Hmar Linguistics Seminar -cum- Spiritual Retreat Chungchang

By Paul Blessing Chonzik

Beisei naw ang taka hotu inzaum tak tak, a kul a taia Hmar Literature Society (HLS) lo thuoia ei Hmar tawng sukhmasawn dan lampui mi lo dap pektu, haiin Hmar Linguistics Seminar, et al. nei ding chungchanga tha an ti naw thu le, an mi le sa hai thanglo dinga thusuok an siem leiin pawi ka ti ngawt el. Hi lei hin hi Seminar nei ding chungchanga ka ngaidan ziek ve tha in ka hrieta ka hung ziek ve a nih. Hi seminar hi nei tha ka ti na a sawt ta a. Silchar kan zin chang Silchara Hmar unau kan hmupui remchang hai ka hrilpui hlak bawk a. Hmar Welfare Society, Guwahati le HSA Jt. Hqrs., Guwahati haiin HMAR LANGUAGE: RENAISSANCE AND PROSPECT ti thupui hmanga seminar an buotsai haia ka thang ve huna hai, remchanga ka hriet hai ka hrilpui hlak bawk. Hi seminar, Guwahati hmuna July 2, 2013 a nei tum khawmin Hmar tawng ziek le hmang tienga ei suong vawr, Pu L. Ruoivel Pangamte khawm ka hrilpuia tha a ti thu a mi hrila ka lawm khawp el. Chuong lai huna chun Linguistic Seminar nei chu Hmar Inpui khawmin a thuphungin tha an ti taa, kei hi Organizing Secretary dinga an mi propose thu khawm ka hriet ta bawk. Seminar neina ding hmun hin Aizawl, Hmarkhawlien le Kaziranga National Park (Assam) hai dapkuol a nia chu a remnawna le duthu sam tawk nawna a um neu neu pei leiin tuta hmun hi sukthluk a ni lem tah a nih.

Mawphurna la hmasatu dinga ruot kei, Diphu (Karbi Anglong)-ah ka uma, HI President le Gen. Secretary hai Imphal le Churachandpur-ah an uma, an hun tamtakhai an inluma um lovin an inzin kuol deu zing bawk. Chuongchun, hun a liem hrat khawp ela, ei Hmar Inpui thuoitu lien pahni hai chu hrillo, kei ve bawk khawm buoina dang dangin a mi chim buoi leiin a hun le program hai sukfel mumal theilovin a um zinga. Hieng vel lei khawm hi a ni el dim aw HLS thuoitu hai le fumfe taka inbiek a um naw nasan kha (!) ti dam ka ngaituo vel mei mei. Chu chu thudang ni ta sien. Hmar literature a hin kan hnik ve na a la sawt nawh. Kan hnik tan dan le tuchena ka ngaimaw hai hang hrildawk veng ka tih.

2010 khan Assam University, Silchar (AUS) a academics tienga thuneitu insangtak, Academic Council meeting ah ka thang ve a. Chu huna chun ka lo hriet lawk der lovin Hmar language chu MIL subject dinga Undergraduate (BA) level-a pawm a ni ding thu agenda ah a lo uma. Mak ka tia, ka phur bawk. Kei a Hmar um ve sun chu tawng ngailovin AUS a College Development Council Director chun a hung hrilfie zung zunga, kan pass ta a. Meeting zo hotel ka pan lai chun, Janata College, Kabuganj, Silchara Asst. Professor sin thawa um, hotupa Lalzawmlien ka zuk phone a, ama chun hi mi hung panin, hi chungchanga hma an lo lak dan hai a mi hril hrieta. Lawm a um takzet.

Chuongchun 2011 a inthawk chun Hmar subject chu B.A. inchuklai haiin M.I.L. subject ah ei hung nei tan tah a. College thenkhata, abikin G.C. College, Silchar ah inchuktirtu an um naw chun Hmar (MIL) subject lak phallo an lo tia. A tawi zawngin tlawmngaiin mi ruoi a hung ni tah. A hlaw ding pek a hung tula, Assam ram hmun dang danga organization lai a hlaw ding dawl a nia; Dr. Rochunga Pudaite le HSA Gen. Headquarters khawmin thla 2/3 hlaw ding khawm an hung tum ve thu mi hril ka hriet. Chuong sa khawm chu a hlaw ding chu pek zing a hung harsa a. Hlaw mumal pek theilo chang a hung uma. Pawi tak a nih. Hmar M.I.L. ei nei sun hi iengtinam sukhringin sukhmasawn ei ta (?), ti chun ka lungril a hung hluo lien ta em em el a nih. Ka hriet suol naw chun Assam University hnuoia college hai lai – G.C. College, Haflong Govt. College, Diphu Govt. College, Nehru College (Pailapool), Karimganj College (hi hi ka hriet chieng naw tlat) a hai BA level-ah Hmar (MIL) subject latu an um tawl. G.C. College ah an tam tak. Chu khela Class X – XII ah hienghai po baka hin Junior College iemani zat zeta Hmar (MIL) lak thei a ni bawk. Hienghai inchuktirtu ding post siem a ni si naw a, inchuktir lo hlak chun an Hmar tawng ziek hai chu tiem a harsa nuom vieu el bawk si. [Diphu Govt. College a chu Bodo department an nei ta tlat; eini iengtinam nei ve thei ei ta? Hmar department lo nei ta reng inla zirtirtu ding MA, NET nei ei hmu zo ding am? MA khawm NET neilo chu BA hai inchuktir dinga lak thei a ni nawh; A subject um hmaa MA, NET lo nei dan lem chu a um naw hrim a]. College thenkhatah tlawmngaia inchuktirtu dinga ruot hai hlaw ding khawm dawl zing a remchang naw hlak. Hi lei hin hlaw hmulo chang an hung neia, an ta dingin tlawmngai zing a hung intak ta hlak a nih. Hlaw ding khawm iengtinam post siem a ni hma po pek thei ning a ta? Rawtna pakhat Education Fund dawl nisien ti ka hang thedar sina chu tuchen hin khaweng a la hmu mumal nawh; HSA Gen. Headquarters inrawina hnuoia hieng ang fund hi an siem mek niin ka hrieta chu kei ka rawtna san tak chu a huop a china, anni inhuoptir chu a lien ding sa a nih. Ka lo hriet danin Manipur a khawm Hmar MIL teacher ding hi High School level ah post 4/5 vel ti naw chu Hmar teacher post dang siem a la ni nawh (ka hriet suol chun ngaidam). Assam tienga harsatna hi Manipur-a khawm ei harsatna a ni ve tho ka ring. Hi khela hin Hmar MIL inchuklai lekhabu (subject) hi Hmar literature sukhmasawnna dingin a huntawk am? Kei literature mi lo hin hienghai hi ka lo invawi ve rak rak hlak a nih. Hi lei hin Hmar tawng chungchanga inrawnkhawm hi pawimaw ka hung ti ve ta em em el a nih. Kei ka khata ka thaw thei a ni si nawh. Hmar Welfare Society, Guwahati le HSA Jt. Hqtrs, Guwahati haiin hma an hung lak dam kha lawmum ka ti nasa. Sienkhawm an fepui dan a danglam deu leiin Hmar tawng thua inrawnkhawmna huopzau lema nei chu makmaw ah ka ngai tah a nih.

Hieng zing lai hin Bhasa Research and Publication Centre, Baroda haiin India rama tawng dang dang hai lakhawma lekhabua sut pei an tum laiah Assam rama tawng dang dang nei hai tawng chanchin ziek an tumna ah Guwahati University ah Workshop an neina-ah fiela ka um angin April, 2012 khan ka zu thang ve a. Chutaka chun assignment – Hmar tawng chungchang ziek ding – an mi pek ta a. Chutaka ziek ding tul hai chu, ‘History of Hmar language’ ti dam, ‘brief grammatical structure’ ti dam, ‘one or two songs’, ‘one or two stories’ ti dam le ‘domain’ (tawng hmangna hmun tlangpui) hai dam an nih. Hi hi ka hang buon tan chun kei ME school-a Hmar tawnga inchukpa khawm hi ei tawng chungchang hi ka lo hriet naw nasat zie ka hriet suok nasa hle a. English medium a tan chawt el hai lem chun an hriet naw awm tak a nih. Hi lei hin iengtinam anni hai hin ei Hmar tawng hi thiem tak tak thei an ta, Class-X, XII le B.A. haiah Hmar (M.I.L.) subject ah mark hmu tha vieu hai sien khawm an thiem tak tak ka ring thei nawh. An thiem theina dingin iengtinam hma lang ei ta ti hi ngaituo tlanga hma lak tlang a pawimaw in ka hriet thar. Hmar Language chungchang ka ziek ve chuongna hi tuhin Assamese version in a suok ta a, Asomiya Bhasa’ (Assam rama tawng hai ti na ni awm a nih) ti chu Delhi Hmar Christian Fellowship in kum 25 a tling champha an lawm ni Sept. 4, 2013 khan India President in Delhi hmuna a tlangzar. English version hung suok nawk vak dinga beisei a nih. Hi ka buotsai naa hin Pu S. N. Ngurte, Prof. L. Ruoivel Pangamte, Pu S.K. Khawbung, Pu V.L. Tluonga Bapui, Prof. Lal Dena, le Pu L. Keivom le mi dang dang hai telephone a ka hriet nuom le tul hai indawnin, a then an document kawl hai en pekin, le an lekhabu ziek hai, abikin Hmar Grammar, HLS, Manipur siem le HLS, Assam siem hai le L. Keivom ziek Hmar Hla Suina hai le Grierson-in Linguistic Survey of India Vol-III Part-III ka hmang tangkai em em. Hieng ang vela ei Hmar tawng ka hang buoipuia inthawk hi kei ka tlinnaw lei am a ni ding, baksam ei la nei rawn niin ka hriet vea. Chuleichun hriltlangna (seminar) nei chu a tha awm de aw! ti hi ka ngaituona ah a lien ta zing a nih. Seminar a chun kei hin Hmar tawng thuah thawlawm ding ka nei naw hle, sienkhawm HLS member hai le Hmar tawnga thu le hlaa lo thawhlawk tak tak Pu L.Keivom hai, Pu Ruoivel hai, Pu V.L. Tluonga Bapui le Pu Rochunga Pudaite hai le mi dang dang haia inthawkin mi tamlemin ei hmasawn pha na ding ei hril dawk ka beisei hle bawk a nih. Hi Seminar a hin thutlukna (resolution) amani thupuong (declaration) kei a tieng anthawk siem tumna a um naw zie mihriem le Pathien hrietin ka puong ngam. Hmar tawng ziek dan thua Hmar Inpui Assembly thuthlukna lo um ta kha hieng ang Seminar mei meia thlak danglam thei a ni naw zie khawm ka hriet chieng.

Hi lungril put hin Hmar Inpui President, John Pulamte le telephone le email in kan inbiekpaw deu char chara, HI Executive Committee khawmin an ngai pawimaw leiin President pu ngei khawm ka umna Diphu-ah Sept. 21, 2013 khan ruol dang pahni le an hung ngat a nih; Diphu-a Karbi Anglong Hmar Association (KAHA), HYA, HSA thuoituhai le inpawl tlangna hun tha kan hmang bawk a. Program ka zuk duon sin laia Hmar tawng ziek dana ei inthuruolnawna deu thenkhat, HLS in a pawmlo, ‘t’ hnuoia sunhang um aia ‘tr’ hmang chungchang le ‘aw’ tluk tawia ‘o’ hmang chungchanga chu hrilsa thain kan ngaia. (HLS thuoituhaiin ‘thuthlukna um ta sa’ a ni leiin hrillang sin khawm a tul tanaw nia an ngai khawm awm lem chu kan ti tho); Chu bakah chun, ‘z’ le ‘j’ hmangna khawm chingfel ngai niin anlang a. Hawrawp inkawp dang hieng CH le NG lamtawi ziek dan le a dang dang zau taka hril tlangna hun remchang hi seminar hin a mi pek beisei sa a ni bawk.

Prokram kan riruong mek lai anthawk, Hmar Inpui President chun a lungril hung sengin hienga ei inko khawm ta si si hin chu Hmar hai pawimaw dang, fak-le-dawn, inchukna le politics tienga ei ngirhmun le hmalak pei dan ding hrilsa na hun nei thei dinga hun siem a hung rawt nawk ta peia, a tha ta hlei hlei. Abikin pawlitiks tienga tutaka Mizoram, Manipur le Assam (NC Hills le Barak Valley) haia Hmarhai ngirhmun hi inhrilhriet le inrawnkhawm pawimaw takzetin ka hriet a; hi hmaa 1950s-60s lai Hmar District nawr kha ei tharthaw ding am ti hai dam ngaidan tha tak tak nei haiin hmaisana ei hriltlang na remchang a ni ding zie hai ngaituo in hi seminar hi a buoipuitu laia thang ve khawm ka phurna a nih.

Thei hram sien chu a tu tu khawm inthuruol takin thang tlang thei inla chu ka va nuom de aw!