TUM AM INRÙ, SARÙ?

Ziektu: Pu L.Keivom*, Inpui Columnist

Cultural Mapping thaw dan ding thlithlaia Sagang Biela khuo iemani zat riek nghaa kan sir hnungin Tripura tieng pan dingin Tv. David Buhril leh kan insingsa a. Kan lam hraw ding chu National Highway 53, Jiribam Road tia hriet tlanglawn hi a na, Manipura lut National Highway pathum laia pakhat a nih. Nagaland fe thlenga hung NH 39 hi Nagahai an insim met leh thuok la thei loin a hritlang pei a; Hmar Biel fe thlenga Mizoram sun, NH 150 an ti ve bok, vok kongrâu neka zie-um hret, National khom ni lo, Highway khom ni bok lo hlak hi fùr-ah Tuivaiin a dang tlat bok si. NH-53 khom hi Manipur sunga mi chu nuom hun huna khâr thei an tam leiin khawk a dâl ti el naw chuh inhnèmna tak tak tlak a ni nawh. Nuom hun huna Imphal ring rêk thei an kat nuk leiin lu bawk tam ringot suonga inlekphek tum chu mani rìnga inrêk ang a ni naw thei nawh.

May 19, 2011-a suok dinga ti khah, lampui harsa le hlaa inzin ding kan ni leiin kan Gypsy chawi ding chu inzinpui tlaka thraa siem hmasa phot dingin motor siemhai kutah ni hni kan sie a. May 21 Inrinni suok a, Hmarkhawlienah Pathienni châm a, a tûk Thawtrannia Tripura North District lut chu kan riruong dan a nih. Sienkhom, chuong ang awzawng chun thil a fe nawh. India hmar sak, abïkin Manipura inzin chu buoina siem thei le lam khâr thei an tam leiin hisap angin thil a fe naw tlangpui a, Delhi tlanga ni khat sina ngai hi kâr pumhlum khoma thaw zo thei naw chang a um. Hmun danga thil a ni ding hrima ngai khah Manipura chuh sinpuia an nei a nih. ATM-a poisa minit khat khom tling loa Delhi tlanga ei lak suok hlak hi Churachandpur-a chu darkar tam nisa le ruo hnuoiah an intlar dul nitin hlak. Sin lo sina nei hi Manipura an sinpui tak a nih.

Inrinni tuk, May 21 chun dar 5:30-ah ka tho a, ka’n siem sok sok a, ka tlungna Vocational and Educational Training Centre (VETC) hai Guest House, Rengkai (Muolhlum)-a chun David Buhril ka lo nghak a. Vàn khomin kan inzin ding chu a mi phurpui ni ding a na, insûm loin a trè thla zing a, Saptrong lamkeia (phrase) hril lem chun ‘mengte le uiin a sûr’ (raining cats and dogs) a nih. Mengte le ui insuol ri le raw sur chur chur tekhi ringot el chu a thaw ding hriet naw thlak khop el. Eini chun ‘ruopui van-awn a sûr’ ei tih. Van inawn phâ hiel khopa sûr chu a nêp naw khop el. Nupui zing tho, zun suok taluoa kawng khaw awna an inthrè thlak huou huou leh an tekhi leia ‘ruopui van-awn’ an lo ti khom a ni el thei. Ruo-baw-hok ei ti ruok hi chuh sûm trè (cloudburst) an ti a, a awm tah khop el.

Zing dar 7-ah David Buhril a hung tlung a, kan suok dok nghal a. Bethela an inah thingpui dawn malamin, a nu-in trongtraia a mi’n thla ka nuom leiin, kan zuk lut a. An chengna buzawl ngeia unauhai kana inzin ding kan ni leiin le thil thra thaw ei tum pha leh sir hrang hrangah dâltu ding an hung suok hlak ti hih a tak ngeia voi tam ka tonhriet tah a ni leiin, Pathien nâ ver khopa be pop theituhai trongtraipui kan mamaw takzet a nih. Hienga trongtraia a mi’n thla zo hin, ruo thimpui chun inkieng zai rêl naw sien khom, zuom sarin zing dar 8:15-ah Hmarkhawlien zuon dingin, kan inthok suok tah a nih.

A lampui sietzie thu chu a hrawtu taphot thunon a ni a. Ka la fe ngai nawna a ni leiin hmu ve ka châk a, chu chun hma tieng a mi thruoi a. ‘Huphur’ ei ti hih hi eini trongah a um a, thil ei huphur hlak ni mei a tih. Trong hi ei nina phung hlimthla, ei ngaituona hriltu a nih. Thil huphur an nei naw ni ngei ding a na, Saptronga ruok chun huphur hrilna hi thu mal pakhat khom an nei awm ka hriet nawh. A umzie hrilfiena ruok chu an nei a, ‘to feel unequal to the task’ an ti duot niin ka hriet. ‘Huphur’ hi mi hû tawng ngam lo le hnè loa inngainaa inthoka hung suok a ni el thei. Mani chunga mawphurna innghat, hlen suok thei lo dinga inngaina lungril a nih. Dawina thlarau ti thei khom a nih. ‘Huphur’ a hin ‘hu’ hi bàn inla, ‘phur’ hi thluksei pein ‘phûr’ tiin thlak inla, phûr tak le thatho takin, zâm loin hma tawn inla, malsawmna hmàra inchangtir thei a nih.

Ruoin chàt zai a rel nawh. Kan motor hmakawra tui far suok theina kuo kha an lo inbuk dik naw ni ngei a ta, driver thrungna ke bulah a hung indir thla a. Sarângin David-in a ke a tuoma chu a trangkai chuong nawh. Driver hi motor bike khal thrang a ni leiin ieng motor khom bike khala hrât taka khal hlak a ni a. Kan pahni chauha Gypsy khauh taka Imphalah lut loa Nambol-Keithelmanbi (West Imphal) kawitan, lam chikte le khokroka ruopui hnuoia kan hei vuong phei chuh, thlarau hi a tet suok zok a, a tet lut nawk zot a ni tak a, inhoi turu tak a nih. Titi thukhawchang rem chu thil thei lo hulhuol a nih. A san chu, sentence khat ei hril khom hi motor inchawmin bong za tamin a tet bong a, mani hril ngei umzie khom hriet ngaina a um nawh. Ami paw ngam um sun chu ruo mal tlahai an nih.

Manipur phaia hin Keithelmanbi hming put iemani zat a um a, tuta ka hril hi West Imphal District-a um, Sadar Hills District le inramri, Meitei khuo a nih. Sadar Hills lutna ding kotsuoah truck 300 ruol lai ding hi bawk insikin an lo intlar a. Manipur an hung lut dinga thuomhnaw a sipa rik taka hung phurhai kha Manipura inthoka phur thlak ding nei nghal lohai chu, a ruok vongin an kir nawk ding a nih ti hei en ringot khomin hriet nghal thei a nih. Hi hin India hmarsak rama cheng, mi chawmhlawma khawsahai hmelhmang indik tak chu a tar lang chieng khopin ka hriet. Inzak nachang hriet nekin silai chawia nuor ei insukhmu pei thung. Ei piengsuol dan hi a va hang khawkher sawt de aw!

Keithelmanbi-a inthokin Sadar Hills an tran leiin tlâng kan kai tran a. Hi hmuna inthoka petrol station hnai tak chu km 65-a hlaa um Longmai (Noney tia an ko bok) Rongmei Nagahai khuo, Naga helpawl NSCN-hai solfa vaina hnuoia um a nih. Tlâng kan kai insang deu deu a, ruo a sur nasa deu deu a, sûm le zilin a hung baw a, hma tieng hlam khat hlam hni bak chu hmu thei a ni nawh. Chuonga fe peiin, Noney kotsuoa petrol station chu kan tlung a, petrol kan thun sip a. Kan thun zo chun motor chu a hring thei ta tlat dal! Vanpui trè hlak chun tawp zai a rel bok nawh. Lam suk hret a ni leiin olsam takin kan nam hring a, Assam Rifle-hai diutina chen kan tlan tlung a. An mi lo sukchawl a, kan inripawt zo hnung chun motor chu a hring nawk thei tah naw leiin sipai ruolin hù nengin an mi nam hringpui a, Noney khawlai chen kan tlan tlung a, vadung liem zuoi zuoi bula chun kan innghat a. Leilak bula hotel-ah kan lut a, sunbu kan fak a, sanghal sa an nei leiin sa dang nekin chu chu kan thlang a, kam a’n dèn nuom khop el.

David Buhrilin an trong anni anga a thiem leiin, Meitei le hnam dang an inzumna hmuna chun, mani puhai ina inlawi lut ang elin, kan tlatlum hle a. Motor siemtu mechanics kan zong a, kan motor an hang en chun a ‘Starter’ le a petrol fena carburetor buoi lei a ni an ring a. An thlong a, an hang en chieng chun a Starter sunga a thirzai inzem chu siem thei ruol lo dingin a lo fak hek huom el a, hnâr tan bong ang khopin a sukhmelhem a nih. A part, sangnga man ding chu a rênga thlak a ngai a, Imphala naw chu hmu ding a um si naw leiin, incha a ngai a. Imphala inthoka Noney pana chawhnung dar 2-a suok ding Bus-a inthon thei dan kan dap a. Kan mobile chawi ve ve hlak chu network a um naw leiin hmang thei a ni bok si nawh. Samari mi thra pa pakhat mobile kan hmangpek a, Imphala um, mi kan hriet taphot kan biek a, hmun danga inzin deu vong an lo ni leiin kan khawk dèr a.

Imphal tieng kan khawk der hnung chun Churachandpur tieng kan tlok nawk a. Edwin Darsanglur kan biek fuk hlauh el a. Amah hin mi inzompui le hmelhriet a hau a, harsatna ieng anga inbichil khom olsam taka baw thleng dan dap thiem mi le thrangpui ngaihai thrangpui dinga inpei zing mi a ni leiin a kutah kan dande top a, a fawn thei thei a fawn kuol zung zung a, driver pahnih- Jakob le Rama- a hung tir a, a motor part chu an hung chawi a, thimbutin Noney an hung tlung hman a, a part chu an inbûk nghal a, kan kuomah an riek ve tah a nih. Hi zan hin thil dang iengkhom thawpek thei ka nei si naw leiin an nâ bek hrai tlaina ding tiin Bangkok khawvel ka fangpui kha tie! Tlai tho de ni hai. Nuhmei le nau le tehai le zing inkhawma chang thlang chi ruok chu a ni naw el thei.

Kan riekna hi Longmai Bazar bula um Hotel Highway Lodging a nih. Lam thlang tieng, kawmkarah ei trum thlak a, hlam hni vela hla chang tieng chun a lutna kotkhar a um a. A hnuoia chun a hotel neituhai an um a, inhnawmna le insilna a um bok a. Electricity a um naw leiin suna khom a’n hmu ruon ruon thei chau a. Chu taka inthoka kai tung chun a sawng, lampui àna um, thingphek in, a um a, riekna pindan iemani zat a um a. Kan riekna dinga an mi kawkhmua chun khum pali a um a, khum pakhat peiah zan khat riek man Rs. 60/- a nih. A neitunu chu khumfat an tam le tam naw thu ka’n don a, an um naw thu a mi hril leiin tlung phot chu kan sukthluk tah a nih. Kawmkara kan lut hrek hrek lai chun David-in, “Pu, ziek ding ei hau ting el chu a ni hi!” a ta. A ni hrim, AMEN.

Kum sawmli chuong Five-Star hotel kalchar-a leng ve hnunga chuong ang khawvel hang sir nawk chuh ka ta dingin thil vangneithlak a nih. Ngaia ka lo nei tah, a ni ding hrim anga ka lo sie tah kha Pathien lunginsietna zara malsawmna a mi vur lei chauh a nizie ka hmu chieng pha zuol a, lungrilin lawmthu ka hril mol mol a. Suna ruo hnuoia hu chuopa ka hak ka kekor le zakuo khom hlip loin, ka pheikhok le mawza hu chauh hlipin, ni danga thrung khom ka thrung nuom nawna ding khuma chun ka tlu lut top a, Five Star hotel-a ka zal hlak lai let tama imu inhnikin, mang takngiel khom nei hman lo khopin, chu zan chu ka hmang zo tah a nih. Zalna khum inhoi nêkin lungril khum inhoiin thu a phur lem.

Hienga inzin sawl changa poimaw chu tui thienghlim a nih. Zing tieng Churachandpur-a inthoka kan inthok suok khan sazuk nenetui chawi dinga ka siem kha ka lo theinghil pal a. Hi khuoa nuhmei pawl hin an do nasat leiin Kana khuo ang khan zalen taka thil thaw thei a ni nawh. A sukpungtu zuituhai kha a sukpungtu mantu an lo ni ve. Mi pakhat, vengva deu le trong nuom deu el, sawt fe kan titipui hnung chun Kana thil hmu thei a ni le ni naw kan indon a. Ama chu, vangneithlak takin, a khaptuhai Secretary a lo ni hlauh a, a hriet khop el. An thil khap chu a trangkaina chin um sien khom khap tak tak thei a ni nawzie le an hlawsamzie thu a hril zo chun thiem takin zanbu kan fakna ding hmun a mi kawkhmu a, a fel kher el.

A tuka chun, kan motor fel taka an mi enpui hnungin Jacob le Rama chun Churachandpur tieng an mi kirsan a. Keini pahni khom carburetor kan insukfaitir hnungin Hmarkhawlien panin Pathienni zing dar 8-ah kan suok a. Kan tum dan chun Nungbaa sunbu fak a nih. Iemani chen kan tlan hnungin, sipai umna hmun Khongsang kan tlung tawmin kan motor ke hma chang tieng a koi a. Sipai diutina gate kan tlung chun a ke koi chu thlak dingin kan chawl a. A ke kuol her hongna hmangruo kha David-in a lo chawi theinghil leiin haw ding kan zong kuol a, a tawpah kan hmu hram a, kan thlak a. A lampui thrat naw zuolna po kan la hmabak a, tyre riper thei um sun hlak a lo leng suok bok si, Nungbaa bek bu fak malama inripertir beiseiin kan pan thlak a. Nungbaa khom tyre riper thei an lo um naw bok. Law ngaina um lo chuh, spare tyre boin Tuiruong vadung le Mukru vadung suk, lam khokrok le por inlet chu a ke koi lo dinga veng tlat dinga Pathien kuoma lungrila trongtrai zing pumin kan nor suk a na, a rumintang khop el. Chuonga fe peiin, a ni hnina zan tieng dar 5-in Hmarkhawlien kan lut tah a nih. Kan hung kir tieng ruok chu Hmarkhawlien le Churachandpur inkarah darkar 11 chauh kan thang thung.

Hmarkhawlien le Tripura North-a Bagbasa inkar, darkar 4-5 a tlung thei kha ni hniin thiphuhakin kan ban trawk bok. Kan thiltumah chieng naw ni inlang lem chuh, lampuia kan thil tuokhai ngaituoin inngaisietna khop le lam chanvea kirna tham a nih. Sienkhom, harsatna kan hmasuonhai chu kan fena san poimawzie hriltu, fiena lawmum, zirtirtu thra, kum tam sikulah a thua inchuk ringota inchuk suok thei lo, a nih. Krista Isun a mi hung zongna man a to ang bokin, unauhai zongna man hi a to dingah ka ngai. Chu thil leia sawl le rinum tuor theia um hi Pathien malsawmna le ditsakna hlu tak a nih. Chu thawna ding chun, ka tum am inru, saru? tia kam pet a, saru chang tak nêk khoma chang lem, lungrila tumruna khauh zuolpei put a ngai. Chu chu kan inzin sunga ka thuruk man chu a nih.

*Pu Keivom is a retired Indian foreign diplomat and respected Hmar Mizo writer known for his Zoram Khawvel. This article is dated June 10, 2011 Delhi.