Gen.President, Hmar Inpui.
Hmar Inpui Special Assembly October ni 30-31, 2009 Saikawt khuo, Churachandpur-a palai fekhâwmhai chun Hmar Inpui President sin kum thum sûng chel dingin mawphurna
rik takel an mi lo inhlân tah a. Hi sin inzâum tak, amiruokchu rik takel phursuok dinga ka chunga mawphurna in lo innghat tâk chu Pathien hmingin lâwm takin ka pawm a. Special Assembly palaihai le Hmar mipui po po kuomah lâwmthu ka hril a.
Amiruokchu, hi sin rik takel hi chunga Pathien le ka unau Hmar mipuihai ditsakna le thangpuina naw chun ka phursuok zo naw ding a nih ti ka hriet a. Chuleiin, Hnam, Kohran le Association hrang hrang thuoituhai le Hmar mipuihai, inthangpuina le in thurâwn ienglai khawm ka mamaw zing ding a nih. Khawtlâng nun a sie chun hnam le kohran hmai a bal a, hnam le society tlûksietna hmunah kohran hring le ditum indin thei ni bawk nawni. Pathien hring nauhai ei nina hre zingin, indikna le ringumna chel tlat pumin, mani umhmun sengah hnam rawng bawl tlâng seng dingin Hmar mipuihai ka ngên takzet cheu.Ei thuring inziekna Bible-in “Hnung tienga thil umhai chu theinghila, hmatienga thil umhai chu banin,” a lo ti angin, thil liem tahnunghai a sie a tha theinghilin, ei hma tieng hunah inngei le thahnemngai takin sin thaw tlâng ei tiu. A pawimaw bîk tukhawm ei um nawh. Mani nina le umhmun sengah, ei mawphurna le thawding ei liengkoa innghat chu, Thuthlungthar malsawmna chang dinga Lalpa’n a mi tiem chu chang seng dingin ringum le thahnemngai takin phursuok tum seng ei ta, chuongchun Lalpa’n a mi thuoi ding a nih.
Khawvel mihriem tukhawm famkim ei um naw leiin, suksuol pal a lo um a ni khawmin, a tha lem le fel lem ditna leia insawisêlna (constructive criticism) le thurâwn thahai pawm le mamaw zing a nih. Thlarau le taksa inkal lova hnam rawng bawl tlâng dingin Hmar mipui po pohai ka ngên tak meu meu cheu. Hnam, kohran le pawl hrang hrang thuoituhai po po-in ei mipuihai ei thuoina kawng tinrêngah Thuvarhai Bung 16:10 hi thupui le innghatna’n hmang seng ei tiu.
Hnam le ram rawngbâwlna sina inthahnemngaipui.
Sd/ Lalawilien Amaw.
Gen.President, Hmar Inpui.
Hmar Inpui thruoituhai chun ei nina le ngirhmun chel le inhmein, kohran thruoituhai thukhawchang anga thu ziek le hril hi bansan tah inla nuom a um khop el. A taka par suok si lo pulpit thukhawchang hi mipuiin an nghok tah. Secular organisation chu secular takin, hnam hmangaina le tlawmngaina lungril putin thruoi ei tiu. Chu chu Pathien thu ei hril nek hmain a Pathien thu lem a nih. LK
ReplyDeleteSecular le Religious affairs thre hrang ei thiem naw leiin thil suol ni lo, tam tak suol ah ei sie pei hlak. Eg. Hmar dan (nuhmei-pasal in nei chu 'nuhmei inruk' ah ei ngai pei dam). Zan thlavar hnuoi a innei dan dam hi khawvela, marriage ceremony lai a simple tak ni bawk si, ei thiemnaw leiin bansan dingin inchuktirna ei pek a. Culture hlutzie hi ei la hriet tak tak naw zie a sukchieng em em.
ReplyDelete