Thutaka Sukthienghlim

Ziektu: Pu Zarzolien Keivom.

Bible chang thlang: Johan. 17 :17-19.

Ei Lalpa Isu hi khawvela a hung laia a thruoihruoihai ta dinga a pa Pathien kuoma a trongtrai pekna thu insam hi eini tulai ringtu le thrangthar la hung um peihai ta ding khoma la poimaw pei ding a ni leiin hang sui chip chier deu met ei tum a nih.

“Anni chu thutakin sukthienghlim rawh; i thu chu thutak a ni si a,” tiin Isu chun a thruoihruoihai ta dingin a pa Pathien kuomah a ngenpek a nih. Nang le keiin thutak ei ti hi Isu’n thutak a ti le hin an inang chie dal thei, Ei thil hriet le hmu an dik ngei a nih ti ei hriet chienghai chu thutak a nih ei ti tlangpui niin a’n lang. Isu’n hi taka thutak a ti ruok hi chu Pathien thu chau hi a nih. Chu chu chatuon dai danglam ta ngai lo thutak chu a nih. Pathien thu ti lo hi chu thutak chatuon dai ding a um nawh, chu thutaka sukthienghlim chu eini ringtuhai hin ei poimaw takzet a nih ti ei hriet chieng a trûl a nih. A tirin Thu a um a, chu thu chu Pathien kuomah a um a, chu Thu chu Pathien a nih a ti a nih.(Johan.1:1). Thu chu taksain a hung inchang a, a ropuizie khom ei hmuh, lunginsietna le thutaka sip, Pa Naupa nei sun ropuina chu. (Johan.1:14). Eini misuol le porche ta hnunghai hi Pathienin a naupa Isu hmangin a mi sukthienghlim a, Krista lungril put a, nei a, thienghlim zing dingin a mi dit a, thruoihruoihai ta ding chaua ngen pek loin, an thu leia ama la ring dinghai po po, nang le keia ta ding khomin a nih a pa Pathien kuoma a trongtrai chu nih.

“Khawvela i mi tir ang khan kei khomin anni chu khawvelah ka tir a nih” Isu-in a ti a nih. (Johan.17;18). Ei Lalpa Isu chu bohmanghai sandam ding le sawp fai dingin a pa Pathienin hi khawvelah hin a hung tir a, chuong ang bok chun ama ringtu taphot chu chanchin thra hril dartu dinga ruot le tir ei nih. “Hnuoi le vana thuneina po po pèk ka ni tah, chuongchun fe unla, hnam tin zirtirah siem unla, Pa le Naupa le Thlarau Thienghlim hmingin baptis unla, thu ka pek po po cheu hi zawm dingin zirtir ro. chun, kei in kuomah kumkhuoin, hun tawp chen khomin um zing ka tih” a ta (Mathai.28:16-20). Chuleiin, sandamna chanchin thra hril dartu dinghai ei ni ti hrein, kohrana thawlawm ei pekhai dit tawk el loin, mi tinin ei sinthawna hmun le ei inchukna hmun sengah ei hril thiem naw khoma nungchang bekin chanchin thra hi puong seng tum ei tiu. Sandamna thu hi a hun le a hun naw hril loa puongdar a hun takzet an tah. Hun fe dan le inher dan thlira ei en chun Lalpa Isu hung nawkna ding a hnai tah. Hmun tin le ram tinah indo thu thang le tram thu thang ei hriet in zing tah. Mani hringnun le sungkuo hringnun khom sui chieng a trul. Lung dit po po chatuon hmunah kim nawk ni a um thei chie dim ti zawna khom hi ei don thei seng am in ngaituo chieng ei tiu.

Isu chun, “Anni leiin ka’n ser thienghlim a, anni khom thutaka an inser thienghlim theina dingin” a ti bok a (Johan.17;19). Eini ringtu intihai khom hi ei kawl le kienga ringnaw mihai hmu thei dingin Pathien thutaka inser thienghlim ding ei nih. Ei hlawkna ding le ei phingpui khawpna ding a ni lei el a ei Lalpa hming hril pawia a um ding ngaisak lek loa ringnaw mihai thaw dan thaw ve lo dingin Pathien thutakin inser thienghlim hlak ei tiu khai. Pastor, Kohran upa le thruoituhai, ei kohran mipui le khawtlang enton tlakin Pathien thutakin inser thinghlim nawk zuol ei tiu. Ama Isu ngei khom kha a thruoihruoihai thutaka an inser thienghlim theina dingin an ser thienghlim hlak a ni kha. Nu le pa hai, in ngaituo chieng a hun. Ei nau le tehai enton tlakin Pathien thutakin ei inser thienghlim chie am le? Ei thil ching le nungchang po po, ei nauhai thaw ve ding le ching ve dingin ei ditsakna ei inhlan nuom chie dim, in ngaituo chieng din Lalpa-in a mi dit a nih. Thaw lo hlaw lak dam, thaw lo bill lak dam, thamna lak dam, Esau ang el a elekson changa Pathien nau ei nina sum le paia zawr dam hi Lalpa’n iengtin am ngai veng a ti aw! Ei ram ei hnam le Pathien ram lienna ding hin sum le pai le ralthuom laklut nekin Pathien ram le a felna la lutin, thutakin inser thienghlim inla, thil dang po po chu a neitu pa’n ami pek el lem ding a nih. Hre loa suksuoltu chu tlawmte chau vuok ni’ng a ta, hre zinga suksuoltu chu voi tam tak vuok ni’ng a tih ti hi ei Pathien thu a ni si a.

(June 10, 2011, Keivom Run, Greater Noida)