Trong Suosam

[By Pu L.Keivom*, Inpui columnist]

If thought corrupts language, language can also corrupt thought.
-George Orwell

Language is the light of the mind.
-John Stuart Mill

Ei chanchinbuhai baka trong ei suosam nasatna hmun tak chu pulpit a ni ring a um. Ei inkhawma zata trong ei suosam zat hin thisen anga inchik suok chu ni ta sien, ei pulpithai hi ran thatna hmun ang chara thisena por inthluok le rimsie ning a tih. Sienkhom ei suosam a nih ti hrie le chu thil ngaituo le invoi chu mi tlawmte chauh ei ni ka ring.

Kha hma khan hi le inzom hin Delhi Thurawn-ah artikul iemani zat ka ziek tah niin ka hriet a, iemani chenah ei trangkaipui khom a hoi a, lawm a um khop el. Liem tah kristmas le kum thar prokram khom kha hang en inla, kha hmaa ‘Hun vongtu’ tia indik lo deua ei hril hlak kha ‘Prokram vongtu’ tiin indik thlapin an hung ziek tah. Hun hi thil um zing, hung lo, fe lo, chatuon ei ti hi a ni a. Ei sui inthuk deu lem chun hun hi Pathien tia hril thei khom a nih. Chuleiin, mihriemin hun hi ei vong thei chi a ni nawh. Amiruokchu, mi thar ei hung pung pei bakah kum a hung sawt a, ei hung inthlada deu deu a, ei inhnawmna ngaia bok ei inhnawm tran nawk tah niin an lang a. Chuleiin, hi artikul hi ei thrathnempui takduoiin tiin ka hung ziek nawk a nih.

Mak ka ti bèk bék pakhat chu, trantu le inkhawm vongtua ruothai Baibul chàng tiem hi chik takin ngaithla la, indik taka tiem thei chu mi zaah sawm khom ei ni naw el thei. Chu taka inthoka thil chieng êm êma inlang chu, ei chàng tiem ding tawite inbuotsaina dingin kar khat zet ei neia chu a tiem lawk ei tlawm ti a chieng. Delhi Version ei hang tiem lem lem hin chu, Hmar trong indika ziek a ni tak leiin ei inkhor a, zu inrui biling lamlawnin pem tlei tluoiin ei tiem a, luoksuok ei va hang sukna thei de aw! Kristmas lai khom khan Luka 2:14 a vanmihai tlang hung insam kha indik taka “Chunghnung taka Pathien” tia ei inlet ta sa sa, ei pastorhai po poin “Chunghnung takah Pathien” tiin indik lo takin an mi la lampek ta tho tho a nih. A hmasa le a nuhnung umzie hi sim le hmar angin a danglam a nih ti an ngaituo naw khom a ni el thei. ‘Tisa’ le ‘taksa’ indanglamna khom thlier hrang thei loa Pathien thu hril dam hi a pangzatumzie iengtik am ei hriet thei ding maw!

Trong ei hmang suol rawn laia threnkhat chauh a tawi thei ang takin hang hril vak ei tih:

Ni sien, ni sien la
Thil ei puong zata trongkam hoihawm anga ngai a, “Chu po chu ei hang puong thei ni sien la” tia ei suktawp zie hi trongkam indik lo hulhuol a nih. “Ni sien la” ti chu thu rotna (proposal) amanih duthusam (wish/wishful thinking) hrilna a nih. Thil ei puong vong hnunga thu rotnaa suktawp chu thu letling a nih. Chuleiin, thupuongtu hrim hrim chun a kharnaah “Chu po chu ei hang puong thei chu a nih” ti el ding a nih.

Thawlawm dawl lo ding
“Thawlawm dawlna um a tih” ti hi trongkam indik lo a nih. Thil dawl amanih khon hrim hrim chu dannaranin thaw ding zat inbitukna thil a ni hlak. Kristmas le kum thara ding thawlawm chu dawl ding a ni laiin Pathien chawibiek dinga ei inkhawma Pathien ta dinga thilpek ei hung chawi khawmhai hi chu a dawla dawl ding ni loin lak khawm ding a nih. Thuthlung hlui huna inthok khan Lalpa Tempula an fe changin kut ruoka fe lo dingin Pathien ngeiin chieng takin Mosie hmangin a lo hril a, chu thil chu voisun chen hin thaw hlaka neiin ei sunzom pei a nih. Chuleiin, “Pathien kuoma ei thilpek hung chawihai lakkhawmna um a tih” ti ding a ni lem. Tuta inthok chu inkhawm vongtu dinga ruothaiin an thaw suol zing ta nawna dingin DHCF Secretary-in mi a ruot taphothai chun trongkam indik an hmang theina dingin thurawn pe lawk zie hlak raw se. Thawlawm dawl nawk chut el hlak hi a thring taluo.

Benediction hril dan ding
Inkhawm trin tawma malsawmna hril dingin dannaranin ei thiempuhai ei fiel hlak a, chu chu hmun threnkhata chu namnghetna chang tah upahai khomin an hril hlak. Benediction chu ‘malsawmna’ tina a na, chu chu Pathien aiawa ngir theihaiin Pathien hminga kohranhai mal an sawmna a nih. Baibula benediction hril ei hmu hmasa tak chu Mosien Israelhai mal a sawm thua khan a nih (Nambar 6:22-26). Chuleiin, pastor-in benediction a hrilin ama le ama mal insawm sain, “ei renga chungah um raw se” a ti ding a ni naw a, “in renga chungah um raw se” a ti lem ding a nih. “Ei renga chungah um raw se” titu chun benediction hril loin ‘duthusam’ a hril lem a nih. Chuleiin, benediction hriltu dinga ruot chu duthusam hril dinga ruot a ni naw leiin, benediction hrilin pung khawmhai chu mal a sawm ngei ngei ding a nih. Hi hi ei pastor-haiin an thaw suol ngun khop el a, thil poi tak a nih. Malsawmna inhlantuin mani mal an insawm sa hlak ti hi Genesis-Thupuong chen zong la, pakhat khom hmu naw ti nih. Hi thu chipchier lema August 25, 2005 ka ziek chu Delhi Thurawn-ah insuo a ni tah.

Voisun ni, voituk zing, voizan ni
‘Voisun’ ti el dingah ‘voisun ni’ ti hi ei ching em em a, a uor zuolhai lem chun ‘voizan ni’ amanih ‘voisun zan’ dam an tih. ‘Voituk’ ti el dingah ‘voituk ni, voituk zing’ ti pawl khom ei um nok a nih. DHCF chawibiek inkhawm (1500-1700 hrs) hi sunchang le zantieng inkara mi a ni leiin indik taka hril ding chun ‘chawhnung inkhawm’ a nih. Amiruokchu, lo ngai veng veng la, ‘chawhnung inkhawm’ ti fuk chu ei vang em em.

Hrilna, tiemna, puongna, sakna..na na na
Thu hrilna nei, Baibul tiemna nei, thu puongna nei, hla sakna nei ti dam hi trong chang lakna taka ei hmang a ni tah. Hi hi trongkam indik lo a nih. “Pastorin thuhrilna a nei” ei ti hin ‘Thuhriltu chu pastor a nih” ti ei inkawktir tuma chu a kawk hrim hrim nawh. A kawk tak chu pastor thil nei ‘thuhrilna’ a nih. Chu thuhrilna chu hmangruo, entir nan a bau amanih, an naw leh loudspeaker, tape-recorder le a dang dang amanih a ni el thei. “Pastor-in Baibul tiemna a nei” ei ti chun kha a thil nei ‘tiemna’ kha a mit amanih tarmit amanih a ni el thei. “Secretary-in thu puongna a nei” ei ti hin Secretary-in thu a puong thu ei hril ni loin ‘thu puongna’ a nei thu ei hril a ni lem. Chu thu puongna a nei chu lekha amanih internet amanih, loudspeaker amanih, tlangsam amanih a ni el thei. “Pastorin thu a hril, Baibul a tiem, thu a puong” ti el ding a nih. ‘Hla sakna a nei’ ei ti chun a rawl amanih ei tina ning a ta, ‘hla insaktirna a nei’ ei ti chun tape-recorder amanih VCD a nei thu ei hrilna ning a tih. ‘Thal sakna a nei’ ei ti chun thal sakna dingin chem a nei thu ei hrilna a nih. ‘Sa kapna a nei’ ei ti chun silai amanih thal amanih a nei thu ei hril a nih. Ei tronga a hmun le hmun loa ‘NA’ ei bel hi Saptrong awphawia Baibul inletnaa ei trong an lo kei kawi leia inthoka hung suok a ni tak a, chu chu trong thraa ngaiin, ‘Active Voice’ a ei hril hlak kha ‘Passive Voice’-a hril ei tum tlat a, chuleiin ei trong hi ‘na-in’ a sip a, a na inrik hle a nih.

Hla sak hril taka chun, threnkhat chun “Sam ziek” dam ei tiem hlak a, Sam chu a ziektu mihriem khom ei sukhoi khop el. ‘Sam’ chu Inpakna Hla tina a ni leiin Mathai ziek, Marka ziek, Luka ziek le Johan ziek ti anga ‘Sam ziek’ tia hril thei a ni nawh. ‘Sam bu/lekhabu’ amanih ‘Sam’ amanih ti lem ding a nih. Sam hi hla a ni leiin a bung zawnga hril loa hla anga ‘Sam nambar chuong zat khang zat’ tia hril ding a nih. A ziektu hming inchuon lo, sienkhom Mosie zieka ngai Genesis, Exodus, Leveticus, Nambar le Deuteronomy hai hi ei hril pha khom ‘Genesis ziek’ tia hril ding a ni nawh. Hieng bu ngahai hi ‘Mosie lekhabu’ tia hriet an ni ang hrimin ‘Mosie lekhabu Genesis’ ei ti naw leh ‘Genesis/Genesis Bu’ ti top el ding a nih.

Lawmthu hril
Lawmthu hril dinga ei ngir chang hin mi tam takin ei thaw rop chu lamthu hril ei bat thu le nuom thu ei hril hril a, sienkhom lawmthu ruok chu ei hril ngai nawh. Trum khat chu ei pastor pakhat Vote of Thanks hril ka ngaithlak a, “I want to thank” tiin sentence tin a tran a, lawmthu a hril nuomnahai hming a sam a sam a, sienkhom lawmthu hril der loin lawmthu hril a nuom thu ringotin a suktawp. Lawmthu hril ei bat chun ei bat thu hril hril loa ei lawmthu hrila tlak el ding a nih. I poisa an bat thu an hung hril an hung hril nekin an bat hung tlakhai sien la, i lawm lem daih ka ring. Lawmthu hril i nuom chun i hril nuom thu hril hril loin lawmthu chu hril el lem ding a nih. Chik takin lo ngaithla inla, lawmthu hril dinga ei ruothai hin lawmthu an mi hril fukpek chang hi vang tak a nih.

Tu le ieng am (who & what) ?
DHCF chawibiek inkhawma ei hla sak, abikin hla thar hai hi ngaituo cheta ei sak naw lei amani ding, a thren hi chu Baibul thutak le inkal vang vang dam umin ka hriet tlat hlak a, kut bena hang khukpui hlut chi lo khom a um nuol el thei. A thren chu a phuoktuin a hril tum nia ei riruotpek, sienkhom a trongkam hmangin hril fu si lo dam a ni nuol. Tam tak chu Baibul thu ei inlet suol leia thil um, ei thaw ta laklaw leia ngaituo chieng mang loa ei thaw zom ta pei dam a nih. Baibul inlettu taphotin tu laia hming an hriet lar tak ding chu Eugene Albert Nida a ni ka ring. Ama hi ‘dynamic equivalence’ an ti, tu lai tronga mi hriet thei dinga a umzie ang taka Baibul hi inlet ding a nizie tlanginsampuitu le chu dinga hma nasa taka latu, Father of Modern Bible Translation an ti nuom hiel a nih. Ama chun, mi tam takin ei biek chu Pathien thu ni loin an inletna trongkam, ei lo hmang thrang tah kha a ni thu a hril a, ka pom zawng tak a nih. Japan tronga Baibul chang pakhat an lo inlet, a umzie hriet mumal thei lo chu fie taka inlet dan ding a hril tawl trumin anni chun, “Chuonga fie kula ei inlet chun thiempuhaiin ieng sin am thaw ding an nei ta ding?” tiin an don a nih. Chu chun thu tam tak a hrilin ka hriet.

Inlet dik lo, sienkhom ei lo hmang thrang tah leia ei inthla nuom lo, a chieng nawna lai lai kha thlarau ruia ei ngai tum tlat Baibul thu a tam em em a. Chuong laia pakhat chu Davida trongkam, “Aw Lalpa Pathien, tum ka na, ka sunghai tum an na, hi chen chen hi i mi thruoi?” (2 Samuel 7:18) tia ei inlet hi a nih. Eini rawiin ring tlak taka ei ngai RSV chun, “Who am I, O Lord God, and what is my house, that you have brought me thus far?” tiin a sie a. Tu lai khawvelin a hmang inlar tak NIV chun indik lemin, “Who am I, O Sovereign LORD, and what is my family, that you have brought me this far?” tiin a sie thung a. Graduate insi khep khupa ei um hnung khoma eini rawi buoina chu ‘who’ le ‘what’ indanglamna ei hriet naw hi a nih. Ei hriet chu ni sien, ei Baibul sut thar hmasa takah thlak daih tang ei tih. Amiruokchu, tu chen hin Lusei tronga an inlet dik lo ei lo kawpi ang khan ei la hmang ngar ngar a nih. Who is our father? What is your father? Which is your father? How is your father? tihai hi zawna inang lo vong a nih.

Chu thu, ‘what’ ei inlet suol chu hlain ei phuok zui nawk pei a, ei hla inlar laia pakhat a ni nghe nghe. Pa tling nu tling, kut le ke kim biei, a thlum a al, inthim le var thlier thiem ta dinga ngai, a tam lem chu Pawlsawm tling phak tah ei ngir khup a, “Ka sunghai tu am an na?” tia kut bena ei khek thruop thruop el hi chu, a zie naw deuh a nih. Mani sunghai khom hre lo khopa invet biling ding chun tu khom ei insie nuom ka ring si nawh. Sienkhom, ei sunghai khom ei hriet naw leiin Pathien hiel ei indon a ni mieu bok si! Hang ngaituo chieng ro, chuong chu thaw awm hrimah ei inngai am a ni?

DHCF Thralai Hlabu ei hmang lai hi an buotsai laiin editing dingin an mi hung pek a, a ni em em nawa ka hriet leiin, “Ka sunghai ieng am an na?” tiin indik takin ka lo sie a, sienkhom mi tam lem chun ei sak pangngai bokin ei la sak zing tho. Threnkhat lem chun mi hla phuok sa lo thlak danglama ngaiin thiem naw arbawm mi’n phurtir an tum el a nih. Hi hla phuoktu hi ka inah bu fain ka fiel a, hi thu indik nawzie le Saptrong le Hebrai tronga chu “who” ti nekin “what” ti an hmang lem thu ka hril a. Thudik ka hril chu lawm ta nekin, “Saptrongin an inlet suol a ni chu” a la ti ta deu deu. Ka tupa a la ni nawknghal! Nida-in a ti angin, Pathien thutak nekin Pathien thu ei lo inlet suol kha thutaka ngaiin ei lo biek lem takzet a nih ti a chieng khop el. Chu chu ei thiempuhai ngirhmun a ni tlangpui. Ei thlarau chang hi a chang chun thlarau mitdel khom a hoi thei khop el. Poi inril tak a nih. Ei trong ei suosam ruol hin Pathien thu khom ei suosam zing a nih ti hi ei hriet fie a va hang poimaw de aw!

Hril ding tam tak, a tlampuiin a la uma chu hun remchanga hril dingin la khek lem ei tih. Hi ei hril po khom hi ei uksak chun ei trong suosam dan zieum deuh a tih. Ei trong hi a thattu nekin a sukhringtu ni lem tum seng ei tiu khai.
=============
[*Editor's Note: INPUI columnist Pu Keivom is a retired IFS officer, respected Hmar Mizo litterateur and author of 'Zoram Khawvel' series]