Hmar Students’ Association, Jt Hqrs Aizawl Press Release

HMAR STUDENTS’ ASSOCIATION
Jt Hqrs. Aizawl
PRESS STATEMENT
25 June, 2004

Mizote himna tawk leh Vai (non–tribals) te laka kan hnam humhalh theitu Trading Regulation kan neih hma a Mizoram sawrkarin sales tax a lak dodalin zirlaipawl (MSU) chuan jail chhungah chawngheiin an nawra. Chutilai mekin Central sawrkarin sales tax latura nataka Mizoram sawrkar a rawn vau zui tak avangin Uniform Floor rate a sales tax lak a nita a. Hemi chungchangah hian zirlaipawl, Central sawrkar leh Mizoram sawrkarte hian an mahni zawn theuhah an tihtur diktak an ti a nih chuan mipuite kan inngaihtuah chian a tul hle ang.

Trading Regulation thatawk/mumal leh kan himna tawk kan neilo chung pawha Sales tax pelo theilo dinhmuna kan ding a nih chuan thil pawi tak a ni ang. Chubakah Mizote tana inhungbingna tha tawkleh vai (non-tribals) te laka min humhalh tlat theitur Trading Regulation hi phuttlat thei dinhmunah kan ding tak tak tawhlo a nih chuan kan inngaihtuah chian a hun hle ang.
Mizoram leh Mizote inhumhimna atana dan kan lo nei tawhte han tarlang ila:

1. District Council hunlaia Vai sumdawng (khuahkhirh theihna or thuneihna dan) Trading by Non-ribals (regulation) Act 1953, Sixth Schedule Para–10 chu paih a nih tawh a. He dan ang hi chhimlam Autonomous District Council ten an la chhawm thei.

2. Trading by Non-tribals (Regulation) Act 1974 chu Pu Ch.Chhunga sawrkarin huaisentaka a nawrna avangin kum 10 chhung (1975–1985) atan India President in a pawmsak ta hram a, tihnun leh a ni ta lo.

3. Bengal Eastern Frontier Regulation 1873, Section–3 hnuaiah Inner Line Permit (ILP) kan nei a. Hei hi inhumhimna kan neih leh kan chelek theihber chu a nita a. Nagaland leh Arunachal te hi ILP hmanna state vetho an ni a, mahse an him tak tak lo a, hnamdang – vai (non-tribals) ten an chim nasat tawh avangin an sawrkar leh mipuite pawh an beidawng tak zet tawh a ni. He ILP ngei pawh hi vawi tamtak hlihsak turin min vau tawh a. He dan hi kan hmang zui zel thei angem tih pawh ngaihtuah tham a ni ta.

Chuvangin India danpui tlawhchhan tur nghettak leh kan nihna diktak ang a min humhalh thei kan ngaihven thuai a hun ta. Mizote hi tribal kan nihna bo lo mahse India Danpui Sixth Schedule Para 20, sub–para (1), Tribal area–(1) Table a Part III ah kan Mizorama, Chakma District, Mara District leh Lai District te huam chhung chauh hi tribal area an ni tih tarlan a ni tawh a. Heng district huam chhung piahlam a mite hi tribal nimahila tribalte dawmkanna tur leh Sixth Schedule a inenkawlna (provision) dawng thei kan ni tawh lo. Central sawrkar ngaihhnathiamna hi kan dil theih tawk a ni a, hei hian rei a daih lovang. Mizoram zauzawk tribal area ni tawh lo hi Tribal area a khungluh leh a nih loh chuan vai (non-tribals) te laka kan keipui sahauh theihna hi a bo tial tial dawn a ni. Mizo District Council chu Sixth Schedule para–20 A. Sub–para–(1) ah kan thiah a ni tawh a, Sixth Schedule a inenkawlna leh hamthatna chang reng thei kan ni tawh lo tih kan hriat a tul a ni.

District Council hunlaia kan dinhmun ang la chhawm theitu chu chhimlam District Council pathumte hi an ni a. Heng District huam baka mite hi chuan kan phurh zawhloh phur tura turluihna kan hmachhawn fo dawn a ang hle. Heng phurrit leh chimralna te hi kan sepui ruahtawrh mai dawn nge, a pumpelh natur leh tribalte invenna tur kan ngaihven thuai zawk ang tih nguntaka ngaihtuah a hun ta a ni.

Mizorama zofate inhumhimna thtak kan neih loh lai mekin India sawrkar chuan Dam Project liantak a thawktu (Non Tribals) mi nuaikhat deuhthaw lo luhna tur Tipaimuk Dam siam a tum meka. Zofate chenna ram zautak tichereua, a rama cheng mipui, kawng engkima hnufualte chimral an ni mai tur hi a lungchhiat thlak tak zet a ni. Tipaimuk Dam hi siam anih chuan a chhehvela ram leh mipuite humhalh an nihngei theihna Sixth Schedule a dah ngei hi a tul tawh a ni. Hei hi hnambil leh inlakhranna a ni lo a. Mizoram leh zofate kan himna, damtlanna leh kan hnam rohlute humhalhna zel turin i pawm theuh ang u.

Kan ram leh kan hnam hi chimralna (assimilation) laka a him theih nan Tribal kan nih ang ngeia kan chenna ram hi Tribal area a khung luh leh hi thil tul hmasaber a ni. Hei hi ram leh hnam humhalh tura hmalkna atana kan tih makmawh a ni bawk.

Sixth Schedule hnuaia Autonomous District Council neih hi development sum semrualna a ni a.Thingtlang leh khawpui inthlauhna(regional imbalance) a tibo a ni. Autonomous District Council hi mipuite enkawlna atana thuneihna (power) semrualna (decentralization/delegation) a ni a,mipuite thlengphak hmasawnna a awm theihnan a pawimawh tak zet a ni.

India Danpui Sixth Schedule a Autonomous District Council thuneihna Para 10.sub-para (1) & (2), (d) ah hetiang hian a chuang a ni.

“Prescribe that no person who is not member of the schedule tribes in the district shall carry on whole sale of retail business in any commodity except under a license issued in that behalf of the District Council”

Chuvangin tribal area nilo zawng hi tribal area a khungluh a nih chuan kan himna tawk leh kan thuneihna ngeiin Trading Regulation pawh kan nei thei dawn a ni. Tribal area niloa chengte hian tribal te enkawlna leh chanvo phut tlat thei dinhmunah kan la ding em tih kan ngaihtuah chian a hunta hle a ni.

Tribal area kan nih leh hi a pawimawhzia hriain kum 1994 a MZP Assembly,Lunglei ah khan Mizoram (tribal area nilo zawng) hi Tribal area a dah/khung luh anih theihnan Autonomus District Council siam vek tura sawrkar nawr nise tih thu an lo pass tawh a ni. Mizoram rorelna sangber Legislative Assembly pawhin Dt 7.4.2000 ah khan Six Schedule Para-20,sub para (1) a Tribal area tarlan Part – III ah hian Mizoram pumpui dahlut tura Central sawrkar ah siamthat dil nise tih thu lungrualtakin an lo pass tawn bawk a ni.

Mizoram hi zofate himna, inpumkhatna leh innghahna a nih zel theihnante, ram leilung hauhsakna kan kuta a awm reng theihnante leh kan nihna ang taka Ceetral sawrkarin min enkawl zui zel theihnan Sixth Schedule a in dah/khungluh hi a tul takzet niin a lang.

Heng hi ngun taka ngaihtuah turin kan sawrkar leh tlawmngaipawlte bakah Zoram mipui zawng zawng te ram leh hnam hmangaihna thinlung puin kan ngen tak meuh a ni.

Sd/-
(DARROSANGA)
Secretary
Information & Publicity
H.S.A Jt Hqrs, Aizawl