Ziektu: Pu L.Keivom
If a person dies without his or her story
being told, that’s like a library burning down.
-West African saying
Hnam rothil a bohmang hmaa hlu lut vat vat hang poimawzie hi hrilin a siek nawh. Chu chu lungvar inril put le hmathlir nei hnam hrim hrimin inpui thei lo khopa an thil invoi hlak chuh a nih.
Kha hmaa Red Indians ei ti hlak, Columbus-in 1492-a America khawmuolpui a zuk tlung hma kum singnga lai zet hi ram lo hluo hmasatuhai, tuta Native Americans an tihai hin an mi hlui le upahai an thi zatin, “Ei laibrari a kàng ie!” an ti hlak. Chuong ang bokin, mihriem hung suokna ram ni dinga mi thiemhaiin an ngai Africa khawmuolpuia chenghai khomin, “A chanchin le tonhriet hril hman loa mi a thi chun, chu chu laibrari kang hmang ang a nih” an lo ti bok. Ieng leiin am?
Mi tin hin hun sawt nawte khawvel ei hung hluo sung hin iemani kong zawng bekin tonhriet ei nei seng a. Ei piengzie le phung a danglam seng ang le ei hma dom inang naw leiin ei tonhriet khom a danglam. Hun khata thil lawmum kha hun danga chu thil lawmum lo, mi pakhat ta dinga vangduoina kha mi dang ta dinga vangneina, hlawtlingna chu hlawsamna bul, hlawsamna chu hlawtlingna bul a ni thei. Ei thil tuok le hmasuon ang peiin hrietna ei hung khawl khawm rawn a, chu hrietnaa inthoka thaw dan thra lem ei hung hriet pha leh thil thiem chi khat chi hnih ei hung nei a, chu thiemna chi hrang hrang infawk khawma inthok chun varna iemani bek ei hung nei pei a, chu varnaa inthoka suok lungvar chu hmangin thil thar le thra lem ei hung ngaituo suok a, hma ei sawn hlak a nih. Hmasawnna ei ti hih ei tonhriet infawk khawma inthoka hung tro suok pei a nih. Mi tinin ei tonhriet seng thrang la hung thar peihai kuoma inhlan sawng hi ei tha bat a nih.
Kum sawt nawte sunga khawvel hmasawn dan ei thlir chun, a lawn amanih tlan amanih ni loin a vuongin a vuong a ni tak. Hi hi ni khat thilthua hung um el a ni nawh. Tonhriet, hrietna, thiemna le varna intling khawmin a hring suok a nih. Mihriem hi Pathien angpuia siem a ni thu Baibulin a hril a. Chu mihriema theina inphûm chu dannaranin zaa sawm vel chauh ei hmang phak niin mi thiemhaiin an sut a. Mihriemin hrietna, thiemna le varna ei khawl khawm rawn po leh einia theina inphum chu hmang hlawk dan ei hung hriet a, chu hrietna insersuon tung pei chun Computer Age hi a mi thruoi tlung a nih. Mihriema theina inphûm hi zaa za ei hmang thei pha chun mihriem hi Pathien angpuia siem a nina tak chu a la hung inlang ding chauh a nih. Chu thil chu Krista Isu ei ringna leia thlarau rama ei la rochung ding thu leh hin hril kop thei a ni lai zingin, ei hring hrietnain a dawl phak chin ngaituo chun hril kop lo a him hri lem ka ring. Kum tlukledingawn iemani zat hnunga chuh, mihriemin hma a sawn pei chun, an hril kop hun a la tlung el rawi mawh.
Hi ka hril chen khom hi mi threnkhat ngaithlak ding chun a him tawk ta naw el thei. Sienkhom, mihriem nina le theina ringot hmanga Pathien angpuia siem a nina tak mihriemin a tlung thei nawk hun ding sawtzie chu kum tluktledingawn zawnga zuk hril fie dan a um naw hrim hrim. Khawvel umphung hlak, Genesis bung khatna khel tieng chuh, iengkhom a puitling saa pieng loa dam tea hung insersuon tung pei a ni bok si. Chu chu Fundamentalist intihai ngai pei naw zawng tak a nih. Sienkhom chu chun umzie a nei bèk nawh. Hrietna a pung dan ang peiin thil umzie hriet fiena khom a hung pung pei a. Kha hmaa Modernist kha Fundamentalist-a ngai a hung ni a, chu chu thil umphung a nih. Ieng khom ni sien, tonhriet ringot khawl khawma inthoka Pathieng angpui nina ram chu tlung thei a ni naw hulhuol. Chutaka chun a nih Isu Krista hmanga Ama Pathienin mihriem le inzom nawk theina kawitan a hung hong makna le ropuina chu a’n thlung chu nih.
Ei thil hril le laibrari kang thu inkar chu hla deua ngai pawl ei um el thei. Sienkhom, thil intringmit tlat a nih. Tui far khat pei intling khawmin tuifinriet a siem angin, hrietna far khat pei mihriemin ei thaw khawmhai chun hrietna tuifinriet a siem ve thung a nih. Chu hrietna chu lekhaa inchikna hmangruo an hmu suok hma chun bauin an inhril sawng a; lung le thing hmangin an thu le hlahai lim chu an lo maksan a. A ziekna hawrop neihai chun savun le thil dang dangah an lo ziek bok a. Kum 1440-a German mi Johannes Gutenberg-in lekha sutna khawl (printing press) a hung hmu suok hnung lem chun hun sawt tak ei khawvel thima inthrung chu khaw varah a hung lut a, khawvel hmelhmang a siem danglam a, kam zalenna a hung pung ruol peiin ngaituona inril tak tak, kha hmaa khuop dea um chu a hung insuo zalen a, thil thar thra lem a hung hring suok a, chu fe pei chun tu laia hmasawnna nasa tak hi a hung thruoi pei a nih. A bul ei thlir chun hrietna le thiemna tui far intling khawma inthoka suok a nih.
Hmun danga van tong deuthawa hma an sawn hnung, Taj Mahal an bawl hnung kum 241-ah ei ramah misawnari hungin A AW B an mi siempek a. Chu taka inthok chun ziekin ei thu le hlahai ei hung hlu lut tran a. Chu hma hrim hrim chun ei thu le hlahai chu an hrietzingna phekah khumin, thrang la hung peihai kuomah trongbauin an inhlan sawng a. Chuong thu le hla chu ei hau hman em em a, abikin hla tieng ei hausa zuol a. Lekha ei hung neia inthokin a thren chu ziekin ei sie hman a, a tam lem chu a hretuhai an thi ruolin a bohmang tah a nih. Hieng ang tienga inhnik mi le thilpek dong mihai an thi zatin ei laibrari a kang hmang a nih. Inpâm an um khop el.
Sienkhom, inpâm nachang hrie mi ieng zat am um ei ta? Hi zawna hi don ngei chi, sienkhom don châkum lo deu el a nih. Kristien sakhuo a hung lut khan ei khawvel a hung inphir a, ringtu le ringnawtu, Pathien thu awi le Pathien thu awi lo tiin ei hung inthre a. Ei suotlang hlui, kristien sakhuo a hung lut hmaa ei nunphung hrim hrim chu ramhuoi be mihai thaw dan phunga hung belin, ringtharhai chun an hung hnawmhnawl a, ei hnam rohlu tam tak chu tawk thieng lo, tirdakumah ei hung ngai tah a nih. Hi leia ei thil hlu ei chan zozai tah hi a a man tozie sut suok ngaina a um nawh, a san chu a hlutzie suma inkhi thei a ni naw leiin. Ei laibrari raw rawntu tak chu ei sakhaw thar le thina a nih. Tu lai chen khom hin ei thiempuhai lai hin sakhuo hmanga ei laibrari an raw rawn po leh an lallukhum sa sot dinga ring pawl an la bo nawh.
Laibrari kang inpâmumzie hi hrilin a siek nawh. Inpâmum tak chu a bilding ni loin a sunga hrietna le thiemna thu umna, lekhahai kha a nih. Bilding chu sum nei phot chun a nêk daia thra bawl nawk el thei a ni a; lekhabu vang amanih thu poimaw inziekna lekha, meiin a kang hmang tah ruok chu sum ieng zat khom senga nei nawk el thei a ni nawh. April 13, 2005-a lekhabu 47,234 umna Central State Library, Imphala mi an hang raw el dam kha chu pangzat a um khop el. Hnam boral mekhai nungchang a nih. Grik mi var Euripides (.485-406 BC) chun, “Pathienin a suksiet nuomhai chu a sukvet hmasa zet hlak” (Those whom God wishes to destroy, he first makes mad) a lo ti hrim a nih.
Laibrari kang hril tâka chun hril ding tam tak a um. Chuong laia hril kai zie hlak chu kum 390 AD vela kang Library of Alexandria kha a nih. Alexandria hi Aigupta rama Alexander The Great khaw indin a ni leiin, a hming chawiin Alexandria tia ko a ni a. A hung thlaktu Ptolemy II Soter chun BC 283 khan laibrari hi a’n din a, a kang hin khang hun laia thiemna le varna thu inziekna lekha poimaw maktaduoi chenve neka tam a kang hmang vong a nih. A rawtu le an raw hun le san nia hril a tam a. Chuong laia mak deu el chu, Tirko Paula rawihai raw ni dinga intumna a um chu a nih. An hril dan chun, Tirko Paula khan Zoroasthrian sakhaw inzirtirna thu a lak sawng rawn em em a. Chu inzirna thu inziekna lekha hlui an siena tak chu Alexandria laibrari hi a ni leiin, Paula zirtirnahai hi ama awm thusuok el a ni nawzie miin an hriet an inlau leia Paula rawihaiin hi laibrari hi an raw niin an zeldin. Chu chu thudik a ni naw dingzie chu ngaituo sap rak khom a ngai naw laiin, hieng ang thu an hang zep sa hin Alexandria Librari chauh khom ni lo, laibrari dang kang poizie le inpâmumzie a tar lang zuol a nih.
May 2011 sung khan zan riekin trum hni zet Sagang le a se vela khuo Tuiring, Langza, Kananphai, Theikhakhi, Khonomphai le khaw dang danga Kom lalhai le an upahai inpawlpui dingin Buonga le David Buhril thruoiin ka fe a. Kan mi inpawlpui le an thu le hla iemani zat kan rikawthai hi kum 85-95 inkar mi deuh vong an ni ta a. Chuonghai laia pakhat chu kum 2009-a Tuiring ka sir truma ka titipui Saitho a nih. Kum hni hnunga ka hang inzin nawk khoma ka zong hmasa tak chu ama bok a nih. Kan inzin nuhnung tak khomin, Tuiring kan suoksan hmain a inah ka va pan a, thlalakna leh video-in a thla ka lak a, hlim taka inchibaiin kan inthre a. Delhi tieng kar khat chama ka fe hnungin June 11, 2011 khan Churachandpur tieng ka kir nawk a. Ni hni ka cham hnungin Saitho thi thuin a mi hung dèng a. Ei laibrari poimaw laia pakhat chu ei lo chàn nawk tah a nih. Poitiin a sawt naw a, ieng angin sûn inla khom umzie a nei ta nawh.
A râla hang fe hrâm ka nuoma chuh sin buoi leiin ka fe thei ta naw a. Ka zuk ngaituo zui chun, Tuiring kan suoksan tawma hun teptêr tak kara va sir a, a sekotrol inri rok roka hong a, a thla kan va lak trawk trawk kha a san inril a lo um a nih ti ka zuk hriet suok a. Kan thlalak le video hi a damlai ni phêk tawp tak a phok hmaa a hmêl le hlimthla rikawt a maksan nuhnung tak a ni ka ring a, hamthra ka’n ti hle a. Hunbi kim vongtuin rem a ti chun, hi a thlalakhai hi chawiin, a inah ngei, a tuol sekotrol sei tak khah inri rok roka tawlin, khawsawt taka a maksan a sunghai kuomah, ralna puon leh ka la hang inhlan ngei ka beisei.
Ei laibrari poimaw a hang kang el hlak hi chuh, hril ding a vang thei ngei maw! Khuo rel hlak dang thei a ni bok si nawh. Amiruokchu, a kang hman hmain thaw thei ei nei. Mani tonhriet seng zieka maksan hi thrang la hung pei dinghai laka tha bat ei sut dinga ei hmaa innghat a nih. Ei kawl le kienga um, ei khawsakpui, tonhriet poimaw neihai thu le hla ei hriethai chu inchikin ziek seng ei tiu. Chu chu ei hnam le Pathien laka mawphurna ei hlen ding chu a nih.
Hieng tienga enton tlak hnam chu Israelhai an nih. Anni hin hnam thuthlung ang deuh an inbituk chu kum tinin, puitling taphotin a tlawm takah lekhabu 10 bek tiem le an dam sung lekhabu pahni bêk ziek a nih. Chu chu an insukhmu leiin zieka thil inchik tieng tu hnam tluk ruol an ni nawh. An Jerusalem voi thum top an sukrieu hnung le anni le anni kar le hnam dang le indona leia an hmun khuorna hrang hrang sukchimita a um hnung, Hitler-in maktaduoi 6 top sukhlum a, an thil neihai le thu ziekhai a raw dur dur hnung khomin, a ziektu an lo tam èm leiin hum tawk an lo nei pei a. Chu ra suok poimaw tak chu, khawvela lekhabu huoisen tak, Baibul hi a nih. Tu chena cultural mapping thaw lai po poa thaw hlawk tak chu Judahai an nih.
( Saturday, June 25, 2011 Delhi)
