Hmar Leaders’ Conclave 2013 Prokram le Thukhawchang

Unauhai,

Ei boruok tawng a butu deu met leiin “Hmar Linguistics Seminar-Cum-Spiritual Retreat”, tuta Hmar Leaders’ Conclave 2013 tia ei nei lem ta ding hi Brochure tuhin sukpum thei a ni cho a nih. Ei inhrietthiem tlang hlak ang khan inhrethiem tum hram ei tiu.

Conclave a thang ding hai ei buoi mup mup ta ding ti chu mitthla ah an lang thei. Organizing Committee khom an buoi ve map map zing a nih. Hlimtlang tak le hlawk taka hi Conclave hi hmang dinga a hmuna a hun taka inhmukhawm dingin besei takin kan lo thlir zing cheu.

Paul B. Chonzik

Conclave Organizing Secretary

Hmar Leaders’ Conclave 2013, October 23-25, Umran, Rhiboi, Meghalaya

Hmar laia pawl hran hran hotuhai le memberhai inrawnkhawmna

HMAR INPUI (Hmar supreme house)

HMAR YOUTH ASSOCIATION: Khawtlang thila Hmar hai hma thuoitu

HMAR STUDENTS’ ASSOCIATION: Hmar inchuklaihai hmalakna enkaitu

HMAR WOMEN ASSOCIATION: Hmar nuhmeihai mawphurna le chanvo enkaitu

HMAR CHRISTIAN LEADERS FORUM: Hmar kohran hrang hrang insuikhawmna

HMAR LITERATURE SOCIETY : Hmar tawng ziek le tiem tienga hmalatu

HMAR ARTISTS’ ASSOCIATION: Hmar hlasak thiem le hlaphuokmi hai suikhawmtu

&

Hmar Welfare organizations hran hran hai thuoitu hai

Lungruoltaka Hmarhai hamthat lemna beisei takin

A sunga thu umhai

1. A sung thu hai – Phek 1
2. A thang ding hai hrietding poimaw - Phek 2
3. Conclave nei san le thupui hai - Phek 3
4. Theme – 1: Hmar Tawng Chungchang - Phek 3
5. Theme – 2: Hmar Hnam Hmatieng hun thlirna - Phek 4
6. Hun changtu le & thu hriltuhai - Phek 5
7. Conclave neina hmun le room hai – Phek  6
8. Conclave Program - Phek 7
9. Inaugural Session: 7
10. Devotion & Session – 1: Hmar Tawng Thlirna - Phek 7
11. Session – 2: Hmar Tawng chungchang (spelling, etc.) - Phek 7
12. Session – 3: Hmar (MIL) sukhmasawn - Phek 7
13. Review of Day One sessions & Praise and Worship - Phek 8
14. Devotion & Session – 4: Inchukna tienga Hmar hai hma lak dan ding - Phek 8
15. Session – 5: Fak-le-dawn tienga Hmar hai ngirhmun le hmasuon - Phek  8
16. Session – 6: Hmar politics hmasuon - Phek 9
17. Worship Service & Valedictory Session: - Phek 9

General information for participants

Information and registration

Hmar Leaders’ Conclave 2013 a thang ding hai chu an hming an zieklut ngei ding a nih. Hi ding hin Conclave neina ding hmun, Umran, Rhiboi District, Meghalaya ah hming zieklutna ding hmun (Registration counter) siem ning a ta, chutaka chun an hming zieklut an tih. Registration um naw nih.

Registration counter hi Oct. 23, 2013 hin dar 2:00 pm – 8:00 pm sung hong ning a tih.

Presentations and equipment

• Hi Conclave neina ding hmuna hin Conference Hall changtlung tak a uma, chutaka chun slide/PowerPoint presentation (projector) facility a um. Speaker le remarks pe nuom haiin hi hi hmang thei a nih. Chuong anga hmang ding hai chun in register hunah receptionist hai kuomah an inhriettir ngei ding a nih.
• Chun, Conference Hall-a hin Public Address system changtlung tak a um bawk.
• Hi Conference Hall a hin mi 130 bawr vel inleng thei a nia, chu bak mihriem ei um chun ngaituo dan um a tih.

Polite Request to all participants

• Hi Conclave a thang ding hai chun hun ei siem hai indiktaka hmang dingin ei infiel.
• Hieng ang hmun fienriel sum tamtak senga ei inkokhawm san hi hmun fienriela ngunthluktak le nguktaka ei inrawn tlang thei ei beisei lei a nih. A thang ding hai chun hun indik tak le session popo thang kim vong dinga beisei ei nih.
• Conclave hlawtlingna chu mitin chunga innghat a nih ti hi theinghil naw hram ei tiu.

Climatic Condition

· Boruok la dei taluo naw sienkhom, mani inthuom lumna tawk inring tul a tih.

· Riekna hmuna ruok chu puonthuo a lumtawk a umsa a nih.

Conclave nei san le thupui hrilfiena

Hmar hai hi khuonu’n politics le administration daidanna hran hranah a mi sie dar tawla; kohran le insuikhawmna pawl hran hran indinin ei khawsaa. Hieng a ni lei hin inthuruoltaka hmalak an tak deu deu ni sien a hoi. Hieng ang ngaituona lei hin Hmar Inpui chu Hmar hnam sunga pawl (association) hran hran hai lungruoltaka keikhawmtu a ni beiseiin indin a lo nih.

Kohran le insuikhawmna pawl hran hrana ei inthe el khela, ei tawng, Pathienin a mi pek ve hi ziek dan le hmang dan a lo danglam tung peia, tuhin chu ziek dan le hmang dan an ang ta naw nuoi el. Hmun hran hrana cheng hai chun an kawl le kienga tawng hai chu an lak peia, Manipur, Mizoram le Assam hmun hran hrana um hai Hmar tawng tuolleng chu an dang nuk el. Chuong tawng tuolleng hai chu tawng pangngaiah laklut ani pei hlak a nih. Chu khela, ziek nuom dan le tawng hmang nuom dan a hung danglam tunga, awlsam lem amanih, remchang leia hriet leiin ziek dan le hmang dan khom sukdanglam a hung ni ta pei a nih. Hmar Inpui le Hmar Literature Society haiin thutlukna lo siemin ‘t’ hnuoia sunghang sie chu la hmang tal tal dingin ti hai sienkhom, chu neka ‘tr’ awlsawm lem le remchang lema ngaia hmang zing an um. Chuong ang bawk chun ‘aw’ thluk tawia ‘o’ hmang nuom pawl an um zing tho. Hieng ani lei hin inrawnkhawma mani ditdan chu an dik lem le a thrat lem zie inhril tlang chu makmaw a nih. Hieng hai khela hin double consonant ‘CH’ le ‘NG’ ei nei tlat dam hi a tha ei ti am?Ei dit naw chun sukdanglam theitu chu eini a tawng hmangtu hai hi ei nih. ‘Z’ le ‘j’ le ‘g’ hai khom hi a hmangna ding indiktak iem a na ti khom inrawnkhawma hril tlang chi chu a nih.

Hmar tawnga ziek lekhabu tiem ding tlawmte chauh ei neia. Sienkhom internet hmanga titina dawkan Hmar Yahoogroups (HYG) le facebook le a dang dangah thangthar hai lekha ziek tiem ding le tiemtu ei tam deu deu. Hieng haia inthok hin tuta Hmar Literature Society in a pom le hum a tum tlat khom ziek indik thei ei tam naw zie hmu theiin a um. Entirna dingin, ei inpawlpui hlak mi khom ‘ruol’ (friend) ti lova ‘rul’ (snake) tia ziek tam tak ei um. Ei hril tum a thel nasatzie khom ei ngaituo phak ta naw a hawi khawp el. Hienga mani tawng ngei khom ei ngaithâ pei chun a humtu le sukhmasawntu nekin a thlan chotu ei ni pei ding a nih ti chuh hril tam a ngai nawh. United Nations Organisation inrawina hnuoia tawng ngirhmun suituhaiin tuta kum za sunga tawng 3000 neka tam thi hmin dinga an ngaihai lai Hmar hnathlak tawng po po an khum lut el hi a hmangtuhaiin mani tawng ei uksak tawk nawna ra a ni chieng khop el. Chu ngirhmuna inthoka ei tawng hi kei suok inhmaw a ngaizie chu na chauhva hre loa a tak taka thaw a ngai tah takzet a nih.

Chuong lai zing chun, vangnei thlak takin Hmar Literature Society le inchuklai thuoina (HSA) hai hmalakna hnuoiah nasa taka thang lain Manipur le Assam State-a hai high schoola inthok undegradaute or TDC (B.A., B.Sc., B. Com, etc) level chen Hmar tawng chu M.I.L subject-a pom a lo ni ta a, lawm a um takzet. Ei inchuklaihaiin Hmar tawng hmang le ziekah hma hung sawnin, ei tawng mawi tak hi hung ngainaa tawng upa hai hung inchuk sapin, pi le pu nunphung mawi tak tak hung hre tharin, a thahai hung sukvul a, a tha nawhai peiin, ei hnamin nasa taka hma sawn phanain a hung hmang ngei ei beisei. Hieng inchuklaihai hi ei tawngin hma a hung sawn zuol peina dinga ei innghatna ban an ni tlat leiin, bulthut nghet tak sirsana an hung inthanglien ei dit a, chu lampui chu a thei anga rel that le siem phuisui hi Hmar Inpui chun tul a ti takzet a, chu ding chun theitawpa hma lak pei a tum a nih. Tawng a hring naw chun hnam a hring thei naw a, hnam a hring naw chun an sakhuo a hring thei bok nawh. Tawng hi hnam himna kulpui a nih.

Hieng lai zing hin, lekha ziektuhai lai ziek dan hmang inang lo, hnam dang tawng mani tawng awphawia ziek pawl le ziek naw pawl le ei hawrop hmang lai khom hmang dan indika ei ngai le ngai naw khom ei hung saisa nuoi el ta a. Tawng hi ni tina inthang le inthlak danglam pei a ni lai zingin, hmang dan tlangpui dinga thaa ngai le pom tlang a um naw chun, inchuklaihai nasa takin a sukbuoi thei a. Chu el khom chu a ni nawh. Thenkhat chu an pom zawng ni lo ziek dan (style) danglama ziek hrim hrim chu tiem lo dinga intiem bur ei um thei bawk. Hi hin ei hmasawnna ding nasa takin a dal thei a nih. Hieng thilhai hi a’n rang thei anga ei siem fel a poimaw takzet.

Chu khelah, undergraduate levela M.I.L. subject-a lahai lai literature tienga inhnikna tak tak nei, mark hmu insang ringawt beisei lo tam tak an um a. Chuonghai chun mani tawng thu le hlaa inhnikna an nei zuol theina dinga an mamaw, tiem le inchuk tham lekha tiem ding ei phuhruk thei am? Tuta M.I.L. subject ei neihai hi a tha tawk hrim am ti dam khom ngaituo a tha. Inchuklaihai dangcharna hnem thei, thu le hla tling, inchuk ding lekhabu ei pek naw chun an thafanna hung zuoi a ta, pawi hleng a tih. Iengtin am school le college haiah Hmar (M.I.L.) subject sukhmasawn thei ei ta? ti khom ei ngaituo a tul sa a nih. Hmar subject hi M.I.L. el ni lova honours (major) subject chena hlangkai khom ei tin zawn a tul bawk.

Hmar tawng ziekna dinga ei hmang alphabet A AW B CH hi mingo missionary hmasa tak haiin thla thum an la um hman chauha an siempek, Mizo A AW B CH chu a ni ang anga ei lak sawng el a nih. Thumal tamtak ei lo hriet lar tasa hai ei tawng inrik dan inmila ei siem danglam um nuol tang a ta, la um pei bok a tih ti chu ring a um. A tawng neitu chun siem that le siem phuisui chu ei mawphurna a nih. Chu mawphurna poimaw tak chu ei liengkova innghat, ei kros a ni a, mi dangin an mi putpek beisei nawng ei tiu.

Hi lei hin tawng thua lungruoltaka hma ei lak tlanga, ei Hmar tawng hi ei sukhmasawn thei beiseina insang tak neiin hi Hmar Leaders’ Conclave hin Hmar tawng chungchang hriltlang chu a bitum hai laia pakhata poimaw ti takin an thang tir a nih. A tir chun tuta ei program hi Hmar Linguistics Seminar-Cum-Spiritual Retreat ti a ni hrim a nih. Remchang lem le huop zau lemin Hmar Leaders’ Conclave ti a hung ni tah.

Chu khelah ei hnamin a mamaw dang dang – a bikin Hmar hnam hmakhuo (inchukna, fak-le-dawn le politics) hril tlangna le inrawnkhawmna hun nei hi Hmar Inpui chun a ngai poimaw a. Chuonghai sukpuitling theina dinga tuta HMAR LEADERS’ CONCLAVE hi buotsai a nih. Hieng inchukna, fak-le-dawn le politics sirhmun rem indik hai hi hnam ngirsuokna dinga poimaw an no vong.

Hmar hai a nawlpuia fak-le-dawn (economics) kawnga ei intodel el ni lova a chuong a liem ei nei thei chu thil tul le poimaw a nih. Kutdaw chu ngampa takin mi lai a um ngam ngai nawh. Harsatna huonga intang laklaw chun an hmakhuo ding tha lem an ngaituo suok thei ngai nawh. Hieng anga harsatna huonga intang hi ei unauhai tamtak tlangram le phairama hai khom an um zing a nih. Chuong mi hai chun anni khatin an suokdawkna ding ngaituo suok kher naw ni hai. Chuleichun chinchang hre lem, hrietna tieng le sum-le-pai tieng hrietna var nei haiin ei kawkhmu le an lampui ding ei siem pek a tul. Hi ding hin inrawnkhawm le hril tlang chu thil poimaw tak a nih.

Hieng anga fak-le-dawn tienga Hmar hai hmakhuo ding ngaituo le hriltlanga hma hang lak tak tak ding le policy fel tak siema, chuong policy hai chun ra an suo ngei theina dinga hma lak tak tak ding chun ei hnam politics hmasuon ei siem thata, a kalbi ei rem that a poimaw hle a nih. Tu chenah politics tienga ei phak chin hi hun ei ti am? Hmabak iem ei nei a? Hmatieng peia ei politics thiltum ding iem ning a ta? Hieng hai hi mi pakhat pahni inbe tuoa thuthlukna siem el nek chun a tam lem inrawnkhawma ei hriltlang a poimaw. Chutaka inthok chun thil tha lo, pei ding le, thil tha lem, ei hmalakna ding hai hung inlang thei a tih.

A chunga ei tarlanghai huom thei dingin session ruk (6) le valedictory program riruong a nia, Thupui funkhawm pahnia the a nih:

1. Hmar tawng chungchang
2. Hmar hnam hmatieng hun ding thlirna

Hun Changtu le thuhriltu hai

Hi Conclave a hin ei mithiem le dawnril tak tak le thlarau tienga mi chawmtu dinghai fiel an ni angin an hun hlutak hai maksanin hun an mi hung hmang pek thei ding leiin an renga chungah ei lawm hle a nih. Chuong hai chu a then cho hang tarlang ei tih.

DR. & MRS ROCHUNGA PUDAITE hai, a tira inthokin ei program hmang ding min hnikpuia infuina le encouragement nasataka organizing committee member hai an mi petu an nih. Chu khela sum tamtak seng inhuomin hi program hi sukhlawtling ngei dingin hma an mi lakpui a nih. Vangduoithlak takin taksa bawrsawmna leiin an hung thang ve theinaw leiin pawi ei ti takzet

L. KEIVOM hi Hmar tawng ziek tiengah thusep ziek le hlaphuok tienga chu Hmarnau hai a tluk ei um naw niin an lang. October – November thla sunga America inzin dinga ticket la fel sa a nih. Ei program a ngai poimaw em leiin a fe hun ding sukhnuin a hun hlutak chu tawng chungchunga inrawnkhawmna ah a mi hung hmangpui ding leiin lawm a um tak zet.

L.B. SINATE, Hmar ram sukhmasawn tuma thi le thau senga hma latu hi sorkar sina inthok a chawl hnungin Hmar hai fak-le-dawn tienga hma ei sawn theina ding a kul-a-taia ngaituo le hma latu a nih. Ei program ah Hmar hai fak-le-dawn tienga ei hma lak dan ding a mi hung hril pek thei ding hi vangnei ei inti takzet a nih.

Dr. Chaltawn lien Amaw, Hon’ble Chairman, HAC (Manipur), Hmar hai politics tienga ei suongvawr, Manipura Hmar hai del chinsukhmasawntu hin a hun hlutak a mi hung pek thei leiin a chunga ei lawm bek bek a nih.

REV. ROHMINGLIEN PAKHUONGTE, Hmarhai del china PMS in school a nei popo hmalaknaa lukhaitu, Hmar nauhai inchukna tienga hmasawn dan ding a lungril tam tak a sengna hai hung share dinga fiel a ni anga hun a mi hung hmang pek ding leiin a chunga ei lawm tak zet.

DR. ROSIEM PUDAITE, Hmarhai ei dam khawsuok theina dinga ‘intamchil’ a poimaw zie le politics tienga ei hring suok theina dinga lungril tamtak sengtu in a hun hlutak hung pea, a ngaidan le a hriet hai mi hung hril dinga hun a hung pek thei leiin lawm a um em em.

PROF. L. FIMATE, Hmar hai mi hrieta mi siemtu, le ram le hnam invawi em emin hun a hun hlutak a mi hung hmangpui thei ding leiin ei lawm em em.

PROF. VANLALNGHAK, Inchukna tieng le politics tienga Hmar hai ngirhmun invawi em em tu in inrawnkhawmna hun a mi khar pek ding hi vangnei ei inti hle a nih.

Anni hai baka hin inchukna tienga Hmar hnam ta dinga hma latu, S.K. Khawbung, Isaac Pakhuongte, Dr. Lalzawmlien le a dang dang, politics tienga Hmar nau hai mi hrieta mi thelar tu Ngamrothang Hmar, Laltlansang, Hlima Keivom, Lalhrillien, Lalditsang, Lalhmangpui, Lalhossan, Lalthawmlien, le Sorkar tienga Hmar hming sukthatu Challienkhum Songate, IRS, Thanghlun Hmar, IRS, David Neitham, APS, Dr. C. Zawlthang hai le ei daktor hrietlar Dr. Chawngrolien Chonzik le Hmar haiin nitin chanchinbu ei nei sun, Hmasawnna Thar editor Lalmalsawm Sellate haiin hung an mi hmangpui thei ding leiin vangnei ei in tih. Hmar tawng chungchang, inchukna tieng, fak-le-dawn le politics tienga ngaidan tha tak tak nei le Thlarau tieng le Pathienthua mi chawmtu ding, Rev. Ruolneikhum Pakhuongte, Rev. V. Lalthalien Zote, Rev. Dr. J. Huoplien, Rev. Lalbiektluong, Rev. Edwin Darsanglur, Rev. Lungawiruol, Rev. Zoramsiem Nungate, , Rev. VL. Nghakthang Khawbung, Upa Gouzalam, Pu Ralkapkung Singson le hnam thuoitu dang dang hai hi Conclave mi hung hmangpuitu hai chunga ei lawm takzet a nih. Ei thahnem ding leiin a thang ding mi poimaw tak tak hai hming ei zieklang seng nawh.

Conclave Neina Hmun le room insem dan

Conclave nei na ding hmun hi Catholic hai enkawl, Rural Research and Training Centre, Umran, Rhiboi, Meghalaya a nih. A tirin “Hmar Linguistics Seminar-Cum-Spiritual Retreat” tia ei program hming ei inbuk lei ei neina ding hmun hi dap kuol rak a nia. Churachandpur, Aizawl, Silchar or Hmarkhawlien, Guwahati hai khom dapkuol sin a nih. Chuong haia chun inchim buoi nuoi kara thaw a ni pal inlau leiin hun iemani chen chu Kaziranga National Park-a Wildgrass Hotel chu remti niin tawngbaua hotel khom booking thawsa a nih. Sienkhom ngaituo nawn nawk a nia, a thang ding hai fe remchang lem na ding Guwahatia inthoka hla lo ngaituo a nia, tuta hmun hi sukthluk a hung ni tah a nih.

Rural Research and Training Centre, Umran, Rhiboi, Meghalaya pan thei dan ding chu a hnuoia ang hin a nih:

Airport hnai na tak chu Umroi a nia, chutaka inthok chun Shillong bypass lamlienah fe peiin Shillong-Guwahati road km. 27.2. fe in tlung thei a nih.

Airport hnai tak dawt chu Guwahati Airport a nih. Chutaka inthok chun Shillong lampui hraw in km. 84.2 tlan hnungin tlung thei an tih.

Shillong a inthokin Guwahati lampuia fe zar zarin km. 33.4 a nih. Barapani-a Union Christian College lamthe a inthokin kum 18 vela um a nih.

Guwahati a inthokin Shillong lampuia fe zar zarin km. 65.7a nih. Nongpah a inthokin km 17.2 a um a nih.

Aizawla inthok le Silchar tienga inthoka hung hai chun Guwahati lut hma met Jorabat-a inthokin Shillong lampui la in, chutaka inthoka km. 49.4 tlan in an tlung thei.

Churachandpur le Imphal tienga inthoka hung hai chun Guwahati lut hmasa zetin, chutaka inthok chun Shillong lampuia fe in, Nongpoh zuk tlung hnungin km. 17.2 ah tlung el an tih.

Chuong ang bawkin Diphu le Haflong tienga inthoka rela hung hai chun Guwahati lut zovin Shillong lampuia fe in tlung thei an ta, motora fe hai chun Guwahati lut kher lovin Jorabat a inthokin Shillong lampuia fe in tlung thei bawk an tih.

Riekna room umdan chu hieng ang hi a nih:

1. Single occupancy room – 1 No.
2. Double occupancy room – 2 Nos.
3. Triple occupancy room – 18 Nos.
4. Eight occupancy room – 1 No
5. Cottage (8 occupancy) – 1 No.
6. Dormitory (58 occupancy) – 1 No.

Hienghai hi a remchang anga a thang ding hai lai sem dar ning a tih.

Conference Hall changtlung tak, PA system le Projector hai umna sa hmang a ni ding anih.

Fak le dawn anni buotsai vawng ding a ni leiin sa fa mi le thlaihna cho fa mi haiin an fak thei ang inhriettir ngai a tih.

Conclave Program

OCTOBER 23, 2013 (TUESDAY)

6:30 PM – 8:00 PM - INAUGURAL SERVICE

Conductor : Joseph D. Hmar

Welcome Address : Dr. John H. Pulamte

Introductory Speech : Dr. Paul B. Chonzik

Seminar Inauguration & Speech : Dr. Chalton lien Amo

Hon’ble Chairman, HAC, (Manipur)

Biblical Insight Remark &Dedication : Rev. V. Lalthalien Zote

8:00 PM – 9:30 PM - DINNER

OCTOBER 24, 2013 (WEDNESDAY)

7:00 AM – 8:00 AM - MORNING DEVOTION

Conductor : Rev. VL Nghakthang Khawbung

Gospel Message : Rev. Dr. J. Huoplien Neitham

8:00 AM – 9:00 AM - BREAKFAST

9:00 AM – 11:00 AM - TECHNICAL SESSION - I

Topic : Hmar Tawng Thlirna
Moderator : Upa V.L. Muonga Pudaite

Speaker : L. Keivom

Response:

1. Lalmalsawm Sellate

2. Lalhrillien, MDC (Manipur)

OPEN DISCUSSION

11:00 AM – 11:30 AM - TEA BREAK

11:30 AM – 1:30 PM - TECHNICAL SESSION - II

Topic : Hmar Tawng Ziekdan Chungchang

Moderator : Vanlalhlun Traite

Speakers : 1. L. Thanmawi Pajamte

2. Louis L. Keivom

OPEN DISCUSSION

1:30 PM - 2:30 PM - LUNCH BREAK

2:30 PM – 4:30 PM - TECHNICAL SESSION - III

Topic : Hmar (MIL) sukhmasawn

Moderator : F. Doliensung

Speaker : 1. Thanghlun Hmar, IRS

2. S.K. Khawbung

Observations:

1. Isaac Pakhuongte

2. Hrilthankung Sielhnam

OPEN DISCUSSION

4:30 PM - 5:00 PM - TEA BREAK

5:00 PM – 6:00 PM - Day ONE Review, Opinions & Suggestions

Moderator : David Buhril

Next day’s Agenda : John Pulamte

5:45 PM – 6:00 PM - TEA BREAK

6:00 PM – 8:00 PM - PRAISE & WORSHIP

Conductor : Rev. Lalbiektluong

Gospel Message : Rev. Edwin Darsanglur

Benediction & Blessing : Rev. Lalnghatlien Songate, Shillong

8:00 PM – 9:00 PM - DINNER

9:30 PM - NIGHT OFF

OCTOBER 25, 2013 (THURSDAY)

THEME - HMAR HNAM HMAKHUO (INCHUKNA, FAK-LE-DAWN, PAWLITIKS)

7:00 AM – 8:00 AM - MORNING DEVOTION

Conductor : Upa Ralkapkung Singson

Short Gospel Message : Rev. Lungawiruol

Benediction & Blessing : Rev. Varsanglur, Shillong

8:00 AM – 9:00 AM - BREAKFAST

9:00 AM – 11:00 AM - TECHNICAL SESSION – IV

Topic : Inchûkna tienga a hnam puma hma ei lak dan ding

Conductor : Dominic Sumlal

Speakers : 1) Rev. Rohminglien Pakhuongte

2) Dr. Chawngrolien Chonzik

3) Lalhmangpui, MDC (Manipur)

OPEN DISCUSSION

11:00 AM – 11:30 AM - TEA BREAK

11:30 AM – 1:30 PM - TECHNICAL SESSION – V

Topic : Fak-le-Dawn tienga Hmarhai hmasawn dan ding

Conductor : Lalawilien Amaw

Speakers : 1) L.B. Sinate

2) Dr. Zawlthanglien Changsan

3) Lalditsang, MDC (Manipur)

OPEN DISCUSSION

1:30 PM – 2:30 PM - LUNCH

2:30 PM – 4:30 PM - TECHNICAL SESSION – VI

Topic : Hmar politics hmasuon

Conductor : Lalthalien

Speakers : 1) Dr. Rosiem Pudaite

2) Rev. Ruoneikhum Pakhuongte

3) Challienkhum Songate

4) Hlima Keivom, MAC, NCHAC

OPEN DISCUSSION

4:30 PM - 5:00 PM - TEA BREAK

5:00 PM – 7:00 PM - VALEDICTORY PROGRAM

Conductor : Dr. Paul B. Chonzik

Valedictory Speeches : 1. Prof. Vanlalnghak

2. Dr. L. Fimate

3. Laltlansang, EM, NCHAC

4. Lalhossan, EM (Manipur)

Closing Remarks : Dr. John H. Pulamte

7:00 PM – 8:00 PM - WORSHIP SERVICE

Conductor : Rev. Zoramsiem Nungate, Shillong

Opinions & Suggestions : Dr. Paul B. Chonzik, Secretary, OC

Gospel Message : Rev. V. Lalthalien Zote

Benediction & Blessing : ??, Churachandpur

8:00 PM – 9:00 PM - DINNER

Organizers:

Executive Members 1. Thanglienthuom 2. Rev. Fimchawnthang 3. Hmanglienthang Hmar 4. Joseph D. Hmar 5. Upa LB Sanga 6. Darlienthang 7. Thangsawihmang 8. T. Sangkhum 9. PL Hranngul Auditors 1. Dr. Lalnghaklien (Rengkai), 2. Pu Sumkaivel (Rengkai) 3. Upa Laltlanmawi F. Tusing (Saikot)

HMAR INPUI THUOITU HAI (2013-16)

Designation - Name

President - Dr. John Pulamte

Vice President - 1. Lalawilien Amaw

2. Hmangzalien

Gen. Secretary - David Buhril

Secy. (Pub. Relns) - Lalthavel Buongpui

Secy. (Inf & Publ) - Vanlalhlun Traite

Joint Secretaries - 1. Dr. Immanuel Zarzosang

2. F. Doliensung

3. Lalchawisang

4. Lalthangsang Songate

Finance Secretary - Jousanghlei Joute

Treasurer - Rev. Ruolhlei Pakhuongte

Conclave Organizing Secretary:

Dr. Paul B. Chonzik