INPUI.COM KUM 5 CHAMPHA LAWMPUINA THUCHA

From Pu Ramthienghlim Varte, Senior Anthropologist, Shillong

Pi le pu hunlai chuh hnuoi hih leidar anga inzawl dur dingin anlo ring a; a awm tho, an mawlna ngaituo chun. Amiruokchu, Chanchintha zarin eini Hmarhai khawm inchuknaah hma ei hung sawn hrat em  em a. Kei ka mimal tak a ei hmasawnna hril ding ni lang sun le zan ang tluka in anglo ani leiin mi tamtak chun thil awmlo a ngai el thei ning a tih.  

Boruok  hmang tangkai danhai mithiem haiin an hung hmusuok a, Internet khawvel a ei leng hnung lem hin chuh thil awiumlo khawm awi-um a hung inchang vawngel tah a. Chu zar a khawvel pumhuop a thiltlung reng reng  minute le second khat sung chanchin ei inhrietpaw zung zung thei tah hih a mak ti elnaw chun hril ngaina khawm a um nawh .Chuleiin, khawvel ei chengna hih mithiemhai tading chun a chin sawt nuom ta hle. Chu, thiemna hlutzie suklangtu a nih.

Hmar tawng le saptawnga ngaidan le chanchin thar thatak tak insuona ding website iemani zat ei hung nei thei tah a, chuonglai a ka ngaisang le ka chakkhai lakna pawimaw tak chuh WWW.INPUI.COM hih a nih. Hnuchak invawi derlova kum nga pumhlum zet Ocober 11, 2013, hin a hei chuongkai vur vur el hi ka lawmin ditsakna insangtak kan hlan.

A buoipuitu  Pu Robert Lalmalsawm Sungte chun Bangalore (Bengaluru) a chengna hmuna inthawkin Hmar chanchin le midang dang hai in an iziek artikul tha tak tak a hung thawnsuokhai hih ei hnam tadinga thil tangkai tak el, inchuklai, sinzawng, thu le hla le dang danga dangcharhai hnemtu an nih ti hih ka hrietchienga. A tlawmngaina hi ngaisang um tak a nih.

Chun, hi website a hin insel-inhal le inchirthena boruok a tlawm a, thil ho mei mei patlinghai nghawkum tlingphak le hnam inthedar zawnga incho tuokna thu hih a tamnaw bawk a; chubakah, ditsak bik le biknaw khawm a nei nawh. Pu Robert hih media/mass communication tienga hrietna zau tak nei a nih ti hih a chieng khawpel.

Hnam tadinga ei rawngbawlna seng a hin tukhawm an sang an hnuoi ei um nawh. Ei hma a thawding um ringum taka thaw hih hmasawnna hnar a nih ti hih hi website neitu le enkawltu hin a hriet chieng hle.

INPUI.COM HI A HMING INTHANG MAWI PEI SIENLA, MIPUI TADINGA MALSAWMNA HUNG NI ZAWMPEI DING LE  ENKAWLTU PU, RO LE SUNGHAI KHAWM PATHIENIN TAKSA LE THLARAUVA MALSAWMNA A TUL  ANG PEI DAWNG PEI DINGIN DITSAKNA HLU KAN HLAN.

INPUI.COM.DAM ZING RAW  SEH.