Good Friday (Zirtawpni Tha)

 By Pu Ramthienghlim Varte, Shillong.

Kum 2011 hin Zirtawpni (Friday) vawi 52 (Sawmnga pahni) a uma, Zirtawpni vawi 16na April 22, 2011 hih Nazaret khuoa Juda thlangval Isu thini ani leiin Zirtawpni Tha (Good Friday) tiin India ram chau nilovin khawvel pumpuiin an inser chu a nih. Isu chuh tum ana ? ama chuh pathien nau, khawvel danah eini ang a siem, a pa Joseph a nu chuh Mary nisienkhawm thlarau thienghlimin an rai tir a ni leiin Lal, Pathien nau khawvel mihriemhai sandam dinga Pa Pathienin a hung tir a nih. Khawvela a um lai khan a chanchin hi M.Gandhi hai angin Bible a chanchintha pali hai tinaw lem chuh a tam naw hle. Juda haiin Lal Messiah Pathien hring naupa hungdinga anlo tung pa kha ana, anlo beisei le tung angin a hungnaw thlat leiin thilirna tinrenga tlirin Lal Messiah ni theiin an ngai nawa, an ngaituona le suongtuona ah lalin an ruotthei ngang naw a nih.Chuleiin vawisun chen hin khawvel rambung hrang hranga Juda mi Krista Messia a pawmtu hai chuh Isreal khuo le tui nina an pek nuom nawa, harsatna namenlo an tuok reng a nih.

Lal Isu khawvela a rawngbawl laia Juda ram ro inrel dan chuh - Rome sawrkar hnuoia um, Juda ram awptu dingin Governor (Bawrsap) pakhat Rome Sawrkar chun a sie a, zalenna insangtak ( Independent state ) neiin an hnam le sakhuo dana rorel chen phalpek an nih. Chuleiin an rorelna khawlpui insangtak chuh Great Sanhedrin an tia, chuh ‘Inthungkhawm’ tina a nih. Sanhedrin member chu 69 an na, presiding Officer pahni leh an rengin 71 an nih.Hi roreltu dinghin mi an dittui em em. Hebrai thlaa mi ngei, mi uong thuonglo, nungchang tha, piengsuolna neilo dawlkai tha, hmeltha le inzaum, sakhaw mi le mi huoisen, khawvel hrietna tieng khawm insangtak nei anni ding a nih.Rorel hi an fimkhur em ema, misuol insuo ding relna a chun vote khat chauva an suo nuom tieng a tam ani khawmin a hun tawka; misuol hremding ruok chun vote hni bek hrem nuomtu tieng vote a tamlem naw chun hrem dingin thuthlukna an siem ngai nawh. Chun, misuol hrem dinga an vote seng lem chun hrem lovin an insuo lem hlauh hlak. Thina khawp dan bawsetu hremna dinga thuthlukna siem ani chun a tul am a tul nawh, a zinga an rel zawm kher kher hlak. Asanchuh, thi dinga an rel pa thiemchang thei danding dapna leia insel ani hlak leiin rel fello le inhmai palh um an inlau lei a nih.Chun, a zinga an rel nawk a, chutaka vote an hei thlak nawka hrem lo dinga member thenkhat lungril thlaka vote khata chauva alo tam ani vai khawmin hrem lovin an insuo lem hlauh

-2-

hlak. Sabath tawm Zirtawpni lem hin chuh thina khop suolna nei hai chungchang an ngaituoin an rel ngai nawh. A zing Sabath (Inrinni) nia sunzawm thei ani ngai naw leiin. Chun, misuol man ding hrim hrim zanah an man ngai nawa, an chungchang zanah an rel ngai bawk nawh. Chubaka, Sanhedrin members le thiempu lal haiin mi hek phal ani bawk nawh. An fimkhurin misuol hrem hi an inlau em em niin an lang tak. Chun, inhremna an nei danhai chuh – (I )Hruihruola vuok (ii) Hmun insanga thlak (iii) Ring tan (iv) Tuipui a dehawn le (v) Kross a hemde a nih. Hieng hun laia Rome sawrkarin Juda ram enkawltu Governor (Bawrsap) dinga a ruot chuh Pilat ani a, ama hi Spain mi Juda haiin lal tak Kaisar kuomah an ditnaw thu an intlun chun a Bawrsap nina tla el theia um a ni a.Thuneina insangtak pek, a nuom leh Rome dan hmangin ro a rel a, a nuom leh Juda hai dan hmangin a rel thei nisienkhawm Juda mipui haihih a ti em em a nih.

Lal Isu hi Juda haiin an Lal Messiah dingin pawm theinaw hai sienkhawm khawvel sandamtu dinga Pa pathienin a hung tir a nisi leiin a mawphurna sukpuitling ding chun a mihriem mihriemna a harsatna a tuok ding le thi ding chen hre lawk zingin a nina a puong ta pei ela. Thilmakhai a thaw a, Sadukai le Pharisai (sakhuoa mi firfiek)hai chetdan indiknawna le Juda sakhuo dan le dunin Pathien ram a hawl phaknawna hai a hei phawrsuok pek pei chun an lung a kheiin an rang thei anga hre hmanga sukbo vat kha an nuom bek bek el chu a nih.A thuoihruoihai leh Biekbuk a hai lutin Pathien thu an hril a, mi an inchutira, a tul leh mithi a kei thova, keibai hai kein an lawn tira, tawng theinawhai an tawng tira, a puonhmawr tawk ringawt khawmin mi an dama, a fena tieng tieng mipuiin an zui a, a kar leh thlaler ram tawla mipui a sanga sang tel hai fakding a sukpung pek. Hienghun laia lalna inchu pawlhai le sakhuo tienga firfiek sum le pai ringawt ngaituoa Pathien hming sala rawngbawltuhai tading chun theida a um ding reng chu nih. Vawikhat lem chu Pharisai le lekhaziektu haiin thawtha inti em emin Nuhmei uire an hung thuoia ‘Pasal le a um lai tak kan man a, Mosie danin lunga deng hlum ding a nih’ tiin. Isu ruok chun Mosie dan sawisel chuong lovin ‘nangni laia suol neinaw takin deng hmasa rawse’ati ela, a deng hmasa ngam an um nawh. Misuol anni an inhrietchieng leiin a rukin an inrel hmang vawng el. Ei sakhuo puithiem thenkhat puon senduk hak thei chinhai leh in ang vel mei an tih. Jerusalem a chawimawina a hei chang chie lem khan chu an lung a sen zuol sau a nih.

chuongchun roreltu le sakhuo tienga a firfiek le thiempu haiin Juda dan khermei po po sie hrein misuol tawpkhawk hremna insangtak Kross a hemde tumin an pungkhawma hekna ding point an zawng ta ngat ngata – ‘Pathien biekin hi thiek unla nithum sung bawlzo kati’ati leiin pathien a hril siet a nih ti dam, kan mipui hai a suk khawhlova, Kaisar kuom a siechawi(Tax) a khap’ ti dam le Juda hai Lal ka nih a tih’ ti le dang dang phuok belsa peiin hekna an siem ta a. Hienganga hmelma tamtak a nei leiin man ani ding le a thi ding a hrietlawka, a thuoihruoi hai chuh ko khawmin Jerusalem a Tarik 6, Ningani 30 AD zanah LALPA ZANBU fak puiin Jerusalem suoksan derlo dingin thu an cha ta a; chuzo chun Olive tlanga Gesmani huon tieng chuh panin an suok ta a nih.Hi tum hin a nih Lal Isu zan khawvar a tawngtai a ‘ A thei hram

-3-

chun ka hma no hi mi dawmsawn pek hram rawh, amiruokchu, i thu ni raw seh’ tia a pa kuomah a hnina hmun le beidawng taka tlantui thisen anga fara a tawngtaina ngei chuh. Mipui an sosang nasa a, heka a um angin Rome sipaihai chun zingkar Dar 3 vel chun an man ta a nih.

RO FELIN AN REL NUOM NAWH, EI LALPA CHUNGAH

Chuonga an man phing chun rorelna in pangaia rel lovin thiempu Lal Kaiapha inah a chungchang an rela, chuzova chun Bawrsap Pilat hmaah an thuoi phei nghal a nih.An dan a khir in a tha lawm lawm veileh Lal Isu bawsiet chungchang thu rel na ding ruok chun an danbu le en mil thei a um ta reng reng naw chu tie. Mi suol man ding chun zan a man awilo, Lal Isu ruok chuh zanril a man a nih. An danin Sanhedrin members annawleh, thiempu Lal hektu a thang theilo hai kha hma thuoituin an thang. Bawrsap Pilat hlak a sin a thlak an lauva mipui pungkhawmhai Kross a hemde dinga anlo khek zing bawk leiin a thiemthu khawm a hril an phal nawh. Hi lei ringawt khawm hin dan anva hei bawsiet nasa ngei de. An hekna po po thina khawp a um nawh ti hrezingin Bawrsap Pilat hlak chun‘An diknawna/a suolna ka hmu nawh, hi mifel thisen chunga hin kan thieng a nih’ ti hielin Kross a hemde dingin a pek suok ta a nih. Kross hemde khawpa misuol chungchang relna ah dan hremi hai suidan chun hiengneka indiklo, tirdakum le lepchie hih ala um naw a, um nawk thei ding chi khawm an nawh ti hiel a nih. Herod Antipas chun nang Juda Lal maw i nih ti elin puon senduk an siltir a, hlinglukhum inkhum tirin, a thenin a hmai an ben a, an vuok a, thenkhatin hmusit em emin an chilsak khum bawk a, an hemdena ding thing input tira Kalvari tlang, Luru hmun tieng chuh an panpui ta a nih. April 7, 30 AD chun Kross a hemdein zantieng dar 3-4 velin ‘A kin ta’ tia a thlarau a hei inthla meu chuh khawvelin a en ngam nawa, an thim khupel. Simkhawlei an hninga, Jerusalem puozar ropui an thlersuok a mipui le an hotu thenkhat lem chun mak anti em em a, hienghi ani chun thonawk tak tak a tih tiin thlan, a ruong siena hmun khawm sipai thuo tamin an veng kha ani reng. A naka thisen hung luongsuokin ei suolhai an tleng fai a, Zawlnei Isaiin kum 600 hmaa alo hrillawk ang khan an vuok invuolna hai leiin sukdamin ei um a, ei suol maw chuh Lal Isu chun ami lo phur pek ta a nih.

Aw thisen, thisen hlu; Vanram mi hawng pek tu, Vanram ka thlungpha chun,

Ka hla tawplo ding chuh,Thisen,Thisen,Thisen,Thisen;Tiin malovin sak ka ti.

tiin hla anlo siem a, a thina hmun Kalvari, mi tisim ,tlang thlavai um, Juda nupui haiin an nau hai tap rena dinga, inthina taka an hmang hlak kha, Lal Krista leiin ‘Thumak ka hril nghawk theinaw chuh Kalvari chanchin a nih, Kalvari chanchin inmi hril thei am tiin ei ngaina em ema. Hi a thini champha a Kalvari tlang ngeia hmang nuomin kum tin mi tiemsenglo an fe a, khawvel pumpuiin eiin sera, a hming khawm ZIRTAWNI THA (Good Frioday) ti a nih.