Hausakna

:::By Pu MALSAWMTHANG KEIVOM, Inpui Columnist:::

Khawvela ei um sunga dingin mihriemin lo thei loa ei pawimaw chu hausakna a nih. Khawvel hausakna le thilhlu thenkhat hang tarlang ei tih.

Pawisa:

Pawisa hi thilhlu hlutna inentirna hmangruo pawimaw a nih. Thuomhnaw, thiemna, sin thaw man le man nei hrim hrim hlutna a’nsang le inhnuoi dungzuiin pawisa hlutna khawm a’nsangin a’nhnuoi ve hlak. Pawisa chu liquid asset a nih. Thilhlu tam tak nei la, pawisa a ni phawt naw chun ama-ah liquidity a um nawh a, I thilhlu nei chu asset a nih. Pawisa hi zuk hmang el thei a ni leiin a tangkai. Amiruokchu zuk hmang el thei a nina tak hi inkhawl a hrasatna a nih. Chu lei chun pawisa hmanga hausakna inkhawl nekin asset dang hmanga hausakna inkhawl hi a tha lem.

Lunghlu:

Lunghlu chu thil sie thei lo, thil vang a ni bawk leiin a ‘hlu’ a nih. Lunghlu chu a chodawk a’nhawi lai chu a to bek nawh a, a zawngdawkna dingin sum tam tak seng a ngai a, chodawkna dingin hnuoi inthuk tak tak cho a hung ngai a, thildang sengna po po leh belkhawm a hung ni pha chun lunghlu man chu a to nawk zuol hlak. Lunghlu man to ruol ruola ekonomi dang a lo inthang pei naw chun lunghlu chu ‘ek zawr’ ang chau a hung ni ve thei. Lunghlu umna zawngdawkna dinga exploration cost chu US $ 16 million vel a nih. Chu khawm chu one-time project chauh a nih. Hmarram leihnuoi khi lunghlua sip lo ni tah ang sien, exploration project-a ding pawisa ei nei si naw chun umzie a nei nawh, khup chen chau chaua inthuka lunghlu ei chodawk ding a ni ngawt naw chun. Chodawk hnung khawmin a sukfaina le a suknamna ding ringawt khawmin sum tam a lut a nih. Lunghlu hau tul ringawta, ekonomik daivarsifikesawn a um si naw chun ramin kawk a nei chuong tak tak naw bawk. Lunghlu hi asset a nih.

Rangkachak:

Rangkachak khawm hi ngharek thei lo le thil vang a ni bawk leiin a hlu a nih. Rangkachak hi asset a nih. Hausakna chu rangkachak hmanga inkhi a nih. Vaihai hi en hman ro, an nuhmeihaiin an pangah rangkachak an khai tlep ter tuor el hih. Rangkachak chu incheina dinga hmang thei a n’a, awlsam taka a mawi dan thlengkuol thei a ni bawka, nuhmei lepler le hmeltha tak angin a hmelthatna a thlak-kuol thei. Nuhmei ta dinga mawina a pek zo hnung ber khawmin, a tawp takah zawr sum thahnem tawk takin a’nchang nawk hlak. Insunga hmang ding car, TV, video, le a dang dang pawisa sukhektu ei inchawk hin a tawpah iengkhawm ei hmukir ngai nawh. A sawt deu deu a, a tawpah hmunhnawkin an inchang el. Rangkachak ruok chu a sawt deu deu a, a man a tam deu deu.

Hmun (estate) le In (home):

Khawbawn ramah hmun a tam an nawm, in hmun chu inchawk ngai lo ela. In bawlna ding thing a tam bawk. An leh khawbawn ram a chun naupang sikul kaina ding a um? Damdawi in tha a um? Sawrkar ofis pawimawhai a um? Infepawna lamlien tha a um? Iengkhawm a um nawh. Chu lei chun Khawbawn rama mani khat chaua um chu thil harsa a ni leiin in hmun man a thlawn ni sien khawm ei va um pei chuong nawh. In hmun le in man tona tieng tieng ei pan a tul tlat si. In sawng (flat) nekin in hmun a tha lem. In sawng chu safety norm limit nei a nih. Flat hi a tlangpuiin kum 50 bak a him ngai nawh, a bikin Vaihai in bawl lek lem chuh. Entirna’n Bangalore khawpui hmunkhatah society flat I lo inchawk ni tah ang sien, kum 50 hnungah sawrkarin thu hung insuo sien, hluo tlak ta lo a nih hung ti el sien. I flat chu iengtinam thaw tang I ta? Zawr ding ni la hlak chu tukhawmin inchaw naw ni hai a. I bawl nawk ding ni sien, a neitu dang po po leh, a sawsaiti leh thuthara a bul tan that nawk vawng a ngai ding a nih. Society flat hi zawrhlawk nawk vat ding a ni naw chun inchawk lo ding a nih. Hmun ruok chu I thu thua I siem thei a nih. Bilding pawlisi um tak tak mang lo, sawrkar authorized area ni ang reng si a hai lem hin chu hmun hi inhnar um tak a nih. I nuom leh sawngli velin zuk bawl I t’a, sawngkhat pei kha man tha tawk taka I zawrsuok seng chun hril ding dang a um ta le. Ku chu I ni’l.

Chawngpu Nina (Patent):

Lekhabu ziektu ka ni chun chawngpu nina kha dan ang takin kei a ta a nih. Midang sut phalna ka pek chun a man (royalty) ka lak ding a nih. Pu L. Keivom, Pu Dr. Lal Dena, le midang tlawmte chauh hi eini lai chawngpunina nei khawpa lekha ziek ei um. Pu L. Keivomin a thi hnunga a lekhabu ziekhai iemani zat sut phalna mi pe sien, kan inbiek dan dungzuiin pawisa thahnem tawk tak a damsunga a hmang ding ka peklawk ding a nih. Chu chu ama ta dinga hausakna a n’a, a lekhabu ziekhai hi asset a nih. Zakuo thui dan design pakhat ei nunghak pakhatin a lo hmusuok tah a. Chu sitail chu a fe em em el, khawvel a dengsuok zo tah. A hmusuoktu hin chawngpunina a nei ngei ding a nih. Ama’n zakuo thui kher naw sien khawm midang thui phalna peng a t’a, a royalty a fak ve ding a nih.

Business/stock/bond/mutual fund:

Sum hlawk zawngna (business) a ni chun mani thang loa midang hmanga sum hlawk zawngna a nih. A neitu ruok chu mani ni zing si’n. Stock, bond le mutual fund ei ti hai khawm hi anni khata sum hlawk zawngdawk thei an nih. Paper asset an nih. Kum 2008 khan India ramah billionair 50 an uma, Japan ramah 24 an uma, China ramah 20 an um. Hitaka mihausa chungchuonghai hausakna chu an stock/share value a nih. Kampani dang dang an siem a, chu kawmpania chun share an nei a. An kawmpani sum hlawk zawngna a pung ang dungzuiin an share value khawm a pung pei a. An share value a pung khawmin a hlawk (dividend) an lak ngai nawh, a san chu sie (tax) an pek ding a ni leiin. An hausakna a pung tuol tuol el a nih. Khawvel pawpiulesawn a chanve tawp hi mi pasie tawpkhawkhai (poorest) ei nih. Mi pasie tawpkhawkhai po hin khawvel hausakna 1% neka tlawm ei insem ruol a nih. Khawvel mihriem pasie tawpkhawkhai mipui tluk-le-dingawn khatin mi pakhat peiah US $ 1 neka tlawm ei nikhat fak man dingin ei hmang. Ei Hmar mipuihai lem chu US $ 0.50 neka tlawm lem sungkhatin ei hmang indai tral tral a nih! A na cher cher khawp el! Ka ngaituo sei pha hin chu ka hnuk a ul el hlak a nih.

Lungril:

Asset po poa ditum tak chu ei lubur sunga ngairuot-thiemna hi a nih. Thluok. Hausakna hi lungrila insiem a nih. Ka thluok asset a hin hrietna le thiemna tinreng ka khawlkhawm a, thil ropui tak tak ka thaw thei chun chu neka tha hausakna a um nawh. Ieng thil khawm thaw ding ni in la, thluok hi siemthat phawt a tul a nih. Baibula lal Solomon a hausakna bulpui tak kha a varna a nih. Varna chu thluoka um a nih. Varna chu inchuk thei a nih. Chu tak chu a nih vawisuna ei good news chuh!

A chunga naw khawm hi hausakna tam tak a um. Ei hmang thiem dan zirin hausakna chu a hung um el a nih.

[Editor's Note: Pu Malsawmthang Keivom is an Indian foregn official serving in Bostwana. This article is dated 27April 2009, Botswana]