Ram lungsietum ram

By Pu Zarzolien Keivom

Roreltu indik lal chun ram a suknghet a,
Thamna ngainatu ruok chun a suksiet hlak.

-Thuvarhai 29:4

Mihriem hin mani nina inhriet chieng intak ei ti em em. Ei suolna le vervekna dam, ei pasietzie le mi lungsietum ei nizie dam ku hi thil hriet fuk intak laia pakhat chu a ni ve awm. Mani neka mi dang thra lema ngai theina lungril pai thei ngat lem hi chu eini lai hin vangkhat te ning ei tih. Hril nikhuoa ruok chun mani neka mi dang thra lema ngai thei deu vong ni mei bok ei tih. Ei thlatu Adam le Evi ei puo chieng khopin an lang. Pathienin Adam kuomah, “Fak der lo dinga thu ka pek che thing ra kha i fak am a ni?” a hang ti dèk dêk a, ama Adam hlak chu an sie kieng hieu a, “Nangin ka umpui ding nuhmei i mi pek renga an nawm” tiin, Pathien chu mawrsie inphur tum ni awm fahranin, “Ama nu khan thing ra ku kha a mi pek a, ka fâk el a ni kha the!” a ti dai el a nih.

 

Evi tieng nghaa, “Anleh ieng thil top am an ta leh i lo thaw el ta chu!” a hang ti nawk leh ama chun hniek phawi der loin, a thil suol thaw chu mi dang lebunin, “Rulin a mi dawha a,, ka fak a nih” a ti nawk hlau a, suol thawtu ni chu an nuom bik der nawh. Khawvela roreltuhaiin thiemnaw an inchangtir leia lung ina intang po pohai khom ku hin an thiem thu hril ding an tlasam bik chuong nawh.

 

A langa Pathien ringtu ni chu awlsam ei ti a, a thu awia zawm ruok chu ei pei tawl naw khop el niin an lang. A malsawmna ei dit hlur a, malsawm tlaka mani sina taima le ringum ruok chu ei tam naw hlein a’n lang bok. Pathien hring ringtua insâl ve bok si, mani suolna le tlaknawna hmu fu thei der lo mi chu hausain pasie sien, mi lungsietum a ni tho tho. Mani suolna le vervekna hmu fu thei loa mi danghai suolna le vervekna chauh ei hmu sung phot chun insung, khawtlang le hnamin inrem tik nei thei ngai naw ni a, pawl thar le parti thar dang dang la pieng sa pei a ta, a mihriem el chauh ni loin ei del chin chin ram khom ram lungsietumah la’n chang pei a tih.

 

Ei pasietzie le mi lungsietum ei ni hmel khom hi ei hriet fuk nuom bar naw khom ni sien a hoi thei khop el chu tie! Ei Pathien thu hrilhai khom a’n ril, mi dang neka hre lem le inthûk lemah ei inngai tlang deu fur ni khomin a’n lang bok. Politik tieng panga lem chu khaw kilkhawra khom pa taptomhai hlei hlei ku hi hril nikhuoa chu ei inril lem khom a hoi. Taksa le thlaraua ei pasietzie le lungsiet ei umzie ruok hi chu ei inhriet naw tlangpui a, ngaituo khom ei ngaituo nuom naw ni deu takin a’n lang. Baua ram hmangaitu ei tam, baua Pathien ram hmangaitu khom ei tam, a taka hmangaitu ruok chu vartrien arasi ang elin ei lan khât phar niin an lang.

 

Ei sum le pai ngainat dan khom ku hi mak tak chu niin an lang, Bethesda dil kama a tui phul ding nghâka sun le zana damnaw tang fur el hai khom ku kha ei hoi. A danglam bik hrim ei um nawh. Ei rengin sum hi chu ei du taluo seng niin an lang. Ei ramah inthlang a um chang hlak hin fak fawm zongin a khing a khingah ei tlan kalang a, ei ai awtu ding thlang ding ei nih ti hrim ngaituo nuom loin mi fel le thra nekin ei tram-bar ding mi pe rawn thei thei kuomah ei vote ei zor nawk hlak. Ei mi thlang tlinghai hlak chun an sum sêng hmu kir nawkna ding ngaituoa indap lo thei lo a na, kong tinrengah ei ai an aw hne nawk taluo hlak si leiin ei ram khom a changkang ding angin changkang muol a dâk tak tak thei ta naw ni takin a’n lang. Ei ram le ei hnam ku hi Vaihai le Meiteihai hung sukchereu an le, nang le kei, a sunga chenghai thabona le depdena lei ku hin ram lungsietumah ei inchangtir lem a nih. Ti bik ding a chuong a liem ei um nawh. Rukruin rukru bok a man chun tun am ro rel a ta? Ei ram ei hnam lai hin thruoitu felin lalna changa ei hung intuoi thar nawk theina dingin ei Kristien nina hi hmang trangkai dingin ei ram lungsietum te hin dawlai siktui angin nang le kei a mi nghak a nih.

 

Ei ram hi dimokresia inthruoi ei ni leiin kohran le khawtlangah mi felin lalna an chang theina ding chun khawtlang mipui hi a bulthrut ei nih ti hi hre tlatin ei piengvo hi sum le pai mei meiin zor lo dingin fimkhur ei tiu. Mi felin lalna an changna rama chun fak le dawn a hnienginhnar a, inchukna in le damdawi in hai a thra a, lampui le leilak hai a thra bok a, sakhuona khom a phuisuiin a ngielnghet hlak a, chu rama chenghai chu an nghet a, ram puo tieng mihai chen lung dumtu an hung ni hlak. Chuong ang rama chun mihriem khom an pung a, sorkar ngaisak khom an hung hlaw deu deu a, iengkimah hma an hung sawn hlak a nih. Europe ram ei ngaisangna san khom ieng dang an le, a rama chenghai an ringumin an taima a, mi felin rorelna an kengkaw a, fak le dawnah an hnienghnar a, sum le pai an hau bok lei chau an nawm. An ram del khu ei ram neka a thrat bik lei khom a ni chuong nawh, Israel ram lek lem khu chu lungkawhrot deu vong a nih.

 

Ram le hnam hmasawnna ding chun ringumna le taimakna hi a bulthrut poimaw tak a na, chuong ang mizie nei theina ding chun Pathien thua intran a ngai a nih. Lalpa chu Pathiena nei hnam, a rochungtua a thlanghai chu hnam hamthra an nizie khom Sam 33:12 ah ei hmuh. Eini khom Europe ramhai anga ringumna le taimakna ei kengkaw hun hunah ei ram ei hnam hung par vul a ta, mi inhnar le lungdumtu hung ni veng ei ta, ei kawl le kienga umhai tading khoma bel tlak le innghatna tlak ei hung ni ve el ding a nih. Chuong ang ngirhmuna mi hlangkai ding chun a ram sunga cheng nang le kei a trang nema inbeia a par tlantu ngei hi mawphurtu ei nih ti hrein a nêl a vai thrangharin taimakna le ringumnain inthuom seng ei tiu!

 

Roreltu indik lal chun ram a suknghet a, thamna ngainatu ruok chun a suksiet hlak ti hi mi tin lungrilah inriektir dingin thrahnem ngai takin eiin fiel tak zet a nih.

 

KEIVOM RUN(Greater NOIDA), 11 November 2011.