By Zozam Times
Chief Minister Lal Thanhawla chuan "Mizoram hi zohnahthlakte tan chuan Inpui bera kan neih a ni a, ram pawn a miten Mizo nih an duh emaw, duh lo emaw, an mangang nikhuaah chuan Mizoramah bawk an lo tlan khawm leh thin a. Mizoram hi Zofate inpui ber a ni a, Pathianin min tawn-khawmna pakhat chu Lusei tawng hi a ni a, Mizo chi peng hrang hrangte chuan hman nise a tha hle a ni" a ti.
Inrinni-a Chanmari YMA Hall-a 'Zoram damna Hla Kutpui’ leh Lalremsiem Fakna hla Album tlangzarhna hun-ah Chief Minister chuan sawiin, "Thenawm ram amite chimral an nih lai pawhin Pathian nungin kan ramah hian min hum zel a, khavel sakhaw lian ber ber Bhudish, Hindu leh Mosolman ten min hual bet mah sela, min chimraltute an lo lan dawn velah Pathianin Missionary a rawn tir lut ta a. Lal lungawina atan leh chanchintha hril kawnga hma kan lak zel chuan he hnam hi tute hnam mahin min chim ral ka ring ngai lo va, Pathian nung lakah hian Mizo hnam hi kan special a ni" a ti.
"Inngeih leh inlungrual taka kohhran hrang hrang kan awm hi Pathian nung duhzawng a ni a, kan duhdan zawng theuha kan kal ringawt chuan ring thar kan siamte tan kal ngaihna a awm dawn lo a ni" a ti bawk.
He hunah hian Brig T Sailo MLA, Lalduhoma MLA, Lok Sabha MP CL Ruala, Assembly Speaker R. Romawia bakah Parliamentary Secretary leh MLA engemawzat an tel a, mipui an kal tha hle a ni.
He fakna inkhawm leh album tlangzarh inkhawmah hian Churachanpur, Shillong, Lawngtlai, Saiha, Lunglei leh Mizoram hmun hrang hrang atangin mipui an kal khawm a. Album hi Pite- Lalriliani, Biakveli LPS leh Rev Dr Da-rchungnunga ten an tlangzarh a. SAY zaipawl, EFCI Aizawl Choir leh he albuma zai mi 16 te zai ngaihthlak a ni a, nilengin Pathian faka hun hman a ni.
Post a Comment
Comments not related to the news or article may be deleted.