Isu a tho nawk tak tak am?

By Pu Ramthienghlim Varte, Shillong.

Tarik Ni 7,April 30 AD a Kross lera Lal Isu khengbet a um chuh a thi tak tak ani ti sipai haiin an enfie hnungin zantieng Dar 5:00pm velin a ruong chuh an lak thlak a, hun an tepter ta em leiin thawdan pangai khawma thaw hman lovin Joseph, Arimathai khuoa mi chun Bawrsap Pilat kuomah Isu ruong chuh a hni’n an lak thlak a. Hmawsarum tak meuvin thuktheinawna damdawi a hungchawi. Alawi le Mura anti chauh chuh an nal sawk sawka, puonzai inhmiin an tuom a, thlan lungker sungah an inzaltir taa. A thlan lungker sinna lung chuh dawmsawn mei mei theilo khawpa rik ruong danghai sinna lungphek ang mei mei nilo chun an sin a. Vengtuhai hmu ngeiin thataka char dein midanghai thawdan bakah Rome Sawrkar Seal an tet khum a nih.A ruong vengtu dinga ruothai kha Juda Sipai a khawm a thonawk ding inlau dawp dawp vawng an na, inrawitu ding chun Bawrsap Pilatin a mi ringzo tak Sipai za hotu Petronius a ruot ti ani nghe nghe.

Hienglaia Rome sipaihai inhrem dan chuh– (i) Indona hmuna tlansie chuh Sipai hotu lientak General in a kut ngeiin chemin a sathlum ding (ii) Duty laia inlusu chuh rawla namthlak ding ti a nih. Chuleiin, hi zana thlan vengtu haihih an inlusu chuh ring a um nawh. An hotupa rawiin rawla namthlak chuh an hmaa dawkan ani tlat leiin.

Tarik Ni 9,April 30 AD (Pathienni) zingkar inhma deuvin Mari Magdalin le Mari dang chu Isu ruong zalna thlan chuh ti le inthin dawr dawr pumin anva en dawk dawka, a hril ang ngei khan alo tho tak taka, a thonawk thu chuh Vana inthawk Vantirko hung tumin an kuomah ‘Tinaw ro, Isu an hemde kha inzawng ani ti ka hriet, hi hin a um ta nawh, a hril ang ngeiin a thonawk tah, a zalna hi hei enta hman ro’ tiin. A tuomna puon chauh chuh anva hmu a nih.A thonawk thu an hriet phingleh an lawm taluo a, a thuoihruoi Jerusalema umhai le mi dang dang a lainatuhai kuomah an hril ta peia. A thonawk thu chuh Jerusalem khawpui sunga chauh nilovin Juda ram, Samari le Galilee a hai an thangsuok vawng nghal a nih.A thonawknaw sa a thukhel hril nita ang hai sien chuh thukhel chun nikhat khawm dai naw nia, an chung khawm ava hei rik awm ngei de.Rome sipaihai le Juda mipui haiin Lal Isu an sawisak neka nasa lemin an thaw awm sia. Thlan vengtu sipai haiin kan inlusu kar a thuoihruoi haiin a ruong anlo hung inruk hmang anti ngam hi a mak bek bek el chuh a nih. Chuonga inlusu chuh rawla namthlak ding anni chu teh, an nam thlak ti ruokchu ei hmu sinaw a, hotu hai le inthuruol vawng anni ti a chieng. A reng rengin an inkar chun an rutu chuh a thuoihruoihai anni ti iengtinam an hriet thei, anlo inruk suok lo ni reng sienla a ruong an siena chuh iengtinam an zawngsuok naw ding. Chuleiin, a hrillawk ang ngeiin mithi laia inthawk a thonawk tak tak a nih.

Isu tuomna puon hi a tak tak hmu theiin Italy ram Turin khawpui biekin pakhata anla sie tha a, a hming Shroud of Turin (Isu tuomna puon) an tih. Europe rama mithiem tam takin SHROUD OF TURIN RESEARCH PROJECT tiin a tak tak ani am tak tak naw an suina a chun Isu tuomna puona hin mihriem thisen pawimaw tak tak hieng- Hemochromogen, Serum Albumen hai an hmu suoka; hi puon tuomna hi a tak tak ni dingin an ringa An vuokna be an hmudan chun hnungtieng nekin hmatieng a tam lema, vuokna be hmun zakhat vel hmu a nih. Hruihruola vuoka hrem ding chun Judahai dan chun vawi sawmli bak vuok awilo a nih.

Chuongchun, a thuoihruoihai hlak Arte a puiin a thisan ang elin anlo indar vawng taa, a thenkhat Galili dil tieng an nga manna hmuna dam anlo um tah. Amiruokchu, a damlaia hril angin a thonawk hnunga a thuoihruoihai inhmupui nadinga alo ruotpek Galili ram hmun pakhat a chun thuoihruoi sawm le pakhat hai kuomah an lara, thahnemngai taka a sinthaw (Mission) sunzawm dingin a hrila. ‘Hnuoi le van thuneina po po ka kuomah pek ani tah; Fe unla, hnamtin lai chanchintha hril unla, Pa le naupa le thlarau thienghlim hmingin baptis unla, thu ka pek po po cheu pawm dingin inchuktir ro. Chun, ngaita u, kei kumkhuoin khawvel tawp chenin in kuomah um pei ka tih’ tiin.

Chun, alo hrillawk ang ngeiin khawvela Ni 40 hmun hrang hrangah inlarin a hun tiem a tlung phingleh a thuoihruoi mi tlawmtehai chuh thuoiin Olive tlang ah an mit hmu ngeiin vana lak hmangin a um ta a nih.Van tienga Lal Isu thuoia a um a inthawk thlarau thienghlim hungtlung hma si ni 10 (sawm) sung chun khawvel hi optu bova um a nih an tih. Lal Isun thlarau thienghlim hungtlungding lo nghakro ati ang khan, Pentikos ni (Isu thi a inthawk Ni sawmnga) a hungtlung chun Jerusalem pindan chunghnung taka chun thli angin thlarau thienghlim chuh a hungtlung ta phut ela; an rengin thlarauvin an sipa, inthinna thlarau an changa, tawng hrietlo hmangin an thil hril inhrepaw thei siin Pathien thlarau thienghlim chuh an chungah a fu tah a nih. Chuh, Juda Jerusalem a um haiin an hriet phingleh makti em emin mipui an hung pungkhawm a, ‘hienghai hih Galili ram mi an ninaw amani, iengleia an piengpui tawngang ela tawng dang dang hmanghai hi inhrepaw thei am ani ta leh’ tiin. Chutaka inthawk Krista chanchintha thilsiem tinreng kuomah puongsuok dinga hmangaina lungril puta, iengkim Krista hminga tuor huomin huoisenna thlarauvin a hei inthuom zet chun Krista hminga thi khawm an cho et et el a nih. Tirko Peter, Johan hai le thuoihruoi iemani zat chun huoisen takin Krista chanchintha chuh an puongsuok ta peia, thlarau thienghlim thilthawtheina neiin zeng, mitdel, kebai le dang danghai sukdam theina le thilmak thawtheina an chang bawka. “Insuol sim unla,Insuol ngaidamna dingin Krista hmingin Baptisma chang ro “ tiin Krista chanchintha chu an puongdar pei ta a nih. Chuongchun, chawl hadam hman lovin khawvel hmun hrang hrangah chanchintha puongdarin, an hringna Krista tadingin an inhlana- Andria chuh Russia rama, Bartholomai le Simon chu Iran rama, Philip chuh Turkey rama, Jakop Spain ram a, Hmangai Johan chuh Asia Minor ram a, Marka chuh Aigupta ram a, Mathai chuh Ethiopia ram a, Peter chuh Italy ram a ( Ka Lalpa hemde anga hemde chuh ka phu nawh, a letlingin mi hemde ro tiin a hringna an hlan a nih), Thoma Didum chuh India ram a. Chuongangin Krista chanchintha chuh vawisun chen hin puongdar in a uma; Chu nih missionary lungril eiti chuh. Chuleiin 60 AD vela khan chuh khawvel hmun hrang hrangah hi chanchintha hi an dar suok nghal a. Khawvel sakhuo laia pawimaw tak Kristien sakhuo (Sakhuona a Krista hnungzuitu) chuh a hung ni nghal reng a nih. Krista hi tho naw nisienla hieng po po hi a tlungthei naw ding a nih. Chuleiin:

Thlaa inthawk a tho nawk tah, Sandamtu Laltak chuh;

Thlan thima inthawk hungsuokin, Khawvel suol le thina a hne zo ta.

A tho nawk ta, Inpak ro, sandamtu a tho nawk tah.

tiin hlain ei sak dep dep thei ta a nih. Pathienni (Sunday) ei ti kuhi Krista thonawkni ani leia khawvel pumin eiin ser, Hindu kulmutna hmun India ram takngiel a khawm hril buoi umderlovin sawrkar sin le thil dang danghai chawl sanin eiin ser bawk ani hi. Kan Upa pain Pathienni tuk tawngtai dingin an ko chang ‘Vawisun i thonawkni ropui taka hin’ a ti hlaka, ka ngai thei rak ngainaw a chuh alo indik lem a nih. Chuleiin, a thonawk ni neka ropui lem hi a um nawh. A pieng ni, a thini le chawimawia a um nihai chuh kumkhat sungin vawikhat chauh eiin sera, a thonawkni ruok chuh kumkhatin vawi 52 (Sawmnga pahni ) eiin ser a nih.

Chu chanchintha chuh mingohai zarin eini lai a hungtlung vea, ei lawm hlea, taksa le thlarauva malsawmna tam tak dawngin ei pilepu hai khawsakna ngaituo chun vawisun hin chuh changkang tak ei ni tah. Chuleiin, eini khawm missionary lungril putin Lalpa rawngbawl ei tiu. Missionary lungril indik tak nei hai chuh Lal Krista a thonawk angin ropui takin eila tho ve ding a nih ti an hriet tlat leiin Pawl le Kohran rawngbawl lovin Lal Krista rawng an bawla, malsawmna tam tak leh nitin nun an hmang hlak .Chuongang ni dingin tiemtu po po Lalpa’n malsawm raw seh.