Oct 31, 2009: October ni 14-17 sung khan Institute of Asian Studies (IAS), Chulalongkorn University le Euro-Burma Office huoihawtna hnuoiah "First International Conference on Shan Studies"nei a ni a. Hmar Mizo sunga inthawkin senior anthropologist Pu Ramtheinghlim Varte khom North East India Center for Indigenous and Cultural Studies(NEICICDS) aiawi in a zu thang ve a; an seminar chu a hlawtling hle thu chanchin ei lo dawng.
Seminar hi Maha Chalulongkorn University, Bangkok, Thailand, campus a nei a nih.
HSA general president lo ni tah Pu Ramthienghlim in ‘An Anthropological Study of Lesser Known Shans: A case study of Mizo-Chin-Kuki Tribes of India’ ti thupui hmangin seminar paper a pek a, mi pungkhawm han an ngai nuom hle ni'n NEICICDS director Pu Zarzosang Varte chun a hril.
Mizo-Kuki-Chin group a Hmar tobul- Sinlung a inthawk ei chengna North East India, ei khawtlang nunphung (Culture), nina (identity) hai tapte bula tawngbauva hril le khekpui el nilovin ziek ngeiin hi conference-ah hin hlawtling tak le phuisui taka present ni'n chanchin ei dawng leiin lawm a um hle.
Hi seminar a thanghai hih hmun dang dang -- United States, Australia, Sweden, England, China, Sri Lanka, Myanmar, Thailand le India-- a mithiem fe khawm an nih. India ram a inthawk paper presenter chu Pu Ramthienghlim Varte chau a nih.
"Conference chu phuisui takin zofel a nia. Tarik ni 17, October 2009, khan Myanmar a inthawka hung ei suopui unau haiin lam chi hranghrang an min entir a; theihle mut dam, darkhuong hmanga lam chi tum an thaw bawk a, eini le in dangna alo um bek bek nawh" ti'n Pu Ramthienghlim chun Inpui.com a hril.
[Editor's note: Nakie tieng leh Pu RTh Varte seminar paper chu ei la hung insuo nawk ei beisei a nih.]
Post a Comment
Comments not related to the news or article may be deleted.