INPUI: Hmar News & Info

By L.Keivom, Inpui.com Columnist

Kei chu Krista kuomah kraws-a hemde ka ni tah a,
ka hring zing ta naw a, Krista chu keimaah a hring ta lem a nih.
Tuta taksaa ka hring hi mi hmangai a, ka ta dinga hringna petu
Pathien Naupa ringa hring ka nih. (Gal.2: 19-20)

Thlaichi hi a thi phot naw chun a hring thei nawh. A hring ding chun a thi hmasak phot a ngai. Fanghma mu amanih vaimim mal amanih a hringin tû la chu hmon hmang el a tih. Nisa amanih rap amania inhro trawl hnunga i tu ruok chun hringna thara trovin hung mawng suok a ta, a puitling pha rà tam tak insuong a tih. ‘Bu mal khom hnuoiah a tla a, a thi zet naw chun bu chi malin a um zing hlak a, a thi ruok chun rà tam tak a’n suo hlak’ a nih (Johan 12:24).

Hi hi Khuonu thil rêl dan a ni tlat leiin, thi thei lo Ama Pathien ngei khom mihriema hung insiengin, Mihriem Naupa le Pathien Naupa hming chawi kopin, Kalvari tlang, Luru Hmun an ti bokah kraws-ah a hung thi a, phûmin a um a, a tho nawk a nih. A thìna, phùma a umna le a thonawkna chun rà ropui hril seng lo, chatuon bohmangnaa inthoka mihriem intlanna chu a hung intlun tah a nih. Chu thilpek ropuizie chu annawm Johanin, “A famkimnaa inthoka ei dong seng chu lunginsietna ngot lunginsietna ngot a nih” ( DV 1:16) a lo ti chu ni. Chu umzie chu tawpintai nei lo lunginsietna tìna a nih. Ei Baibul inlet hmasaka chun ‘lunginsietna chunga lunginsiet nawksawnna’ tiin ei hmuh. Chu umzie chu chin (limit) nei, lunginsietna dawbol chauh tina a nih.

Hi thu hi hieng zawng hin hang hril fie inla. India sorkar pêk tribal concession chu zaa 50 a nih. Student’s Concession khom zaa 50 a nih. A thuphungin, tribal ni bok, inchuklai ni bok chun a pahnia lak kopa a thlawna rêl le vuongnaa inzin thei a nih. Amiruokchu, India sorkar hnuoiah konseson hrim hrim a ruola pahnih lak kop phal a ni nawh. Chun, India sorkar lunginsietna konseson chu tiem chin nei vong a ni a, sorkarin a nuom pha pha a sukbo thei. Pathien lunginsietna ruok chu tiem chin nei lo, chatuon dai lunginsietna a nih. Chu lunginsietna chu hmangaina famkima inthoka luong suok, a thlawn top, iengkima dinga chatuon dai a nih. Lunginsietna dawbol, lunginsietna chunga lunginsiet nawksawnna chauh a ni nawh.

Chu konseson famkim, hla phuok thiem Edwin Rowlands (Zosaptharin) in ‘Thûkna pui’ a ti le Kamlalin ‘Thûkna Ropui’ a ti, suol bawia inthoka mihriem intlanna sin chu Iengkim Pathien ta ding chun voi khat chauh bau hang phonga thaw vong thei a ni vei leh, ieng leia Hemdêna Tlang fe thleng kher khera a thaw a ngai am ning a ta? Ieng leia Abraham kha hemdêna tlang kai a, a thil hlut tak, a naupa hringna inhlan dinga Pathienin a phût kher kher am ning a ta? Chu lampui, Golgotha tlang thlavaium chu hraw kher lova Jehova Jire tlang sîp tlung theina lampui dang kawitan a um naw am a ni? Aiguptaa inthoka ram tiem Kanan ram, chawlkar khat vêl chaua tlung el theina lam phei inhoi Mediterranean Tuipui kam Gaza phaizawl tieng a um vei leh, ieng dinga long khom nei bok si lova Tuipui Sen kàn a ngaina le kum sawmli tâl top el Sinai thlaler nunrawng, thina ko tlâng hraw a ngaina kher kher lampuiah Pathienin Israelhai kha a thruoi am ning a ta?

A donna pakhat chu, thlaichi hi a thi phot naw chun hringna tharin a tro thei nawh ti hi a ni ring a um. Tarkûn hnung, kum zaa nau lutir hmu phak chauh, tu mong a ben hun ding khoma ben phak ve lo Abraham chu Babulon phaizawl ram hnienghnara inthoka ram a la hriet ngai hlei lo hluo dinga rawlin a ko suok laia a thu zawmna kha a kotu chun a’n ring songtir el nawh. A kotu thu chu ring ngam ding le a dit zawng anga nung thei dingin ni tinin Abraham chun ama dit zawng le nuom zawng chu hemdea a thisan zing a ngai a nih. Chu hemdena tlanga fiena vawrtawp a tlung chu, hlanbiekna dinga ran aia a naupa Isak inhlan dinga Pathienin a phût trum kha a nih. Chu chu Abraham ta ding chun thil harsa tawp a nih. Hnuoia trieu zât le vana arasi zâta tam a thlahai sukpung dingin Pathienin thu a tiem a, sienkhom thlatu ding nau pasal a pêk el si nawh. Tarkûn chenin a nuhmei Sari sûl hlak chu a nuor si. An hmabak chu suonmong a nih. An suonmong chun a pasal kuoma Pathien thutiem chu a’n khêl ding a nih ti Sari’n a ngaituo chun a bei a dong thlu thlawt ni naw nim, a pasal chi thlăna dingin a siehlawnu Hagar a ruoi ta hiel a. A pasal chî hlak chu a lo chang chieng khop el a, Hagar chun nau a pai nghal a, Ismail a hung pieng tah a nih. Amiruokchu, Sari remruotna hi hemdĕna tlang le inzom lo thil a ni leiin a kakhawk a râpthlâk a, voisun chen hin Ismail thla Arab mihai le Isak thla Israelhai chu tawp loin an inbakkei zing a nih.

An chanchin ei sui pei chun, Ismail a pienga inthoka kum sawm hnunga khom Sari chu a la ching ta zing a. Kum 90 a hawl phak hnung, Ismail khom kum 13 vêl a niin a sûl a hung inhong ve ta trawk a, nau a pai a, Isak a hung pieng tah a nih. Tuhin chu chi thlatu ding a hung pieng tah leiin Sari chang khom a par ta a, a pasal leh an ha ngot a’n lang ta thung a nih. Sienkhom, Isak chu tleirawl chedek a hung ni chauin pumraw thilhlâna inhlan dingin Pathien chun a phût ta tlat el! Nau dang nei nawk dinga inbeisei ta lo, Abraham le Sari ta ding chun an hnuoi beisei tawp innghatna an nau nei sun inhlàn chu, mihriem mihriemnaa chun, thil invetthlak le thil thei lo tluk a nih. Sari ngirhmuna ngir nuhmei tu khomin chuong ang thil chu thaw dingin an pasalhai an remtipui ring a um nawh. Suonlam ding khom an nei thra. An inhlân chun Pathien thutiem sukkhêltu an ni thei ding a nih. Mani nau that chu tuolthat a na, dan khomin a phal bok nawh. Chuonga mani nauhai that a, hlanbieknaa hmang dinga ngêntu Pathiena hang nei tum tlat chu mihriem sierkopa hang chok chun thil invetthlâk tâwp a nih. Chun, chuonga an naupa an inhlàn chun an kawl le kienga um hnam, pathiena Molek be a, an nauhai inthawinaa inhlan hlaktuhai leh an indangna um naw nih.

A siehlaw Hagar chu chi thlana dinga pawl el dinga Sari’n a rot laia ringnaa thaibawi lo thlang tah Abraham chun a nuhmei thil rot a zawmpui leia a insunga buoina namên lo a suokzie a hriet chieng ta êm lei ni ngei a ta, a thuthlung naupa inhlàn dinga thupek a hmu zet chun Sari phal le phal naw thu a ngaituo ta naw a, rawn khom rawn der loin khawvela a dit tak a naupa chu inhlanna tlang, inpumpekna tlang, hemdena tlang, Golgotha a panpui el a nih. Khawvela a thil hlut tak, a naupa a’n rona le a hmangaina po po hemde a, phûm a, a kotu kona san anga nun thara hring le nung dinga a’n hlàn ngam phing leh Jehova Jire, hnèna tlâng le malsawmna tlàng chu a tlung tah a nih. Chu chu annawm Pastor Thangngurin hla mawi taka a lo khèkpui kha.
Salem puonzar hnuoia himna,
Salem Lalpa kuta malsawmna,
Jeho-Jire tlanga mihai chun,
An chang ngei ding a nih;
Haleluiah Amên.

Jehova Jire tlang, hnèna tlâng le malsawmna tlàng ei ti hi a hming dang chu ‘Hemdèna tlàng’ a nih. Chu chu Pathien dit zawng anga a thupek hlenna tlang a nih. Chu tlang chu chânna tlang, inpumpekna tlang, inhlânna tlang, thu zawmna tlang, inngaitlawmna tlang, tlawmna nun changna tlang, mi hmusit, endong le invêt hlawna tlang, tuorna tlang, inrûmna tlang, hnena tlang, hlimna le malsawmna tlang, suonmong khoma chi thla tiem seng lo nei theina tlang a nih. Chu tlâng chu hringna thara leng dinga ‘mihriem hlui’ hemdena tlâng chu a nih. A hemde rawn le thisan rawn rawnin hringna thar an nei rawn a, a hemde tlawm le thisan tlawm tlawmin hringna an nei tlawm el a nih. Chu chu a nih Tirko Paulan suol thisana Kristaa nun thara lêng thu a hril kha (Rom 6:1-18; Kol 2: 12-14; Gal.2:20).

Inremna dittu le zongtu chun amaa inremnawna, a hringnuna bu khuor a, kansar anga a nun fa setu hlak po po kha hemdèna tlangah a hemdê phot a ngai. Hemdê nuom si loa inremna a zong pha leh a hlawsam hlak a nih. Inremna tlang zuon phak si lo le intheidana lungril hemde si loa inremna dittu chu hmur inchîp hmaka innui rak tum ang a nih. A hemde ruok chun ama tienga bêk inremna um a ta, hadam a tih. Mi hnàmtu le mi theidatuhai theida dan hlawk tak chu an mi hnàmna le theidana po po hemde a, anni hmangai lêt a nih. Hlim nuomtu chun amaa hlim nawna siemtu po po kha a hemde a ngai. Chuongang bokin tlawm nuom chun chapona le inngaihlutna lungril po po thè thlâka hemde; lungrila zalen nuom chun lungrila zalen nawna siemtu po po hemde; mi dang chawimawi le inpâk thei ding chun mani thra intina le mi dem nuomna po po hemde le mani neka mi dang thra lem vonga en theina lungril put; taima ding chun thabona hemde; thil chîng thra lo bansan ding chun thaw châkna le thaw dinga mi turtu hemde a nih. Tlawm lem ni nuom lei amanih, chunghnung lem ni nuom lei amania insuol chu ‘lem ni châk tumnaa’ inthoka suok ve ve a ni leiin a porchè dan a’n ang char a, hemdena tlang tlung hma nun ve ve a nih.

Hemdèna tlàngah hemdè nuom si loa mihriem hlui inkot luoia kotkhar chîna lut tum chu thil thei a ni nawh. Inleng naw ti nih. I’n lengna ding chu kotkhar lien, bohmangna lampui chu a ni lem. Hemdèna tlàngah i hemde ruok chun, i phur hung zâng a ta, i phurrik po po phurpektu che Isu chu kal zâng vûkin zui thei tang i tih. Hemdèna tlang tlung phak lo nun chu nun rik le rimsi a nih. Hnèna nun changtu ei tihai hi hemdèna tlang tlung phak chin, Krista hnèna kraws-a inhemde phak, ni tin thia hringna thara hringhai chu an nih. Chu chu a thuphung chauva hretu le mani nuna a tak ngeia hmangtu nun chu hremhmun le van ram angin a danglam a nih.

By L.Keivom, Inpui.com Columnist

Aw Pa, anni hi ngaidam rawh, an thilthaw hi an hriet naw a nih.-Luka 23:34

            Pa mak le dangdai tak chu a ni phot el. Hming khom a hau hle. Mihriemin thil inkawkal le inpersana ei ngai po po nei kimtu a nih. Mihriem ni si Pathien; Pathien ni si Pathien Naupa; Pathien Naupa ni si Mihriem Naupa; rethei hle sia hausakna po po neitu; tlawm le inhnuoi hlê sia lalna le thuneina po po changtu; pienhmang thratna le hmêl mawina, hang lungdumna hrim hrim nei loa zawlnei Isaiin a hril ni bok sia ngainobeinaa sip; lungngaina le natna hre ve ni sia thlamuongtu; sikul kai phâk ve si loa thiemna po po koltu; dàn inchûk si loa ukîlhai ukil; damdawi tieng inchuk si loa daktorhai daktor; innêm vieu sia pa khauh tak el; inngaitlawm èm ém sia inngaihnuoi ngai lo hrim hrim; indo inlengtir dinga hung ni sia Remna Lal ni bok si; suol nei si loa misuolhai ruol thra le misuolhai ta dinga hemde; thi bok sia tho nawk, chatuona hring zing chu a nih. A chanchin ei bi chieng po leh a makna ei hmu rawn ting el a nih. A hming pakhat khom ‘Remruottu Mak’ a ni hrim a nih. Chu hming chu put naw ruol a ni nawh. Eini rawi lem chun a makna tieng, ‘Maka’ a nina hi ei uor nuom zawng tak a nih.

            Mihriem insieng dan pangngai anga hung insieng a ni naw bakah ran bûkah a pieng a, a khum chu ranthleng a nih. Sienkhom, a piengna hmun tlawm le inhmè lo zetin khawvela naute pieng tah po po laia hril hlaw tak le chawimawina dong ropui tak a nih. A pieng thu puong dingin vanin zaipawl le vantirko tlangsam a hung tir a. Van ropuina aiawtu dingin palai ringum, arasi var tak a hung inlang a, a piengna zawn chunga chun chibai buka ngîrin a êng sèt a. Chu arasi mak chun chibai bukpuitu ding khawsak tienga inthokin mi var pathum a hung thruoi bok a. Hmêl hriet lo, berampuhai chenin, chibai bûka hung an insùlpêl zut el a nih. Ran zun hìng le ek rimsie ur kârah chuong ang khopa vàn le hnuoiin chibai a buk lut lut khopa ropui si a hang pieng el chu, tienami phuoktuhai hisapna khel tieng daia lêng chanchin mak, kumkhuoa hril tawp ngai lo ding chu a nih. Kum sanghni invoi hnung khomin khawvel hmun tinah a piengcham ei la lawm lut lut zing a, a piengcham lawmnaa ran tlu zât hi tu piengcham lawmnaah khom ran a la tlu ngai nawh. A hming “Remruottu Mak’ hi a phû hlie hlie a nih.

            Chuong anga tlawm le chuong ang khopa ropui ni si chu a hung seilien dan chanchin sui ding a um mang dèr nawh. A pieng dan le naute a ni lai a chanchin tlawmte le kum sawmthum a tling hnunga rong a bawl hun inkarah voi khat chauh a’n lang a. Chu chu kum sawmpahni a tling kuma a nu le pain Jerusalema an thruoi thu le an hriet naw kara Tempula a lo fe leia an zong rak thu Luka’n a ziek chu a nih. Marka le Johan lem chun a pieng thu khom ziek loin kum sawmthum a tling hnunga rong a bawl chanchinah an tran top el a nih. A pil hmang sawt taluo lei hin annawm Tuolte Vanglaia thil zêldin thiemhai thukhawchang hmangin mi threnkhat chun Kashmir-ah thlarau trêning a hung lak nia an hril hiel chu ni. Chuong ang hrilna lekhabu chu iemani zat a pieng tah bakah Japan rama chen Isu sulhnu uma hril le ring pawl an um hiel a nih.

            Chu chauh chu a ni le! A dam laia hmutu tu khomin a lim an ziek ti ei hriet nawh. A pieng hma, kum zasari neka tama zawlnei Isaiin a lo mitthla dan chun pienghmang thratna le mawina hrim nei lo, lungngaina le natna bawm, mi hmusit le endong a nih. Chuonga ngainobeina hrim nei loa a hril chun lemziektuhai ngaituona mit a lâk tlat a, zaipuhai lung kuoiin, a chawimawina ding hla ropui tak tak an phuok a. A lim an zieknaa lekhapuon, lekhatui, puon le rong chi hrang hrang an hmang ral rawn tak dingzie chu hisap ngaina khom a um nawh. Lim ker le ser thiemhan a lim an kerna dinga sailungvar le lungmantam chi hrang hrang an hmang tahai chu intieng khawm inla, muol tam tiet ni tang a tih. A chanchin ziekna lekhabu chu khawvela lekhabu hlu tak, sut non rawn tak le trong tum tuma inlet rawn tak a nih. A san iem ning a ta?

            Mihriem khawvela chun thaw ra sîk le inthungrul hi dàn thraa ngai a nih. Mit aiah mit, hä aiah hä, kut aiah kut, ke aiah ke, hliem aiah hliem, vuok aiah vuok. Mi hmangaituhai hmangai a, mi hmêlmatuhai hmèlmàk. Mi’n pâktuhai inpâk a, mi demtuhai dem phier. Mi kantuhai kan a, mi tuithlàrtuhai tuithlàr. Mi fieltuhai fiel a, mi thlimtuhai thlim ve hmak. Chemsen mi’n lènkhumtuhai chunga chemsen inlèn. Inthungrulna khawvel a nih. Chu khom chu thil thra tienga inrul kongah a rultuin rul tlawm ni inchuin kut a’n tìm a, thil thra naw tienga inthungrulnaa ruok chu kut a hlawk a, bân khom a sei nuom.

            Ama ruok chun mihriem ngaia thil thei ruol loa inlang, dàn letling a hung zirtir a. Misuol chu khing lo ding. Bieng chang tieng bentu chu voi tieng khom dawpek ding.  Zakuo mi’n chùpêktu kuoma chun puon khom inlâktir nghal ding. Hmêlma hmangai ding. Mi nghaisatu le suknomnatu chu trongtraipek ding. Mani ei inhmangai anga khuo le venghai hmangai ve ding. A hrila hril chu olsam tak el, a thawa thaw le a zawma zawm ruok chu harsa tak vong a nih.

            Chu tak chu a makna a nih. A mak nawkzuolna chu, ama ngeiin, mihriem taksa puta a hung zăwm muolsuo vong kha a nih. Mihriem taksa ngei puta a hung hlen suok ni naw sien chu, a thu inchuktirhai chu mihriem zawm thei ruol lo, duthusam a phulpui angah mihaiin ngai an tih. Mi tam tak chun a thil tuor po po a tuor muolsuo theina san chu Pathien Naupa a ni leiah ei ngai. Sienkhom, ama ngeiin a Pa thrang lo chun ieng khom a thaw thei nawzie le “Keimaa um zing Pa chun ama sin a thaw a ni lem,” tiin a hril (John 14:10). Pathien leh inzom zing a, a thu zawm a, a hratna hmangtuhai chun hmangaina nun a tak ngeiin an nunpui theizie thu chu ama nun ngeiin hril fiena a hung ziek a nih. Chu nêka hril fiena chieng lem chu a um thei nawh. Chu chu mihriema a hung insiem san thuruk ropui laia pakhat chu a nih.

            Roman lalram nêksawrna hnuoia intâng Judahaiin anni hung sansuoktu ding Messia beisei taka an Tlumte thlir lai chun an lo suongtuo dan naw takin ama, Judahai lal inti, Pathien Naupaa insâl, Messia nia inhril chu a hung inlang tah tlat el a. A pieng le murna tlawm hle sien khom thil mak thaw thei le mi hîp hrat èm ém el a ni a. Chuleiin, mi tam tak chun an bawi ringkol bàt chu hlîppek a, zalenna ram tlungpui a. Davida lalram indin thar a, kum sang rorel tranpuitu dingin an ring a, an beisei bok a nih. Hi lei hin zuitu khom a hau tran hle a.

            Sienkhom, Judahai lalram thar beisei le ama lalram thar indin tum chu an inmil ta tlat nawh. Judahai chun Roman lal Kaisar baksamah thrâm a, a bekah dumade inlêng chuoi khopa ben dingin an lo beisei kha a ni a. Ama hlak chun Kaisar thil chu Kaisar kuomah pe ding le Pathien thil chu Pathien kuoma pe dingin a lo hril daih el si. A zuituhai lung a hnuol; an hnàr a kîr. Judahai ser le sang le dàn kulmûthai chu chawi sang neka inchuktirna dangdai hmanga a hung sirsop hnung lem chun an năk a kal takzet a nih. Hlêpru, uirè le mi tuithlàr hai leh inpawl a, an inah thlaithleng a ot zeuh zeuh hnung lem chun, “Si si si, mi tirdakumpa, mi suol inah a lût ta rèk saw!” tiin a hnung tieng kutchalin an kawk zui ta huoi huoi el a nih. Hnama inthlierna le indaidanna bang, Juda mi firhai bawl, hmangaina chema a hang thriek duoi duoi an hmu lem chun an hachang a’n thak zuol a. A dodâltu khom mautam mazu angin an hung pung a, a thi dan ding phierruk chu sinpui taka nei pawl khom an hung um ta hiel a nih. Kum thum rong a bawl hman chauh ti chun hmangaina maichamah hlanbiekna hring le thienghlima inhlànin a lo um tah a nih.

            Chu inhlàna a umna champha chu khawvel hmun tin deuthawha kum tin inser a ni hlak a. Mithi sûn ni ni siin a hmingah Zirtawpni Thra (Good Friday) ei ti nawk dai si a nih. Hi ni ropuia hin a chipuihaiin kros-a an hemde laia a’n rùm ri le hmangaina bau thlum taka inthoka hnĕna hlado a’n sam ri chun a mi hung dèng non nawk hlak. Mitthlain Jerusalem tieng vuongin Kalvari muol ka fang hlak a. Suolna nei dêr lo Nazaret tlangval, a chipuihai ngeiin man a, soisak a, vaw zot zot a, chil sakkhum a, a hmaiah ben a, khêl muhlum tinrênga an hĕk lai le Roman sipai lubawkhaiin insukphokna le insukparâpnaa hmang a, hemde dinga an pek suok hnunga siel lulul kei le som anga lunginsietna thrang dêr loa kut an thlak lai dam chu ka thlir a. A nih, khâng ang khopa thil thaw thei kha a tlawm a, a tlawm ngawi ngawi a nih. Sienkhom a dol zor nawh.

            Thi chena tlawm a thlang nuomna tak chu a makna a nih. A thilthawtheina hmang nuom chu ni sien, a suknomnatu le cheksoltuhai kha Maurawkel zawng khuong thilthawtheina nêk daia hrât lem le inrang lem hmangin, “Thi ro, pip” a ti ruolin bohmang song an tih. Kei chu ni lang, an du hmu naw chieng ngot an tih. Ei unau hnam threnkhat, trongsie inphur tienga hausahai lem chun rawn intàm tawl ngot dingin ka ring chu tie.

            Ama ruok chun a bău a ka nawh. A kut hmawr khomin tawk lêt a tum nawh. A sepui raw tuor tlok tlok el a nih. Mi danglam chungchuong a ni a. Hmêlmahai hmangai ding le mi suknomnatuhai trongtraipek dinga zirtirtu a nih. Chu chu ama nunah, mihai mithmuah ngei kros-a chun a hlen tah a nih. A nghaisatuhai chunga phuba la nêk hmanin, “Aw Pa, anni hi ngaidam rawh, an thilthaw hi an hriet naw a nih” tiin a hnipek lem hlauh a nih. Chu chu a nih hnĕna hlado. Chu chu a nih hnĕna nun.

            Hi trongtraina anga hnĕna hlado ropui lem hi a um ka ring nawh. ‘Rulpui Tar’ Setanin hi hlado ri hi a hang hriet chun thi hmun suolin inrûm ngur ngur ngei a tih. Chu hnêna chu mihriem siem ralthuom le tharum hrâtna leia chang thei a ni nawh. Kapathîr anga khauh le chang mihriem lungril khom sun tlang a. Vathru anga nun nema siem thei hmangaina hriemhrei hmangin a nih a hnè lem chu. Kalvari hmangaina hriemhrei hmangtuhai chu Pathien hrâtna le thilthawtheina intrawmpuitu an ni tlat leiin, chauin an tlu ngai nawh.

            Chuong ang hringna tui luong laiin,

            Tu’m dangchârin chàu an ta?

            Lalpa chu a petu a nih,

            Chatuonin tawp ta naw nih.

Hi hnèna hlado insam ve thei hi mi ei um am: ram le ram inkarah, hnam le hnam inkarah, sungkuo le sungkuo inkarah, mi mal le mi mal inkarah, kohran le kohran inkarah, pawl le pawl inkarah?

            Ka theinghil ngai lo chu kum 1970-a Churachandpur-a chawl hmanga kan fe truma ka thil tong a nih. Chuong lai chun kohran inkârah innghirnghona le inbakkeina a sosang hle a. Krista hming sâlin, Setan ralthuom intheidăna fei chu chelin an intin tuo thrup el a. Baal rorelna hmaah an thubuoi put lutin, thiem chang lem ni inchuin, sum tam tak sêngin, mong an inhlim ton zak zak el a. Court ngaidana a archal khong chan chang lemhai chun a tlawm lem hai chu kotthlêrah diriem takin hnĕna hlado an insam khum a. Kros-a Krista hlado insam le a hnung zuitua insâlhai hlado insam chu a va hang intu ta naw ngei de aw! ka ti lungril a.

            A ni hrim takluo a. “Aw Pa, anni hi ngaidam rawh” ti hi insamna le hmangna ding hun le hmun ei pal changin kohran ngei khomin Setan hlado insam ei thlang lem rop hlak. Pulpit tlangah hi thu ropui hi chil far zoi zoiin ei sermon hlak a. Sienkhom, miin ei poi an tawk pha chu ngaidam nêkin thungrulna hmola khom a rik tak ei inchŭ nawk lem el hlak. Chuong chu a ni lai zingin, inkhawm trin tâwm zătin “Kan chunga thil suksuoltuhai kan ngaidam angin” tiin khêl buru ei insam ruol nawk huk hlak.

            Krista hnĕna hlado hi ni tin mi mal, sungkuo, khawtlang le hnam nunah lungril takin insam thei inla chu ei ramah lawmna, hlimna, inremna le thlamuongna rimtui inzâm a ta; inkhawm zata “I ram hung tlung raw se” tia ei samphuol hlak hi a takin hung tlung bok a ta, hnuoiah van ram indin ei tih. Ngaidamna nun chu tlawmna nun indik tak, hmangainaa inthoka suok, hrătna hlâwm, hnĕna nun a nih. Chu Krista lungril le nina chu a nih tirko Paulan put ve dinga a mi’n fui mol mol chuh (Filipi 2:5-11). Chuong ang puttuhai baua inthok chauh chun Kalvari hnĕna hlado hi lungril taka insam thei a nih. Samphuol hlado a ni nawh.

            Tu kum Good Friday (March 29, 2013) hmangtuhai le hi thusep tiemtuhai po poin ieng amanih kong zawng bĕka Krista zara hnĕna hlado an insam theina dingin ditsakna chibai ka bûk. (March 27, 2013 Delhi. Original text written in Wellington, New Zealand April 30, 1984)

By L.Keivom, Inpui.com

Kum 2013 ei chuong luta inthoka ei khawvel chikte sunga titi suktamtu chu Independent Church of India General Assembly 63-naa ICI Kohran bik hminga Delhi sunga remchang hmasa taka ICI hminga a hrana inkhawmna nei tran dinga an thurĕl Resolution No. 5 a nih. Hi thil hin inpumkhatna le inthuruolna nasa taka a suksiet bakah kakhawk ditum lo tam tak a nei ding nia Delhi tlanga hnam lungthu pathum- Hmar Students’ Association (HSA Delhi Joint Headquarters), Hmar Christian Fellowship, Delhi (HCFD) le Delhi Hmar Welfare Association (DHWA)- haiin an hriet leiin an dit naw thu le an thurel hi sût dingin ICI thruoituhai kuomah an intlun a. Chuong ang bok chun Hmar Christian Fellowship, Guwahati khomin an intlun bok a. Hmar Christian Leaders’ Forum huoihota Gospel Centenary 2010-a Declaration No. 5 chu ICI General Assembly Resolution No. 5 hin chieng taka a bawsiet leiin, HCLF khomin, inza phura mi en a ni angin, a mawphurna chu a hlen ve ngei dingah ngai inla.

Hnam kansar

Ei hriet seng tah angin, kum 1928/29 laia Watkin Roberts (Saptlangval) le H.H.Coleman insuotna leiin kohran pawl hni a hung suok a, hnam inthuruolna le inpumkhatna a vuok dar a, chu panna huoisuol chu tuorin kum sawmthum ei inrŭm a. India ramin zalenna a hmu hnung le mani inbêngbelna ding a hrana District suol suok nuomna thlarauin mi hung kei khawm phing leh, hnam pum huop le aiawtu ding Hmar National Union (HNU) nihliep hnuoiah ei hung inlawi khawm a, chu boruok chun kohran pumkhata inlawi khawm nuomna a hung hring suok leiin Independent Church of India (ICI) hnuoiah a tam lem chu ei hung insuikhawm nawk a, hma ei sawn duok duok a.  Kum sawm hnungah ei kansar benvon a hung suok nawk a, pawl hniin ei hung inphel nawk phok a, chemtum chawiin ei intintuo a, thiem chang lem nuomin Pathien hmaah ei inhĕk tuo bok a. Kohran hming sâla mani pawl indik inti seng eini rawi laia Pathien ni hih thil rinum le inzakum tawp a ni ka ring.

Delhi Hmar Fellowship

Chik zuola ei sui chun, kum 1910-a Senvona gospel a hung luta inthoka voisun chen hin kum sawmthum vel ti naw chu pawl inthrĕna hringolin a mi la man de ngat ngat a nih. Hi boruok lo pal tah le pal nghok tah, ei khawvel puo tienga fakzongna hmu thei, entirnan Delhi tlanga hung chuong kaihai chun pawl inbakkeina puoa lungruol taka mani tronga Pathien biek tlang diel diel nuomin September 4, 1988 khan inkhawm an tran a, an tranna khom Lalzar B.Sinate kuartar, ama Guwahati tieng, Regional Director, Staff Selection Commission hnuoia deputation-a a um laia Laldatlien F. Tusing le a hnungah C. Thant Khobung-in an lo hluo, 390 Sector 9, R.K.Puram-ah a nih. Ad-hoc Committee hai chu H.Thangluaia (AIR), Lalruotthang, Dr. Chongrolien Chonzik, Darsiemlien Ruolngul, Laldatlien F.Tusing le C. Thant Khobung an nih. An hung pung pei leiin October 22, 1989 khan Free Church, Parliament Street-ah an inson a. Chu khom chu an intar tah leiin October 4, 1992 khan tuta inkhawmna Apostles Methodist Church, R.K.Puram Sector-4 a hin an inson a, tu chen hin an la hluo tah zing a nih. 

HCFD thupui chu “Khawvel po poah fe unla, thilsiem po po kuomah Chanchin Thra hril ro” (Marka 16:15) ti a ni a, chu mawphurna chu hlen dinga kohran pawl hrang hranga inthoka Delhi-a hung fuon khawmhai chu pumkhata suikhawm a, pawl rong bawl loa Chanchin Thra the dar a, ringtu a tam theih ang tak siem a nih. Khauhlâng ben threlh an ti ang elin, pawl thil a hung luta a baw dar nawk el inlauna a lien leiin, amaa kea a ngir nghet thei hma chun mit nauleng anga fimkhur taka vĕng him trûla hriet a ni leiin, HCFD Executive Committee-ah Hmar kohran pawla thoktu, Delhi le a sè vèla rongbawltu tu khom member-a thlang awi lo a nih. Delhi tlanga hin kohran hrang hrang hnuoia rongbawltu pastor le evanglis mi 5-8 inkar, Hmar Fellowship-a inlawi an um zing a, chuonghai chu ser le sang hmangna iengkimah hlawk taka hmang an ni a, rorêlnaa ruok chu, a hrana fiel an ni naw chun, an thrang phal a ni nawh. 

Hi hin umzie inthûk le inril tak a pai. Kohran inpumkhatna hi a thuphunga chu a dit naw ei um nawh; ei duthusam ram, rangkachak ram, ei ‘El Dorado’ a nih. Sienkhom a taka hang phur suok ruok chu thing lŭt-inlè kei mar tum ang tluka harsa a nih. Thaw ding chun hnuoi thar le boruok thara thing thar introtir le duot tak le fimkhur taka enkol a nih. Chu chu a nih Sinlung Thar indin nuomna lungril puthaiin Delhi tlanga an lo tran chu nih. Chu pawl tlawm taka inthok chun thil thei ta loa ngai, inpumkhatna chu damte’n a hung inthrang lien a, inhnarum khopin a hung par suok tran a. Chu huonga chun hmun hrang hranga inthoka Delhi-a hung inzin tu kohran pawla mi khom an hung chuong lut a, rongbawlna hun remchang a um chun chanvo pek an ni bok a, tu khom an thla a ngam a, ta-ah an nei a. Hieng ang boruok le ngirhmun hi ni khat thil thua siem thei a ni nawh. Mihriem keitleina dingin tha le zung senga kum tam inrimpui a ngai angin a ngai ve. Suksiet ding ruok chun silai voi khat hmet amanih kawlhnam vilika chop le chila inthat thei a ni ang hin suksiet thei a nih.

Chuong ang inpumkhatna le inthuruolna boruok hlimum le inhoi chu a sukse thei hrim hrim laka inthoka inveng fimkhur chu Delhi tlanga cheng Hmar hnathlakhai chun thil thaw makmaw-ah an ngai. Pawl indin rawn hi inpumkhatna sukbahlatu a ni nuom hlak leiin, indin dinga norna um hlak sien khom lungthu pathum- hnam thil le khawtlang invongna thil enkoltu dingin DHWA, inchuklaihai le an rongbawlna tieng enkoltu dingin HSA, sakhaw thil enkoltu dingin HCFD- tihai bak chu indin ngai le trulin an hriet naw a, indin a ni bok nawh. Kohran pawl lek lem chun Hmar tronga inkhawmna a hrana thaw an remti naw leiin May 2007 khan chu thu le invong dan thra lem rurel duong suok pei a trulzie hril tlang dingin DHWA chun umni khama ruoi buotsaiin inkhawmpui a huoihot a. Mosie ngeiin Levihaiin Ebal tlanga thu insam a, dan le thupêk bawsetuhai chu trongsie inphur a, mipuiin ‘Amen’  an lo ti dan ding a’n chuktir (Deut. 27:15-26) hiel ang khan, chuong laia DHWA Chairman Darsiemlien Ruolngul, hi inkhawmpuia Moderator-a thrang inrawina hnuoiah Pastor James L. Joute-in, “Delhi-a Hmar mipuihai ditzawng bawse a, a hrana Hmar tronga inkhawm trantu chu trongsephurin um raw se” tia inring tak le khûn taka insama, mipuiin voi thum zet bân phara an ‘Amen’ khum tah a nih.  Chu nêka inring lema Delhi tlanga Hmar mipuiin inpumkhatna an ditzie thu hang hril uor dan chu a vâng hle el thei. 

A kaikuongpa

A hmaa ei hril tah, ICI General Assembly 63-na Resolution No. 5 chun Delhia Hmar mipuihai dit dan le inpumkhatna thuthlung, kum 25 zet an lo kengkaw tah chu ICI thruoituhai Delhi-ah hunga March 3, 2013-a an hung bawsiet leiin nasa takin Delhi chauh khom ni lo, Hmar khawvel a nghor a. Thu buoi a um hrim hrimin a kaikuongpaa mi ngai le intum an um tĕi hlak a. Hi thila khom hin a kaikuongpaa mi ngai le hril chu South Korea-a kohran pakhat Shin Am Church sum tuoka inchawk le bawl, Bethesda Social Service Centre (BSSC) a nih. Mi tam lemin a hung intran dan bulbal an hriet naw leiin, ka file-a inthoka ka hmu thei chin besanin, inhrilhrietna dingin tlawma zawng ka hung thur suok ding a nih.

BSSC Trobul

Kum 1992 khan Korean pastor penson tah, Rev. Koh Hae Sung chu India ramah a hung inzin a, Churachandpur a hang sir a, a hang insem da vong a, kut ruokin Delhi tieng a hung kir a. Dr. Lalkhawlien Pulamte-in thurawn a pek angin, Delhi-a a hung kir chun Lalzar B.Sinate, chuong laia Dellhi Hmar Christian Fellowship-a Chairman chel lai chu a hung pan a, a inah thla iemani zat a um hnungin, sungkaw tlawm lem le in inthawl lem nei Lalruotthang inah a um a. Korea tienga a kir nawk hnungin India ramin a lung a len tlat leiin Hindi inchuk malama rongbawlna lampui hong dan ding dap zom dingin Delhi-ah a hung kir nawk a. Ama hi Presbyterian Church of Korea (PCK) a inthoka kum 1953-a indang Presbyterian Church of the Republic of Korea (PROK) intia a penson chena rongbawl, John Calvin inchuktirna Reformed Faith zuitu a ni leiin, Delhi-a Hmar Christian Fellowship le inkopa somdawl ngaihai laia rongbawl theina kot (social service centre) hong a nuom a. A nuom dan chun Trust indin a, hmun le hma inchawk a, chu taka inthoka rongbawlna sin tran a nih.

ICI hung lut dan

Korea-a chawla a fe chun a ruol thrahai a rawn khawm a, Shin Am Church-in Centre bawlna hmun ding le a bawlna ding hung tuok an nuom thu an hril ruolin a bilding bawl dan ding le sĕng zat ding chenin an kohran member laia architect le engineer hai chun an hung duong suok vong a. Trust indin chu a thra taka ngai a nih. Sienkhom, chuonga thaw ding chun puo tienga inthoka sum a hung lut dong thei dingin Foreign Contribution Regulation Act (FCRA) 1976 hnuoia in register a ngai a, chu registration chu Society/Trust indina inthoka kum thum hnunga hni thei chauh a nih. Prawzek tranna dinga hmun inchawkna le a bawlna ding sum hung tuok ding an um ta si leiin, FCRA registration neihai hming hmanga thaw a hung ngai ta a. Delhi Hmar Christian Fellowship-in registration a nei si naw leiin Presbyterian Church of Mizoram le Independent Church of India (ICI) hai chu biek an ni a, Korea-a inthoka palai hunghaiin an inhmupui ve ve a, ICI hmanga Bethesda Social Service Centre inchawkna le bawlna dinga sum thon chu an sukthluk tah a nih.

Hi dungzui hin Joginder Singh ram, 360 yard-a lien, Rangpuri Gali No.14, Block K, Rangpuri, New Delhi-a um chu Independent Church of India (ICI), New Delhi hminga inchawk le inhlan a ni a, I.C.I New Delhi aiawa dongtu chu Field Secretary, Rev. Maylawmthang Tuolor le Mr. Kawllienthang an nih. Hi hi May 6, 1996-a General Power of Attorney, Deed of Will le Affidavit kawpia an ziek dan a nih.  Hi plot le inzom hin biek in bawlna ding lieu lieuin Cho Dong Church sum hung tuok Rs. 12,10,845 chun 435 sq. yd inchawk sa a ni bok a. A rênga plot lien dan chu 1359 sq.yd a ni a, 906.6 sq.yd chu Shin Am Church-in Centre bawlna dinga an inchawk a na, a bawlna dingin Rs.34,49,968.50 an hung tuok bok.

Delhi Regional Office

Hi prawzek hi tran thei dinga lampui sat fel a ni hnung le ICI kuta sum hung lut dinga mawphurna inhlan fel a ni hnung, sienkhom prawzek tran a ni hma, 1994 khan Delhi Hmar Christian Fellowship ruoi dinga kum nga sung deputation-a Rev. Maylawmthang sie rotna chu fimkhur thuhlaah  remchanga hriet a ni tak naw leiin, ICI chun Delhi-ah Regional Office hong a, prawzek leh enkol dingin a hung tir ta lem a, 1995 July khan ICI Regional Office Interim Advisory Board ruot a ni bok a, sienkhom zieka mawphurna le thuneina ieng khom pek a um nawh. ICI Executive Council 93-na March 3, 1997 chun Delhi Regional Office ti chu ‘Liaison Office’ tia thlakin an thrum hnuoi a, Advisory Board-a thrang ding member thar an ruot bok a. ICI Executive Council Voi 94-na (August 20-21, 1997) chun ICI Regional Office Advisory Board hi BSSC Advisory Board-a ngai palin, Resolution 13-naa chun, “Elder Chul Dong Hahn of Shin Am Church hi Delhi-a BSSC Advisory Board member dinga belsa ni sien kan tih” an hung ti nawk nghal a. ICI inrelbawl dan ding le BSSC prawzek enkol dan ding an thlier  thiem naw hi, Delhi-a um hi prawzek duongtuhai le lo tranpuituhai  inkara chadan inthuk tak inkhang chu a nih.

BSSC bawl tran a nih

Kum 1996 kum bulin a ‘blue print’ ziek le siem tran a ni a, an pei fel charin thla 15 sunga bawl zo dinga riruong a ni leiin an bawl tran nghal a. December 31, 1997 chenah a rênga zona dinga sum Rs. 34,49,368.50 and peka inthokin Rs. 29,73,440 hmang a ni ta, sienkhom bawl dinga riruong chenve khom zo a la ni nawh. Hi thu hi sum tuoktu Shin Am Church-a an thruoituhaiin an hriet chun an lawm naw hle a, zawna khir tak tak, sienkhom indon awm hrim an hung indon a. Sum dang an hung thon ta naw ding thu le a tira ruongam dungzuia iengkim bawl zo a ni hma chun hong lo ding an hung ti bok a. An thil hriet thiem lo laia threnkhat chu (a) BSSC bawlna dinga an sum hung thon dollar sangthum ding lai thil dang thawna dinga an lo pŭk pĕng dam; (b) Sum a tlawm ta si leia a tira an ruongam (original plan) thlak danglam rotna le (d) BSSC prawzek indin le hlenna dinga inrelbawl dan mumal tak ieng khom siem a ni naw zing chu a nih.

Buoina ching fel ngai

Kum 1997 April thlaa fawrena inthoka Delhi-a ka hung kirin an inkara thu inhnok hi ching felpui dingin an mi ngen a. An bawl zo vong phaa hong chauh dinga Korean-hai phŭt anga a fe ding chun sum tlawmte la uma inthoka bawl zo thei a ni naw hrim hrim leiin hong loin a trâwp se el ding a nih ti a chieng a. Thla iemani zat chu bawl zom thei loa um a ni ta nghe nghe a. Zo lo khomin a hongin hong phot inla, hong dinga Korean palaihai an hung pha mit ngeiin a hmunah hmung an ta, an thil hriet thiem naw po po khom hmai intuoa hril fie chun hung hre thiem an ta, an inhong zui pei ka ring a. An pom thei ding BSSC inenkol dan ding Rules & Regulations buotsai chu a damdawi um sun nia ka hriet leiin ka ziek a, an hung pom a.  Chun, Korea tienga lekhathon ding, an ngirhmun hrilfiena, an ziek huphur em em chu ka ziekpek bok a, chu chu Rev. Darsanglien Ruolngul, ICI Executive Secretary, Rev. Koh Hae Sung, Patron le L.B.Sinate, Chairman, Advisory Board hai hmingin an thon a. Hi taka inthok hin inbiekpawna hrui thlung zomin, bawl zo loa BSSC hong khom an hung remti a, chu chu March 25, 1998-a hong a nih.

Hienga thil a hung inher thrat lei hin ICI Executive Secretary Rev. Darsanglien Ruolngul khom a lawm ning a tih, October 15, 1997-a lekha a mi hung thona chun, “Delhi-a kan hung laia hun tlawmte ei inpawl khan, Delhia i hung kirnawk hi, Pathienin a huntaka ei sinthawhai sukdet le siemtha tu dinga a hung tir che ni chie in ka ngaia. Ka lawm takzet anih. Hmatieng pei a khawm iengkimah i ngaidan le thurawn, keini in kan lo indawn na chang hrietnaw leia kan indawn naw khawmin inphalam lovin imi hril pei ka ngen” tiin a hung ziek a. Hi hi edit loa a ziek dan ang chara ka hung thur suok a nih.  Hi thil hi lawm a um hle laiin, tak tak sawna pak huorna chi a ni nawh ti chu a hnunga chanchin ei hril pei ding hin hung sukchieng a tih. 

BSSC & Hmarkhawlien Assembly

Delhi-a ICI Advisory Board inthrung, January 9, 1998-a an rel angin, Hmarkhawliena ICI General Assembly 28 Feb-1 March, 1998 ah BSSC chungthua hma lak pei dan ding hril ding le rem ruotpui dingin Rev. Koh Hae Sung leh an mi ruot a. Chu taka ding chun lekha, KOHRAN KALCHAWI: BETHESDA SOCIAL SERVICE CENTRE, NEW DELHI ti phek 14-a sei ka ziek a, Korea tieng le ICI Executive Secretary khoma an pom tlang tah BSSC Draft Rules & Regulations chu ka thil sa bok a. Tam tak hi teknikal thil a ni leiin Assembly neka Executive Council inkhawma phor chi a ni lem a. Keini pahni kha Assembly-a thrang dingin rem an lo ruot a. Assembly-a chu hun a’n tar leiin Executive Council rorel kha se chip hman loa an nam liem mei mei hlak angin BSSC chungchanga khom Draft umzie phur thrak lo inpomtir dingin nam liem an tum a; hi hi a hma le tu chen khoma an thaw dan tlangpui a nih. Chuonga an nam liem chu ka remti naw leiin Executive Council-in siem thrat a trulna lai lai siem thraa, chu chu Delhi tieng Korean palaihai leh hril tlang a, remti tlang anga ro fel lema zam dingin Executive Secretary Rev. Darsanglien Ruolngul leh kan inbiek a. Sienkhom, ICI Assembly zoa Executive Council inthrungin an nuom nuomin an hung rel tah lem a nih. BSSC chungthua ICI Assembly/Executive Council thurel ei ti vet hi kut pakhat suok le agenda fepui a lo nizie chu trum chun ka man suok tak tak chauh a nih. 

Hotuhai inkara chadan

A hma khoma ka lo hriet nuol tah tho, a hnung peia ka hung hriet chieng zuol pei chu Delhi tlanga BSSC prawzek trantuhai le ICI hotu lokhai kara chadan inthuk tak um chu a nih. Chuong laia DHCF Chairman le ICI Delhi Regional Office Advisory Board-a Chairman chu Lalzar B.Sinate a nih. Ama hi chuong laia sorkar sin lien le poimaw Executive Director, Food Corporation of India (FCI) chel lai le a tira inthoka BSSC prawzek duongpuitu, Rev. Koh Hae Sung le Korea tieng sum hung tuoktuhai mi ringzo, belbul taka an nei le a Office hmanga inbiekpawna hrui olsam taka an thlung theina a ni leiin thu iengkim an hung intlun hmasakna a ni a. Chuonghai chu ICI hmunpuiah kohran sum sengna thrang loin a lo thon sawng pei hlak a. Chu chu lawm nêk hmanin Executive Director, Rev. Darsanglien Ruolngul chun a lo natpui hle a nih ti a hnungah ama lekhathon ngei besana hmangin ei la hung hril pei ding a nih.

Chuonga Korea tieng haiin an ring zo tak le dawr tak ni hai sien khom, Rev. Koh le Chairman L.B.Sinate ngirhmun hi inhnarum lo tak a nih. Prawzek bawlna dinga sum hung lut hrim hrim a hmasain ICI hmunpuiah a fe a, chu taka inthok chun Delhi-a ICI Superintendent hminga bank account an honga chun a hung lut a, a chalaitu chu Superintendent a nih. Sum thuah Advisory Board chu thuneina pek an ni naw hrim hrim. Audit an thaw pha khom ICI Executive Director a hung thla a, Superintendent leh internal audit an thaw a, anni karah an inzo pei a. Hieng ang ngirhmun, transparency um nawna, sum le pai enkol le hmang dan ding thraa khawvelin an ngai an hmang ve nawna hin mi mit a hîp leiin trûl loah titi a suktam a, lung himawna a hring suok nuom. Hi hi a tira inthoka BSSC enkolna thua baksamna inthlung tlat chu niin a’n lang. 

Hi lei hi ni ngei a tih, Pi Kimbuong Sanate, Secretary, BSSC Managing Committee-in Rev. L.Thanzam Nungate, Secretary ICI Executive Council kuoma August 15, 1998-a lekha a thona chun, “ We have to be honest to ourselves to accept that the present arrangement is simply not working. Our two sittings have clearly demonstrated that the skeletal Committee had no meaningful agenda except to blindly endorse decisions or positions already taken by someone without consultation and discussion. We are therefore making no progress. In fact, we are slipping back. We have no proper rules and regulations to function, apart from lack of clear vision and perception. Most lacking seems to me is financial propriety and account-keeping perhaps because we rely too heavily on internal auditing which in our case really amounts to the neighbourhood of self-auditing. We do not seem to have followed even rudimwentary bookkeeping procedure and therefore our accounts may not stand close scrutiny by professional auditors” tiin a beidong thu a ziek.  

Inkhawm boruok rik

A hmaa ei hril tah ang khan, BSSC prawzek tranna ding bilding chu bawl zo la ni naw sien khom March 25, 1998 khan hong a ni a. Korea tienga inthoka an beisei dan chun, kha hmaa BSSC enkol dan ding Draft Rules & Regulations an pom ang dungzui khan ICI haiin iengkim lo sukfel a, chu dungzuia Board of Governors ding ruot fel dinga inbeisei an ni a, sienkhom sukfel nĕk hmanin an nuom ang angin an lo thleng kuol ti an hmuin an lung a awi naw hle a. March 26, 1998 zing dar 10:30 ah Rev. Darsanglien Ruolngul inrawi ICI aiawtuhai le Elder Chul Dong Hahn inrawi Korean aiawtuhai chu BSSC-ah an inhmu khawm a. A ieng a khaw hril hmain, Rev. Darsanglienin mawl takin Korean haiin an ngirhmun hril hmasa dingin a ngĕn ringot a. A bawsetuin an ngirhmun hril hmasa loa a bawsetu ni lo inhril hmasaktir tum chu inbiek dan konglam nia kan hriet naw leiin Lalzar Sinate leh kan remti naw a. ICI tieng le Korean tieng a hran ve vea la’n hmu phot a, chu zoah an thu sukthluk ang ang chu inhril tuo ni lem sien tiin ka rot a, an mi remtipui a. Keini inkhawm chu a boruok a sa hle a,  tlang takin an inhriet thiem nawnahai an inhril bor bor a. Sunbu fak huna chen khom kan hril ding topic takah ieng khom sukthluk a um thei naw leiin thu tlukna ding ka rotpui a. ICI Executive Council thurel nuhnung taka an thu sukthluk le BSSC invong dan ding ka draft hmasa tak chu enkhi a, iengkim a’n lai ang thei taka siem rem a, March 30-a inbiek fel dingin kan remti tlang a. Inbieknaa thu tlukna ding, Note of Understanding hung ziek dingin an mi dande a.

Note of misunderstanding?

Note of Understanding ka ziek chu ICI tieng an fak thei zàn naw leiin, an nuom ang anga her kuolin, BSSC BYE-LAW ti a heading-a siein Elder Hahn chu ziekpui an lo tum a. Elder Hahn-in  March 30, 1998 zana Golden Dragon Restaurant-a bu a mi fakpuiin thil um dan kan hrilfie a, a lung a awi naw hle el a.  Rev. Darsanglien le Lalzar Sinate hung inbe a, lekha ziek ding chu hung sukfel dingin a hril a. Hi zan hin Elder Hahn-in anni Shin Am Church aiawa BSSC Board le Managing Committee-a thrang dingin a mi fiel a, sienkhom ka pom thei naw thu ka hril nghal a. 

Golden Dragon Restaurant-a bu kan fak khopin Darsiemlien Ruolngul inah kan fe a, Rev. Darsanglien khom Lalhmingthang Ruolngul ina bu faa fe chu a hung inlawi a, Lalzar leh an inbiek a. Lalzarin, “Kha hmaa ei inbieka sukfel ta saa ei ngai ang khan thil a fel amanih ei ta, Koreanhai le Note of Understanding ziek dinga in hung siemah, in nuom ang anga in hung thleng bakah, a thuhmaa chen BSSC BYE_LAW in hung ti a. Elder Hahn-in, “ ‘Rev. Ruolngul leh iengkim in hril fel tah ei sawn a, iem a ta a la fel chuong nawh? Hung inbe thra nawk ro’ a mi ti a, inzak a um khop el” tiin a hril a. Rev. Darsanglienin thu threnkhat a chuong ta nawna san chu computer print-out an thaw laia an thaw suol pal niin a hril a. An printer hmang kha a siemtuhai siem dan naw ang taka dawha mita sip khom a lo ni rawi mawh!  Suonlam khom hin konglam deuh chu a nei ngai a’nson nawm ie!

Chun, an thil ziekpui tum kha a thuhma khom um lo a ni leiin, a thuhma dingin fel takin Lalzarin a diktetpek a. Chuonga a thawpui sa khom chun a tûk March 31, 1998-a Elder Chul Dong Hahn le Rev. Koh Hae Sung hai Note of Understanding an ziekpuia chun an nuom nuoma a hmaa draft kha an hung thlak danglam bakah, an thuhmaa chun, “The Executive Council be requested, through the Board of Governors, to prepare it within the framework given below” tiin an ziek!

Cheating Game

Hi hi a thu bulbal hriet chun nuizatum tak a ni thei a, tum nei saa an thaw a ni ruok chun, a hmaa printer mak ei hril tah mizie put, dawhaa inphierna le inhlemna dawibûr khom a ni thei. Ahmasa takin, tuin am Board of Governors kuomah hnina chu a siem ta ding? Board of Governors chu ICI Executive-in BSSC invong dan bu anga a ruot ding a na, chu invong dan bu chu siem fel a la ni naw a, dan siemtu ding Board of Governors khom an la fangson bok si naw a, iengtin am hma lak a ni thei ding? ICI Assembly-in BSCC invong dan thua dan iengkim siem dinga Board of Governors le Managing Committee a dande kha an pei hmang am an ta ding? Chun, Note of Understanding-a invong dan siem fel a ni hmaa hmang dinga Interim Board of Governors le Managing Committee siem dinga Executive Council kuoma hnina le invong dan kimchang buotsaitu ding Drafting Committee ruot a trulzie hrilna khom an pei bok.

Hi Note of Understanding, ‘Note of Misunderstanding’ ang hiela an inchangtira an thil thleng pakhat chu Board of Governors-a thrang ding laia member pahni chu Delhi Hmar Christian Fellowship ruot an ni ding a nih tia a hmaa draft po poa “Two members nominated by the Delhi Hmar Christian Fellowship” (DHCF ruot member pahnih) tia inziek hlak chu “Two members nominated by the Executive Council from the Hmar Christian Community in Delhi” (Delhi-a Hmar mi kristien umhai laia inthoka Executive Council ruot member pahnih) tia an hung thlak chu a nih. Hi kut hin Delhi tlanga Hmar hnathlakhai inpumkhatna sukse dingin hemfung a thlâk char char khom a ni el thei. Suolin taluo a nei nawh; hmai trimna le inphalam nachang khom a hriet bok nawh. Mani mihai hremna dinga Pathienin mi a ruot khom an um ti Baibul-ah ei hmuh. Chuong ang mi chu mi pieng vangduoi an nih. Piengsuol hi a’n hnu naw ang bokin sûnga Setan a lut leia (Lk. 22:3) Iskariota inchang khom hi thil inhnu a ni nawh. Pathien hriek năl Saula chanchin hrilnaah “LALPA thlarauin Saula chu a suoksan a, LALPA tirh ramhuoiin ama chu a soisak a” (1 Sam 16:14) ti khom a chuong a ni khah.

Thlirna tukver inang lo

BSSC thiltum tak chu taksa le thlarau tieng nuna zalenna, hmasawnna, changkangna le hadamna intlun dinga rongbawl a nih. Ram danga kohranhai leh India rama rongbawlna sin thaw tlang theina hmangruo ni ding le inbiek pawna tukver ni dinga duong a ni bok. Khawvel dang le indawr tuo theina ding Information network thra tawk tak le rawn ding laibrari thra tak nei tum a ni bakah Nat Enkolna (Health Care) dam, kut themthiem inzirna (vocational training centre) dam, mi retheihai ta dinga sikul dam, Conference hall dam, mikhuol tlungna pindan thrahnem tawk tak le rongbawl theina hmangruo chi hrang hrang siem dinga riruong a nih. Hi prawzek tranna dinga trûl hmasa tak chu insaisangna ding hmun le hma nei le bawl zo phot a nih. Chun, sum hnâra inchang dinga duong a ni naw a, ringtuhai thilpek khawm hmanga mi rethei le hnuoihnung hai somdawl a nih. Chu chu mi threnkhatin a ra sor ding hung kûr truk dinga an lo beisei letling char a nih.

Tu chena ICI rongbawlna sulhnung ei sui chun, rangkachak le lunghlu khura mi ngai khom hmunhnokah an inchangtir pei amani aw ti dingin a um. Mi hlawkpui ĕm ĕm sikul, bookroom le press chen khom thattuin BSSC a enkol puitling dinga ring chu Luseihaiin ‘zawh dawra suk tin ang’ (mengte zamawa fahrel rol lut tum ang) an ti leh huong khata khum khawm chi a nih. BSSC hi hong a ni hnunga an thil tran a ieng khom a hlawtling hril ding kei chun ka hriet nawh. A lo um khiet a ni chun thil lawmum a nih. 

A phuntuhai hmathlir sukpuitling ding chun sum tam tak sung lut a ngai a, chuong anga sum tam siem (generate) ding chun mi fel tawpkhawk el khom ni lo, mi zuonzang le inpe zo thrak a ngai. Chuong ang mi chu lo hmu khom ni ta hrim inla, thla khata nuoi tam hlaw ding khomin hung kher naw ni hai. Chuleiin, a prawzek phu tawka prokram thiem taka duong a, ama le ama inenkol thei dan dinga indin suok a ngai. An khat tawkin ramthima ei rongbawltuhai kei suok a, trening pe si loa BSSC enkol dinga ei inthrut top el dam hi a pangzatum tieng nêkin a nunrawng thlăk tieng lem hman niin ka hriet. Ramsa, pûka um, sunchang laia hawl suok ang a na, iemani chen chu an mit a’n vai leiin ngai an aw el thei nawh. Chuleiin, BSSC hi ramthima ngai a, a hrana mi inkhawmpui ding ei dap ruoi el khom hi ei mit invai lei khom a ni thei. Grik mi var Euripedes (c.485-406 BC) in, “Those whom God wishes to destroy, he first makes mad” (Pathienin a suksiet nuomhai chu a sukvet hmasa phot hlak) a ti khah ei thaw am an ta ding maw! Ei sunga var um anga ei ngai hi thim a lo ni vai chun, back hole amanih, Peter-in (2:17), thima khom thim sa tak a ti ang kha a ni nawh ieng tin am ei ti thei ding? 

Thlir dan inkawkalh

BSSC an hong hnung khan Executive Secretary le BSSC enkoltuhai kuoma sum tuoktu Korea tienga mihaiin lekha an hung thon, ka hmu ve phak taphotah Rev. Koh Hae Sung le L.B.Sinate, a tira inthoka prawzek trantu le buoipuihai an ringzozie le anni pahnih leh iengkima inrawn tuoa thil thaw dingin thu an incha sâ zie a. Hi le inzom hin Rev. Darsanglien-in Elder Chul Dong Hahn kuomah April 27, 1998 khan lekha a ziek a. Chu lekhaa thu threnkhat chauh chu hang tar lang ei tih:

“Ni e, BSSC enkol dan ding ICI-in a rĕl danah Mr. Sinate a lawm nawh ti ka hriet, Kan inkara chadan um hi mi mal thil ni loin a thuphungah a ni lem. Delhi tienga unauhai chun BSSC enkolna hi annin pumbil an nuom a, ICI Executive Council ruok chun kohran kutah sie a, kohrana fakzong ni lo ‘lay-persons’ hai thrangpuia enkol a nuom a. Kohran prawzek a ni leiin kohran enkolna dan hnuoiah a um ding a nih. Hi hi ei prawzek um dan dinga kan hmu dan a nih.

“Tuta trum chu Rev. Koh Hae Sung ngirhmun, in kohran le ICI inkara ei inzomna palai sin a thawna chungchanga kan ngaidan khom tlang takin hung hril ka ti che. A tira inthok khan kan lo ring dan chun, ama hin Kohran (ICI) thruoituhai belbul le thawpui takah nei a, PROK amanih Shin Am Church-in kan hung thaw thei ve dinga a beiseihai chu kan hung thawna dingin, an thu hrim hrim keini kuomah hung intlung hmasa tak dingin kan beisei a. Amiruokchu, iengkim Mr. Sinate kuomah a hril hmasa phot a, a hnungah kan hriet ding awma an ngai chauh an mi hung hril sawng niin a’n lang a. Thu hlui (secondhand communication) kan dong hlak chauh niin kan ngai. BSSC thil an chalai dan kan dit nawa chu, anni a prawzeknghaktu an ni si leiin, ram inchawk thu le in bawl dan thua khom anni rawi hmalakna kha zui lo thei loin kan inhriet bok si a.”

Chun, BSSC honga an hung khan sum fai iemani zat an hung chawi a, sienkhom a boruok an hang hmu khan pek kha remchanga an hriet naw leiin Rev. Koh Hae Sung kutah an maksan a. Chu thua chun hieng hin a ziek a:

“Chu khêla chun, ICI hi rethei èm ém le in sum hung pĕk ringot hnota um ni ang ziezanga in ringtir che tumna umin ka hriet a. ICI kan rethei ti thu hi thudik a ni hrim a nih. Prawzek in mi tranpui khom hi kan theina le mangphan phak bak a ni ta hrim hrim a. A tira inthok khomin chu chu kan hriet.  Amiruokchu, Pathienin hi prawzeka inthok hin keini ta ding thil ruohmang le tum a nei ngei nia ringna leiin kan pom chauh a ni lem.

“Chuleiin, ICI hin sum a hnot nawh ti hi i mi hrietpek ka nuom. Sum ringot hnot ni inlang chu, pawl hrang hranga inthoka sum hmuna remchang kan tong rawn tah. BSSC prawzek chungthua khom hin sîr danga inthokin thrangpuina hmu thei kan nih ti kan hriet chieng a, amiruokchu kan la lâk ĕm nawh. Delhi-a in hung truma Dr. Koh Hae Sung kuta poisa in maksan khom kha, in sum ringot hnota um in mi ring a ni chun, hi sum hi chuong anga inngaina lungril hnuoia chun kan pom thei naw thu Dr. Koh Hae Sung khom lunginsiet takin hung hril ro. Nangni mamawna thila dingin hmang lem ro.”

Hi hma ni nga hin, inhre paw thrak loin, hi thu le inzom hin Lalzar B. Sinate khomin Elder Chul Dong Hahn kuomah April 22, 1998 khan lekha a thon a. Chu taka a hril threnkhat chu a hnuoia hin hang thur suok veng ei tih:

“March 31, 1998 a Delhi-a Rev. Ruolngul le ‘Note of Understanding’ in ziek chungthua khan Rev. Koh lekha le telefawna in inbiekna thu i hung hril a. In thu ziek kawpi kha kei khomin in fe hnung khan ka hmu ve chau a. Chuleiin, in cham sung khan hang hril tlangna ding hun ei nei ta si naw leiin, ka hmu dan anga a ngirhmun ni awma ka hriet chu Rev. Koh ka hril a. In lekha ziek le kei le Keivom-in kan buotsai lekha kha indang tak a nih. Kan lekha buotsaia ruok khan chu (a) Board of Governors le Managing Committee Lailawk (Interim) ruot le (b) BSSC invongna ding dan buotsaitu ding Drafting Committee ruot khom a thrang a, a draft khom i hmu ta khah. Hieng thu poimaw le rotna kan siem iemani zat khom in lekha zieka hin a thrang sa ta nawh.

“March 30 zana zanbu i mi kilpui truma i mi ngen ang khan, ei trin hnung khan Rev. Ruolngul chu a sangpa inah ka’n biekpui a. I ngaidan ka hril sawng bakah in thu ziek dinga a thuhma ding khom bauin ka’n sam a, Rev. Ruolngulin a ziek thlak pei a. Mr. Keivom khom kan titi ngaithla phaka hnaiah a thrung a, ana chu a mi hung zawm nawh a. A tuka an ziekpui cheu kha mi dang tu khom rawn loa anni buotsai a nih. A san le um dan ieng khom an mi hril si naw leiin, anni thilthaw le an thawna san awm lo hril chu ka ta dingin thilthaw awm a ni nawh.

“India rama i chăm sunga voi tam ka hril non tah che ang khan, Rev. D.Ruolngul leh hin mi mala inhmu thiem nawna kan nei nawh. Theidăna ieng khom ka pâi bok nawh. BSSC prawzek hrat tak le fel fai taka fepui dan ding chungthua ruok chu kan thlir dan le ngaidan a’n ang nawh. Kha hmaa ka tonhrieta inthoka ka hmu dan chun, BSSC hin invongna dan fel fai tak nei a, mi mal hlawkna zong lo mi, hmathlir nei, ngaidan thra tak nei, inpe zo le inhlan zotuhai enkolna hnuoia enkol dinga ei sie chauin a hlawtling ka ring. Chu umzie chu, BSSC hin thuneina insang thei tak neiin um sien, Lalpa thruoina ang peia a hmasawnna dinga thil trangkai thila lo thei loa thil thaw ngai a um a ni ngot naw chun, zalenna boruokah tu nor chepna hnuoia inthok khoma fimhlim dinga sie a ngai.

“Rev. Ruolngul le a rawi threnkhathai ruok chun BSSC enkol dan dinga an ngaidan chu hmunpuiah thuneina pumbil a, thuneina sem dar loa enkol an tum a, chu chu BSSC-in a thratpui ka ring si naw a. Ka hmu dan chun, thuneina insang lem pek chun BSSC hi an kuta inthoka chăn an inlau leia hieng ang ngaidan hi an put niin ka hriet a. Hi ngaidan hi inringhlanaa inthlung a na, BSSC prawzek ruok chu inringzona- Pathien ringna le mani thawpuihai ringzona- chaua hrat taka fe ding a ni bok si a. An ngirhmun hi ka hriet thiempuia chu ka pompui thei naw a nih. Inringhlăna boruok karah hrat taka sin hang thaw ngaina uma ka hriet naw leiin, BSSC invong dan fel tak siem a, inringhlana boruok hi hlip kieng a ni hma chun, Board of Governors le Managing Committee-a member ni dinga in mi hung ruotna khom kha ka la pom hri naw a nih.”

Tu ta dinga bawl am a na?

BSSC hmun le hma hi ICI hminga um a nih ti hi tu khomin an inhmai naw a, chu ngirhmun chu inchupui an tum bok nawh. A ngaituo suoktu le hmun inchawkna ding le a bawlna ding hung tuoktuhai ruok chun Delhi Hmar Christian Fellowship le rong an bawl tlangna dinga sum le pai an hung thaw a nih. Elder Chul Dong Hahn, Chairman of Mission Committee, Shin Am Church-in August 26, 1998-a Rev. D. Ruolngul, Executive Secretary, ICI le Rev. M.Tuolor, Superintendent BSSC lekha a thona chun, “Although Shin Am Church built the BSSC and now the Centre is being managed under the control of ICI, at first Rev. Koh and Mr. Sinate felt strongly the need of such a building as BSSC for the Hmar Christian Fellowship and they proposed and negotiated with us for the construction of the building. After we discussed much about it, we decided to construct the building. In other word, BSSC got a start by Rev. Koh and Mr. Sinate for the Hmar Christian Fellowship movement” tiin a ziek. Hieng nĕka chienga hril fie la ngai chu an na a sêt fe khom a ni el thei.

A chunga Elder Hahn thu ziek hi Hmar tronga inlet chun, “BSSC hi Shin Am Church bawl le hi Centre hi ICI thuneina hnuoia enkol ni sien khom, a hmasa takin Rev. Koh le Mr. Sinate-in BSSC bilding ang hi Hmar Christian Fellowship rongbawlna dinga an mamaw takzet thu hrilin a bawl dan ding thuah an mi hung dawr a. Voi tam kan hril tlang hnungin, bawl dingin thu kan sukthluk a. Kong danga hril chun, BSSC hi Rev. Koh le Mr. Sinate-in Hmar Christian Fellowship rongbawlna dinga an mi tranpui a nih” ti ning a tih. Chuong chu thil um dan le a bawltuhai hmathlir a ni laia BSSC hi Hmar Christian Fellowship movement vaw dartu hmangruoa inchangtirtu thlarau mit chu Tuolte vanglaia mit inkalh an hril lêt tama inkalh a ni nawh ti ngam a harsa el thei. 

Tlangkawmna

Hieng ka hril tah hai hi BSSC harsatna phurpui dinga an mi ngĕnna anga sawt naw te ka thawpui sunga ka tonhriet le document ka kolhaia inthoka thu poimaw bik zuola ka ngai laia a thren chauh, thil chinchang inhril hrietna dinga, ka hung thur suok a nih. Delhi Hmar Fellowship le rong bawl tlang theina ding ngaituoa BSSC prawzek lo trantu Dr. Koh Hae Sung le chu dinga sum tuoktu Shin Am Church le Chodong Church hai hmathlir le a hming le hmun neitua ruot ICI thruoitu mi tlawmtein Hmar Fellowship hnuoia inpumkhatna phǐndarna hmangruoa an hung hmang lem hlauh hi thlaraua mitvarna nei tu khomin poi an ti seng ka ring.  (March 14, 2013 Delhi)

Ziektu: Pu L.Keivom, Inpui.com Columnist 

Khawl ropui

            Mihriem taksa bung anga khawl ropui le thilthawthei lem hi ei hringhrietna thla kiin a hawl phak chinah chu a la um naw el thei. Taksa, lungril le thlarau nei kop a ninaa ei hmu thei taksa bung, mûr (cell) tlukledingawn tam tak inbeng muka siem ringot ropuina le makna khom hi hma ei sawn fet tah ei ti hnung khom hin a hmawr chauh ei la hmu suok phak khom a ni el thei. A Siemtu ‘angpuia siem’ tia Genesis-in a hril lem lem hi chu a umzie hril dingin ei hringhrietnan a la phâk naw hrim hrim niin kei chun ka hriet hlak. Pathien angna neia ei inhriet phâk chin seng dam hi (insui theina nei phâk china inngaihai bĕkin) hang insui inla, ei bobâng hle el thei. Pathien nina ni dinga ei hriet phak chinah ei intâng deuh seng ka ring. Thlaraua paw inthûk inti deuhai chun an thlarau chang trong hmangin an hril inthŭk lem met rawi mawh. Sienkhom, ei hrietna le ngaituona bănin a ban phak khĕlah thlarauin mi a pawl ngai kher awm nawh, Ei lungmawl dan le lungvar nei dan zirin, ei thu le hla hriet phak tah hai hmangin, mi a pawl lem hlak. Pathienin mihriem a siem ropuizie thlarau mita hmutu David-in, “mak tak le râpum taka siem” (Sam 139:14) a ti hmu fietu ei tam poh leh Siemtu ‘angpuia siem’ ei nina umzie hi ei la hung hriet chieng deu deu ding a nih.

            Chuonga khawl ropui le mak chu ni sien khom, a derdĕpna tieng ei en nawk chun thazam, lunga inthoka a pam suok thisen fena ‘artery’ amanih, lungin a sukfai dinga thisen a lutna kaw zam ‘vein’ a ping chun ei thi nghal thei. Ngei naw zawng, thil inhuot zawng iemani tawk keka thuok insama thi el thei ei ni bok. San hrang hrang leia lungphu chawla thi thut thei ei nih. Mi hrât khawkheng khom a tramsawl chun thâ nei loin a zoi dĕr el. Chini vei khat bârin, tui hang dawn sien hung harin thâ nei nawk a ta, bu fŭn khat a fâk lem chun a tha pangngai hung put nawk a tih. A hratna kha chini vei khat amanih bu fŭn khata um niin hril inla, a ni chie si nawh. Ieng angin bu hnienghnâr fa sien khom, mit lâwnga hmu thei lo khawsik hrik chiterekin a man chun che thei loin khumah a bet el a nih.

            Chuong chu a ni lai zingin, karate amanih kungfu thiem chun amaa hratna tha hrui um po po kha a kuttum bawra chauh fûn khawmin, kapathir anga changa siemin, trêklei thuo tam intieng khom kut ru tliek le hliem si loin a chum bong el a nih.  Chu theina, mihriem sunga inphûm chu hmang thiem dingin kum tam trening neiin, taksa le lungril an sawizoi hlak. Chu hrâtna hlawm chu taksaa innghat a ni, an naw leh lungrila innghat? Taksa chu a hmangruo a ni a, theina hlawm tak ruok chu hmu thei lo, lungril ngaituonaa um, a ni nawk daih si a nih. Ei thaa hin hratna a um nawh ti ding ni inla, hrătna petu hmangruo, ei fak le dawna inthoka hratna siemtu ‘hlo’ hrang hrang, inchawi tawka inchokpola ei chawm zing chun, taksain a ngei sung po chu tha hrui a pêk zing thei. Amiruokchu, a lo hmangtu taksa bung hrang hrang laia pakhat khan a lo ngei ta naw chun hmang thei a ni ta naw nghal el a nih.

            Hieng thil tlawmte entirna dinga ei zuk hrila inthok hin Pathienin mihriem a siem ropuizie le makzie a hmawr ei hmu thei luot thei ka ring. May 12, 1999 khan hi lai thu ka zuk tuihni metna thusep ‘Hringmi Rĕng Hi’ ti ka ziek a, hi thil dawnkhawl sap nuomhai chun tiem ngei dingin ka’n fui. Tuta ka tuihni tum ruok chu, chuong anga khawl ropui chu duot a ngaizie le ni sari peiah ni khat sung chu inchawltir trok trok dinga Siemtun thu a pĕk thu chu a nih. Sinai Constitution a pek khan “Ni ruk sung chu thokrimin i sin po po thawng i ta, 10 ni sarina ruok chu LALPA i Pathien chawlni a nih. Chu ni chun sin ieng khom i thaw ding a ni nawh, nangma le i naupa le naunu, i suoknu le suokpa, i ranhai le i ina chêng ram dang mihai khomin” (Ex.20:10) tiin a hril a nih.

Chawlni

            Chawl Ni hung intran dan chu Juda sakhuoa inthok a nizie chu a chunga Baibul chang ei tar langah chieng taka ziek a ni a. Chu ni chu tu laia chawlkar (hapta) ni ei tiem dana Inrinni hi a nih. Judahai chun ‘Sabbath’ an tih. Hi ni hi chawlna ni dinga Pathienin a puongna san khom, ni ruk sungin a thilsiem a zo a, a ni sarinaah a chawl lei a nih. Sĕlpatokin, “An leh, Pathien chu mihriem ang bokin a sâwl ve thei a ni?” ti zawngin zawna siem inla, ngairuotnaa inthoka suok theulawzi tam tak suok thei a tih. Chuong laia pakhat ni thei ding chu, “Pathien chu sâwl thei lo e, sienkhom mihriem chu sâwl thei a nih ti a hriet a, a hmangai leiin kar khatah ni khat bĕk taksa le lungril chawl hadam a, indawnkhawlna le intuoitharna hun a pêk a nih” ti ni mei a tih. Sienkhom chu chu Baibulah ziek sa a ni nawh. Sabat chu Chawlni a ni leiin a hmang dan indik tak chu hmang loa inser top el a nih. Tu khom Sabat nia sin thaw chu sukhlum ngei ding a nih (Ex.31:15). Chawl hadamna ni ringot khom ni ta loin, an Pathien chun, “Ka Sabat hi in inser ding a nih. In Pathien, a sukthienghlimtu chêu chu ka ni ngeizie in hrietna dinga nangni le in thla la hung pei dinghai le keima inkâra inchikna a nih” (31:13) a ti bakah “kumkhaw thuthlungna” (31:16) a ni thu a hril bok a nih. Hi ni hin inah mei takngiel inkhûk khom phal a ni nawh (35:3).

            Hun a hung fe pei a, Sabat inser dan thuah an hung khuongruol ta naw a. Chu chungthua Farisaihaiin Isu an inbicharpui chun, “Sabat hi mihriem ta dinga siem a na, mihriem hi Sabat ta dinga siem a ni nawh. Chuleiin, Mihriem Naupa hi Sabat chunga chen khom Lalpa a nih” (Mk. 2:27) tiin a hril tawl a nih. Isu khan Sabat inser lo dingin a zirtir naw a, Sabat ni khom ni sien thil thra thaw a thieng thu, suksiet nêka sukthrat, sukhlum nêka sukdam a thieng thu a tlanginsampui char char a nih. Ama hnung zuitu, a hnunga ‘Kristien’ hung intihai chun thina hnea a tho nawkna ni, chawlkar ni hmasa tak Thawtranni chu Sabat aiah Pathien Ni (Sunday) tiin an hung hmang tah lem a. Sul khat suok dang, Islam sakhuo zuitu Muslimhai chun ‘Zirtawpni’ (Friday) chu an Pungkhawmni (al-Jumu’ah) a ni a, Chawlni le Pathienni aia an hmang a nih.

            Kristien sakhuoin a mi hung rŭn phăk hmâ khan ei pi le puhai chun thla hming chauh an nei a, chawlkar (hapta) an nei naw a, thla dêt le mang inkâr kha thla khat a ni top a, kum bi an thliekna khom lo an văt trana inthoka pâwl tlâk chen, thla 13 a nih. Ni suoka inthoka a tlâk chen chu sŭn a na, ni tlaka inthoka a suok chen zăn a na, ni khatah darkar 24 a um ti zawngin ni bi  an thliek ngai nawh. Kristien sakhuo ei hung pom hnunga thil dang dang nêka vangneina ei dong  chu chawlna hun kar khatah ni khat, Pathienni ei nei hi a nih. Chuong laia ringnawtuhai soisel tak chu, “Kâr tin ni khat in chawl pei chun, iengtin am fak hmung in ta? In ĕk lieka hring in tum a ni?” ti a nih. Kar tin ni khat chawl trok trok dinga Jehova thupêk kha kum 3300 vêl hnungah an hung hriet ve chauh a nih ti an hriet si nawh.

Hun a fe pei a, kâr khatah ni khat chauh ni ta loin, khawthlang ram, kristien ram, ram  hmasawn lemhai chun mihriem nun hlutna chawisangin kâr khatah ni hni chawl, Inrinni le Pathienni an hung puong a. USA-a tran hmasa tak chu car siemtu hmingthang Henry Ford a na, kum 1926 khan a tran a, chu chu ruolênga lain America pumpuiah 1940 vel khan chu an hung thaw ve tah vong a nih. India sorkarpui khomin sin kan zom ve hlim chun Pathienni bakah Second Saturday chauh chawl a puong hlak a, sienkhom sawt riel loin Inrinni chawl khom an hung puong ve tah a nih. State sorkar threnkhat chun tu chen khom hin Inrinni chawl pum hlum hi an la thaw naw zing. Sienkhom, khawvelin hma a sawn pei ruolin ni danga mi a sang ruolin ni khata an thaw zo naw kha khawl hmangin mi pakhatin darkar khatin a thaw thei ta a, tharum hmanga sinthawtu nĕkin thiemna hmanga sinthawtu ei hung tam deu deu pei leiin, kar khatah Chawlni/Pathienni bakah ni thum chawl a, ni thum sin ei thaw hun a la tlung ding a nih.  Chu chu Pathien kuota pek lêt li zet a ni ding a ni leiin, mihriemin thratpui nêkin ei sietpui lem el thei. Awlthawng hi mihriemin ei ngei nawh; Setanin a hmang hlawk thung.     

Taksa hmang inrim taluo

            Mihriem hi inrim taka sin thawa fak zong dinga Pathien trongsephur ei nih (Gen.3:17). Chuonga bawsietna leia trongsephur ei ni lai zingin, kâr khat sunga ni khat chawlna hun a puong chu a thriek chuong nawh. Hnuoia hin hausakna tinrêng a phŭm a, chu chu a thaw nasain a huot dok rawn a, a thaw tlawmin a huot dok tlawm a, a thaw naw chun ieng khom a huot dok nawh. Hi intlansieknaa hin Pathienin tu khom ditsak bik a nei nawh. Pathienin theina a pekna tieng kong seng hmang hlawk thiem thiem an hlawtling el a nih. Hnuoi inlettu chun tuk dinga bawngtuthlaw a hlâng zăt khan hlawtlingna lampui a hraw a; ieng khom thaw loa thrung inmûm el chun minit tinin hlawsamna lampui a hraw thung a nih. Chu chu khuorel thudik um sa a nih: a thaw rawnin chang rawn, a thaw tlawmin chang tlawm, a thaw nawin chang naw. Ei sinthaw ang peia hlaw le lawmman dong hi kumkhaw thudik ngîr zing chu a nih.

            Chu chu a ni lai zingin chawl loa taksa le lungril hmang inrim taluo hi a Siemtu ditzawng a ni naw leiin, kar khatah ni khat chawl hadam dingin thupêk khauh tak el a puong a nih. Thil dang dang leiin, mani nuom thu lei amanih le nuom naw thu khom ni loin, taksa le lungril hi hmang inrim taluo um thei a nih. Thil a ‘taluo’ hrim hrim a thra a um nawh. Sehriet hrui chu pot făn thei chin a um a, a thei chin băk i pot făn tum chun intan el a nih. Bawngnene chu a tui a um sung chu săwr thei a ni a, a tui săwr kang hnung chun ieng angin zût la khom a trangkai nawh, bawngpui nene a na thlawn a, i săwrna kut kham thlawn bok a tih. Sawr nawk ding chun bawngnene tui a hung insiem nawk hun nghak a ngai.

            Chuong ang bokin taksa le lungril sor le hmang thua khom a nih. A thei băk sor lui tuma ei hnaw chun a rizal a chău deu deu el. Laurence J. Peter le Raymond Hull lekhabu buotsai ‘The Peter Principle’ (1969) a khan hi thu hi an chai a, trongkam thar, ‘The Peter Principle’ ti le ‘Principle of level of incompetence’ ti dam hi a hung suok pha a nih. Hi le inzom hin lekhabu hrang hrang a suok a, ka hmu hnuhnung tak chu Hoover Institution le Graduate School of Business, Stanford University-a thok Edward P. Lazier ziek, ‘The Peter Principle: Promotions and Declining Productivity’ (2000) a nih. Hi hi ei thu chai lai leh inzom chie naw sien khom, tangka hmai hni ang an nina a um leiin ka zuk săm sa a nih.

            Ei thupui takah lut tah inla. Taksa le lungril hi sawizoi le trêning pĕk pei chun a lêt tam taka sukhrât le hmang hlawk thei a ni lai zingin, a thei chin băk chen chena hmang tum chun a hun hmaa ongrop dĕr thei a nih. Thâ inthak èm éma sazuk pûta pu hlak, sienkhom sawt nâw tea inhmang châu dĕr an um a, chuong mihai hrilna trongkam ei ser chu ‘kulcho’ a nih. A hun hmaa chău let dêr amanih inhmang da dĕr tina a nih. A poimaw tak chu ‘chintawk’ hriet a nih. Pathien ramri khang chu kar tin ni khat chawl hadam a nih. Chu chu ngaisak loa ei inhmang rim talaw pha leh ei thipui naw leh ei nat pha hlak. Chu chu a nih a thupuia “Khuo rĕl chawl’ ti ka hmang san. A chawl pĕk hmasa ‘thipui’ ti hih ni loin, a chawl pĕk nuhnung lem ‘nat pha’ ti hi a nih ka chang thlang chuh. Ei chawl hadam tum naw khomin Khuonuin natna hmangin chawl hadamna hun a mi pek hlak thu a nih.

Khuo rĕl chawl

            Kum 2012 sung khan inzin suok loa chik taka Baibul (Delhi Version) ennon ka tum laiin January 22-ah Churachandpur ka kai tung a ngai a, chu taka inthok chun Guwahati, Shillong, Haflong/Muoihoi, Hmarkhawlien le hmun dang dang sirin kan inzin kuol a, February thla tawpin Delhi tieng ka hung kir a. April 20 khan ka naupa David Keivom leh Aizawl-ah kan kai tung a, a BD thesis ziek ding le inzomin David Buhril thruoiin Sinlung Hills, Tipaimukh le Tuiruong dung suk le tungah, thlipui le ruopui vanawn hnuoiah, sawl taka inzinin, May 4-ah Hmarkhawliena inthokin Delhi kan hung lut nawk a. Sil-ong puma inzin ka ni băkah kan lam hrawhai kha manga khom hmu pal inlau-um deuh vong a ni leiin, kan hung tlung khan chu ka taksa bung tin hi a sil nawna a um nawh.  ‘Sinlung Hills’ (1-8) ti artikul pariet zet ka ziek pha a, sawl a manhla tho.

            June 1-a inthokin Baibul ennon tran a, December tawp hma ngeia zo dingin hma ka lak a. Chu chu hlen ding chun ni danga nisa suok ruol zing dar 7 vela ka tran chun thil thei lo hulhuol niin ka hriet leiin zing dar 5-a tran dingin thutlukna ka siem a. Delhi Thurawn-a ding kar tin artikul pakhat ziek bok ding chun ni khatah darkar nga bâk inna hun ding a um thei naw a ni tak.

Tran chu ka hang tran a, taksa châu le imu mi zim kara sinthaw chu a hnunga ka hang ennonin hmu hmaih ka lo hau bakah a kualiti a tla hnuoi nasa a, siem thrat ngai a tam a, a hlawk nawh.

            Chuonga sin a fe tluong ding chauh leh Khawbung (S) ‘Hla Kungpui Muala’ Seminar-a khuollien dinga an mi hung fiel tlut tlut leiin October 15 khan Aizawl-ah ka vuong tung a, October 17-18 Khawbungah ka hmang a, Oct 19-ah lampui se trawngah Khawbunga inthokin Champhai chu thimbutin ka lût a. A tuk Oct 20-ah Aizawl ka pan a, inthimin David Buhril in Chaltlangah ka chuong lut a.  Oct 23-ah Sakordaia HSA huoihot inkhawmah Sinlung Hills-a College indin dan ding hriltlangnaah thrang malamin, zan tieng ni tlak tawmin khaw chengker le hlun, in 50 khuo, Lal Remruata Varte-a pahai umna Khawdungsei-ah ka lût a. A khaw mi, thrahnem tawk tak chu Hmar Biela inthoka inpêm, Hmar hla sak chak ngawi ngawia kûr an ni a, Remruata nu Makthangi, June 28, 2012-a muol liem tah râl malama fe ka ni bok leh, sawl dawn loin, keiin khuong vawa hla thruoiin, zing dar 2 chen Independent Kohran Hla Bu-a mi ngot sakin kan lengkhawm a. A tûkah Aizawl tieng kir nawkin, ni khat ka cham a, Oct 26-ah Delhi ka chuong lut nawk a.

            Lo thei loin December 9, 2012 khan Darchawi (Tripura) a Zofest-5 a khuolliena thrang dingin Agartala-ah ka vuong tung nawk a. Zofest (Dec 11 & 12) ka hmang zoin David Buhril hai innei champha voikhatna Dec 14, 2012 chu hmangpui dingin Darchawia inthokin Aizawl ka pan tung a. December 14-ah All India Radio-in Aizawl Club-a ‘Symposium on Mizo Poets (Rokunga & Zirsangzela Hnamte) an huoihotah ka thrang bok a A tûk Dec 15-a Beraw Tlang (keiin Luru Hmun ka ti hlak) a Sikpui Kutah ka thrang ve vuoi a. Delhi tieng ka hung kir nawk hnung kar khatah Kristmas leh kan innang nawk a. Chuleiin December thla tawp hmaa Baibul ennon zo chu thil thei lo hulhuol a ni tah.

            January 2013 sung bĕka zo hman tumin ka pu nawk a, Thuthlung Hlui chen chu December tawp hmain ka en zo hman a. Kum thar charin Thuthlung Thar-ah ka pu nawk a, Gospels-4 ka zo hman charin Shillonga ka tarpu Trana Darngawn nuhmei Lalhlimpui a thi leiin a ruong nang hman dingin January 14 khan Shillong ka pan tung a, ka nang hman char a. Sŭn-zăn zoma buoia ni sawm sung ka thang hnungin January 22-ah Delhi ka hung chuong lut nawk a. Pu nawk char charin February 1, 2013 khan Baibul ennon chu a hmingin ka zo a. Sienkhom sawl tongkhong le imu zim puma ka thaw a ni leiin duthu a sam naw a, en thrat nawk vong a ngai.

            Chuonga fe peiin February 10-a inthoka intranin hritlang-khawbŭrin ka hnuka inthoka mi hung man tranin, ni hni hnunga lem chu a mi let thal dĕr a. Ka damdawi fak leiin muhaiin ka um a, ka mang anga ka ngaia mi ka lo inbiekpui dam le ka lo titi dam kha a tak takin ka lo trong suok a, hla dam inring vuolin ka lo sak suok a. Mihriem thluoka damdawi thilthaw dan hrang hrang le conscious mind le sub-conscious mind ramri a suizom dan ding awm dam a mi’n ngaituotir a. Hun liem tah hnung thlir kirna hun le hun fe lai mĕkin hun la hung ding a kakhawk le nghong dan ding dawnkhawlna hun remchang a mi hongpek a. Theinghil thei lo dinga ei ngai hlakhai khom, vakam phaiphina hawrop lien phuora inziek, hun tui fawnin voi tam a hung liek hnunga a nuoi bo hlak ang el hin, hrietzingna khom hi hun tui fawnin lo nuoi bo thei takzet zie a min hriet chiengtir zuol a. Ka khum bulah, laptopa hla za tam tak ka siehai, abikin nun hlui hla, kan tleirawl laia kan khŭkpui le ui tol inlet tluka innâla kan hriet belhai ka hang ngaithlak nawk chun, a tam lem chu ka lo theinghil titi tah an ni a. Ka ngaithlak hlim chun ka hla hriet vei vuoi angin an inri a, ka hang ngaithlak non rawn po leh a hung chieng tuol tuol a, hriet zingna bawm kila thluokin a lo hnaw lut tah hai chu an hung tho nawk sung sung a. Mithiemhaiin hrietna bawma lut tah chu a bo naw a, a lăk suok nawk dan thiem chun lak suok nawk thei (retrievable) vong a ni thu an lo hril hi a lo indik ding a nih ti dam a min ngaituortir a.

            Kâr hni chuong zet khawsik khom ni lo, lungril sukruok a, taksa hadam taka zâl a, kum tam ka ngaithlak hman ta lo miuzik hrang hrang ngaithla a, ngaituona thla zâra nuomna tieng tieng kil le kap fang a, lekhabu ka tiem nuom nuom bi lâwr a, nun kong dawnkhawlna hun remchang ka hang nei el hi ka hang ngaituo chîk chun, ka taksa ka hmang inrim taluo leia a ‘break’-na dinga khuorêl chawl mi pĕk a lo ni zing annawm ie!

(About the author: Pu Keivom is a retired Indian foreign diplomat and well-known writer. This article is dated March 02, 2013, Delhi).