BAWI CHU A PU NEKIN A ROPUI NAWH

Bible chang: Johan.13:16

Ziektu: Pu Zarzolien Keivom.

Ei chang thlang “Bawi chu a pu nekin a ropui nawh” ti hi a hrilna tukvera inthoka bi chun inngaitlawmna thu tieng nek hmanin bawi ropui nawzie tieng hi ei hril uor tum lem a nih. Bawi hi tu lai chu hmu ding an vang ta a, Mizorama ngei khom kum 1914 March khan Borsap J.Hezlett thusuoka suktawp a ni tah. Bawi ngirhmun hi inhnuoi tak, ran le mihriem inkara mi an nih ti inla ei hril uor taluo ring a um nawh. Thuthlunghlui hunah lem khan chu thuomhnaw ang chaua an ngai khom niin a’n lang. Tu khomin a bawipa amanih a bawinu amanih hmola a vuok hlum chun ama chu hrem ngei ding a nih; sienkhom ni khat ni hni hnunga a hung inkang nawk ruok chun hrem lo ding a nih, bawi chu a pu thil nei laia mi ani sia a ti chu (Exodus. 21; 20-21). Bawngchal huoiin bawinu amanih bawipa amanih a sikhlum chun bawi neitu kuomah tangka shekel sawmthum peng an ta, bawngchal chu deng hlum ning a ta, a neitu ruok hrem lo ding a nih. Chuong ang khop chun bawi ngirhmun chu an hnuoi a, an lu man khom shekel sawmthum chau a ni chu. Bawi chu zor le inchawk thei thuomhnaw ang chauh an nih. Bawi chun tangka suma intlan thei le suok thei hun a nei khoma a pu a lunginsiet a, a kuomah um zing a la nuom phot chun a pu chun roreltu hmaah kul kotkhar bieng bulah thir zumin a na verpek a ta, a dam sungin a pu bawi ni tang a tih.

Tiena ei thlatu Adam le Evi lung inmawl leiin suol bawiah ei lo intang ta a, chatuona hrem ding ei lo ni tah. Chu suol bawia inthawka min tlan suok thei ding hlak chu vanah tu khom an um naw a, hnuoia le hnuoi sungah khom an um bok naw leiin Johan khom a tap ngawi ngawi a nih ti Thupuog 5 ei tiem chun ei hmuh. Tu ta ding khoma a danglam nawh, Mi po poin thilsuol an thaw a, Pathien ropuina an chang thei ta si nawh ti Rom 3:23 a ei hmu angin Pathien ropuina chang zo ta lo suol suoka zor ei lo ni tah, ei ngirhmun an hnuoi ta hle a nih. Lalpa chun vana inthokin ama zongtu mi var an um am ti hmu tumin hringmihai a mi zuk thlir a, Naw tieng an pet hmang vong a, hlemhlenain an sip a, thil thra thaw pakhat bek khom an um nawh” a ti a nih (Sam.14;2-3). Rom 3:13-18 ei tiem chun, an hnuk chu thlan inhong a na, an leiin hlemna thu a hril a, an hmurin rûl tûr a pai a, an bau trongsie le thu khain a sip a, thisen insuo dingin an ngal a zâng a, an fena photah sietna le rinumna a tlung a, remna lampui an hriet nawh, an mit mengah Pathien tina an nei hrim hrim nawh” a ti thlawt el a nih.

Ei nina indik tak chu suol suoka zor tah, châkna suol le inhnarna chi tinrenga sip ei lo ni tah leiin ei thil chàkna le inhnarna hai chun tê pâiin suol a hring a, suol chun taksa le thlarau thina chen a hung intlungtir hlak a nih. Chuong ang chauha chàu le ngirhmun inhnuoi tak, chatuona hrem dinga lekhabu ziela hming chuong, inchikna suoi pasaria nam le char khum tlat hai chu Pathienin a hmangai em leiin a nau pakhat nei sun chu intlanna dingin a hung pek tah a nih. Pathien chu inpakin um raw se. Ei thlatuhaia inthoka nun dan inhnuoi tak le chau taka inthok chun thil se thei tangka le rangkachaka intlan khom ni loin beramte hmêl hem lo le soisel bo Krista thisen hlua intlan ei lo ni tah ti 1Peter1:18&19 ah ei hmuh. A va hang ropui ngei de aw!. Suol bawia inthoka zalen dingin Krista chun a mi’n suo a, suok ringkol bat ta lo dingin ngir nghet ei tiu. Chuong ang lawma Pathien hmangaina ropui chu ngaitha lo a, sawt naw te sunga dinga suol inhoitirna thlakhla le hmangai lo ding le Setan bawia dam sunga um dinga ei nakawr inverter ve lo dingin fimkhur ei tiu.

Isu ringtuhai hi mi enton le thlir tak ei ni leiin mi sukhnoktu taphot le mi khuoptu suol chu thè thlain ei hma tienga intlansieknaa chun sel takin tlan ei tiu. Mosie ang khan, Setan bawipa le bawinu nia hun sawt naw te sunga suol inhoitirna chen nek chun Pathien hminga suol thilthaw hai chu do le tuor thlang lem hlak ei tiu, Hmutheilo hmutuhai ei ni si a. Bawi chu a pû nêkin a ropui naw ang bokin ringtuhai hin pu nepnawi, ei chunga thu neitu ei la hau talaw lei hin Pathien malsawmna ei dong ding le chang ding tam tak chanin, natna tuor lo ding chen tam tak tuorin thina chen ei tuok pha hlak. Tulai kohran thruoitu le mi tam takin ringnaa insang taka eiin ngai lai zing hin suol ringkol ei bat treuh hlak leiin Pathien hming chen ei ni lai hrilsietin a um hlak nin an lang.

Pathien ngaiah suol a chin a lien ti a um nawh. Nangin a chin a lien i thre thei naw a, i ngaidan kha Pathien ngaidan a ni bok nawh. Ruihlo khom a thra deu le a thra naw deuh ti Pathienin a nei le, damdawi i ching zongsak naw lei el in talap, sikhar, khaini, zu, kuva etc ching mi i lo ni chun thra bikin inngai naw rawh. “Pathien chengna tempul in ni le Pathien Thlarau nangniah a cheng ti in hriet naw am a ni? Mi tu khomin Pathien tempul chu a sukkhawhlo chun Pathienin ama khom sukkhawhlo veng a tih, Pathien chengna tempul chu a thienghlim si a; chu tempul chu nangni in nih” ti Rom.3:16&17. ah ei hmuh. Pathien hi hmusit chi a ni nawh. I tù ra kansar le chuop trawlnain a hmuok zing thei che a nih ti ngaituo chieng rawh.

Inruithei i chîng naw lei elin thra deuin lo inngai pal rawi i ti aw! Tangka hi ei mamaw hle lai zing hin ngainat taluo hi suol tinreng bul le milem biekna a nih ti khom hi ngaituo sa ding a nih. Kut tling loa sum laklut dam, a thiem lem thiemnaw inchangtir dinga thamna lak dam, mani chan bak ding hlepruk dam, mani taksa chen inzor hai dam hi Pathien ngaiin suol tawpkhawk an nih ti Baibul hmun tam takah ziek a nih. Hmu thei thilhai chu bo nawk el ding an ni a , hmu thei lo thilhai ruok chu chatuona ding an nih ti hre zingin ringtuhai hi khawvel suolna tuipui chungah thieng le thieng lo inkâra ei inleng lai hin, ei ringna bul le sukfamkimtu Krista Isu tieng en zingin ei hmatienga intlansiekna uma hin sel takin tlan ei tiu.

Bawi chu a pû nekin a ropui nawh ti hre zingin inruithei le sum le pai bawia intang lo dingin tiemtu po po ditsakna insang tak kan hlan.

KEIVOM RUN (Greater NOIDA)

23 July 2011.