By James Pusing
Khuplal hi kum 1882 khan Hmuntha khuoah a pienga. A pa hming chu Thangzakhup a nih. Ama hi pa hmelthatak le mi hrattak el a nih. Hmar naua chu ama hi ahrat pawl tak ni ngei a tih.
Pa taksa tha deu, a pangti khawm sen deu tût el, intuoi thla le inkhai thli tawk tak el a ni bawk. A dung insang zie chu feet 6 vela insang a nih. A pum lien zie chu vawk inkhi a inkhi in fun ruk zet a tling bawk. A taksa mar tha lai tak chu a ban khawm hi vei intak a ti thei hiel a nih.
A vanglaia taka a rikzie chu kg 100 vel a nih. Ama hi pa hrat tak a ni bakah, pa nunnem, zaidam le nuntha em em a ni bawk. Naupang te a ni laia inthawk mi tlawmngai thei tak le neka upa inza em em mi a nih. Mi hlim thei tak ni’n rimawi tieng khawm an hnik em em a, khuongben le darkhuong vuok khawm a thiem em em bawk. Nau pariet a neia, chuong hai chuh:
- Hmangropui
- Hmangkhum
- Hmangtinhnieng
- Hrangthathnieng
- Hmangzathat
- Hmangthanghlei
- Chawngtinhnieng
- Hrangdingzo
Ama hi papui te bawp ei ti laia inthawkin thiempu a hung ni a. Bawlhmunhaia rawngbawlna (inthawina) neiin mihai inza le inpak a hlaw hlak. Natna khirkhân tak takhai khawm a thawi dam hlak leiin thiempu sa khawm an ni hunlai rau rau a chu a dawng rawn pawl tak a nih. Hienga hun sawttak a hmang hnungin kum 1940 khan Lalkher a Pathien thuhrilnaah a hung piengthar ta a nih. Hi taka inthawk hin ringtu ringum tak ni’n kum 1975 khan a thi a nih. Khuplal anga hrat hi khawvela hin mihriem an tam ring a um nawh. A hratzie tarlangna dingin a hnuoia a thilthaw thenkhat hai:
1. A saihli chu ruova chang phelphawk, hang siemtha deua saihli-hrui hera hmang el hlak a nih. Chuleiin, a saihli hi chu tlangval hrât pawl khawma an kuoi zo ngai nawh. Hieng ang saihli hmang hin a nih, savawm, zawng, awrrang, sazaw le vate chi dang dang a lo per thlak chuh.
2. Mizoram, Khawlien khuoah zawlbuk buonzawlah, an khaw tlangval hrattak le an inbuona, naupang ang chauin a buon leiin mi dang tukhawma an ngam ta nawh.
3. Parbung khaw hmun hlui, khuo a inthawka Km. 4 vela hla-ah, sakeiin sanghal fun ruk a lien a se hlum zo chau a hmu a. A sakeiin fen zo lovin a maksan chuh a ringah a tan hmawk a, “Nang pasaltha, a lu chang rawh” ti’n a lu a peka. A dang po chu a ke a khitin khuo chen a pai tlung.
4. Lungthulien khuoin hminga a nei pha hiel an khuo kawla lungthu pathum, pakhat rikzie chu quintal 6 (Kg. 600) vel pei ni dinga ring chu a ching-in-chuon zo.
5. Ruonglevaisuo-ah vai hratpa an ti leh ruo sangkhat pum sun thlang an in ela. Khuplalin awl takin a sunthlang zo a, vai hratpa ruok chun a sun thlang zo nawh.
6. Taithu khuoah siel a ki nguntang chen chawrsawnga thang lain, a ki pahnia manin chawrsawngah a kei kai zo.
7. Parbung lal busung ni’n lal sumbel, khap 12 (sawmpahni-a) lein a sunga zu a bita um chu kawng chen a dawm kâng.
8. Parbung mihrata an hril ve pawl, Kailal, Zosel, Khuonga, Bawngte le Thanghrim hai po in an hrawna, an rengin hnuoiah an zaltir vawng thei bakah, a tho hmasa sa an zaltir nawk pei thei.
9. Kum 1967 khan putar kum 85 a ni hnungin thirtieng hrietrieta lien a kutpui le a kutchal chauvin a hmet ngir zo.
10. Parvachawm khaw kawlah siel hel, a ki khawm tawng chena sei tah, hruoi bovin a ki ringawta man in lo fîng khat (Km. 1 neka sei) dinga hla a kei phit zo.
11. Keivawmmuolah a ruolhaiin an cho phawka, kherseu tuoi kutring ruol zet chângkawlin a her pek tawl.
12. A hrat lai tak huna khan chu hrei ha zawng awlsam a ti hle ning a tih. Ruo-bul hi phawi zo naw rak a nei nawh.
13. A tar hnung kum 80 vel a ni hnung khawma bal hi vawthlai a ding a pum in a kut khingkhat chauin a hmet nawi a a thlak pei hlak.
Ama ngei khawma, “Ka hratlai chu mihriem a tunga lawn tukhawm ti ka nei nawh” a tih.
Dear James, I thaw tha de. Hung dek pei ta. Tienlai mihai chanchin hriet ding dang khawm um sa naw maw?
ReplyDeleteInformation thatakel a ni a, ka lawm ngawtel.
Mihrang Khuplal kha a tar vuoi hnungin ka hmu ve phak tawk a; chu chu kum 1972 kha a nih. Kha kum khan favang hnungin Parbungah sikul ka hang kai veh a, an pansak takah, mi inah ka um a. Sienkhawm naupang el ka la ni lei le, mi hmingthang a nih ti khawm ka lo la hriet naw leiin lo belchieng nachang ka hriet nawh a; a pawi khawp el. Ka nu ruok chu, a hming le a chanchin a lo hriet ta sa a ni leiin, kan tlung ni zing-zing kar a mi zu panpui nghal a. Vawkbu-a suong ding bahlip pui, rawsen pui, batung ... inang rawnga a hmet-hawp ruop ruop kha ka zu hmu ve.
ReplyDeleteKhang hun lai khan tar-kawng-kawi a ni tah a, funghrawl thunin, kum pumin a la lengsuok hlak a. Keini kha tlangval inti ve, high school zo hnai tieng kan ni tah a. Ka lo enkhi hlak a, a kerai kha ka malpui ruol vel a la ni'n ka hriet.
Hmarhai hi mani inpak nuom rak lo mi ei ni awm. ‘Mani inpak le sakhi ngalah iengkhawm a kawp nawh’ ti hi upa tawngbau ei nei hai laia a lar pawl tak pakhat a ni hrim a. Hi hi a tha em em ... lai zingin mani hnam chanpui inpak hi ei rinpha hiel annawm a nih ka ti hlak a. Chuong lai zingin, tu hnung hnung hin, mani thilthaw report a, pultpit tlanga le media-a hai chen inpawt zut zut ei tam nawk ta vieu si. Ei lut-in-le zo am an’ ta ding!?
Ka hrilna san: sawtieng biela mihaiin lekhabu pakhat ‘Mizo Michakte’ an buotsai a. Hmar-hai hi Mizo an mi ti am, ti naw am; Pu Khuplal ruok chu Mizo Micchakte laia langsar pawl tak a ni nawk lawi si a nih. Anni haiin a chanchin an ziek hi ka dem nawh a, ka theida hlek nawh; ka lawm em em a nih. Amiruokchu anni’n an ziek hma khan lo ziek hman inla chu aw … Iengleia Pu Khuplal le ei mihrang danghai chanchin hi vawisun ni chena tiem theia la nei lo am ei na? Mani inpak le sakhi ngalah iengkhawmkawp dingin ei ring nawha a ni? Sawtieng biela an sikul naupanghai chun Khuangchera chanchin, Vanapa chanchin, Laltheri Zai, Saikuti Zai an inchuk a. Ei naupanghaiin Hmar subject-ah tu chanchin am an inchuk a leh … (I meant) Khuplal a chanchin hi an hriet am? Hanuman chanchin chu inchuk em naw awmtak an na!?
Hun sawt tak liem taha chanchin ei suikir chang ei thulakna hnar (source of information) ringtlak a nih am, thil ni thei der lo a mi hril sa am, ti hai hi ei enfie le, ei thiltfim tul ngei a tih. Entirna: Pu Khuplal a saihli hi an hril zat ‘rawva phek phawk’ niin an hril zie. Thil awi-um lo tak a nih. Rawva hi saihli ngul dingin an hmang ngai naw chau ni lovin hmang thei a ni naw hrim hrim a; rawnal annawleh rawthing an hmang hlak. Rawthing hi a vang em em a, Patpuihmun le Sartuinek inkarah a um a, hmun dangah a um ka hriet nawh. Rawnal kher kher, chu khawm a chang tha, a bul sa tha tawk, tlawma a suk zawnga kur met, chu chu an lak a, a zaang tieng, a kur deu met chu saihli dingin an sak hlak a. Raw dang hieng rawmau, rawthla, chalte, vai rawpui, ti hai hi … rawva thangsain, saihli ngula hmang thei a ni nawh. Chuleiin ‘Khuplal saihli chu rawnal phek phawk …’ ti ding a nih.
Saihli hrui dingin sairil kher an hmang hlak a, a remchang naw chun rawva hnang hmang thei a na, a tlo nawh.
Hun phawt raw se ie. -RH
tha de o'...'
ReplyDeleteA tlangval lai photo I nei no mo
ReplyDelete