Aizawl Slum Area 73-ah kum 3 chhungin Rethei 7.6 % pung

[From Our Partner]

AIZAWL, Nov 8, 2009: Urban Development & Poverty Alleviation Department-in khawpui chhunga  slum area survey nei tura a rawih Directorate of Economics & Statistics chuan an hna an zo tawh a. He an zirchianna atanga a lan danin Aizawl khawpui chhungah hian slum area 73 awmin, chutah chuan chhungkaw 13,423 zet an awm a, kum 2006-ah chungkua 12,392 awmin kum 3 chhungar Rethei Chhungkhaw  punna hi 7.6 % zet an ni.

Slum Area 73 hi a vaia a zau zawng chu 57.895 Sq. Km a ni a, hetah hian chhungkaw 13,423 awmah mihring 66,618 an awm a, heng zingah hian Below Poverty Line (BPL) chhungkua 4,447 awmin a mihring zawng chuan mi 22,069 an awm thung a ni.

Kum 2001 chhiarpui-ah khan Mizoramah Slum Polpulation an awm lova., Census of India-ah pawh thehluh a ni lo. Khami chhiarpuiah khan Mizoramah mihring 8,88,573 an awm a, thingtlangah mi 4,47,567 awmin khawpuiah 4,41,006 an awm thung a ni.

He statistics tlawh chhan hian Aizawl khawpuia Slum-a cheng mihring hi khawpuia cheng mihring atanga chhutin 15% vel lai an ni pha tihna a ni.

Urban Development & Poverty Alleviation Department chuan khawpui danga Slum Area an tih ang tak tak chu Aizawl-ah leh Mizoramah awm loh thu an sawi a. North East-ah pawh hetiang area awmlohna State hi a awm nual bawk. Chu chu central sorkar pawhin an hria tih an sawi. Hetih rual hian National Slum Development Programme hnuaiah, heng miretheite tana hmasawnna leh ruahmanna hi kalpui a ngaih avangin, khawpuia rethei zual deuh te hmasawnna turin hmalak a nih thu an sawi bawk.

Economics and Statistics Department hotute hnen atanga thu dawn danin kum 2006 khan Aizawl huam chungah hmun 73 chu slum area-ah puan a lo ni tawh a, heng hmunah hian In 12,392 an awm a ni.

He survey atan hian ngawrh takin Statistics department hian hna an thawk a, Mizoramah chuan phai lam anga Slum Area mumal a awm ve loh avangin rethei deuh chhungkua leh veng a in luh thelh zung a, chu chuan hna thawh a ti harsa hle niin Statistics Department chuan an sawi a, he an survey hi UD & PA tih tir an nih angin an hnenah an la submit leh dawn a ni.

UD & PA Director C.Liantluanga hnen atanga thu dawn danin Survey hi sorkar laipui Ministry of Housing & Urban Alleviation hnuaia National Building Organisation ruahman a ni a, Slum area survey chu Information Ministry-in Aizawla slum area dinhmun chiang zawka a hriat duh avang leh sorkar laipui atanga Slum Area Development hnuaia tanpuia lo kal tur te dik taka hman a nih theih nana survey hi neih a nih thu a sawi.

The Zozam Times is our official partner.