PATHIEN THU HI MI 99% IN AN INHNIK NAWH

Ziektu: – Pu Zarzolien Keivom

Taksa sawizoi hi iemani chenah a trangkai ngei a,

sienkhom Pathien ngaisak mi ni hih iengkimah a hlu lem a,

hi damsung nun le la hung um dinga thil trangkai a nih.

-1 Timothe 4:8

Ni khat chu ka artikul ziek le inzomin ka u L.Keivom ka hang hello a.”Thu dang khom ziek sa ta la, Pathien thu inhlir hlak chauh hi chu mi zaah sawmkuo le pakuoin an inhnik ta nawh” a hung ti a. Elektrik mi dep ang elin ka hip sokin ka hriet a mak ti taluoin ka telefawn khom chu ka hriet naw karin ka lo sie thlak ta hiel a. A tu ka theida lei ni loin, ei Pathien thu awina kum za lai lo ni hiel ta sia chuong ang lawma Pathien thuin eini lai hmun a chang zo ta naw thu chun a mi barakhai em em el lei a nih.

A hnunga ama ka u L.Keivom thlirna tukvera inthoka ka hang thlir ve luo chun a hril uor naw lem hman hman niin ka hriet hnuhnaw nawk ta lem hiel a. Keima tak khom hi a sawmkuo pakuo laia thrang ka lo ni ve zing si a. A ni ngei, Pathien thu luo hi inhnik taka tiema zawm dam hi a lo in tak khop el. Ei Pathien thu chun Lalpa Pathien chu ei lungril po po, ei thlarau po po le ei hratna po poa hmangai ding le ei nauhai chen khom taima taka inchuktir dinga infui ei ni lai zingin mani insunga Pathien dan thu mani nauhai inchuktir mol mol hlak chu ei vang ta hle ring a um. Mani sakhaw inchuktirna konga seng seng chun eini nek hmanin Hindu le Musilimhai hin an sakhuo an lak ursun lemin indikna khom an lo kengkaw lem niin a’n lang.

“Khawvelin a nghak sawt ta leiin an lo ngui zo ta a, Mi lungrilhai khom a lo chau zo ta a” tia hla ei sak ang deu khan, Kristien ei intina hi a lo sawt tah em leia Pathien thu khom hi inhnik pei ta lo am ei ni ta ding maw! Ni tin chanchinbu ei tiem naw chun kim lo truta inngai hlak si a Baibul tiem hre fu ngai der si lo khom ei pung tuol tuol. Sin buoi suonlama hmanga kar khat kar hni Baibul keu thrak lo khom kohran thruoituhai lai ngei khom ei kat nuk an ta aw! Thlaraua thuok ei lakna tak trongtrai khom ku hi zing tho zal tawm le bu fak tawm chaua thaw hlak hi zaah sawmkuo le pakuo ei ni el naw dim a ni? Chuong ang chau ei lo ni lem chun, kristien ashma invoi ei ni zing a nih ti ei inngaituo chieng thra hleng a tih. Ni khat sunga voi khat bek Baibul khom ei tiem ta naw lem chun ringna le thlaraua lem chu hang inthrang ngaina a um thlawt naw a nih. Ei hriet naw kar hin kohran le sungkuo lai hin Setanin bu a khuor nasa ta hle niin an lang. Chuleiin, “Lal ram chanchin chu hrilin, hla sakin insukhar ei tiu, Lal ram tlungna ding chu a hnai ta leiin” tiin ei infiel thar a nih.

Pathien thu hi nang le keiin ei hrietna le ei awina a sawt ta lei ela chul le da el thei chi a ni le! “Hnuoi le van bo a ta, ka thu ruok chu bo naw nih” Pathienin a ti a nih, Hmu thei thilhai chu bo el ding an na, hmu thei lo thil ruok chu chatuona ding a ni si a. Bu bohmang nawk el ding zonga inlap rak rak lo dingin Isu khoma ami hril kha tie. Chatuon chena um zing ding Pathien hmangaina thu hi ei hril rawn po leh a’n lang zuol deu deu a, ziek le hril ei nuom deu deu hlak bok a nih. Tirko Paula chun Timothe kuomah Pathien thu hi a hun le hun nawa khom hril dinga inpei zing ding le mihai chu kawkhmu a, zil a, infui dingin a hril a nih. Chuong ang bokin eini ringtuhai hi mihai kuoma chanchin thra hril a, hringna lampui kawkhmu a, petekhai chuh zila infuitu ding ei nih ti hrein, inlusu ta loa thrang harin, ei mawphurna hlen ngei tumin, mani insung le puo tieng chen thrang la thar ei tiu khai; ei awi phut lai nek khan ei sandamna khom a hnai ta si a.

“Zirtirna indik an ngaithlak pei naw hun a tlung ding a nih. An nuom zawng le an na ver zawnga thuhriltu ding zirtirtu tam tak an fiel khawm hun a tlung ding a nih” ti 2 Timothe 4:3 a ei hmu angin, kohran lai hin a tlung zing an tah. Pathien thu, mani nuom zawng le ril rem zawng zawnga kei hera inchuktirna a tam ta leiin ei hnam sunga ngei khom kohran pawl kutpar thlieka tiem khop zet khaw tinah ei um tah. Pathien thu tiem a, hril a, zawm nek hmanin mani kohran chanchin tiem le hril mawi ei uor tah. Pathien ram le a felna zawng nekin kohran ram le a felna ngot zong khom ku hi a lo olsam a nih. Van le inzoma Pathienin a phun ni lo, mani ropuina ding le mawina zonga kohran pawl phun ei ni pal hlauh chun ni kin niah phawi dok ei la ni vong ding a ni leiin tu hi inen fie hun a nih.

Tuta kum za hnung khaw lam um i ta?
A hi damlai thil ngaituo ding,
Poimaw le trûl a nih.
Khawvel suoksan tang i ta,
Van le hremhmunah iem chang i ta?
Dit lem, tu hih thlang hun a nih.

Pathien thu ngaia biekina inkhom neka movie serial en mei mei dam le thu lawilo tak tak hrila inpawl khawm mei mei hai dam hi kristien nun khal dan indik a ni nawh. Isu’n, “Ka thrang loin ieng khom in thaw thei si nawh (Johan 15:5) a ti a nih. Ra insuo ding chun a kungpui Isu le inzom a ngai. Pathien dan thu a sun a zana ngaituo ku hi thil iengkim thawna phota hlawtlingna bul a ni si a.

( Keivom Run, Greater Noida, July 28, 2011)