bel ei tih. Kei hieng ang ka ni ta si hin chu, ka sangnu bek an naw le ka sangpa bek sin lien tak nei dingin thaw fan fan ka tih tiin inchukna tieng uor nawk ei tiu. A nau naua sin nghet rak lo thaw ei tam taluo. Ei rimsi deu khomin bei tràng trâng ei tiu. Private sina hai khom Managerial post-a hai bĕk lut thei dingin infûn ru tlang ei tiu. Ei ram le hnamin thiemna le sin thra tak tak nei a mamaw rawn a nih.

A tawpna dingin, thil dang le mi dang chu a nî nì ni sien, a poimaw naw ei tina ni loin, inchuklaihai mol hi inen ei tiu. Lekha inchuk hi Pathien konaa ngaiin, taima nawkzuolin thrang la’ng ei tiu. Lekha tiem hi ei sin a ni a hun pe rawn ei tiu. Harsatna tam tak tuok hlak inla khom Pathien kuoma ei inhlan a, rimsikna le harsatna ei tuor muolsuo ngam chun aman mal ami sawm ding a nih. Hi hi ring nghet bur el ding anih. In thralai chanpui in harsatna tlawm ka tuok ve hai ka hung tar suok hin chona thar a pek ngei cheu ka beisei. Thingtlang khaw chite, tu chen khoma electric, tui connection le lamlien khoma a la hraw lo a inthokin, lien naw sien khom a hminga Officer ka ni thei chun, nangni ta ding lem chun a olsam taluo. In thei seng. Ei ram le hnam, mi hnung hnot mek le tlu se mehai indin thar nawk dingin Pathien le ei ramin nang le kei a mi ko mek a nih. THAW RO, INDIN THAR NAWK EI TIU. (Delhi, September 14, 2012)

Ziektu: Pu L.Keivom, Inpui.com Columnist

Mani doralah insiem loin, Mani rŭnah thal inlĕn loin.-Author

Delhi, September 14, 2012 Zirtawpni. Zing dar 5-a tho hlak kha sun dar 11-ah ka tho chauh a. Chu khom chu Lala Khobung-in Imphala inthokin a mi hung fawn leia tho chauh ka nih. Zanah Tv. Rothanglien Khawbung a hung lĕng a, a artikul ziek chu inpawl malamin kan thuol a, zan dar khatah kan thuol zo phuor hman a. Kei hi zâl inhnuin inhma lang khom, zal tawma lekha tiem hi makmawa ka nei a ni leiin, zing dar 2 chen Lala Khawbung lekhabu mi hung thon, Mizoram Leh Kei (2012) ti, Mizoram a Rajya Sabha MP hmasa tak R.Thanhlira ziek chu a tlangpui chauh ka bi thuok thuok a.

Lala Khobung le kan inbiek zoin, a lengna Dr. Chaltonlien Amaw ofis-a leng ve, Pherzawl lal ka pu Lalhmangpui leh an inbiek a, Pherzawl-ah Power Sub-Station sie dinga ruohmang a ni thu le bawzui a ni mĕk thu a mi hung hril a, lungril a sukhlim hle a. Chu ruol chun, “Pu Hmang, chuonga electric hmu ei phak ding a ni ta si chun Pherzawl khaw hlui le se vĕl, kha hmaa khawtlang rizap huom sung po bĕk kha loa văt le nei lo khap ta ro. Khaw hlui tlanga khan prawzek poimaw tak ei la’n din ding a na, kha taka inthok khan khawvel ei la rŭn ve ding a nih. Chu taka hmang ding chu hmun tin le ram tinah mi thiem sor tlak ding ei buotsai mĕk a nih” ka ta. Khaw hlui tlang chu văt le loa nei an lo khap tah thu a mi hril a. Hi thu hi Pherzawl khuo ka sir zăta ka thu incha mathlawn lo a ni a, an lo tah ri hang hrietin lung a suklawm èm ém.

Clash of fundamentalism

‘Breakfast’ pangngai fa dingin an hnu talaw ta a, lunch (sunbu) fakna dingin a la’n hma talaw bok si leiin, thingpui dawn a, Times of India newspaper tiem pumin kawlkai ka but a. Ka chanchin tiem laia ngaituona fa deuh chu ni thum liem tah, September 11-a Libya-a USA Ambassador Christopher Stevens that a ni thu le a bebawm chanchin hrang hrang chu a nih. Hi ni hi Muslim firfiek, Osama Bin Laden rawihai phier rŭka vuongna hmanga New York-a World Trade Center (Twin Towers) le Washington-a sipai hmunpui Pentagon an baw darna champha voi 11-na a nih.

Muslim khawvel, abikin Arab khawvelin tin le haa an do le khawvel map-a inthoka thai bo an nuom chu Israel Ram a nih. A mawi a mawi naw khom dawn loa Israel ram trantu le humtu chu USA a ni thung a, a thilthawtheina le thil neia Arab le Muslim ram hrang hranga thruoituhai zawr lungawi dan a thiem a. Chu chun, an hnam le an sakhuo tran dinga turuna uoiin-a an vai ruihai theida a’n kaitir naw thei naw a. Chuleiin, an sakhaw hmêlmaa an ngaihai chu hmangruo ieng khom hmanga sukchimit tum chu hieng mi turûhai sakhaw thar a nih. Chu le inzoma hi lekha ka ziek lai chena an siehre nuhnung tak chu Ambassador Stevens a nih. A san ei la hril pei ding a nih.

Muslim-hai hin an sakhuo hmusuoktu, zawlneia an ngai Mohammed (c.570-8 June 632) chu Mecca-a pieng le Medina-a kum 63 mi nia thi a nih. Hieng hmun poimawhai hi kum 1980-83 laia Saudi Arabiaa sin ka thaw lai kea ka sir ve vong a nih. Kum 40 vel a niin Muhammad chun thu a dong hlak a, chuonghai lak khawm a bua an siem chu Koran an ti a, a hnungzuituhai baibul a nih. A dam lai ngeiin, a zirtirna pom nawtuhai chu, abikin Juda mihai chu, thawluina hmangin ama rawiin an bei hlak a, chu chu ‘Jihad’ (indona thienghlim) ti a ni a, Judahai chungah a tran hmasa tak a nih. Nuhmei dorzon khat vel chauh a nei nia hril a na, amiruokchu a lim amanih a thlalak amanih siem le sie phal lo a nih. Chu chu Sinai tlanga Pathienin Mosie hmanga Dan (Thupek Sawm) laia pahnina “I ta dingin milim siem naw rawh….” kha kalin an hriet a nih. Muslim mi fir tam lemin thla lak dam hi nuom der lo an nih. Indian Revenue Service (IRS) a um laia kan bathmate pakhat chu Muslim, a hming Hassan a na, Group-a thla kan lak chang khom a thrang nuom naw hrim hrim.

Chuong ang chu Muslimhai turu dăn a ni leiin an zawlnei thla amanih tar le a hming sukhmelhem zawnga ngai thil thaw hrim hrim chu sukhlum an tum pei a nih. An sakhuo leia mi hringna lak hi tuolthatah an ngai nawh. Indona thienghlimah an ngai lem. Chuong thil leia an lo thi pal a ni khomin pielralah dairekin kai an ta, tui luong del delna huon mawi le inhoi, thei inhnik chi tinrêng umnaah nunghak thienglam 70-in chatuonin an enkol ding niin an inzirtir. Chuong chu a ni leiin, an sakhuo thi chil huom an tam. Iemani chena inthoka an ching chu paipuok paia mi thi chil dam hi a ni leiin khawvel an chokchawrawi nasa khop el. Ieng sakhuo khom ni sien, mani sakhuo chauh thra bika ngaina le sakhaw dang chu Setan pawla ngaina lungril an intuna taphotah sakhuoin a ngêk a hlaw naw thei nawh.

Innocence of Muslims

Ei thupuiah lut inla. Mi pakhat ‘Sam Bacile’ inti, a hming tak ruok chu Nakoula Bassely Nakoula nia an hril chu Aigupta rama inthokin Los Angeles (USA)-ah a’n pĕm a (Ama hi Coptic Christian a nih. Muslimhaiin Aigupta an lak hma 4-6 A D sung khan sakhaw pawl lien tak an ni a, tu ruok hin chu a ram pumah 10% vel chauh ni tain, Muslimhai hnawchêpna kara intar taka kum za tam khawsa tah an nih). Inruithei thil le inzomin lung inah thla 21 a’n tang a. Hi sung hin film-a siem dingin tienami a ziek a. Kum 2011 June-a a hung suok chun sum a zong khawm a, Juda hausa mi iemani zatin sum an pek a, chu chun mi 80 vel inchangna film a siem a.

Hi film hi an insuo hmasa tak chun Desert Warriors ti hmingin a hung suok a. Chu hnunga chun Innocence of Bin Laden ti hmingin a hung suok nawk a. Kum 2010-a World Trade Center an baw ni Champha September 11-a Muslimhai lekhabu Koran raw hlut hlut dinga inthritu Pastor Terry Jones (Gainesville, Florida) khan hi film hi nasa taka a lo inhnikpui le thrangpui leiin September 11, 2012 khan an nuom dân dăna hi film an siem danglam chu Innocence of Muslims ti hming chawiin an tlangzar nawk a, chu chu khawvel hmu thei dingin Youtube-ah sie bok a. Hi ni hin Pastor Jones chun mi fiel khawmin hi film hi a’n entir a, an en hmaa thu tlawmte a hrila chun hi film hi “International Judge Mohammad Day” a ti nghe nghe a nih.

Hi film hi Zawlnei Muhammad hming sukhem tumna lieu lieua siem nia ngaiin, nasa taka demin Aigupta, Yemen, Libya le Tunisia le ram dang dangah-ah mipuiin lam an hraw mup mup a, American Embassy an bei a. Libya-a lem chu Benghazi-a American Consulate chu Muslim firfiek pawlin rawket-in an kap sop vong a. US Consulate an kap ni hin Tripoli-a um an Ambassador Christopher Stevens-in a sir ni le film ei hril hi a rawihai le an en lai a nih. An hril dan chun Ambassador hin hi film hi a’n hnikpui a, mi threnkhatin fimkhur dinga thurawn an lo pek chu a poisa naw leiin, a fepuihai leh an thi pha tah vong a nih. Muslim firfiekhai chun an zawlnei deusawti siehre amanih hrè hmang hi rongbawlna insang taka an ngai a nih.

Siehrè

Hnukah intar âwk ăwka kawlkai lem thlaa hi thu ka tiem lai chun, Delhi Thurawn-a ding artikul ka la ziek naw thu ka hriet suok phut a. A hmaa ka lo ziek tran tah, ka la sunzom hman lo pahni pathum laia mi am sunzom ding, an naw leh a thar ziek ding ti ka’n ngaituo lai chun ka na-ah thu mal pakhat ‘SIEHRE’ ti hi a hung inlang tlat a, chu chu hi artikula hin voi hni zet ka hmang hman ta nghe nghe a nih.

Kum sawmli vel liem tah khan hi trongkam hi ei hung hmang tran dan ni thei awm ka sui rak ta a. A san chu trong hi a hmangtuhai khawsakna le an nun dan fie taka thlir theina darthlalang, hnam hlimthla a ni lei a nih. Mihriem tonhriet hi hriet le tiem thei dinga ei namkai theina dinga a negative chu thu mal a nih. Thu mal tin hung insiem hi ei hnam zierang a nih. Chu chu a hang indikzie chu ei thu mal chai lai ‘siehre’ ti hi hmangin hang hril fie tum ei tih.

‘Siehre’ ti hi thu mal pahnih- sie le hrè- keikopa thu mal pakhata siem, a siena ding taka thil sie thrat tina a nih. In inhnok nuoi el chu a siena ding taka sie lo amanih, a umna dinga um lo thil a tam tina a nih. Chuong hai chu a umna ding thlap thlapa ei sie pha chun ei ‘hrè’ fel a nih. In ei inthiel fai khom a nih. Sienkhom, in ‘hrè fel’ le ‘inthiel fai’ inang nawna chu, a hmasa hi a umna ding thlap thlapa thil sie a kawk a, a nuhnung ruok hin chu ina thil um, trangkai lo, hmun hluo po po kha ei thak hmang ti a kawk deu bik. Ka pindana ka lekhabuhai hre feltu chun indar nuoia um kha a umna ding sengah siein rem fel a ta; ka lekhabuhai inthieltu chun a lak hmang amanih hrè hmang vong khom a ni thei, a thaw khah lekhabu inthiel a ni tlat a. Hmunhnok inthieltu chun a lak khawm a, a dehawnna dingah a peihawn hlak.

A umzie pahnina hi ‘Siehre-2’ ti zawngin hril inla, ei thu chai tak hi a thlier inhoi a tih. Chu chu, ‘siehre’ umzie pahnina, ei artikula ei thu fŭntu a nih. A umzie chu ‘that, sukhlum, sukbohmang’ tina a nih. Thil thraa ei hriet thaw tumin pawl ei indin a, ei kalchawina sukhrattu neka sukbahlatu, lam suktluongtu ni nêka dâltu an um pha leh inthiel an ngai a, “Ama hi siehrè ding a nih” amanih “Ama hi hrè thrat ding a nih” ei ti chun, kha mi kha that dingin thutlukna ei siem tah tina a nih. “Ama hi inthiel a ngai” ei ti chun ei that amanih, a ngirhmuna inthoka ei pei ding thu ei hril a nih. Thanga’n a thuomhnaw lo ‘siehrè’ dinga a hril le a nuhmei lo siehrè dinga a hril chun a hmasa hi siehre-1 a na, a nuhnung hi siehre-2, sim le hmar anga indanglam a nih.

Siehrè-2 ei hung hmang tranna nia ka hriet chu kum 1960 kha a nih. Hi kum February-August sung khan unau hmelhai thawin Hmar le Kuki inkarah buoina a suok a, mi iemani zatin hringna an chàn pha a. Khang chen pansak panthlanga lo cheng tlang le innei pol, zan khat thilthua kèl le berama hang inthre le inen ringot el kha chu thil harsa a lo ni a. A khing tieng a khing tienga a chongpu chan chang theihai lem kha chu a tu tieng tieng ringhla an hung kai naw thei naw a. Hi boruok lêng vêl kara hin ‘hi nu/ hi pa hi hrè thrat amanih siehrè ding a nih’ ti ri a hung inri nok nok el ta a. Sienkhom, a taka insiehrè thu chu hril ding a vang. Kum 1966-1986 inkar khan Mizo National Front-in insiehre an thaw nasa a, anni MNF sunga mi ti lo, an khingpuia an ngai Mizo Union mi le sa an siehrè ringot khom mi 400 chuong ni dingin thil suituhai chun an ring.

Hmar hnam bing sunga insiehre pawlisi hmang nasa tak chu HPC a nih. Ei pawlitisianhai laia hrohrâng le huhăng na tak Ngurdinglien Sanate-a inthoka tranin mi fel tlawmte ei nei laia mi iemani zat an mi siehrepek a, tu chen hin thruoitu mumal nei loin, van tawk lo, hnuoi tawk loah an mi’n lengtir a, an pawlisi bawzui po po laia tluong tak le thrahnemngai taka an la bawzui ngar ngar chu mani insiehre sin hi a nih. Thuthang inleng ka lo dong danin, HPC (D) a Lalhmingthang pawl intiin siehre dinga SIPHRO Chairman an vauh thu a nih. Iem a san? Hmar Inpui chun Hmar Biel le a se vel, abikin Tamenglong Biel-a thautui zong pawl hmalakna (oil exploration and prospecting) chu a rama chenghai rawn loa iengkhom thaw lo dinga norna sin chu SIPHRO kutah an pek a, chuong ang dungzui chun Chairman-in inhrilhrietna sin chu a bawzui a, chu chu hun la hung um peia hnam damna lampui nia ngai le hriet a nih. Threnkhat chun, HPC (D) Lalhmingthang pawlhaiin hieng ang thil inzakum an thaw hih thautui zonghai hin an lo suklawm tah lei niin a nih. Ram le hnam an mi zorna man hi a tlawm sawt nuom awm khop el.

Kaina khan a unaupa Abel kha a lo siehrè ringot el a. Sienkhom, Iengkim hretu hmaah thup thei a ni si naw leiin a chunga trongsie a tlung nghal a, a umna rama inthokin hnot suokin a um bok a. Unau siehre hi Pathien hmelmaa chop le chila insiemna a ni leiin, a hmaah hmaiman ei nuom chun băn vat chi a nih. (September 14, 2012 Delhi)

Zieku: Dr. John H. Pulamte

Pu RH Hminglien ti ang deuin kei khom HYG-a ka mail po po hi tiemna hman le hun ka nei nawh a; inhman hun remchanga tiem ding tiin ‘delete’ loin ka sie peia chu ‘inhman’ hun tak tak a la um naw lei mani ding ka la tiem lo mail chu ka inbox-ah a sang tel a um tah.

Mizoram HSA thu insuo a khan a hranpa lieua ka hming sam a ni bakah a hnungah hril neuh neuh a umpeikha inhoinaw tina rieu ka nei a. An thu phorsuok tamlem kha GHQ President mawphurna ka chel laia tlung a ni a. Khanga ziek meuh-a sie a ni ta si lei khan a hnung peia ding khomin mi ngaiven le hril khom a la ni el thei leiin zuk tosan el ka tuma chu ka ngaimaw zuol point threnkhat khat hrilfiena bakah ka mimal ngaidan suklang trulin ka hriet leiin vaihnu ramah hieng ang hin ka hung siem a nih. Hi bak hi chu hi thu le inzom hin ngaidan siema hrilfie trulin ka hriet tan aw bakahkannuom tan aw bok.

MHSA THU INSUO
HPC Election 2009

Kum 2009-a HPC Party Election kha HSA GHQ thruoituhai zing tho hnang thut laia an bei thut an nawh a; Hmar hnam pumpui hmakhuo ngaina leia Hmar Inpui, le HYA GHQ thruoituhai le fumfetaka inrawnkhawm a ni hnunga kan invirpui a nih. Dik char chun kha hmalak hma le lak mek lai khan tuta Mizoram CM, Lal Thanhawla ngei khom inbiekpui a nia; mipui thlang HPC President chu a sorkar khawma a hrietpui (recognised) ding thu a hril a, ‘thu intiem’ chen khom a nei a nih. Mizorama Hmar thruoitu threnkhat in a chang po le ‘state puo tienghai’ ti thumal/trongkam an hmang vet hi chu an ngirhmun derthawng deua inhrietna rieu an nei lei le hmasiel lei a ni el thei. Mizoram-a Hmar issue leia hriem le hrei chelek lai le a hnung peia ei chakkhai lakna le inbengbelna tak chu Manipur le Assam a nia; a thi le hliem bakah tu chena in kongkawpui khom Mizoram puo tieng an la tam hle. Hienga ‘state puo tieng mi’ ti thumal hmangtu hai tamtak chu ‘state puo tieng’ anthoka lut ve tho an ni nawk angreng a nih. Ei inthrangpui tuona a ni leiin soisel le hrilmawi rak khom a trul chuong nawh.

Fimkhur thilthuah le ‘free & fair’ kengkaw tumna luot leiin khang hun laia Aizawl le Sinlung Hills JHQ thruoituhai chu kha inthlangna le inzawma thu po po inhriettir an ni naw bakah HSA hming taka hmalak a ni naw lei khan official takin ‘information’ pek an ni nawh a; inhnamhnoi tir an ni naw bok. Inthlang result puonglang zo hnunga ‘inthlang dan kalhmang le thu ramtin’, a thedartu hming inzieklo lekha khom HSA Aizawl hming angdeua thedar a ni kha thilmak a ni nawh; football ei peta ei hratnaw chun ‘umpire-in tranbik a nei’ dam ei ti hlak reng annawm. Kha election neka fumfe le ‘fair’ kha midangin an huoihot thei chun HI,HYA,HSA a lawmnaw an um ka ring nawh. Lekha khom kha inthlangnaa thling naw lempa kha lo thling lem nisien chu thedar a ni da’l thei bok. ‘A hnungah HSA thruoitu han harsatna an tuok’ na san tak ruok kha chu ‘thruoitu inti’ pakhatin ama mimal ngairuotna le thu khel muhlum hmanga FIR a thelut lei an naw maw? Aizawl JHQ in kha buoina kha in lo chingfela, lawm a um. Anachu, mimal thil leia buoi a ni nawh a; buoina chingfel khawm kha pawl thil lei a nih. Hahipa hril chi rak khom a ni mani ie?

MZP election, Blah! Blah! Blah!
MZP election thu in hmun le point tamtak a hluo anthok hin ngaituo sap ding tamtak a um. MZP Headquarters inthlang chu MLA inthlanghai ang em em a ni nawa chu a ‘stake’ le sum ‘involve’ ansang leiin ‘voter’ an hlu hlea, vote nei nuom an tam bok. Mizoramah Aizawl Joint Headquarters chauh a um lai khan chu MZP election-a HSA aia vote thlak ding inruotna le candidate (line-up) inthloppui ding thlangna kongah buoina a um nawh. An dik. Sinlung Hills Joint Headquarters a hung um ve ta si khan chu HSA hminga ‘vote’ 20 ei nei hlak kha Sinlung Joint Headquarters thruoituhai khawma iemanitawk nei ve phu (deserve)-a an inngai leiin GHQ an inpun a; chuong ang tak chun GHQ in vote ‘chuzat-khazat chang ve hai sien’ tiin a threthrawp a ni kha teh! Election-a mimal or GHQ, JHQ inrol le inrol naw thu le support le support naw thu an nawh! A hnunga Kollasib JHQ a hung pieng nawk a, an chan ding siem vepeia ngai bok. MZP election nei ni le hun, credential card nei le nei lo thulai vel khan an naw maw, phone hmanga ‘independent’ inpuongna thu chen suok kha! Ka hril seipeinawh. A nep kuoi top!

Tribal Hostel Lungphum le HSA Council
HSA hi a pawl hminga poisa umsa umlo, thruoituhaiin mani fak sik le pocket money hmanga maimarawna ei kei hring trawk trawk mei mei a nih. Ti tak ema chu, kum 2003 anthawka GHQ hminga poisa ei hmu le hmang a tamlem chu hotupa Joseph R. Hmar leh ATSUM tieng rawlkanlo nei lai a ni bawka, thieng le thienglo karakanhmusuok hai an nawm!Kaninzin le fekuolnaakansumsenghai hi pawl poisa a ni ngai nawh. Nei chang a uma chu kutbenthek chang a tam el. ‘Biek hmanloa Imphal tieng lo fehmang deih’ hang inti chie kha chu anhoi naw thret. State pakhat-a Joint Headquarters pathum hotu bakah, GHQ Finance Secretary rawia ram hlatak a pawlpuia inzin suok ding chun Aizawl khawpui a bek khom hang inmaikuol inla chu in hnawng dap ding vei leh! Ei mipuihai harsatna chu a ‘entuhai’ khom an enhai angthoin an lo harsa hle a ni chu tie maw!

HSA Campus-a Tribal Hostel bawlna leia HSA le Hmar Art & Cultural Society thu buoi nuoia in hung phor lang ruok kha chu a thuphung in hrietnaw zie in suklang bakah chierna ding zong hrim hrim hai thusuok a hoi ka ti lem. Chieng keng kongin a bul athawka thu hretu Pu Zothanglur Sanate khawma a hung hilfie ta leiin hrilsei ta da’l ka tih. A thaw thei haiin thaw hai sien; a soisel pawlhaiin lo soisel zing bok hai sien! In thu hung thursuok ruok hi chu nangni leh inzawlna a um tlawm. HSA issue chie khom a ni naw bok.

Point No. 9-a “HSA, Jt Hqrs Aizawl inthawka Jt Hqrs Sinlung Hills le Kolasib a hung pieng hi rorel inkhaidiet dan umzie nei nisienla chu a that nawna bek bek umin an lang nawha, thei nisienla lem chu tuta Jt Hqrs Sinlung Hills khawm hi infepawna harsatna leiin Suangpuilawn le Khawlian tlangdung hi Jt Hqrs/Sub Hqrs hrana sie ni sien, Jt Hqrs Kolasib hin Unit awp ding nei mumal lova a um nekin Vairengte tlangdung po awp sien, Vairengte a ei mitha hai le Kolasib a ei mitha hai thawktlangin hrat taka an fe thei ngei ringaum. Tlangdung khat nisi Jt Hqrs hran ve ve an ni leia thawk tlang harsatna an nei hun a la um ding a nih” tia thurawn in hung pek ruok hi chu za-ah za (hundred percent) ka thlop. Ei tonhriet hai anthawka insiemthrat pei hi mihriem pangngai thaw ding reng a na; ‘hi hi chu ei pi le puhai, ei mithiem hmasahai lo thawdan le fepui dan a na, sukdanglam a thra nawh’ ti vel hi chu thil a khawnghat hla naw tlak. In thurawn le rotna ang hi zawm thei inla chu, Aizawl JHQ hi Shillong, Guwahati, Delhi le a danga hai angin ‘khawpui joint headquarters’ ni veng a ta; thruoitu haiin college le university-a eini mi an pung theina dingin admission hun anthok lo invirpuina hun nei pha ngei an tih. An activities nei hran hranhai bakah, mi tharhai inhmelhrietna le lawmlutna malamin kumtin ‘Conference’ nei ve hlak an ta. Chuongchun, HSA ngirna san le thiltum poimaw, INCHUKNA tieng ei hnamin hma a sawn pha lem ngei ka beisei. Sawl lem chu sawl deu an tih.

A thlangpuiin
In thu phorsuok threnkhat kha chu a nep kuoi top. A muk naw taluo! Sakawrdai Assembly 2011 khan, ‘State pakhata Joint Headquarters pathum neka tamlem umna haia hin a enkawltu ding Vice President ruot sien’ ti kha sukpuithling loin Manipur, Assam le Mizoram haia dingin ‘Joint Secretary’ ding ruok chu an ruot a; A san bo a ni chu ring a um nawh. HSA-a thruoitu hai designation le mawphurna chu a hmun le hun izir peia ei inruot a na; constitution hrietpui le hrietpui naw chu ei uksak bek am a ni ie? Evangelism Secretary nei khom ei annawm. ‘Mizoram State ah Joint Headquarters pathum neka tam a um nawh’ in ti hi andik a chu ‘a neka tlawm lem a um bik naw bok’. 3 (pathum) char a um lei ruot thei le ruot naw thei a ni chu teh! An inruotpa kha in ti zawng a ni mang nawa mani?

Tu tak hin HSA GHQ President le General Secretary bakah Public Relation Secretary le Jt. Secretary pakhat Aizawlah an um a; ei hmu ‘headquarter’ vieu – Rengkai, Churachandpur-ah ruok chu Vice President le ni khat laia ruot thar Secretary pakhat chauh an um. Aizawl hi tulaia ei ‘General Headquarters’ ti thei hiel an ni lai taka, ‘independent’ in inpuong el hin ngaituo a suksei pha. Mipui (Assembly) thlang, President le GS hai hi an sin le inzom (posting) a um mei mei an ni leiin ‘khuo-le-tui nina’ ei pek thei naw lei dam hi a lo ni el rawi maw! Annaw leh, anni haiin Aizawl an hung dellei hin mi threnkhat ngirhmun a suk derthawng am an ta ding maw! 2005-2011 sung Aizawlah GHQ Finance Secretary chauh a um lai khan chu buoina a um nawh. 2012-2016 sunga GHQ President dinga Aizawl-haiin nasataka in campaign pui kha hlawthling sien chu tuta ei buoina hai po po hi um a ti, ti hi zawna poimaw le khirkhan tak a ni thei ta tlat!     

HSA Aizawl Joint Headquarters thupui angrenga in inthlang thua, ka hming insuot chie kha chu a tir chun nuizat tieng a fea chu a hnung peiah threnkhatin an la hung belsa nawk pei khan chu lungsen tieng a fe met a. Voikhat tak lem khan chu ‘legal notice’ le ‘defamation case’ chen dam ka lungrilah a hung um pha. Ka nui an za nawh!

A MEITEHEM THRENKHAT
Ka kum a la tam nawa chu HSA GHQ a hin Inchuklai Nun Board Member a tranin Committee Member, I & P Secretary, GS, VP ni tung peiin 2004 anthok 2011 chen President mawphurna ka lo chel bok. Tu chena HSA-a la ‘active’ zing ka neka senior lem chu Assembly Speaker hlui le tuta Adviser, Pu Zothanglur Sanate chauh hi ni mei tang a tih. Sienkhom, kei chu inzom zata um ka nih.Chusung chun HYA Tuithaphai Joint Headquarters Secretary term khat le ATSUM President kum 6 sung ka chel bok. HYA-a ka um lai, 1993 khan Muolvaiphei-ah Inkhawmpuikanbuotsaia; kha lai hun tak kha HPC boruok thrat lai tak kha a na; Hnam Inkhawmpui e ti lo chun, Kohran revival lai ang elin hnam hla sakin nuhmei-pasal, a tar-a-zur an lam dup dup el chu a ni kha tie! Khawsawt a um ang renga chu tuta ei boruok le hang tephme chun inzak a um cher cher ta ngei!

HSA-a ka umsawt ta ang huin hnam le pawl ta dinga ka thaw thrat le thaw suok ruok chu hril ding meuh ka nei nawh. Thi-le-thau senga, thieng le thieng naw karah HSA Campus, Rengkai, CCPur-a marketing complex kan suolsuok le chu hmun bawka tribal hostel complex bawl meka um hlak hi ‘ka thaw’ ti theina ka nei bik nawh. Ka hun, ngaituona, sum-le-pai le tha-lezung seng zat seng ruok chu an tam bik rak ka ring nawh. Kawng keiphit rakin program General Assembly voi 3 – Hmarkhawlien (2005), Vairengte (2007), Parbung (2009) le Sakawrdai (2011) bakah siel 2 le ran ang iemanizat thata ruoi ropui threin 2005 khan Senvon Zopui Tlangah Sikpui Ruoi kan huoihot a chu ‘HSA a la thi nawh’ ti suklang a ni bak chu a hlawk phana taluo ka hmu nawh. Soisel nuomtuhai bau thruona takin ka um pha.

Sienkhom, “hlawsama hnam rong lo bawl khom chu bawl lo hlol nek chun a thra lem annawm; hlawthling taka hnam rong la hung bawl ding thrangthar ka hnungah an la hung um ngei ding a nih” ti thu hikan nghatna a ni rop hlak. Hma dom ding le thaw ding tamtak la um sien khom, mi ang angin ‘inkhat pa’ ei lo ni ve tring treng ta bakah boruok le tuisik chauh ringa dam ei ni bik naw bakah mithar le rawl thar hai inken hun nia ka hriet ta leiin Sakawrdai Inkhawmpui, 2011 khan President mawphurna chu midang kan hlan sawng ta a nih. Assembly Speaker mawphurna pek ka la ni tho thoa chu a dan a dang tah. Thruoitu ninatak chel ta naw lang khom ka hnung chara hunghai hi ka ruolthra hai vong anni bakah thrangkhat deuthaw ei lo invetpui ta chu voilekhata zuk thlathlam dan a um nawh. Kong iengkima lan rawitu, thusie-hlasie la phan vongtua mi ngai pawl an lo um pal khomin theida zawnga lak ka tum nawh. Tuta JHQ le GHQ-a thruoitu threnkhat a hnung meta hnam thruoitu dinga ditum le thra mi iemanizat ka hmua, lawmum ka tiin tha an suk fan khop el!

HSA thruoitu anga Aizawl ka sir hmasatakna chu GS ka ni lai, 1999-a Sakawrdaia Inkhawmpui um trum kha a nih. Kha huna ka thuhril kha ka lekhahlui sienadap lang chu a copy ka la hmudok el thei. Chutaka inthawka tuchena Aizawl khawpuia HSA thruoitu poimaw zuol hai chu inthloppui le inpawlpui naw ram ka nei nawh. Kha hun sung po khan, in tum suokna le tumna thu tiengpang hril le rot thu ka nakawra a lut lai awm ka hriet nawh. HSA hi Mizorama in register a ni khan, ‘sorkar ti dan/dit dan ang taka MHSA hi hmang a nih’ ti thu hi ka soisel nawh a; a buoipuitu hai ti dan le dit dan char a ni le ninaw thu tuta a thara indon thrat nawk chu inremna siemtuhai thaw ding chi a ni ka ring nawh. Registration buoipuituhai khan Mizorama HSA chu Assam, Manipur le hmun danga HSA hai le ‘parallel’ anga uma, inkhaina bik neiloa le a hranpa lieua anni le anni inthruoi chu a pawl hminga ‘HSA’ an hmang bakah ‘Aizawl JHQ intia General Headquarters program le inkhawmpuihaia active taka an thrang hlak anthok khan an lungrila um hmasatak tak chu nisien a hoi nawh. Chu zar peiah chun Unit, Branch, Joint Headquarters hai le General Heaquarters chenin ngampa takin Letter Head-haiah Assam, Manipur le Mizoram-a ei registration numberhai ei inchuon ve tah pei a nih.

Kum 2012 bul tieng anthok, HSA Aizawl Joint Headquarters (anga ngai) chun ‘MHSA Headquarters, Aizawl’ tiin uolau takin an hung inpuong hi a puo tieng anthoka lo thlirtuhai ta ding chun iengrak a kawk nawh a chu a sunga um le thil chinchang hrehai chu a barakhaih chieng a nih. A san iem ei ti chun, Hmarkhawlien Inkhawmpui (Dec. 15, 2005) Resolution No. 1 en a ngai. Hieng ang hin ziek a nih: “Aizawl Jt. headquarters hi Mizoram Headquarters ni lem dinga ‘agenda’ hung lut hi nguntaka ngaituo a ni a. ‘Mizoram Headquarters’ ni lovin HSA hmasawn lemna le hrat lemna ding a ni beiseina leiin Mizorama hin Aizawl Jt. Headqurers bakah Sinlung Hills Jt. Headquarters indin sa ni lem sien thra kan tih”. Vairengte Inkhawmpui (2007) khan hi thu hi hrillang a ni nawa; Parbung Inkhawmpui (2009) khan Kollasib Jint Headquarters (a thua) pom a nih. Sakawrdai Inkhawmpuia Aizawl Jt. Headquarters agenda 4 (pali) laia a pahnina a chu, “H.S.A Constitution a hin Special Provision siem nisien, chutaka chun – Mizoram pum awp dingin H.S.A Joint Hqrs Aizawl hi H.S.A Gen Hqrs hnuoiah Mizoram H.S.A Headquarter, Aizawl tia sie nisien” ti a ni nawk a. Hi agenda hi ‘letter head’ chieng keng konga, “HMAR STUDENTS’ ASSOCIATION, JOINT HEADQUARTERS; AIZAWL” tia inziekna le letter reference number a khom, “No. HSA. JT.HQ.AZL/A-08/2011; Dt 14.11.2011” inziekna ngata President le (General) Secretary hai hminga peklut a nih. HSA Aizawl JHQ Letter Head a hin Branch/JHQ danghai le GHQ letter head ang thoin, Mizoram, Manipur le Assam-a HSA Registration numberhai tarlang a ni bakah HSA motto- Sinin, Sanin, Hrilin, Thuoiin, Serve the Nation” a chuong ve. Thrahnemngaina ansang deu khom ning a ta, Mizoram map Hmarthangsuopuona chei chungah HSA logo le (Mizorama HSA kum 25 champha tarlangna niawmtakin) ‘25 years – 1986 – 2011’ ti a chuongsa bok.

Aizawl agenda hi Assembly Speaker khawma ngaipoimaw takin hriltlangna ding hun awmtawktak a hong a. Sienkhom, zuk remti bur dingin a thu hi ‘Constitution tawk’ a nia; anni (Aizawl) agenda dang (No. 4) ah “Inawpdan Bu (Constitution 2007) Amend ni raw seh” ti a uma; siemthrat dinga an ti lai Article No. 12, 13 le 14 bakah 28 an tarlang nghe nghe.Biel dang anthok khoma Constitution siemthrat (amend) dinga rotna a um bok leiin ‘special provision’ thu hi hnawlbur ni lovin Constitution ennon (siemthrat) hmasataka ngai poimaw dinga inchik (note) a nih.

Mithi pur doa lusun beidong puma lo theilo thil leia nei hram, Hmarkhawlien-a April 21, 2012 Executive Council resolution No. 4-na chun, HSA Aizawl Joint Headquarters hai hming an inziek dan hi a san, an harsatna le ngirhmun anni ngeia inhrilfie dingin’ a phut a. Phut anni angin May 22, 2012 in chieng kel kola donna point 2 chauh-in a hunga, a thutawpna tieng chun, “khawvel huopa Hmar ta dinga thawktlang le inrawntuo pei hi kan nuom a, hmatieng peia inlaichinna thalem le inpawna tha um pei sien kan nuom takzet” ti a thrangsaa, an letter head khom a dang zat tah. Executive Council thuthluk bawzui le a tawp tlungpui chu CEC mawphurna a ni leiin July 28, 2012 thuthlukna kha a um pha a hoi. The rest is now History!

In theidana le inhnuoisiena tieng ka lungrila um thrak loa Aizawla HSA chauh nilo, Hmar ngirhmun ka hrilnaa thutak le fiemthua kan thloppui zing zing le ka iringzo le ngainat hai trongkam ka hrilsawng kha anni mi 2/3 hai laia mi a tutak in amani na a lo tia, poi mi tipui an um chun annihai chungah chun ngaidamkanhni a; ka thuziek le hrilna san a bul le bal hre loa, a selpawtok zawnga laa mi diriemhai chungah ruok chu hril ding dang ka nei hran nawh. Mihriem a tunga lawn tukhom ‘perfect’ ei um nawh; ka nungchang le khawsakdan, ka thuziek le trongkam hmanghai khom a lawmtu le lawmnawtu an um ding zie chukanphat nawh. Hmar hawrop thra ka ti zawnga ka ziek leia hnam thruoitu ni thlakloa mi ngaitu le chu kher kher chu Aizawla HSA thruoituhai nuor-phengna thu le keimattuhai lem chu ‘ka don naw el a nih’. Buoipui ding dang ka hauh!

Ieng po khom hril inla, ei buoina hi ‘conflict of interest’ le ‘ego or super ego’ a umzie chu ka pom ve khop el.Chukhelah chun, ‘crux of the issue’ khom ringvang thu hril ding chun point 4/5 vel hre ve mei ka tih. Sienkhom, chu chu tu hi a hril an hun ta nawh.

HSA hi kum iemanizat liemtah lai khan chu, ‘ka ui ka ar’ ti um ta loa, a ri a re riei riei deu taa ei ngai lain tulai hnaia inpakna thu le soiselna thu ei hrila a hming ei lam ringot khom hi ‘positive development’ niin kei chun ka ngai. ‘Constructive criticism’ a um ang bokin ‘destructive criticism’ ruok chu a um. Trongbaua hmangai le zieka invoitu nekin lungril le titakzeta hnam le Pathien ram hmangaina thranga hmangai le invoitu ei tam lem pha lem chu ropui hleng ei tih. A ni naw ruok chun tuta inthawka thrang khat a liem pha chu a hming hrie le sam hlak um ta meu nawng ei tih.

Ei hnam nunphung le sakhuona thu le inzawma ngaidan rorum le turu deu deu nei eini laia a thri be phak china ei ngaihai lai ei la um hi a poi a nih. Ei pi le puhai nungchang le khawsakdan le an Sikpui le Khuonglawmhai chen hmu khawhria, chuong le inzawma activity hrim hrim setan thilthawa ngai pawl kohran rongbawltuhai le lukhaitu ‘council member’ chen kai phak lai ei la um khom hi a poi bok. Zopui tlanga HSA in Sikpui Ruoi a huoihot leia a kum nawk Meitei helpawl hai kut ei nunghak le nuhmeihaiin an tuor a nih ti pawl ei um khom hi a zienaw bok. Ei sakhuo hlui zui laia ei sulhnung tlawmte um laia ‘Zopui Tlanga’ Sikpui Lung, a khup zawnga um kha inletthal leia Pathien kuoma suol thupha chawi anga inngaia thlarau suol hnothmang anga inngai ei um tlat bok. Khanga ei thaw lei khan thlarau ramah ei hma ei sawn pha sot am, ei ram le hnam lai hlemhleina le suolna tum tumhai a bo pha sot am, tihai hi ngaituo tham a nih. Suol tinreng bul anga ei ngai ‘zet-u-zu’ khom hi ei doa ei ditnaw vieu lai talent sukpungna dinga vok vai pawl threnkhat chun zu suongtuhaiin zu an suong naw chun an vokbu ding an harsat pha leiin poi an ti vieu hlak. Titak ema chu kohran le thralai inkhawmpui a khom zu dawn pawl le thimtham hnuoia arasi lo tiem pawl an bang bik lem. Khrismas le Kum Thar lawm lai lem chu tlawma hmuom lum sakhai umlo chun ruoi ei kil theinaw a ni deu tak ta nawm a nih!

HSA hin kum 75 hmel a hmu hnai thuok tah a; fumfe taka inop dan (constitution) ei neina khom kum 50 a chuong dei tah. 2005 Hmarkhawlien Inkhawmpui khan HSA Constitution a renga ‘review’ rot a ni a. Review Committee member haiin kumpui linglet an buoipuia, draft entlang dinga ‘Special Assembly’ nei hiel a ni hnungin Vairengte Inkhawmpui (2007) khan Constitution (thar) chu hmang nghal dinga pom a nih. Ngaidan thar le ditdan thar a thua a suok kuma inthlang (2005) khan Assembly palaihai chun GHQ thruoitu dingin state le bieldang danga mi an mi thlang deu thrut el a; a tirin thil ni thei lo dinga inlang kha, ‘a lo inthawchi lem awm hi tie’ ti a ni lem tah. A san chu, hienga GHQ thruoitu biel/state dang danga mihai hin mani umna JHQ/Branch hai seng en enkai pui thei bakah inlaichinna a siemthra lem theia, a hmaa GHQ ti le ‘Rengkai, Churachandpur’ ei ngaibelna kha a bo duok a. Head Office um sien khom, General Headquarters bik a um ta nawh.

‘Decentralisation of Power’ le ‘federalism’ ti tiengpang hibielle state tum tuma thredar Hmar sunga pawlhai inthruoidan leh an hmetkop thei ding am ti hi ensin mek a nih. GHQ thruoituhai hi umna le khawsakna inkarkik hle sien khom, tulai chu infepawna le inbiekpawna a thra ta tho leiin a lo inthawthei tho a nih. Nakie lem chu ‘video conference’ ti ang chi khom ei la hmang el thei a nih. Tuhin chu HSA Joint Headquarters hai power le thuneina hi General Headquarters thluk char ang tho ni tain GHQ chu ‘monitoring cell’ ang chauh a hung ni ta pei a nih.

Pathien le ditsaktuhai zarin Hmar Students’ Education Fund (HSEF) buotsaia um chu tuhin a taka hmu theiin a hung um tran mek a; Fund Capital anthoka interest in tukum 2012 sunga dingin October 3, 2012-a Barak Valley Joint Headquarters-in ‘Zarzolien Memorial Award’ an peksuokna ding le October 26, 2012-a NC Hills & Karbi Anglong JHQ-in Career Guidance Program an huoihotna dingin Rs. 20,000/- ve ve a peksuok thei a nih. Kum 2012 sung hin capital fund Rs. 5 lakh bek neia 2013 sung ngei JHQ le Branch threnkhata ‘academic program’ (Coaching Class, Career Guidance Program, Seminar, etc) hoihotnaa hmang dingin Rs. 1 lakh bek peksuok dan ding a ngaituo mek bok.

HSA ‘constitution thar’ a hin a hmaa GHQ inkhawm (committee), ‘executive committee’ ti hlak kha ‘Central Executive Committee’ tia thlengin Joint Headquarters le Branch inkhawm chu ‘Executive Committee’ a ti lem tah a; a hmaa JHQ Secretary khom kha GHQ-a inkona ang charin ‘General Secretary’ tiin a ko ve tah a nih. A hmaa GHQ thruoituhai, Tuithraphai laia mi common room pakhata intep ngawia committee neia hnam pumpui huop ropui an rel hlak kha tuhin chu OB, Secretary, CEC member, hmun le biel dang dang athawka hung khawmin ro an rel tah lem a; chu khelah Constitution-in a hrillang angin Executive Council inkhawm, CEC member le JHQ le Branch tina President le GS hai thrangin khom kum khatah voi 3 bek nei a la ni thei pei a nih.

HSA GHQ-a ka um sung khan Branch/Block 5 hai chu Joint Headquarters status-a hlangkai an nih a; a biela umhaiin hra hnia an hni bok leiin Joint Headquarters thar pahni hong a ni bok. Tu theida lo dingin hienghai lai hin Delhi le Guwahati ti naw chu a hma neka an zuk inthrang duokna hmu le hriet a ni meuh nawh. General Assembly palaihai hin fim taka thu ngaituo set set loin ei lunginnona’n a mi thruoi deu hlak am a ni ding, ti thei a nih. Hming ropui le lien ei nei lei ringot hin ei thilthawin a hril si naw chun iengtina khom ei lo ni chong naw khop el!

HSA chauh ni lovin ei hnam sunga pawl (kohran tiem sain) hran hranhaiin ei trangkaipui le ei chawisang, a sawt a seia ei la sietpui ding chu ‘hmangaitu der, neithangzai’ hai hi a la ni el thei a nih. Poisa sum hi kong tinrenga dingin a poimawa, pawl thila ding lem chun a poimaw zuol a nih. Sienkhom, Officer, Businessmen le Politician, sum le paia pawl le kohrana an trangkai ti lei ela ei sie poimaw taluo ta hi ei insirna hmakhuo la ni mei a tih.Chuneka poi thei nawkzuol chu anni hai hin sum le paia pawl le kohran an thrangpui rawn hlak lei ela ro iengkima an inrol tum pha a nih. Sorkar thoktu, an hlaw hmunaa ringum taka sin thawa rong bawl tum loa kohran sina inhmang vieuhai hi sawtnawte miin hlutsak vieuhai sienkhom an dai sawt naw nuom vieu. Kohran ro le ranga an inrol rawn taluo pha ‘full time’ rongbawltu an pastor le reverend-hai an hmusit nuom vieu hlak bok. Kohrana department threnkhat – social front, education, buildings haia ‘laymem’ an um hi chu a zie a la uma, a poimaw le inril zuol – Ramthar/Ramthim, Missions, Evangelism hai hi chu full time worker-hai ngaituo le buoipui ding bikah sie awm a ni vei le, sorkar thoktu le laymen hai an hang umduot hi chu a mak angreng ngei. Government gazetted officer hai sawmapakhat zat khom inhlawtir zo lo ei Pastor le missionary hai hlak hi ‘full time’ takmeua rong bawl dingin ei phut a; ei fak ang fa le ei dawn ang dawn an ni ti hrezingin poisa sum lamsuokna dinga huon le lo chite an nei vea, ran pakhat/pahni an vai le hlak an hnungtieng ei demzui nawk angreng si.

Hmar kohran tinhai hi nakie chu ei ‘layman’ hai ku hin an mi la thruoisuol lem thei tlat a nih. Kei ka ngaidan chun kohran-a inhnika rorelna iengkima inrol nuom chu pa deu taka an sin anthok inbana full time-a lut top el ding annawm! Ei hnama pawl le kohran hai hin adviser nei ei thiem naw ang bokin adviser hai khawma adviser ni an thiem nawh. Adviser ni sia agenda putluta hril lut nghal tum pawl ei bang naw bok. Ka sabjek tak nilo ka zuk hril sei duot tah chu. Hun ta raw seh! STOP

Compiled by Pu Timothy Z.Zote, Date 12/9/2012

Hmar Inpui Hqrs. ( Hmar Supreme House)
( 2009 – 2012)
President : Pu Lalawilien Amo, Jiribam
Vice President : Pu Joseph D. Hmar, Saikawt
Gen. Secretary : Pu Lalthalien (Risigned), Pu F.. Doliensung, Sielmat
Jt. Secreatary ,Tuithaphai : Pu F. Doliensung, Sielmat
Jt. Secretary , Hmare Biel: Thangkhumlien
Jt. Secretary, Cachar : Pu L. Thanmawi Pamjamte
Jt. Secretary, N.C. Hills : Pu Lalchawisang
Finance Secreatary : Pu K. Lienzathang, Rengkai
Treasurer : H.Zaneisang

HYA Hqrs. Leaders (2010 – 2013)
President : Pu Zothanmawia, Lamka
Vice President : Pu Ramthanglien,Rengkai
Secretary : Pu Lalthangkima F. Tusing,Lamka
Assistant Secreatry : Pu Lalsanhim Sanate, Rengkai
Finance Secretary : Upa Laltlanmawi F. Tusing, Saikawt
Treasurer : Pu Thangchuoilo, Rengkai
Games and sports Secretary : Tv. Thankhum
Information Secretary : Pu Lalhmunsang, Sielmat
Art and Culture Secretary : Pu Ruolchunghnung, Hmarveng

Hmar Women Association Hqrs.( 2010 -2013)
President : Pi D. Vari, Rengkai Road
Vice Prsident: Pi Elizabeth,
Secretary cum Finance Secretary : Pi Chawngtuozing, Rengkai
Assistant Secretary: Ms Sharon Parmawi,Khawpuibung
Treasurer : Pi Rothar, Rengkai
Information secretary : Pi Lalremmawi Zote, Khawmawi
Lalremruot, Hmar Veng

Hmar Art And Culture , Manipur. (2010 – 2013)
Chairman – Dr. Rosiem Pudaite, Zouveng
Vice Chairman : Pu S.N. Ngurte, Rengkai Road
Secretary : Pu R. Tawna Khawbung, (Resigned), Pu Zosanghlei Zote
Asst. Secretary : Timothy Z. Zote, Saikawt
Finance Secretary : Pu K. Lienzathang, Rengkai
Treasurer : Pu Zosangsanghlei Zote, Rengkai ( Upgrade as Secreatary), Pu H. Zaneisang, Rengkai.

Dated: The 10th Sept. 2012, Guwahati
Ref.No.: HSAGHQ/SecyEdu/12-16/ 02-17

To,
The President / General Secretary
All HSA Joint Headquarters & Branch
Subject: Hmar Students’ Education Fund (HSEF)

Thawpui dittak,
A hmasan HSA Hmar Students’ Education Board (HSEB) hmingin chibai ka bûk che/ cheu.

Eilo hriet ta nisienkhawm thufedan kimchang lem Education Fund chungchang a hin eiin hril nuom a, ei thawlâwm dan ding le ei thawlâwm ta hai tarlang ei nuom bawk a nih. Ei thiltum tak chu hi sum hung inlâwi khâwm ânthawk hin inchûklai tamtak hai hmadawm thangpui hi a nih. Harsa luot lei a inchûk theilo dâm, fahra dâm le harsatna tamtak phurrûk le career thu le mipui kuoma kawng iengkim a inchûktirna hi a nih. Mi thahnemngai tamtak in an thei ang le phaltâwk hai an hung thawlâwm mêk a, an chungah ei lawm takzet a nih. Tuhin HSA GHQ hma lo lâkna zârin HSEF donor hi iemanizât ei nei ta a, sumpui hi Chêng Nuoi 2.5 (Lakh) nei ani tah. Hi sum hi a pung umin sie mêk ani a, tuchena ei hmalakna met met hai ah ami phuruk man ta a nih. Ei beisei ang le thahnem ei ngai tlâng chun sumpui hung hau pei ei ta, a pung chauh hi hmang ei beisei bawk a nih.

Hieng popo beiseina hai hi sukpuitlinga a um theina dingin HSA Joint Headquarters le Branch popo hai thang nasataka hung la nâwk zuol a sum hi thahnemngaitak le tlawmngai taka hnam hmakhuo ngai a ânhma tieng hung thawlâwm dingin le mani awpna hmun sengah thahnem lo ngai dingin ka hung fiel tak meu cheu. Sum hi ei nei inhma po leh hma ei lâk lien in ei lak awlsam vat vat ding ani ding a nih. Ei hnam dawmkângna sin hi thaw makmaw le thaw vat vat a ngai an tah.

Hmar Students’ Education Fund-a dinga pawisa sum hung lûtna ding laia pawimaw le lientak chu ‘Donors’, hieng a hnuoia category hran hran hai anthawk hin ning a tih:
a. Platinum Club Donors – Rs. 1,00,000/- le a chung tieng
b. Diamond Club Donors – Rs. 50,000/- le Rs. 99,999/- inkar
c. Gold Club Donors – Rs. 10,000/- le 49,999/- inkar
d. Silver Club Donors – Rs. 1,000/- le Rs. 9,999/- inkar
e. Donors – Rs. 150/- le Rs. 1,000/- inkar

A chunga Donor-hai bakah hin HSA member tin (makmaw a pêk ding) le ditsaktuhai popo kuomah ‘project’ hi ‘launched’ a ni kum (tukum) hin ei reng a ei ta ani le ei thang vawng theina dingin Rs. 10/- anthawk Rs. 50/- dâwl ning a tih.

HSEF Donors le an Hamthatnahai:
a. Platinum Club Donor chu HSA-ah ‘Honorary Patron Membership’ pêk ning a ta, a hming le thlalâk HSA in Hostel a enkai taphawtah naupanghai hmu thei dingin târlang ning a tih. Patron Membership Certificate pêk ning a ta, HSA General Assembly-ah General Headquarters palai ni bawk a ta, vote ruok chu nei naw nih. Thina a lo tuok chun a umna Branch/Joint Headquarters or General Headquarters-in mawihnai takin râl a tih.

b. Diamond Club Donor chu HSA-a Honorary Life Membership pêk ning a ta, a hming le thlalâk HSA in Hostel a enkai taphawtah naupanghai hmu thei dingin târlang ning a tih. Patron Membership Certificate pêk ning a ta, HSA General Assembly-ah General Headquarters palai ni bawk a ta, vote ruok chu nei naw nih. Thina a lo tuok a umna Branch/ Joint Headquarters or General Headquarters-in mawihnai takin râl a tih.

c. Gold Club Donor chu HSA-a Life Membership pêk ning an ta, Life Membership Certificate pêk ning an tih. HSA General Assembly-ah General Headquarters palai ni bawk a ta, vote ruok chu nei thei naw nih. Thina a lo tuok chun a umna Branch/ Joint Headquarters or General Headquarters-in mawihnai takin râl a tih.

d. Silver Club Donor hai chu Donors Card pêk ning a ta, an hming le pawisa sum pêkzât HSEF Head Office-ah târlang ning a tih.

e. Donor hai chu Donors Card pek ning a ta, an hming le pawisa sum pêkzât HSEF Head Office-ah târlang ning a tih.

A chung a ei tarlang phuor ta angin theitawp hung suo a dâwlna kawng le a hrildarna kawng ah mani awpna hmun sung chitah hma hung la dingin ka hung fiel nawn cheu. Receipt book khawm thawn dar vawng alo ni ta a, alo hmunaw eilo la um pal ani chun ân hma tieng chanchin inhrepawin ei inthawn ding a nih.

Ka lawm ie.
In thahnemngaipui,
(JOSEPH V TUOLOR)
Secretary Education
Hmar Students’Association, GHQ

332

By Jaynee Newton, for Inpui.com

What do you want to do for lunch? That question is probably the most frequently heard around offices every day. Often, the answer is, "Let's go out," but for some workers, this is impossible. Swamped under a boatload of work, they know they can't possibly squeeze out the hour or sometimes longer it would take to leave the office and get a meal.

Busy workers sometimes decide to skip lunch altogether, but this is rarely a good idea that can, in the long run, lead to unhealthy eating habits and possible weight gain, especially when coupled with long hours of sitting in one place with very little activity.

So what's a hungry and busy worker to do? A great answer is to order food to be delivered to the office by a local restaurant. Here are four great reasons why office workers should consider ordering their lunch in on occasion.

Working While Eating

If a businessperson is really crunched for time, ordering food in makes perfect sense. All it takes is just one quick phone call to a local restaurant and a worker can then get back to the more pressing business at hand.

Skipping Meals Can be Unhealthy

It is easy for some people to decide to just skip lunch when they get overwhelmed at work. Unfortunately, this can cause a businessperson to turn to unhealthy and fattening snacks later on or to really binge when he gets home from work. Instead of skipping the noonday meal altogether, a businessperson should consider ordering a healthy and delicious lunch from a restaurant and have it delivered to the office.

Some people also don’t realize that stopping for a quick bite to eat may actually help to recharge their batteries and help them to work harder and possibly even accomplish more than they would if they just attempted to work through their lunches.

A Healthier Option

Workers who don’t order in may have to rely on a company‘s vending machine for sustenance if they didn’t bring anything to eat for lunch. Unfortunately, most vending machine items are very unhealthy and full of empty calories. Health-wise, it is much better to have a nutritious and tasty meal delivered to your office than it is to eat your meal out of a vending machine.

Ordering in for Team Tasks

Many managers find that it is easier to order lunch in for tasks that involve a large team of people. That way, everyone can eat at the same time and having food on hand will limit the number of team members leaving the building for long periods of time. Companies often find that even when they foot the cost of the meal being brought in, they end up saving money because their good will is often rewarded with more productive and happier workers.

Written by Jaynee Newton writes for Delivery.com la, a site she recommends for finding the best LA food delivery options.

By Pu L.Keivom, Inpui.com Columnist

Krista zarin HCFD kan nih - Author

September 2, 2012 khan Delhi Hmar Christian Fellowship (DHCF), a hnunga hmathlir lien tak le hla tak a hung suok pei leia Hmar Christian Fellowship, Delhi (HCFD) tia her danglam thret chun a piengcham voi 24-na chu chawhnung 1530-1730 hrs sung khan Apostles Methodist Church, RK Puram, New Delhi-ah a hmang a. Hriet mang lo karin, HCFD chu mihriem khom ni sien mi puitlinga ngai, nuhmei neia intum suok thei, UPSC ekzama khom thrang a, India rama sorkar sin insang tak chel thei ngirhmuna ngîr a lo ni tah zing el.

Trŭlna leiin, mani tronga chawibiek inkhawm a la um nawnaa lekha inchuk le sinthawa khawsahaiin in le hmun remchangna-ah Pathien thu le thu dang danga inpawl khawmna an nei hlak a. An hung tam deuh pha leh kohran pawl bik um loa inkhawm tlangna an hung nei pei a, Fellowship tia ei hriet lăr tah hi a hung pieng hlak a nih. Kum 1959-63 sung Imphala ka um lai chun Hmar Company-ah kan inkhawm hlak a, chu chu kha hma daih, kum 1947-a Hmar Company (Hmar Trading Company-1961) an indin laia inthoka an lo thaw tran a ni ta awm. A hnungah kohran pawl hrang hrang an hung lut a, êk vuok chek angin an hung indar a, chu chun khawtlang inthuruolna chen khom nasa takin a vuok siet a, State sorkar rorelna inpui inthrutna le hnam tina inthoka thlang aiawtuhai umna khawpui ni siin, an ni dan dinga mi beiseina hlen phak loin an tung inmŭm ringot hri pei a nih. Fellowship pakhat hnuoiah lo inthlung khawm vong hai sien chu, Setan nui inza naw hleng a tih.

Hi ei ngirhmun hril le tekhi chun Delhi chu, tu chena chuh, danglam tak a nih. Kum 1970-a inthok khan Delhi hi hmunpuia ka nei tah a ni leiin, nuomin nuom naw inla, ka khaw hmun nghet a hung ni ta a. Chuong lai chun Zo hnathlak po po hang dap khawm khomin, kut par pahni thlieka tiem khop chauh kan la ni a. Pathienni zing tieng Parliament Street-a Free Church-ah kan inkhawm tlangpui a; chawhnungah in a remchangna ruotin, chawibiekna hun serh kan nei hlak a, ‘devotion’ ei ti ang deuh hi a ni tak. Inkhawm trinah bu kan fak tlâng nghal zie bok a. Hi hi sunzom peiin, mi an hung pung pei hnungin, Delhi Mizo Inkhawm chu Green Park-ah nei tran a hung ni a. 1980 bawr tung laia inthok khan Delhi tlanga sin zom le lekha inchuka hung tla thla an hung pung pei a, mani tronga Pathien biek an hung nuom seng leiin, Manipur-a inthoka hung Zo hnathlakhai lair ingot khom Fellowship hrang hrang pasari chuong a hung pieng a, chuong laia pakhat chu Hmar Christian Fellowship, Delhi hi a nih. Indar peiin, Guwahati, Mumbai, Pune, Bangalore, Chennai, Silchar, Chandigarh le hmun dang dangah HCF an hung indin sap pei a, Conference nei khop zet an hung suok tah a nih.

Delhi-a kan tlak thlak hlim chun kan inrieng èm ém. Tu hin chu thrang li sung chauh, Israelhaiin Aiguptaa inthoka Kanan ram an pan laia lampuia an thang sung chauin, Zo hnathlak ringot khom a sanga tiem khop ei um ta a, Mizo inkhawm khom hmun khatah an inleng ta naw leiin hmun thumah an inkhawm hrang tah. Chu hun chu Pathien lunginsietna zarin hnam tinin ei la hung tong seng ding a nih. HCFD khom ei trana inthoka kum sawm nêka tam sung khan Sunday School-a kai khop naupang an la um naw leiin, a hnung daiah ei tran thei chauh a nih. Tu hin chu Sande Sikula kai (2012) naupang za vêl an um ta a, kum sawm hnunga lem chuh a let hni nêka tam an hung ni tah ding a nih. Chu pha chun, ei um khawm rawnna veng buk zirin, hmun hni hmun thumah ei inkhawm hran ngai ta mei a tih. Chuong kauzâr hrang hrang hai inthlungna ding chu a kungpui nghet tawk ei nei a ngai a, chu chu damtea tuta ei indin tung pei hi a nih. Hi thil hi a nih kum 2007 laia Structural Reform ei hril le a taka dam tea ei hung inchangtir pei chuh.

Ei hnam thrangmawbawk lien taka mi tam takin ei ngai chu kohran pawl innghirnghona le a kakhawk a nih. Kohran khata ngìr thratzie hi ei hriet a, ei hril rawn a, sienkhom ei tranghma kei zawnga thil infetir dinga ei phan lawk china chauh ei inhnik. A chok chen hrât hràt hi a hril rawn khom ei hoi. Hmaithinghawnga ei hmang lei khom a ni el thei. Chun, ei êk chè seng inthiel fai hi Pathien ringtu ei ni chun ei mawphurna le ei kros put ding a ni hrim hrim. Ei sukhnok inthielpui dinga mi ei fiel hlak dam hi thil thra fè thaw-ah inngai ding ei ni bok nawh. Ei sukhnok seng hi inthiel inla chuh, trieu sûm angin sawt naw teah ei khawmuol hung fai vŭk a ta, ‘pielral nisa’ hung inlang a ta, a êngah hlimin lêng thei ei tih.

Hieng ang thil lei hin, kohran pawl kansar hri a lut inlau leiin Delhi tlanga Fellowship thruoituhai lai kohran a ieng khoma rongbawltuhai chu thrang phal a ni naw hulhuol. Puo tienga inthoka thlirtuhai chun HCFD ramri khang hi a khauh taluo ti mei an tih. Sienkhom, a trûl tlat si. Khauhlâng ben threlh pawlisi hi, ei ngirhmun zirin, hmang a trŭl chang a um hrim a nih. Kohran pawl hrang hrangin thoktu pastor an hung sie po po bakah Delhi le a se vela um pastor, HCFD-a hung inkhawmhai chu kohran ser le sangah a trŭl hunah hmang trangkai an ni vong a, anni khomin inphal takin rong an bawl a, sienkhom an pawl hri hung phur lutin, an pawl ta dingin kuo suot an tih ti inlauna leiinn, rorelnaah an thrang ve phal a ni nawh. Chuong sa khom chun, kohran threnkhat chun an mi le sahai hmangin HCFD dai hung nêr an tum chàng a um. Sienkhom, tu chen hin Pathienin a la veng him hri a nih. Kohran pakhata inlawi nuoma inhril po po thaw ding hmasa tak chu, a tak ngeia insuikhawmna lampui hrawtu le pawl leia indaidangna bang ngir fek fuk hai sukchimtu Fellowship thrangpui le mani hmun sengah a lam lo sàt hraw a nih.

Tu chena Pathienin HCFD a la hum tlat san hrang hrang ni thei ding laia poimaw ka ti zuol pathum chauh hang tar lang inla. Pakhatna, kohran inpumkhat thratzie hi a hril ringota tlâk el loa a tak taka zawmtu le thawtu a ni lei a nih. Unau inngei diel diela um khawmhai chungah Lalpan malsawmna a vŭr hlak thu Sam 133 phuoktuin a hril kha a lo indikzie hriltu săkhî (witness) chu HCFD hi a ni ve ti inla, khêl ei hril ka ring nawh. Pathien thu zawm hi ringtu taphot sinpui a ni a, chuong mihai kuoma malsawmna le lawmman pek tiemtu chu felna le ringumnaa sip Pathien a nih. A thu zawmtu chunga a thaw ding a hriet; ‘remind’ a ngai nawh.

Pahnina, tlâk lo le hrât naw tak puma Pathien chauh ringsana sorkar thoktuhai rongbawlna chu Lalpan mal a sawmzie chieng taka hriltu a ni bok. Ka hril suol a ni chun Pathienin mi ngaidam sien, sum tam tak senga kohran ngelnghet le hluna inngai, thoktuhai hming hma le hnunga dikri ropui tak tak intlar thret thrut hai rongbawlna nêk hmanin Vaihai laia tlak naw puma HCFD rongbawlna hin ra hlimum a’n suo rawn lem niin a’n lang. Mani theina le dikri suong loa Pathien ringsana rongbawl hi hlawtlingna châbi pakhat a nih.

Pathumna, sakhuo le kalchar, kohran thil le khawtlang thil inkhaktuo loa lungruol taka an insom tlangna hmun a ni lei khom a ni bok. Hnam le khawtlang thilah Delhi Hmar Welfare Association (DHWA) chu iengkimah thruoitu niin, tlawmngaina thilah DHWA member-hai tluka tlawmngai thei hi Zoram khawvelah an um ta naw el thei. Tlawmngaina nun zawmtu chun Baibula nun thruoitu dinga a ngai poimaw tak ‘hmangaina’ hi a tak takin a thaw a nih. HCFD chun sakhaw thil a buoipui a, HSA-in inchuklaihai thil. Tu china chuh, hi pawl pathum bak chu pawl dang a la ngîr hri nawh; pawl tam chu insekhêkna mei mei a nina chin a um.

Hi a pathumna, sakhuo le kalchar inlaichinna hi hre fie lo, hnam thil hrim hrim hmu khawvêl ngŭk tum an um a, hnam thil an tlansan nasa po leh thlarau mi nia inngaina an nei. Sakhaw tina hin chuong ang mi chu an um hlak. ‘Taliban’ pawl, sakhaw mi tawrot hringtu an nih. ‘Kristien Hla Bu’ chawi lâr a, Solomon-a ‘Hlahai Hla’ ngaisang a, ‘Lenruol Hla Bu’ phŭm hmang nuom tlat si pawl dam, ‘Sikpui Kŭt’ hnawl a, Baibula chuong lo ‘Good Friday’ le ‘Christmas’ hlut a, fak le dawn thila insukfir hlè sia Baibula sa thieng lo a ti, entirnan, voksa dam beng pŭk pûk a, sathu ngaina a, Sabat inser loa a tuka ni inser lem si dam an lo ni nuom khop el. Hi thu hi a hrana lekhabu tam tak ziekna tham a nih. A poimaw le ei hril nuom tak chu, taksa put le thlarau neia siem ei ni leiin, ei taksa le thlarau mamawhai inbuk tawka phuhruk le chawmlien a nih. Hi hi threnkhat chun ‘chokpol nun’ nia an ngai leiin an hnuolsuot. Chuong mihai chu mit khingdel ang an nih. A varna tieng hup a, a’n delna tieng an en pha leh an hmu thei ta ngai nawh. Mihriem hi bei chaua a hring thei naw ang bokin Pathien thu tak chauh ringin a hring thei bok nawh. A siksawina a um pha leh nun a buoi hlak. Fak le dawn zong loin Pathien thu ngot ring tum la, ni tam a liem hmain hlangva (leithra) bu zawlah inchang i tih. Lunginsietna zara hring le chang le khawsa ei nih. Chu thila chun Delhi tlang le khawpui danga chênghai hin ei ram tienga khawsahai nêkin thil buk ton dan an thiem lem a hoi khop el.

Thuring

HCFD chu kum 24 zeta upa a lo ni tah thu a bula khan ei hril ta a. Pathien lunginsietna zara a hlawtlingna muolhai khom iemani zat ei phor lang a. Baksamna tam tak a nei a. Mi khawsak dan ei hmu tlawm lei dam, theulawzi tienga mi thiem ei um naw lei dam, kohran hmasahai lo thaw dan kha rău deua ei ngai lei dam, ei thabo lei hrim hrim dama ei chawibiek dan le ser le sang ei hmang dan thlak loa kha hma, mawl huna an lo thaw dan kha ei la sunzom pei a tam a. Chuong laia thring deu el chu kum tina voi khat bek ei insam ruol hlak HCFD thuring hi a nih. Ka’n sampui hmasa tak ding trumin a kawpi mi hung thon dingin Pastor Laldiksak Inbuon ka ti a, a mi hung thon ngei a. Kha hma daia mi, a thu fûn khom kim lo, a Hmar trong khom inphuoi tak el a la ni a, a trong ringot hriet fie thei dingin kan chŭl nâm phuor a, chu chu ka’n sampui a.

Ni kum September 4, 2011-a insam ding Thuring chu thruoitu dinga an mi ruot leiin chuong laia HCFD Secretary Herbert Lalsanglurin Thuring kawpi a mi hung thon a, chu chu a Hmar trong inthirna le a kim naw langsar zuol belin ka siem thra phuor a. Ka thon malamin a thuhmaah “Ei thuring hi a hma khan ei en chieng tawk naw khom ning a ta, duthu a sam naw khop el a, theologically and grammatically unsound a um zeu zeu a, siem phuisui met ngai a tih. In inkhawm nawk pha leh in en tlang dingin a hnuoia hin ka hung siem thrat phuor chu ka hung thon” tiin ka ziek a. Hi ka thon hi thuring insamah kan hmang a. Chu hnung ela chun fumfe lema ensui nawkin, an bi tlang dingin Thuring nambar pakuo ka thon a.

Thuring nambar 1-ah, “Baibul pumpui, Genesis-a inthoka Thupuong chen, bu 66 (Thuthlung Hlui bu 39 le Thuthlung Thar bu 27) hai hi Pathien thu hring, mihriem hmanga Pathien inthuok khuma ziek, ringna le thilthaw inkhǐna dinga indik tak a nih ti kan pom” ti a nih. Hi hi a tawi tek toka chu a thu fŭn hi khǐn deu el a na, mi thiemhai insĕlna bupui laia mi a nih. “Inthuok khum” ti (2 Tim 3:16) hih a ziektu um sun Paulan a umzie a hril fie si naw leiin hril fie dan dang dang a um a, ngaidan a khuongruol nawh. Baibul inleta inhmanghai chun hrieng an ta, “Pathien Lekha Thu tinrênghai hi Pathien inthuok khuma pek a nih” tia hin Grik tronga chun thuziek (graphe=writing/scripture) ti a na, a hmaa um ‘Pathien’ ti hih a thrang sa ve nawh. Chuong ang chun Delhi Version-a chu inletin, “Lekha Thu po po hi Pathien inthuok khum a na..” tia inlet a ni a. Hi inlet hi a fel zo chie nawa hriet a ni leiin, tuta siem thrat sin thaw lai meka hin chu “Pathien inthuok khum Lekha Thu po po hi..” tia sie lem a ni tah. Chun, “ringna le thilthaw inkhina dinga indik tak a nih” ti hi hriet dan le hril fie nuom dan inhmu lo a tam leiin insêlna a suktam bok. Chuonghai chu hi taka hin a hmor khom ei phor hman naw ding a ni leiin, ei thiempuhai buoipui dingin sie inla.

A pahnina hi United Church of North India (UCNI) Thuring 12 laia pakhat a nih. Chu taka chun “The Scriptures of the Old and New Testaments are the Word of God and the only infallible rule of faith and duty” (Thuthlung Hlui le Thuthlung Thar buhai hi Pathien thu a ni a, hienghai chauh hi ringna le thilthaw inkhina indik lo thei lo a nih). Hi hi 1823-a Welsh Presbyterian Church Thuring 44 an pom laia pakhat a ni a, sienkhom thuring hril changa hril sa hlaw tak laia mi Westminster Confession of Faith (1646), bung 33 hiela sei le chipchiera ruok chu a thrang sa ve nawh. Hi thuringa mi tam tak buoipui chu “indik lo thei lo” (infallible) ti trongkam hi a nih. A san chu, Pathien inthuok khuma ziek thu chu indik lo thei a ni zing lain, Baibula thu chuonghai hi mihriem hmanga ziek a ni leiin an thaw suol palh tam tak a um. Entirnan, Mat, 27:9-10 a Zawlnei Jeremia hril anga ziek hi Zawlnei Zakaria 11:12-13 a ni a, thaw suol palh ni ngei ding a nih. Luka’n Suria rama larsap (governor) Kurini a thrang sunga intiemna uma a hril khom hi (Lk 2:2) a hriet suol a nih. Romanhai rikawta chu intiem hnung kum sawmah Kurini kha Governor-a ruot a ni chauh a nih.

Pathiennia ei insama khan chu “hienghai chauh hi ringna le thilthaw inkhina indik lo thei lo” ti hi a thrang sa ve nawh. Chun, Nambar thumna, “Isu Krista chu Pathiena mi pakhat, Pathien Naupa, Thlarau Thienghlim thilthawtheinaa nunghak thienglâm Mari sunga mihriema hung insieng, Mihriem Naupa, suol nei lo, suol intlanna dinga thi, a thisena suol sawp faitu, a ringtu taphot thiemchangna dinga taksaa tho nawk a nih ti kan pom. Ropui takin a la hung nawk ding a nih ti kan ring” ti chu “Isu Krista hi Pathien Naupa, nunghak inthieng sunga Thlarau thilthawtheina-a insieng, suol neilo, suol intlanna dinga thi, a thisen leia suol sawpfaina le taksa-a a thonawkna kan pawm a. Ropui taka a hung nawkna ding kan ring” tia sie a ni bok a. Hi taka hin ‘Pathien Naupa’ a nina chauh a pom a, ‘Mihriem Naupa’ a nina a pom sa si naw leiin “thu chu taksain a hung inchang a” ti kha a hnawl tina ang a nih. Isu kha ‘Pathien Naupa’ a nina chauh pom a, ‘Mihriem Naupa’ a nina ei pom si naw chun ei Pathien thu ringnain umzie a nei nawh. Chun, “a thisen leia suol sawpfaina le taksa-a a thonawkna kan pawm” ti hi sentence indik lo hulhuol a nih.

Nambar 5-na, “Baibul-in ringna leia lunginsietna-a sandam ni dinga a hril hi kan pawm” ti hi hang ngaituo chet chun pangzatum deu a nih. Ringna leia sandam ei ni nawh; lunginsietna zara sandam ei ni a, chu ringtu le pomtu chun chatuon hringna a chang a ni lem. Saptrong chun, “For by grace you have been saved, through faith” (Eph. 2:8) ti a nih. Ei ring rak leia a mi sandam duok a ni nawh. Kum sanghni liem tah khan a thlawna lunginsietna zara sandamna sin chu Kristan a lo thaw zo der tah. Chu ringtu chun sandamna a chang a ni lem. Chun, ‘sandam ni dinga’ ti trongkam hin ‘element of doubt’ a pâi a, hmang lo chi a nih. Hi hi kum hmasaka draft ka thona chun, “Pathien lunginsietna zara Isu Kristaa mihriem intlanna a siem ringtu taphot chu sandam an ni thu Baibulin a hril hi kan pom” tiin ka sie.

A tawpna tak Nambar 9-na, Thlamuongtu Thlarau Thienghlim thu hi ka draft thona chun Pathiena mi pathum um indota hrilnaah ka sie a, Nambar 4-na a hluo. Ei Thuring insama a tawpna taka ei sie hin Pa, Naupa le Thlarau Thienghlim insersuonna a khakbuoi a nih.

Tlangkawmna

A dang khom hril ding a lam tam el. Sienkhom dit tawk inla. A tlangpuiin, ei Thuring insama ei Hmar trong hmang kha a trîtro a, kum 24 tling tah trong ding chun inzàpui a um deu a nih. A tûk khan Malsawmthangpa’n a mi hung fawn a, mak a ti thu hahîpin a hril a. Kei chun, “Ei ti zawng a ni rak naw leh ei insam ve nawa a ne’l annawm. Kei chu ni kuma ka’n sampui kha ka ring el a nih” ka ta. Ama chun, “Kei khom ka’n sam ve le! Insam hma khan ka tiem a, ka dittawk khop el” a ta. A mi thruoitu Upa Ruolkhumlien Buhril kha a fel hràm a, bau hni chen bak bakin, fak thei dingin a hung chan nawi a, kan tlingtla hram chu a nih. Insam zo char khan a lekha khah inkhup inla, mipui kha an thu insam indon inla, a hril thei an tam hmèl naw kher el.

Thuring hi kum khatah voi khat chauh ni loin, thla tin voi khat bêk insam ruol ding a nih. Chu ding chun insam tlaka ei duong suok a ngai. ‘Ka sunghai tu am an na?” ti duol duol anga khawvel la pal zing hi kum 24 mi nungchang ding a ni ta nawh. Patling chu patling chêta chĕt ding a nih. Puitling tieng pan tum ei tiu. Pathien thu hi samphuol ela tlak chi a ni nawh. Hebrai lekhathon ziektuin, “Krista chungchanga inzirtirna mawl tak tak hril zing ta loin puitling tieng pan ei tiu” (Heb 6:1) a ti khan Hebrai kohran kha kum sawm vel chaua upa a la nih. Eini kum za kristien lo ni tah haiin ringna tieng le Pathien thu hrietna tienga A AW B ei la khĕl thei naw hih inzakumah ngai inla, theida zawnga la loin, chona thraah ngai ei tiu. Krista zara HCFD ei ni ve si a. (September 8, 2012 Delhi)

A Hmun: Darngawn Villa (Upa Neisel In), Shillong, Meghalaya
A Hun: September 2, 2012; 2PM

Members present:

  1. Dr John H Pulamte
  2. Joseph V Tuolor
  3. Lalramsang Hmar
  4. Lienthanglur Khawzawl
  5. Lalthlamuana Hmar
  6. Simon L Infimate
  7. Guests: Ms. Mawii Darngawn, Brando H. Keivom

Hun hmasatakah President Pu Lalthlamuana Hmar in CEC Resolution hai suklangna le thuhmahruoi hrilna a nei zoin Board Chairman dinga ruot, Dr John H. Pulamte’n Chair a lak a, Pathien kuomah tawngtaina a nei. Chu zoah Hmar Students’ Education Fund (HSEF) hung pieng dan le Fund enkaitu dinga Board indin a ni hma khawma General Headquarters hmalaknain hi fund a ding hin pawisa sum mimal le pawl hmingin Cheng (Rupees) 2,53,242.00 lo dawl dawk a ni tak thu a hril a, memberhai a sukphur thar hle. Hi pawisa a hin 53rd General Assembly (Worship Service)-a dawl suok Rs. 6,500/- khawm a thangsa.

Thurelhai:

  1. Hmar Students’ Education Fund dinga dawlsuok ta hai hi tuta lo enkaitu, GHQ Vice President Pu Rochunghnung in December 2012 chen mi la enkai pek sien, chu zoah Board kuta lut ta sien kan tih.
  2. April 21, 2012 Executive Council Resolution No. 1-a lo relthluk ta, Barak Valley Joint Headquarters huomsunga Zarzolien Memorial Award le football tournament a dingin Rs. 20,000/- peksuok tha kan tih. Award hmutu kuoma Education Board hmingin Certificate mawitak siem nisien tha kan ti bawk.
  3. October 26, 2012-a NC Hills & KA JHQ huoihawt Career Guidance programme ah hin Cheng 20,000/- bawk kan sanction. Programme kimchang lem le resource person ding chu Board Secretary le JHQ hai inbierawn in lo siem sien kan tih.
  4. Kum 2013 sung hin Joint Headquarters pathum bekah Education Board hmingin education dawmsangna le sukhmasawnna tieng le inzawmin programme siem ngei nisien tha kan tih a, a kimchang lem Secretary in hung buotsai sien tha kan tih.
  5. HSA Library hi lekhabu lak/dawlkhawm a Library tlan phak nawna a tul nana khuo hai a siem tha ti ani a, hihi Library siem tanna hmun ding hin 2013 sung Parbung Khuo a tan nisien kan ti bawk.
  6. Mani ta senga ei ngai theina dingin Education Fund hi thawlawm tlang diet diet ding tia lo hril ta kha JHQ tin hai kuoma inhriettirna hi thawn thar nawk nisien tha kan tih.

HSEF dinga dawlsuoka lo um ta laia Rs. 2.5 lakh hi General Headquarters Vice President enkaina hnuoiah 2% per month interest in mi kuomah sie a nih a; August 2012 chen hin Rs. 10,000/- a pung (interest) a lo um ta bawk.

Sd/-
(Dr John H. Pulamte)
Chairman

Sd/-
(Joseph V. Tuolor)
Secretary

Hmar Students’ Education Board
Hmar Students’ Association, General Headquarters

Pu Ramthienghlim Varte, Shillong

Khawvel insieng tira inthawk van boruoka fakzawng chi le hnuoi chunga invak rannunghai chuh vawisun chen hin anni danding Pathienin a siem angin piengphung, chetdan, nunphung, zierang le inhram danhai ala pangai zing leiin; chuh an niphung (identity) dinga ruot pek ani el a. Chuleiin, Sakei chuh tukhawmin Savawm anti ngai nawh, Savawm nunphung angin a khawsa naw a, an hram ngai bawknaw leiin. Chuongangin, Zawng chu Zawng, Sakawr chu Sakawr, Sai chu Sai, Kawlhawk chu tukhawmin Rangkek anti ngai bawk nawh. An nunphung dinga Pathienin a ruot angin vawisun chen hin an zie, piengphung, chetdan danglam lovin an chang a, an khawsa a, ransa dang lekhawm an inkawp ngai nawh. Chuleiin, mihriem khawmin awlsam takin ei hriet thei nghal a, chuh a nih NIPHUNG (Identity) ei ti chuh.

Mihriem ruok chuh ei piengphung angkhata siem ni inla khawm hnam tinin tawng hrang ei neia, incheidan, chetdan le khawsakdan le chibing-nunphung hrang hrang ei nei hih a nih ransahai neka ei danglamna le ei niphung, mihai mi hriet theina le inchikna theina chuh. Chuleiin, Adam a inthawk vawisun chena ei niphung (identity) zie le rang hrang hranghai humhim zolova inthlak danglamna a hungsuok pei a. Chuleiin, Niphung (identity) humhal tum leia insuol-inhal tamzie nitin a chanchinbu hluo bittu, apui-apangin a thar a thar a ei hriet nuom chuh ana; chu chanchin chuh ani bawk khawvel mithiem le varhai lekhabu suk hausa tu le hmun tamlem hluo bittu chuh, la ni pei bawk a tih.

India rama ringawt khawm hnam, tawng le nunphung hrang hrang nei sang le zali lai zet ei um a, chuonghai chun mani niphung (identity) seng humhala India khuo-le-tui nia chanvo tha dita insuol, in-eptuo, in-er tuo le insik buk buk zing chuh ei nih. A hratpa chun a hratnawpa a sirde a, chimralin a um a, a chimraltu khawm chuh a neka hrat an hungsuok pha chimralin a um ve nawk a, tawpintai umlovin hun sawtnawtea a chimraltu khah midangin an hung chimral nawk a. A hlui a tharin a hung thlak a, a thar kha a hlui a, a thar dangin a hung thlak nawk pei a. Chuleiin, mi dawnril Darwin-in khawvel nun intlakdanglam dan a hrietna-var Darwin Theory eiti ‘A ru no no suoka (Survival of the fittest)’ neka inril, indik bawk hi vawisun chen a ding chun a khel thla thei eila um hri nawh ti inla suol kher naw nih. Chuleiin, mani niphung (identity) ngaisaklova hum nachang hre bawklo hai chuh chimralin an um hlak. Chutaka inthawka ei inhumhimna kulbing le ralthuom pawimaw tak ding chuh iem ning a ta ? Khawlai a inthawka hungsuok ding am ? Tu am mawphurtu ? Hi zawna pawimaw tak sang ding chun thil pawimaw em em el pathum inthe thei derlo eini a hin a uma chuonghai chuh : Hnam, Tawng le Sakhuona a nih. Pa, Naupa le Thlarau thienghlim anga hieng pathum haihih a um kawptlat a tul.

Hi le inzawma niphung (identity) hmelhmang le umzie ei fie uor theina dingin khawvel hnam po po lai a niphung (identity) a piengthar le chiengtak hnam ni dinga ka ring Isrealhai nunphung tlawmte suklang a ngaiin ka hriet. A san chuh : Pakhatna- Ieng hun a khawm an hnam (Israel) hih Jehova (Pathien)-in a thlangsuok hnamah an ngaitlat a, beiseina hring neia chawisang an tumtak ani zing hlak; Pahnina- An ram chauh hi ram hlun le thienghlim Jehova mit fukna ramah an ngai tlat; Pathumna- An tawng (Hebrai tawng) hih Jehova pek ngei tawng hmasatak le Jehova khawm an puong rawpna tawnga an ngai bawk. Hnam, Tawng le Sakhuona ah an chienga, remruottu Pathien an inza lei a nih.

An chanchin sui ta laklaw, an niphunga an chiengzie la hei thaisa met ei tih. Jerusalem-Tempul hih an hnam thuthlung inthlungkhawmna sutpuiah an ngai takzet a. Babylon, Aigupta, Greek le Rome lalhai khawm khan indawt zutin anlo do ta hlak reng a nih.

Amiruochuh, AD 70 lai vel khan an Lal Messia (Chuh Krista tina a nih) hung khah Messia ni thei dinga an ringnaw leiin an chunga Pathien lungsenna vawrtawp a hungtlung zet chuh an Tempul Moria tlang ( Abraham in Isak an hlanna ) hmun ngei a an bawl khawm sukchim pekin an um a, chuongchun hnuoi chung popova sukchek/sukdar le thuoihmangin an um ta a nih. Amiruokchuh, niphunga an piengthar chiengzie chuh kum sanghni deuthaw sukdar le chavai a an um lai khawm khan ‘A nih, Kan tap hlak, Zion kan ngaituo’n…Aw Jerusalem, ka thienghil che chun …’ an ti vawng vawng hlak. Chubakah, hnawtdara an umna (Diaspora) khawlai ram khawm ni raw se Biekbuk (Synagogue) an bawl hrim hrim chun Jerusalem tieng ngha zawng kherin an bawla a chunga ‘Aw Jerusalem, ka theinghil che chun..’ ti an tar kher kher hlak. Khawvel kiltina sukdara um hnung, an rama kirnawk danding an hriet dernaw lai khawma an fekan ruoithe zo zatin ‘Kumnawk fekan ruoi chuh Jerusalem ah ti’n an pase kum tiem hlak. Isrealhai anga hnam niphung a chieng le det hih khawvelah hmu ding an um nawh.

An Sakhuo a inthawka Sakhuo thar Kristien Sakhuo thuring bulpui ‘mani mihriem chanpuihai le inhmangaituona’ thu Lal Krista chanchintha ringtu le zuitu rambung haiin chu lampui daltu le suk khawhlotua an ngaitlat leiin an ram inthawk sukdar a an um ti tak lova mi ram, mi hnam kar a an inbiknahai chena khawm suknawmnatna an tuok nasat dan hi hril seng an nawh. Kristien sakhuona’n ram a lak hrat si leiin Judahai chun thiemnaw Arbawm awrthei po po an awr ta pei a. England, Spain, France le ram dang dang khawlai hmun khawm an ta dingin thlamuongna a um naw a, inthawlna reng reng an nei nawh. Russia Lal Czar-in a ram Poland pel raka a hung zauh lem khan chuh khawvela Juda mi po po zatve deu thaw chungah chungpikna sumpui ala sa ta deu deu. An pumrawhmang thil inhlanna ding sa le an Sabbath ni a sathau khawnvar thaw dinghai po po Sie-chawi (Special tax) a siem pek a. Juda nunghakhai hrim hrim khawpui le University a leng ding chun nawchizawr sinsiena darkuol bun lo chun an lengsuok phalh an nawh.

Kum 1880 a Russia lal Alexander-II tuolthina a Judahai intum anni tum lem chun mipui hazat lungsen le Czar a sipaihai kuthak nulna a hmangin Juda veng tin hrutin an hmu taphawt an vuokthluk a, an inhai an raw pek bawk. Hienganga hnam sukchimit tuma inthatna a rapthlak taluo leiin ‘Pogrom’ ti tawng thar khawm a hung piengpha tah nghe nghe a nih khah.

Chubakah, German sawrkar hnuoi a Juda mi reng reng that chimit vawng tuma lal nunrawng Hitler a Gas chamber tiengpan a Juda mi nuhmei, naupang a pui-a panga an tuor dan ngaituo lem chun a chunga ei hrilhai hih a nep zo vawng el. Hi le inzawm a lekhabu Hmar tawng khawma inlet ‘INSUOTNA RAPTHLAK’ ti khawm a um ei tiem nuom chun. Hieng anga an tuor hnung khawma an niphung (identity) inphat ngailova cheldet tlat anni leiin tukhawmin an chimral thei nawh.

Hnamah an chienga, tawngah an chieng a, Sakhuona ah an chieng bawk a, an niphung (Identity) tui le thlarauva piengthar chieng a ring an um a nih. Hi lei hin an Pathien (Jehova) khawma a phatsan thei tlawtnaw a, a tawpkhawk an tlunghma’n beiseina a an pasie kum tiem Fekan ruoi chuh Jerusalem ngei a the thei dingin an ringphaklo le beisei ngailohai kut hratna hmangin November 29, 1947 khan United Nation General Assembly members 57 New York khawpui a inthungkhawm chun Jerusalem le Isreal chanchin kum sanghni deuthaw hriet nita ngailo chuh khawvel hriet ah pek kirin an um nawk el a nih. Niphunga an chiengna ra lieu lieu a nih. Pekkir anni dan chanchin hi ngai nuomum tak ani a chuh, ei thupui pel tieng ani leiin hun danga ziek lem ei tih.

Niphunga chieng le cheldet thlathai chu a petu khawmin a hriet zing hlak si a. Chuleiin, Isreal haihih an niphung (identity) khawlai khawm um hai sien cheldet tlat hnam anni leiin midang leh an inrem tak tak theinaw reng a, an umna taphawta hnam kher-in-khawng takel, midang le inpawl hlei theilo khawpa buoithlak um, naupang khawm an hung piengtlak hlima nu’n a malpui chunga nene a pek ding zata an Juda sakhuo dan insama chawilien anni leiin an Sakhuo thuringhi an cheldet em em a, chu kalzawnga mi`n chungthlak taka thaw an tum chun naupang e tilovin inza derlovin mi an tau ngam vawng a nih. Chuleiin, Pathienin an niphung ( Identity) a pek angin an ringum a, an chieng a, an cheldet tlat leiin Assam ram khawm tietlo Isreal ram chuh vawisun hin khawvel a ram hausa le ralthuom nei tha le khawvel rambung popovin an buoipui luoi luoi el chu a nih.

Chungangin eini khawm ei niphung (identity) hi khawlai khawm ei inzapui ding annaw a. A hma a ei hril ang khan Tum ka nih ti min min dawn hai sienla, ka hnam chuh Hmar, ka tawng chuh Hmar tawng, ka sakhuo chuh Christien ti hin bauva dawn pawl khawm nilang, ziekpawl khawm ni lang ka sangna ding chuh ani hrim hrima, ka chiengtawk em leiin ienglai khawm buoi ngai naw ning a. Chuongangin, Hnam chuh ei nina hrilfietu ding laia pakhatna ani leiin ‘Hmar ka nih’ ka tinaw theih nawh. Ka ni chiengzie chuh Hmar a khawm Lawitlang pahnam (Clan), Lawitlang pahnama a khawm Varte (Sub-clan), Tuolbung khuo, Manipur a pieng, chutaka inthawk hung inpemin Tuithaphai a pu hai Veng Khawmawi a khawsa ka nih, ti ka chieng em leiin.(Niphunga piengtharna –II next )

By Pu Zarzolien Keivom, Regular Contributor

Ei thupui khi mani nina hre fu loa mi thrat nawna hril ching hlakhai hrilnain upahai chun an lo hmang hlak. Ei Lalpa Isu hi khawvela a hung lai khom khan hi thu tlukpui char hi hmangin Farisaihai le Lekha ziektuhai kawknain “Iengtiziea mani mita thingtum um chu ngaimaw si loa I unau mita thil hlek um chu i hmu am a na” tiin a lo hril bok (Mathai 7:3). Pathien thuin kumza lai a lo chenchil tah tulai kohranhai hi ei Lalpa Isu hungin mi hang enfie sien, kohran thruoitu le membarhai lai hin mani mongkhawn hmu si loa ei ringtu chanpuihai mongkhawn chau hmua nuisaw ching hlak iengzat chie am um ei ti aw ti hi ngaituo tham tak niin an lang.

Mivar le inrila ngai le thlaraua sipa ei ngaihai lai khom hin mani mongkhawn hmu zat zat thei hi chu kutpar thlieka tiem khop khom ei um dim chu aw! Lekha inchukhaiin an sierkop thiem thei naw thu an hril hi ka hriet tawng hlak a, chu neka mi tinin ei thil thiem thei naw zawng tak chu mani mongkhawn hmu hi ni lem seng dingin ring a um. Mani felna le thratna chau hmu thei, chongkor mit nei ei tam lei tak ku hih ni ta veng a tih, kohran thilah ni leh, hnam thilah ni leh, hieng lawm lawma pawl phun ei hrat el ku hi ti dingin a um chu tie. Hlepruk theina ding hmunah ei um naw leia ei hlepruk ve naw lei el khom ku hin Pathien lawmzawng thaw ei ni bik chuong der le, ei sinthawna le ei ngirhmunin lo zir ve ta ngat sien chu, thlarau mi nia inngai tam tak hai hi a hlep rawn rawn khom ei ni ve el thei a ni aw! Chuong ang bokin Pathien kohran intihai lai khom hin mani thrangna kohran thrat nawna hmu thei bar loa kohran danghai thrat nawna le baksamna hmu thei vieu hi ei tam ring a um. Ieng dang nekin mani mongkhawn hmu hi chu an tak ma ma chu a ni hih.

Pathien meuin ka lungril ang put mi David, Jesai naupa ka hmu suok tah, ama chun ka ditzawng taphot chu thawng a tih, tia a lo hril meu khom khan Pathien ditzawng taphot chu a thaw vong bik chuong naw niin a’n lang. 2 Samuel 11 ei hang tiem a, a ho zawng le a pangzat um zawnga ngai lem chun tiem inring khom ei ngam naw a, hmulthi a suktho uor el a nih. A sipai haiin ral doa an buoi mup mup laia ama a lal tak chu Jerusalemah ngai muong muta umin, zantieng ni nemah a in chungzawlah lungngam charin an vak vela, nuhmei pakhat tui insil lai a zuk hmu phut chun hmel thra a ti hle chu ni naw nim, tu am a nih ti zong suok dingin mi a tir ta nghal a, Suol thaw dinga ieng dinga lal David chu an hmaw bek bek el am ni tang a ti le aw! A mi tir hlak chun chieng em em elin Eliam naunu Bethsheba, Hit mi a sipai Uria nuhmei a nih tiin Davida chu a hril a. Ngaisak chi an naw chu ti el nekin ral rama Uria um chu remchanga lain mi chu a zun thruoitir a a lo zalpuia, a in tieng a kir nawk ta a. Nuhmei chu a hung inrai ta a, nau a pai thu chu David kuomah mi a’n hriltir ta a. Davida chun a suol thupna dingin Uria chu ral hmatawnga siein a that tah a nih. Mihriem mit hi a chak zawng le a ditzawng thilhai hin a sukdel tlat hlak leiin a sie le a thra ngaituo nachang a hriet naw a, tum khom a tum sin ngai naw a niin a’n lang.

David khom kha Bethsheba hmel thratna khan a mit a suk del tlat leiin Pathien dit naw zawng a thaw ding a nih ti hrim a ngaituo thei ta naw a, tuol chen a la that thei ding a ni ti khom ngaituona chang a hriet thei ta naw ni takin a’n lang. Mita ei hmu le naa ei hriet hai hin suol dinga thlemnah mi thruoi lutin mani mongkhawn tak ngiel khom ei hmu thei ta ngai naw a nih. 2 Samuel 12 ei tiem chun Davida hin a mongkhawn reng a hmu naw thu ei hmuh. Zawlnei Nathan hmangin David kuomah tekhi thu Pathienin a’n hriltir a. Khaw pakhata hin mi pahni an um a, pakhat chu mi hausa a na, pakhat dang ruok chu mi pasie a na, mi hausa pa chun beram ruol le bawng ruol a hau em em a, mi rethei ruok chun beram la chikte a vai a, a fak le a dawn ang ang chu an trawmpui a, a angsungah a pom in, a nau ang hielin a cheibawl a. Chun, mi hausa chun mikhuol a neia, a beram ruol le a bawng ruol laia mi chu thata thlaithleng siempek nekin mi rethei beram latuoi chu a lakpek a, a thatpek a tiin. Davida chun ama chan chin zawlneiin a hril a nih ti reng a hriet thiem thei chuong der nawh. Nasa taka lungsenin, Lalpa hringna sal hielin chu thil thawtu chu thi tlak a nizie le hieng thil hi a thaw lei le lunginsietna a nei naw leiin a beram chu a let liin a rul ding a ni thu chu Nathan a hril a nih. Nathanin David kuomah “Chu pa chu nang hi i nih” tia a hril khan a mongkhawn lo sazie a hmu thei chau a nih.

Kohran thruoitu le hnam thruoituhai, Pathienin a zawlnei tu am a nih hung tir ta ngat sien Lal David nek hin ei chan a thra bik ngut dim chu maw ti dam hi ngaituoum tak chu a nih. Nuhmei uire lai tak an hung mana Isu kuoma an hung thruoi trum khom khan suol nei lo loin deng hmasa raw se a hang ti khan a hotu lien taka inthokin a dot dotin to trokin an trin diel diel el a ni kha. Ei kohran chanpuihai rorel dan inlai tawka ei ngai naw leia ruol ding fiela pawl hran ei hang phun chot chot el dam hi chu ei Pathien thu le chu a’n hme naw hulhuol niin an lang. A thilthaw dan hrim hi, thi tlak a nih ti a mi ro ei rel khumhai dam hi zawlnei Nathan hung tho nawkin ei tlak nawna hai mi hung phorlang pek ve sien chu, David nek hman khan ei hmai a mawk lem ring a um.

Filipi 2:3 ah ei hmu angin,” Mani tranghma siel taka iengkhom thaw loin tu khomin inngaitlawm takin mani nekin mi dang thra lemah ngai raw seh. Mani hmakhuo chau ngai loin mi dang thratna ding khom zong ro” ti hi zawm seng inla chu ei hnam sungah kohran pakhat chau ngir a ta, Hnam sipai inti hai khom pawl khat chau ni bok ei ta, tuolthi khom um naw bok ei tih ti hi ring a um. Ei mongkhawn ei hmu naw lei chau a hieng thil po po hi ei thaw hlak a ni leiin Krista lungril ang putin ei um danhai inthlak danglam ei tiu. Ei kum za kristien nina hi uongpui el loin ra thra insuo dingin tho har ei tiu. Ei hnam ei ram le Pathien ram lienna dinga Krista lungril ang put, mani nina maksan ngam thruoitu iengzam ei um ding leh?

KEIVOM RUN, Greater NOIDA

25 August 2012.

Powered by Blogger.