Khawvel inruolsiekna a’nsang ta bawk leh, ei tlin bak bak ei ziek pei ding a hawi hih. Kum 2006 khan Pi Lal Remsiem le Pu Lalrawngbawl Keishing Hmar hai nupa (the Hmar millionaire couple) tawite inpawlpuina ka nei a. Pi Remsiemin a mi hril thu pawimaw deu pakhat a uma. ‘In inchaw la, pawisa i hau naw khawmin a tlawm a zawng a man pelawk la, kumkhat vel a’nvawi zoah zawr nawk la, a tlawm takah Rs. 5,00,000 dam i hlawk ding a nih,’ a mi tia. A theory chun a’ndik a, a praktikal hi a’ntak a nih ti ka lungrilin ka hriet zinga.
Pu Lalrawngbawl hi a hmel en chun mi pangngai ve ringawt, pa tluongtlam tak a nih. A lungril ruok chu inkhi phak ruollo ni’n ka hriet. Kum 2001-a Tokyo kan pawsting ding khan an Tata Safari ngeiin an nupa’n IGIA (Indira Gandhi International Airport), N. Delhi, chen an mi hung inthla a. Kei mi naran ve ringawt an mi zuk ngai pawimaw kha ka theinghil thei nawh. Business ei ti hi inchuk fawma thiem a nih. Sum inkhawl le enkawl lem hi chu inchuk tak meua inchuk a ngai. Pu Lalrawngbawl bawk chu zuk hril nawk lang. Gerezuot ve pangngai ni si, a hnuoia thawktu hai chu pawisa tienga thiemna insang tak tak nei an ni nawk lawi si. Chu lei chun, pawisa sum inkhawl, enkawl le sukpung thiem ei ti hai hi MBA val/nu ni loin, mania inchuk dawk (street learner) ei ti hai hi an nih. Khawvela mi hausa po po deu thaw hi mania inchuk fawma thiem vawng an nih. Apollo International Ltd.-a President ve ngat, ruol anga ka nei, pakhat khawmin a mi hril a. Sum hlawk zawng ei ti hi inchuk fawm vawng a nih a tih. Ama khawm inchukna tieng chu Engineer graduate (1st Class), Law graduate (International law in business) le MBA (1st class) a nih. Business deal kan thaw hrim hrimin ka sapzek inchuka mi lesson pakhat khawm ka la hmang thak nawh, ka mimala ka’nchuk dawk vawng ka la hmang a nih a ti chuh.
Botswana-a hausa tak (Indian origin) khawm inchukna tieng chu iengkhawm ni lo, hausakna thuruk a hriet rawn dan chu hril ngaina khawm ka hriet nawh. Vuongna pathum tawp a nei a, a nuom nuomin pawlitiks ti vel hi chu a hem kuol el a nih. Hi mi hausa hi ka mimalin vawithum ka’nhmupui tah a, a tawngkam le hawiher a chu chapona chite khawm ka hmu nawh. Ama khawm hi street learner tho a nih.
Mi hausa ei ti hai hi thluok hmang rawn an ni tak. Ruol anga ka nei bawk (Indian origin ve tho), Botswana hmun pawimawna phawt deu thawa convenient store chain shop neitu ( 50% partner), pakhatin 2009 diary a mi pek a. Diary chu a dawt dawtin ka hang phet pei a, inchuk ding pakhat pawimaw deu ka hmu tlat chuh. Phek karlaka chun colour print advertisement phek-khat pei a lo inzep a. Vai phek tiemin advertisement phek hma le hnung tieng a uma. Ad po po chu a renga tiemin 12 zet a lo n’a.
Ka hang hisap det det a. Ad phek-khat pei man chu Botswana Pula 1000 vel ning a tih. Phek 12 a chun Pula 12,000 (Rs. 74,000) a hmu tina a nih. A diary mi pek hi mi tlawmte chauh ta dinga a sut a nih. A tam takah bu 400 bak ni naw nih. Ka zuk ngaituo a, a sut man a tam tiengah Rs. 20,000 vel seng ding a n’a, a thawnna man hlak chu hril khawp khawm ni lo ding. India rama inthawk thuomhnaw lawngliena an hung phur lai a zepsa mei mei awm sia. Promotional diary e ti loin, a hlawk hrep awm hih ka ti lungril a. Hausakna ei ti hi inchuk dawk thei a lo nih.
[Editor's Note: Pu Malsawmthang Keivom, an Indian foreign official serving in Botswana, is one of our dedicated columnist. His column is called MK-To the Point. The views expressed herein are his own. This artilce is dated: Botswana, 24th April 2009]
Khawlam a um ta pu Malsawmthang kuhi?
ReplyDelete