Thlarau Thienghlim neinawtu chu Kohran a ni thei nawh!

By Pu David Ralsun

‘Kohran’ ei ti hi syllable pahni’n hang the in la; ko-hran, chu umzie chu kodawk, ahrana kosuok tina a nih. Tuta tuma ei sui tum hi kohran umzie le a thiltum tieng ni deu tak a tih. Thutlung hlui tieng thlir tum nawng ei ta, Thutlung thara Isu Krista kohran, andinnasan, le a kohranhai umdanding anih ei inchuk ding chu.

Kohran umzie.

Kohran ei ti hi ‘Ekklesia’ ti classical Greek, Septaugin(Lxx) a inthawka laksuok a ni a. a umzie tak chu, mipui fekhawm, mipui pungkhawm tina a nih. Thutlung thara tirko Paula’n a hmang dan chun, ringtuhai hmunkhata fekhawm tina’n a hmanga. Chu umzie chu Isu Krista ringtuhai hmunkhata an fe khawm mei mei ni loin, an Lalpa Isu Krista rawngbawl dingin an fekhawm ti na a ni chu. Hi taka fekhawmhai hi mi naran an ni nawa, Thlarau Thienghlim in a kohranhai, Thlarau thienghlim neituhai le Thlarau Thienghlim siemtharna changtuhai an nih. Tawng dang takah, hi Kohran hi Thlarau Thienghlim’n a siem suok tina a ni bawk. Chuleiin, Thlarau Thienghlim neinaw chun hi kohran, community a hin thang thei a ni nawa, Thlarau Thienglim chu hi kohrana thangtheina dinga thil makmaw hmasatak chu a nih.

Kohran chu Krista rawnbawltu ding a nih.

Hi kohran sunga umhai chun thaw ding poimaw tak an neia, chu chu an Lalpa Isu Krista rawngbawl ding an nih. A chung chiea Ekklesia umzie ei hril fie ta ang khin, hi kohran, community sunga hin mimal khata hrat rak le thaw rak hi kohran thiltum a ni nawa. Hieng anga mimal khata rawngbawlna le inlak hranna a tlung phat phat hi kohran, community hi inthangtieng pan nekin sietnatieng a pan lem hlak anih. Asan chu kohran chu Pathien nauhai fekhawmna a nia, a renga, hrat le hratnaw biek um lova inthangpuituo ding le insawmdawltuo dinghai an ni leiin.

A size lien le chin tieng a ni nawh!

Mi tam tak chun kohran memberah ei buoi tawla, kei ni pawl an ni pawl ti damin. Kohran umzie tak ei hriet ta angin, member tam le tlawm tieng a ni nawa, Isu Krista hming leia fekhawm, mi pahni le pathum an ni khawma, kohran, ekklesia an ni thoa. A size lien le chin tieng a ni nawa, Isu a thang le thang naw a ni lem! Kohran hi pakhat cho a uma, chu chu Isu Krista kohran a nia, chu kohrana umhai chun thiltum pakhat chie an neia chu chu Isu Krista rawngbawl a nih. Chu Isu Krista kohrana umhai chu insawmdawltuo dingin mawphurna an in lak tuoa, an thiltum pakhat a ni leiin inremna a uma, an in hmangaituo hlak. Hi kohrana hin lutak pakhat cho a uma chu chu Isu Krista a nih. A dang po chu a sinthawtuhai an nih.

Kohran hi sinthawtu ding cho a ni nawh!

Kohran hi sinthaw ding choa kodawk an ni nawa, a kodawktu choimawi ding le inpak dinga kodawk an ni bawk. Hi taka kohran tamtakin ei thawsuol rawp hlak chu, ‘mission’ tieng eiin hnik taluo luot luotin a sunga umhai ei theinghila, kohran siemtha hmasa lovin mission tieng ei luta, hi hin kohran, community a suksiet hlak. Thil pakhat ei hriet ding chu, kohran, community chun an rengin Pathien an biekin an choimawi tlang ding a nia, anni laia pakhat pahnin Pathien biekna chang an lo hriet naw chun, kohran ta dinga thil po a nih. Asan chu kohran hi mi pakhat a ni nawa, community ringtuhai fekhawm an ni leiin an rengin Pathien an biek tlang ding a nih. Chu umzie chu ei hril ta angin eiin sawmdawlltuo ding tina ani chu. Pakhat achau chun, a rengin an tuor ding a nih ti hi kohranhaiin an hriet tlat a tul bawk!

Kohranlai a lien biek an um nawh!

Pathienin a kohranhai hi ama ta dinga ringum taka um ding le a hnuoia intuklut dingin a dita. A kohran sunga hin tukhawm a lien biek le a chin biek um ding a phal naw bawk! A kohran sunga hotua a ruothai chu kohranhai rawngbawltu ding an ni lema. Chu kohran chu hmu theia ama inlar suokna a nia, a kohranhai fekhawma Ama, Pathien an biektheina dingin a kohranhai chun hmuthei kohran chu an ngai poimaw hlak.

Kohran hi sumdawngna a ni nawh.

Tulai tamtak kohranhai chun kohran hi sumdawngnaa hmang ei tam ta hlen an langa. Entirnan, ‘ei pastorpa a chau em, mi khawm hip thei lo midang mi hip thei deu ding ei kohran ei pung thei deua ding hung sien la’ ei ti chun, ei hriet naw kar kohran chu business a lo ni der el! Ei hril ta ang khan kohran chu mitam le tlawm a ni nawh, Isu thang le thangnaw a ni lem. Chun pastor’n sukpung theina dingin iengkhawm power a nei nawa, sukpungtu ding chu Isu a ni lem.

Kohrana thang dingin I qualify am?

A tawpna taka dingin hi zawna hi hang dawn tum in la. Ei ni laia ei hril uor em em chu, Zudawn hai ta dingin biekinah hmun a um ve naw maw? Ti hi a nih. Hi taka zu dawn ka hmang kher nasan chu ei culture achu zudawn hi ei ngai koi tak niin ka hrieta. Chun a dang popo inkawktir malama ka hung hmang biek a nih. Zudawnhai hin kohran sunga hmun an chang chie am hang en ei tih. Pathien’n a kohran dinga a dithai chu quality pali in hang then in la. Chu hai chu:

1. Pathiena dangcharna neihai

2. Pathien thu inchuk nuomhai

4. Pathien ta dinga mi ringum nuomhai

5. Pathien ta dinga inpe nuomhai

Hieng point palihai nei si lova, ngolvei hai ta dingin biekinah, kohranah hmun a um ve naw maw? Ti tu ei ni chun hi hi dawnna chu ning a tih. Biekinah chu hmun a um, a kil le I nuomna hmun taka inthung theina a um. Kohran aruok chu a um ve nawh. Kohran chu mi thienghlimhai fekhawmna, Thlarau Thienghlim’n a kodawkhai, Thlarau Thienghlim indinhai an ni leiin zurui le hlepruok, uire, rukruhai chengna hmun a ni ve nawh. Pathien le a nauhai hlim taka an chengna hmun a nih. Hi taka chenghai chun Pathien a kohrantupa rawng an bawla, hlim takin an khawsa hlak.

Chuonglai zing chun hi kohrana thangve dingin a nuom taphawt an fiel zing a. Hi kohran hi Krista taksa a ni leiin sukpawrche a thieng nawa. Hi kohrana thang dingin zurui khawm an dita, ruokru khawm an dita, hi taka thang dingin zudawn bansan phawt a ngai nawa, Pathien hmangeina an chang hunah Pathien thienghlim zie a hrieta, sukpawrche an tia, Thlarau Thienghlim peka um chu hmangin an in sukthienghlim lem hlak. Hi kohrana cheng sia, sukpawrchetu chu ama khawm Pathienin sukpawrche ve ngei a tih. Kohran chu Krista taksa a ni si a! Kohran lu chu Krista a nia, chu Krista chu an thieng leiin a kohranhai khawm inthieng dinga ko an nih. Thlarau Thienghlim nei naw chun hi kohran hi thang thei a ni nawa,Thlarau Thienghlim neinawtu chu kohran a ni thei bawk nawh!