Music Video Review: Jerusalem Thar ft Ruoltinkung Puruolte

Ruoltinkung Puruolte

By Lawrence S Khawzawl

A CHANGTU: Furpui rawsurin a sukpawr neng, chirhrakin a tuom khup el, lampui lien takela chun tlangval insang zawt el, smart tawk taka in thuom hin hmatieng a hung pan peia, a kalpen le inchawi rem ding chun music an ri zing a, hung hnai peiin, a hmel chu fie takin i hmu tah a, amiruokchu hmelthar i zuk sawn nawk el thei, asan ding awm chu tuta i mit hma a inlangpa hi style thar leh a hung inlang tlat el, tudang nilovin Tv.Ruoltinkung Puruolte, (Boia) ngei chu sam style thar leh a hung suok nawk ta ani!

Nikum khan a album puitling “Ka Khuolzinna” chu a suksuok taha, a hlawtling zie chu Mizo Music Industry a Award insang tak Lelte Award ah Lelte Chibil Award (Hmar) a dawng hiel ani khah. Zaithiem dang thenkhat album pakhat suksuok hnungah an hlamzui el hlak laiin, ama ruokchun resan el lovin tuhin music video single belchieng dawl tak el ami hung buotsaih pek nawka, abik takin ama ditsaktu le a hlasak ngaina tuhai ta ding chun thu lawm um bek bek anih. Jerusalem Thar khawm hi mi suongum tak tak el, Churachandpur phaia Music le Videography tieng panga insitumlo tak hai kutthem insuikhawm aniha, chuleiin a mei mei naw hle anih.

A saktu Boia a’nthawk, a hla phuoktu, rimawi remtu le thla latu le a remkhawmtu hai chenin a thiembik hai vawng an nih. An thiem ang hrimin hla record le video buoipui sung khawm hin hun a aw sawtnaw hlea, ni sawtnawte sungin zo nghal anih.

HLA LE A PHUOKTU: Jerusalem Thar ti thupui hmanga hla hi ilo hriet rawp ta thei. Boia sak ruok hi chu ilo hriet ta sa kha ni naw nih. Ruo i thamlo hla thar, “..Lalpa neitu danglamna chu iengkima lungawi theina hi ani...” ti hla Lalruotmawi in a sak lar em em phuoktupa Upa.L Muonvel, Tuiring hla phuok thar anih. Upa L Muonvel hin hla la phuoktam beknaw sienkhawm a hla phuokhai hi sak hlaw le mihriet hlaw tak tak anni vawnga, Jerusalem Thar khawm hi mi hriet le sakhlaw tak a hung ni nghal ringhla a um naw hle.

A hla thluk hi inrang lo, a thu fe dan leh inmil taka remkhawm, Hmar hai hla thluk ditzawng tak hrim kha aniha, a saktu khawma a sakthiemin ama sak ding hrima phuok amani eiti nuom hiel awm. Jerusalem khawpui inthieng khi, Mithienghlimhai lengna ramchu; Suolna le tirdak umnahai hnungsawnin, Beramte Thisena sawpfaichauh lutthei anti. tiin a hla changkhatna chu a hung intan a, a thunawn i ngai tlung hma khawmin a thu hin i lungril chu lo fang der ta’ng a tih.

RECORDING LE MUSIC: Rawl khumna hi Doh Doh Records, Rengkai, Bible Hill a niha, Music khawm hi Recording Studio neitupa James Rochullo remkhawm anih. Ama hi Hmar music tienga meng pha chin hai ta ding chun tu’m ani ti hril kher ngainaw niha, ei suong em em le ei innghatna pawl tak anih. Chuong ta lawma a sina mi pawimaw ani bawka, inpezo tak ani sa nghala, a kutsuok khawm dem phal chi ni naw nih.

CAMERA LE EDITING: Video thla latu le a hnunga remkhawm tu chu Richard L Sinate aniha, ama hi tulaia Churachandpur tieng Hmar music video hai a hming inlar tak el a hung ni tan mek a, a hrie tamtak ei um lai zingin then tamtak ta ding khawm in hmel thar la ni bawk ata.

A thiem zie chu hrilh ngailovin a kutthem a’nthawk ei hmu thei. Kohran thuoitu Rev.Rosung Sinate naupa niin, Asian Academy of Film and Television, Noida ah Diploma in Videography and Sound Editing inchukzo ngat anih! A taka inchuk ani bawka, ama a hin Hmar Music Video hmakhuo ding chu tamtak annghata, a thiemthil sumhlawkna chauh nilova, Hmar music video nasataka dawmsangtu pakhat ani mek anih. Jerusalem Thar music video a a changtuhai chanchin chu ei hrilzo taha, an nina le anthiem bik na hai khawm ei hriet ta khah. A hla saktu tak Boia, A hla phuoktu Upa Muonvel, a rawl khumtu le rimawi remtu James, thla latu le remkhawmtu Richard ha’n an thei tawp suoha Hmar music ngainatuhai ta dinga an thiemthil an hung phosuok nawk hi a ropuiin an inpekna lawm a uma, nitin, kartin el khawm hin khawvel tawng hrang hrang le hmun hrang hrang a’nthawk music video thar a suok zinga, ennuom um tak tak a suok zing lai khawmin mani hnam tawng, mani hla le mani mihai kutsuok hi ngaihlua, i hun tawite bek hi hla hi lo hei thlir ve la, i mit a tlai el bakah, thlarau tieng khawm i hlawkpha el rawi maw.

Iem ila tiem zing lie, khu lo en nghal ta la.