Hmar Inpui, HSA in Pu Sangliana Support An Pek

(HSA leaders with former MP Pu HT Sangliana&his wife)

BANGALORE, APRIL 12, 2009: "Lawm a um ngotel! Hmar Inpui thuoitu han an mi hung hrietfuk a," a ti ruol ruol chun lawmthu hril tumin a mobile phone a hang hmet nghal a.

Chuongang khopa mi inrang le bengvar Hmarnau, Member of Parliament lo ni tah, le inthlangna a ngir nawk tum chuh Pu Hmar Tlawmte Sangliana a nih.

Pathieni zingkar khan Hmar Inpui, General Hqrs aiaw in Hmar Students Association, Bangalore Branch hai chun MP lo ni tah le Bangalore Central constituency a inthawka ngir nawk Pu Sangliana chu inpawlpuina an nei a. Hmar nauhan Pu Sangliana an theinghil naw zie suklangna dinga Hmar Inpui in tangka sumfai, campaign sunga a hmang dinga an hung thawn chu HSA president Tv Rama Khobung in inhlanna a nei nghal.

Hratnawk an ring lai zingin Pu Sangliana chun thang nasataka lak a tul zie a hril a. HSA member hai popo in voter ID an nei le an neinaw thu an dawn a, a la neinaw hai chun ngaiven dingin a lo infui bawk.

HSA hai khomin an thaw thei zawng a um ani phot chun "HSA, Bangalore branch kan inpei zing a nih," ti'n president pa in Pu Sangliana a hril.

Amiruokchu Bangalore biekin tamtakah ngainatu dang han an fiel leiin, hun tawite chauh Pu Sangliana leh hohlimna hun nei a nih. A nuhmei Pi C Rothangpuii leh 'Thingpui dawnin lo hohlim el ro...ka lo fe tul si a' ti'n Pu Sangliana chun HSA thuoitu hai an thla hnungin darkar chenve vel an hmalakna le tuchen a campaign ngirhmun hai hriltlangna nei a nih.

Tuta tuma Pu Sangliana inteppui theitawk dinga an hril JD(S) candidate Zameer Ahmed Khan chun minority vote a keidar el thei dinga an lang leiin Pu Sangliana khom campaign tieng uor takin hma a lak thu a nuhmei Pi C Rothangpuii chun a hril bawk.

HSA President Tv Rama Khobung, Vice president Tv Randolf Amos, Secy Tv Solomon Hmar, Asst Secy Tv Japhet Darngawn, le Finance Secy Tv Barnaba Infimate hai chun nguntakin Pi Rothangpuii a thilhril hai ngaiin indawna dang dang an siema. An thil indawn laia pakhat: "Pi, tuta tum ei tling nawk i ring am?" ti chuh "Hril a harsa khopel, amiruokchu kan pa hi poisa a vote zawnglo, ama 'fame and integrity' leia zui an tam el bakah mi tawngtaipuitu tam tak an um a....beiseina lientak a um tho" ti'n a dawn.

Thingpui, bei le titi khop tal hnungin BHCF president le HSA adviser Pu Robert L Sungte in Pathien kuomah Pu Sangliana tadingin bik lieu in tawngtaina a nei a, hun hmangzo a nih.