SIKPUI KUT 100

[By Tv Zacharia Varte]

Delhi-a cheng Hmar hnathlakhaiin ei nghakhla em em, Krismas nek hmana ei tung lem Sikpui Kut chu kar nawk ela hmang dingin ei insingsa mup mup a, a phûr pawl le phûr si, phùr naw tehlem insir pawl leh, ei nasa. Sienkhom, thla hmasak laia Delhi khawpui chu Commonwealth Games lo mikhuoltu ding ni sia a la’n zozap naw em leia Commonwealth Games Federation hotuhai kawk a tuok ang khan, Sikpui Kut buotsaituhai khom hin dem an hlaw a ni khomin thil makah ngai naw inla. Awleh, lo inzozap naw deu inla khom, thaw naw nek chun a thra hrim hrim. Sikpui Kut 2009 inbuotsaina hi vuoicha deuh sienkhom vuoi flop letder naw nih ti chu kan hnemna a nih.

Sikpui Kut hi iem a na? ti zawna hang siem tah inla, a tam lem chun don khom don pei loin ei innui bo mei mei ka ring. Pastor kuoma Krismas umzie a hriet le hriet naw indon ang deuh ni mei ei tih. Iengpo khom ni sienla, ka lo hriet ve dan chun, Sikpui Kut chu Kut dang dang laia pakhat, Hmar hnathlakhaiin kum thrat kum, bu le bala an hnienghnar kuma ruoipui threa thlasik huna khawtlang insukhlimna an nei hlak chu a nih. Kum thrat kum chu iem a na? Ei pi le puhai khawvela chun bu le bala hnienghnar kum, indo, hri, tràm le hnam le khawtlanga harsatna dang dang a um naw kum chu kum thrat kuma ngai a nih. Kum tluona Pathienni-Chawlni um loa sin an thaw hnunga an taksa sawl em em insukhadamna dinga insukhlimna an hmang, sakhaw thil amani le mi mal thila inchongna khom ni lo, khawtlang insukhlimna lieu lieu a nih.

Ieng ieng khoma ei hriet dinga poimaw tak chu sakhuo le inzomna a nei naw thu hi a nih. Chu chu ei histri suitu le thranghlui haia inthoka ei hriet dan in a chieng em em a, ei buoipui em em Sikpui Hla hin a sukchieng zuol.

SIKPUI KUT LE CENTENARY

Khawvel hi a la’n vir zom pei a, hmangaina hun kei seipeka ei la um a ni chun kum nawk el hin Manipur simthlanga Chanchin Thra a hung luta inthoka kum zakhat a tling lawmna (Gospel Centenary Celebration) chu hmang dingin ei insingsa mup mup mek a, ei invetpui naw chauh chu a ni tak. Puitling thei si loa pieng champha lawm kar ngot nghakhla chu ei ni tawl tak. Isu’n a mi thienghlimhai a lawr hman thut a ni khomin thrahnem tawk fet chu a lawm ding ei la um ka ring. A lawmnaa mi’n rawitu ding leh.

Ka hril tum tak chu: ei hma ela Delhi khawpuia Sikpui Kut ei hmang ding, thruoituhaiin Gospel Centenary le an kei kop tum phet phet thu hi a nih. Ei ram tienga ei thiempuhan Kristien ei ni ta si hin chuh Sikpui Kut hi hmang ta ngai naw inla ti an hril phat khom, phing vun na rak khopa “Sikpui le sakhuoin inzomna an nei nawh’ tia khek hlak hai kha, ieng leia tu hin Gospel centenary le kei kop ei tum phet phet am a na? Hi hi kher hi chu ei hlap suol el chauh khom ni loin ei hlap khawhlo der niin ka ngai.

Kristien sakhuo trantu Lal Isu Krista’n Kaisar ta chu Kaisar kuoma pek el ding a ni thu a hril kha ei la tiem naw am a ni ding maw? Kei ka lo ngai ve dan chun, hi thu hi chieng em ema secular thil le sakhuo thil thre thrawp thiem a trulzie Isun a hrilna a nih. Chuleiin Sikpui Kut chu Hmar hnamphung inentirna ni sien la, Centenary chu an sakhuo thil ni lem raw se. Christmas le Fresher’s Meet ei kei kop teu awm si naw a.

Hmar khuo Senvon-ah 1910 in Chanchin Thra a hung lut a, nisienlakhom Hmarhai ram sat hmasak le Hmar tam tak cheng vena Mizoram khawpui Aizawlah January 11,1894 khan missionary an lo lut tah. Ka chanchin lawrkhawmin a hril dungzui lem chun Mizoram-a Kristien-a inpe hmasa tak Khuma, June 25, 1899-a baptisma inchang kha Hmar a ni nghe nghe.

Sikpui Kut hi khawvela Hmar um po po hai Kut a nih ti chu a kal ei um ka ring nawh. Delhi a Hmar chenghai hlak hi hmun tin ram tina inthoka hung ei tlat bok si. Hmar Christian Fellowship Delhi a ei Evangelical Secretary R.H. Hminglien hi Mizoram Hmar a na, Delhi Hmar Welfare Association a Chairman D. Ruolngul hi Manipur Hmar a ni a, Hmar Students’ Association. Joint Headquarter Delhi-a ei General Secretary Thlirnawnmawi hi N.C.Hills (Assam) Hmar a nih. Chuleiin Senvon-a Chanchin Thra lut leh tinzawna Delhi-a Sikpui Kut ei hmang tum a ni chun: Hmarhai hi tu ha’m an na? Manipura inthoka suok chauh khi maw Hmarhai chu? A danghai hi Hmar tehlem maw? tihai chu zawna poimaw tak tak hung ning a tih.

LUM LO DEI LO

Thupuong 3:16 a chun “Dei si lo, lum si lo a i lum puot chauh leiin ka baua inthokin peisâk ka ti che” ti an ziek a. Hi Bible chang hi chu ei berampuhai po po ‘ultimate favorite’ chang ti inla khel ni kher naw nih. Martin Luther King Jr. khomin khawvela “moral conflict” a um phata thrangna bik nei lo hai hi hremhmuna khom a satna lai tak chang ding an nih a lo ti hiel reng a nih.

Sikpui Kut 2009 khom hi secular ni chie si lo, sakhuo ni teu teu bok si loa ei hmang chun peisak chu ei chan ding reng a nih. Sunah ‘Centenary e, Kristien kum zakhat e’ ti a, zanah ‘Nang naw chu lunglai hnemtu an um nawh’ ei ti nawk ding tho chun ‘a biling a balang’ a khai chu ei phu hrim hrim. Biek ina Sikpui inthang ei ur thei naw ang bokin Sikpui Kuta khom ‘kalvari hningzu’ inrui thei naw mei nih. Ei Kristien nina ei hmusit mei mei ning a tih.

Delhi-a Hmar nauhai hi ei hman laia chu changkang le thilthawthei takah ei inngai si chun, secular le sakhuona hi thlier hran thiem tum ei tiu. A ni naw si si chun ka ruolpa William Darngon a ti dan angin, tu kuma ei Kut hmang ding chu “Sikpui Kut100- In special memory of Watkin Roberts” ti el ei tiu.

(27^th November’09) (zach_varte47@rediffmail.com)