Kristien Sungkuo – II

::By Pu RAMTHIENGHLIM VARTE, Shillong::

Mihriem hi rannung anga a ruola khawsa (social animal) eini leia sungkuo le Kristien Sungkuo pawimawna nikum hmasa 2007 khan Khawnvar Le Thuhriltu journal a insuo in a um ta a. Sungkuo hung um tandan le chutaka inthawka Kristien sungkuo hungsuok dan archil zatvel chau hei thai nawk inla.

Scientisthai chun leihnuoi hi kum makteduoi 400 B.C. neka upa ni dingin an zeldin a, chun kum 300 makteduoi B.C. sungvel kha khawvel hi hringna nei pakhat khawm um lova re thuop anga ngai anih. Chu hnung kum iemani chen a thilhring chite a hung inlanga, chu 'bacteria' tiin an inbuka; mit lawnga hmutheilo, enlenna (microscope) hmanga hmuthei hringna nei a nih. Chu thilhrik chite inthlapung peiin umna/chengna boruok ang peiin piengphung hranghrang neia chi intla sawngpei ni dingin an ring.

Chuonghai laia ransa ke pali nei le piengpui varna nei mihriem le inhnai hrietthei hmasatak chuh 'mammals' hi a nih. Hi rannung hi naupaia hringve chi, nu nenetuia chawmlien kut, ke, lu, thluokbawm, thin, chuop, thisen lum nei ani leiin animal (ransa) tiin an inbuk a. Kum 64 makteduoi B.C. laivel khan khawvel an hluo tana, anni laia vartak chu Zawng chihi a nih. Chuleiin zawng sungkuo hi kum 27 makteduoi B.C.vela um ni dinga ring a nih.

Hun a liempeia kum 40,000 B.C. vel liemtah khan an khawsak le nun a changkang ta vieuva, ransa dang laka invenghimnachang hrein puk dam belin an khawsa tan a. Chu in thlasawngpei chun mihriem nun intanna ahung nia, kum 12,000 B.C. hnungtieng lem khan chu lo neina chang hrein wheat, barley, maize dam chingin beram dam kel dam vaiin an khawsa ve taa; Chuleiin Baibul puotieng suina a inthawka tlir chun sungkuo in tanna hi kum 8000-7000 B.C. vel kha ni dinga ring a nih.

Baibula ruokchun a tirin Pathienin hnuoi le van le a sunga um popo a siema, chuzovah ama angpuiin mihriem (pasal le nuhmei) a siema, an umna dingin Eden huon a buotsai peka. Chutakachun inhawi takin an khawsa a, theira chitinreng hnieng-in-hnar taka an fakding a buotsai pek bawka tiin. Chuh sungkuo intanna le sungkuo hmasatak indinna chu nih.

Amiruokchu, scientist hai sui anga kum upat dan sui theidingin aziek venaw tlat leiin ‘a tirin’ tihi in nghatna ding chu ni el ata.

Ei chengna khawvel upatzie mithiem (Scientist) haiin kum vaibelse tamtakin suisuok hai sienkhawm ‘a tir’ ti neka upa hi ani thei chuong naw leiin khawvel mithiem hai suidan le khaikhin ding chun a tirin ti chu alan bul lem hrim hrim.

Sungkuo chi tum tum:
Chuongangin, sungkuo eiti chu a bika in enkawlna buzawl nei, chengna hmun bik uma, hotu pakhat rorelna hnuoia mi iemani zat um khawm hi a nih. Anrian Wilson chun ‘thisena inzawmna nei le khawtlang dan siemin a phuor tang tlat, hmunkhata cheng, fak le dawn a semsem damdam thaw a, in khata in lawi hlak haihi sungkuo’ (family) a ti bawk.Chuongang chun sungkuo ro-in-rel dan hi khawvela hnam chi hranghrangin ei hmangdan an angnaw a; hnamkhat, thlatu hming chawia suon thumna chen sungkuo pakhata tiem pawl an um a, chuh sungkuo lien (extended family) ti ani a, sungkuo nu-pa le nau hai chau chengna insunga uma chuh, sungkuo rilmu/lairil (nuclear family) ti ani a, sungkuo pa lutak nia nuhmei nau le in sung thuomhnaw pasal thuneina pahai hnam nuhmei le nau hai intawmpui a uma chu pa thuneina sungkuo (patriarchal family) ti ani nawka, sungkuo nu lutak pasal le nau le in sung thuomhnaw nuhmei thuneina le nu hnam pasal le nau hai intawmpui a um nawka chu 'nu thuneina sungkuo' (matriarchal family) ti ani nawka, chun sungkuo nau pasal upatakin nulepa chanvo changa rorelna insung a um nawka chu nau hai thuneina sungkuo (Fratriarchal family) ti ani a. Chun, sungkuo members hai thuneitu bik um chuonglo, pa ruokchu nu neka thuneina insang lem nei a uma chu thuneina intawm sungkuo (egalitarian family) ti ani nawka, chun sungkuo members hai mimal zalenna nei a um bawka, chu mimal zalenna sungkuo (atomistic family) ti ani.

Hienghai naw khawm hrilding tamtak a um. Eini ruokchu sungkuo pa lutak nia nuhmei nau le in sung thuomhnaw pasal thuneina le pahai hnam nuhmei le nau hai intawmpui a uma chu pa thuneina sungkuo (patriarchal family) chu ei nih.

Pathienin khawvela thil popo a siem hi thiemtakin mawphurna bik neia a remkhawm le buotsai ani a, remruot thiempa ani leiin thilsiem rengreng chu insukbuoi neknuk umlova ani ang thlapa an umdan dinghai aruot pek vawng a nih. Entirnan, ransa hnuoia fakzawng chi hieng sakei, sazuk, sakhi, savawm, sanghal, zawng, saku, sihal… le chunga inlenga fakzawng chi hieng- mu, mulukawl, vathu, vaber, vamur, rangkek, vakawl le dangdang an nunphung dinga a ruot anga an umnaw leiin an khakbuoi ngai nawh.

Chuongangin mihriem khawm khawvel hluobittu ding le a chunga rorel dinga alo tiemtah ani leiin sungkuo biknei dinga ruot, mumal umtaka khawsa ding le cheng dinga ami siem hai ei nih. Chuong nilovin ransa hai angin mani tlat tlatin mumal umder lovin khawsa/tla ta murmur inla - ka nu, ka pa, ka nau tibik khawm um theinaw ni a; in ditsakna, hmangaina, lunginsietna chu tlawm hleng a ta, pung hrat naw hleng ei tih. Mania fak zawng theilo pitar, putar damnaw natna khirkhan nei le piengsuol hai tading lem chun thi nghak sengseng rin a um zuol hle ding a nih.

Chuleiin mihriem hi khawvela thilsiem popo chunga rorel dinga ruot, Pathien angna neia siem, a hringna intawmpui eini leiin rorelna mumal tak neia sungkuo indin chu Pathien thiltum a nih. Chuongangin, nunphung umzie nei, nundan mawi, khawtlang rorelna tha le thildang mihriemin ei mamaw zuolhai chu sungkuo ahin inchuktirna antan phawt atul leiin kawtlang nun inchukna ( Sociology) tienga mithiem hai chun ‘mihriem ransa hai neka ei hlutna le hieng- nundan tha, inza umna, eihlutna, le dangdang inchukna school pawimaw hmasatak chuh sungkuo hi ania; khawvel hi mihriem chengna dinga siem, chu hmun chuh cheng tlaka eiin buotsaina hmun pawimawtak chu sungkuo (family) hi ani’ an tih.

Sun-ah hmun hranghranga a ruolruola sinthawin eiin hmukhawma, zantieng mani chengna hmun sengah sungkuo bikin eiin lawi khawm nawk hlak hin vantlang le khawtlangnun asuk thienghlimin nun venghimtu thatak ani a, chuleiin thutlunghlui huna biekin ala um hma lem khan chuh sungkuo nun hi umzie nei taka siem ani leiin kohran hmasatak a nia, sungkuo a inthawk kohran hi hung piengsuok ani leiin sungkuo le kohran hi pafa anga pumkhat anni anti hiel.

Pathienin sungkuo alo remkhawmdan hi anthuk em leiin insung khawsak relfello chun kohran le khawtlang nun anfuk thei taktak ngainawh. Ransa sungkuo neilo hai chuh anhung piengsuoka hun sawtnawte a inthe darin, an nuomnuoma inse khekin nun anhmanga, mihriem ruokchu eihung piengsuoka nu mal chunga kumli vel vengvawng nun ei hmangral phawta, inchuk ngai popo nulepa in anmin chuktira, ei chengna khawtlang, nundan le chetdan ang dungzuiin ei hung inthanglien hlak.

Chuleichun, nu-le-pa hi sungkuo skul a dinga zirtirtu pawimaw le naupang tadinga an inchukbu (subject) anni bawk. Mihriem chu sungkuo a inthawkin ei hung piengsuoka, nundan ei inchuka, chu sungkuo a inthawk bawk chun khawvel hi ei suoksan ani. Ei Baibul khawm hi ei en chun sungkuo a atana sungkuo bawka a thu khar anih.

Krista inlalna sungkuo
Pathienin ama angpuia mihriem a siema nitin an pawlpui hlaka, a thutlung an zawmnaw leia inzawmna hrui lo intan tah zawmnawk dingin a naupa Lal Krista khawvela hung tirin mihriem le pathien inkara remna palai sinthawin ahung zawmnawk tah ti ringtu le pawmtu hai chu Krista zuitu Kristien anni ela, chu sungkuo chu Kristien sungkuo ti ei hung ni ta.

Kristien sungkuo chu nuhmei-pasal inneina vawngthienghlimtu hai in an siem a. Sakhuo dang pathien be lova, Lal Isu chau sandamtu a pawmtu hai chu kristien sungkuo an nih. Nakie phaa Pathien khuo le tui eila ni ngei dingzie entirna dinga Pathien thiltum kumza tamtak hma a alo buotsai lawk chu ani renga. Chu insung rorelna a chun eini tading chun pa thuneina sungkuo (patriarchal family) ei ni a; Pathien remruotna a nuhmei pasal innei a pasal chu alu tak le roreltu( head of the family) niin umzie inthuktak neia Kristien sungkuo hi indin anih. Pasal le nuhmei mihrang dai nupa pumkhata siem, zalna hmunkhat ringawtel nilo, man le muol inpek lei el khawm ni bawklo, hieng thil pali- pasal, nuhmei, kohran le Pathien hai sui mata Kristien sungkuo hi remkhawm le buotsai anih.

Pasal le nuhmei chu inhmangai le indit emema pumkhat nidinga kohran hmanga Pathien hminglama ‘kan tiem tlat’ tia Pathien le kohran mipui hma kut insuia thutlung sa ui eitan (sakramen) hi Kristien sungkuo nun intanna dinga Pathien remruot chu nih. A umzie ngaituo lawklo le inchuk hmasa zet lova Kristien sungkuo hi indin ringawtel chi annawa, aman peklawk tul um, umzie inthuktak nei ani ti nupa a insiema Kristien sungkuo indin ding haiin hriet atul.

Pasal le nuhmei inhip tawnna hi suol ani nawa, in hmangai taka nupa pumkhata insiema Kristien sungkuo indin hi Pathien remruot le thiltum chu ani leiin vanram hawlphak Pathien sungkuo eila niding entirna ana; chu thuruk hrea sukdik hlak nupa hai chun Pathienin van malsawmna a pek hlak leiin khawvela vannun an intem lawkin sungkuo ditum, Kristien sungkuo annawleh, Pathien sungkuo an hung ni hlak. Amiruokchu, sungkuo rorel danding ngaituo lovin, inchuk lawk rengreng um bawklo nuhmei pasal innei nachang hriet ringawta, apawimaw tak chawmhlen a Kristien sungkuo hmingmawi takel haw a insung indin hi a awl emem.

Chuongang mi chu a tlangpuiin, hun iemani chena hmelthatna ahung chuoia, pang ahung vuoia, inngaina hai ahung tlawma, Pathien biea tawngtai ri insunga are vungvung ta chun insungkhata um, taksa hmunkhat bawksia lungril indar nuoia sungkuo nun hmanghi a um theia. Puotieng inlang danah mi angin inchei nam pung inla, tawngbau thatha hai leh awm takin khawtlanga hai inhmang hlak inla khawm Kristien sungkuo intive sia apansak khawm hrawfu lo, ralkanga mitlir le entleu, sietni le ruong intla liemna ding chauva khawtlang thuoitu le kohran nulepa hai hrietfuk hlaw chau dam an hungni nuom vieu hlaka. Chuleiin, ei rama Kristien sungkuo Krista inlalna insung iengzatam ei um ding ti hi ngaituo thamtak niin an lang.

Joba chanchin hi i ngaituo hlak am. Ama chu Uz rama um, mifel,mi indik famkim,pathien ti mi, thilsuol a inthawk inthier fihlim mi anih. Nau pasal pasari le nau nuhmei pathum a nei a. Pathien laka a ringumna le a taimakna leiin a neinung em ema; Beram sang sari, sanghawngsei sangthum, bawngchal tuok zanga, sabengtung zanga le siehlaw tamtakel a nei a. Hienghunlai hin a chengna rama inthawk nisa suokna tiengpang rama ama neka hausa an umnawh.A insung enkawl danah Pathien lung a awi em ema. A nauhai birthday a hungtlung pha chun an sungkuo in anau nuhmei le makhai fielin khuo le venghai leh ruoi a the hlaka, HAPPY BIRTHDAY hlimtlang takin Pathien hming lamin ni iemani zat an hmang hlak. Eini rawi 'happy birthday' hmang le chu an angnaw hle.

Chu chauchu annawh, a hausakna le malsawmna a dawnghai hrefu lovin chapo rawi anta, Pathien hming hrilsie pal anti ti anlau leiin an ruoithe tumtiek phaleh anau hai chu an rengin a ko khawma an hming kimin pumrawhmang inthawina anhlan hlak. Chuleiin, Pathien meuvin khawvel popo a ka mifel ati anih.

Chuchu a nih, Kristien sungkuo um danding Baibul a ei hmu chuh. Ril a ra, malsawmna ei dawng kanau ei ti hai hi Pathien nau enkawl dinga mawphurna amipek lem chau ani tihi Jopa anghin hrechieng inla nuom a um khawpel. Insung enkawltu nu-le-pa tamtak chu Kohran le pawl buoipuiin ramtin-ramtanga tlan kalangin hun tamlem khawlai dunga ei hmangrala, chuong karlaka ei nauhai Setan in a nuom tawkin amilo sawisak peka, asunga khawhri tamtak luta hming khawm NUOIA ang el khan anmi umpeka, anni le anni insukpawpa thisen suok khawpa pawi an tawk tahnung khawma mani in thiemchawpna tlanga inthawk khawvel ei tlirliem pei ana.

Ei insung chita nau chunga enkawlna sin ei chunga innghat hi ei ramthim rawngbawl nadinga Pathien in ami pek ani tlat leiin ei thawsuola ei mawphurna eizo naw ang dungzuiin nakie Krista rorelna insang Krista supreme court a thiemnaw arbawm min awr tirtu ding anni tihi ei hrietphak dernaw mani ding aw. Chuchu a nih, Pathien in inthuktaka Kristien sungkuo alo rellawk dan le a thuruk inthup chu. Chu chawmhlen a, nauhai khawsak le umdan hrephak derlova nu-le-pa tamtak Tripura, U.P.,M.P., Manipur Meitei ramthim invawi emem hi Pathien ditdan tak ani karing thei naw rengreng.

Kristien sungkuoa seilien nisi hieng lawmlawma khawtlang nungchang tirdakum le pawrche el ta hih. Hieng - tharum hmanga mipawi tawk, sawrkar sum ani chun Upa nisien Pastor, mi tuelkhawm in timna nei thaklova midanghai thaw anga thawve ngam sungkuo hai eini tlat sia. Nangni sungkuo hi chu insuol em el Setan in lalna sungkuo inni inti ding ni inla siel le salam inchawitir nuoma palai hmel hmu awlsamna tak ani ka ring.

Chuleiin, Kristien sungkuo ei nina hmawla inkhi ding chun ei insung, kohran le pawla thlarauva tam a thla nasatzie hi. Ei Hmarrama kum khawtluonga taksa tam a thla el hi thil awmlo ani der nawh tihi hre seng ei tiu.

Sungkuo buoi Krista umlona sungkuo,
Inremna umlo inhalna a tam, In thuruolin pumkhatna a umthei nawh;
Pasietna, harsatnan a hmuok rawp hlak.

(Editor's Note: Pu Ramthienghlim Varte, senior anthropologist, is a regular contributor to Inpui Blog. We will soon feature him as one of our esteemed columnist)