Project: Cultural Mapping

By L.Keivom*, Inpui Columnist

Kum 1958 April 5-a Hmar Cultural Research Committee indin chu October 5, 1960 khan Hmar Cultural Society (HCS) tiin thlak a ni a, Chairman hmasa tak chu H. L. Daka a nih. Kum 1963 lailung chen tlawmngai taka a chel hnungin inthlang thar a ni a, keiin ka hung thlak a. Bulthrut an lo rem tah kha sirsana hmangin, iengkima ka sangawi zawnpui hlak, Compounder Lal Rokung kha Secretary niin, mi thrahnemngai le inpe zo mi tam takin a kûl a taia mi thlopin, hnam thu le hla, làm, thuom le incheina, rimawi hmangruo le rothil dang dang, kristiennain hnawmhnawl vong a tum leia tam tak lo inhmang tah le inhmang mekhai chu hnam zierang le nina hriltu an ni tlat leiin, nasa taka tharthawa sukhmasawn dan ngaituoin theitawpin thrang kan lak a. Chu sunzom peina sin chu hi prawzek thupui hi a nih.

Hi thil hung hring suoktu hmangraw poimaw zuol laia threnkhat chauh hang tar lang inla. Kha hma, 1957-58 laia inthoka cultural revolution chî tu a, thu le hla thar phuok a, a thei ang anga kan lo chawm lien chun zung a hung kei nghet pei a, kum sawm sungin puipungna chi hrang hranga a hun le inhmea sak ding mani trong ngeiin hla ei nei ve treuh hman tah a nih. Hi thilin a hmatiema a hung hring suok pei chu kum 1962-a kan buotsai THRALAI HLA BU le a hnung kum 17-a hung pieng LENRUOL HLA BU hi a nih. Chu ruol chun pipu hla, mawi tak tak, sakhuona leia ei lo hnawl le vui liem tah hai chu khon khawm nawkin, cyclostyle-a herin a buin a hung suok a. Chu chu ei thu leh hla hlui, hnam rothil hlu tak el humhim sin ei tranna chu a nih. Chu chun te lawmum tak tak a hung hring pei a. Chuong laia threnkhat chu H.V. Vara buotsai Hmar Hla Hlui le ka lekhabu buotsai, ei literechar suina lekhabu um sun, HMAR HLA SUINA a nih.

Cultural revolution ei hril hi a hung hring suoktu ve thung chu Mizo Union thlipuiin a mi hung nuoi har hnung le ei beiseina a hlamzui hnunga mani hnam puola ngirhmun suol suok tuma 1954 laia hma ei lak tran lei a nih. Chu thil chu bawzuiin kum 1956 khan Scheduled Tribe list-ah ei hung inziek lut a, kum 1958 khan rênga insung khawmna ding Hmar National Union (HNU) a hung pieng bok a. Chuonga nasa taka hnama har tharna a tlung tran lai chun vangduoi-vangneiin unau Kuki-haiin buoina an hung chok suok a, chu chu 1960-a Kuki-Hmar indo tia hriet kha a nih. Hi buoina hin thawk le khatah ram hrang hranga chêng dar tah Hmar hnathlakhai chu pum khatin a hui khawm ta pup el a, huong khata Hmarhai kei khawmtu hmangruoah a hung inchang tah hlauh a nih. Hnam invoina a pung ruolin mani trong ngainatna a hung lien a. Hieng hun lai hi a nih kha hmaa mani insunga mani trong hmang ngai lo hai khoma an hung hmang tran hun chu.

Thil inchik tlak dang chu kum 1956-57 laia kohran khata Hmarhai insuikhawm dinga Rochunga Pudaite hmalaknain hnam thila har tharna nasa tak a hung intlun leia kohran khata ei insung lut treuh le hma ei hung sawn duok duok hun kha a nih. Chu keikhawmna kut lawmum chu mani invuok darna dinga ei hung inlet hma kum sawm sung khan ei hnam chanpui lo inmuolvom tah tam tak khom ei inpuiah an hung inlawi lut tran nawk hman a nih. Chun, hi huna hin College lut phak chin an hung pung ruolin HSA khom nasa takin a hung tral thar a, hnam hûi khawmtu takah thrangin, inkhawmpui nikhuoah State hrang hranga inthoka hung hmel an inlang tran tah a nih. Hieng lai bok hin, iengtik khawtika hnamin a la nei ngai lo, Hranglien Songate buotsai Hmar History chu 1958 khan a bu ngeia sutin a hung suok a. Hi lekhabu hin hnama chiengna lungril nasa takin a hung kei har bakah mani hnam trobul le chanchin hriet chakna le sui nuomna a hung pung a, chu chun mani thu le hlaa inhnikna le chu chu huma sukhmasawn pei nuomna lungril a hung hring suok bok a. Chu thil chun te dang a hung hring pei a, chuong laia inchik tlak chu Imphala lekha inchukhaiin kum 1964-a Sikpui Kut an hung tharthaw, tu chena ropui lema ei la sunzom pei hi a nih. Hi khom hi kohran mitmei vengna leiin kum tam tak sung kha khawpuia chenghai chauin an sukhring ngat ngat a nih. December 9, 1972-a Imphala Sikpui Kut an lawm kha chawla Delhi-a inthoka ka suok lai a ni leiin kan nu leh Churachandpur-a inthokin kan zu thrang a. Kha trum khom khan dona rawl a tam leiin Inchuklai Nun-a insuo ding artikul SIKPUI RUOI LE SAKHUONA ti ka ziek pha nghe nghe.

Sakhuona thil la thiem lo, piengthar mitdel, hnam thil le sakhaw thil inpawna le inzomna man fu thiem lo, thil inkawkal le inaihala ngai tlat pawlin ei hnam rothil hlu phùm hmang tuma thrang nasa taka an khaw laia tharthaw dinga norpui kan thlak lai chun dodalna a nasa a, mi hmaisa le vauh kan tuok chang a tam hrim a nih. Sienkhom, khang laia ei inthimna sut chim dinga thrang la pawl kha hnam le khawtlang thruoitu le thiemna tieng khom a thri be pawl an ni leiin le hieng ang thil hre thiem phak kohran thruoitu Dr. Thanglung hai, Rochunga Pudaite hai le mi dang threnkhat an um phak tâk leiin a pawngpuiin kohranin a dodal ngam naw mei mei chauh a nih. Chu zara chun ei hnam ro inhmang song ding tam tak humin a um pha a nih.

Hmar Cultural Society-a mawphurna kan lak khan bulthrut lo tran tah hai sien khom hma a’n ko hle a. Hnam làm inchuktir ding chun thuomhnaw hmang ding hnam incheina bu kim nei a ngai a. Ieng ang thuomin am an inchei ding ti khom a hmu phakhai indon chieng a, a hrie an um ta naw amanih le hmu ding a um ta naw a ni chun a hrana a zierang le a khawng dan ding iengkim duong suok a ngai a. Làmnaa rimawi hmangruo an hmang hlak po po nei a, a tum dan inchuk ding chun a tum thiem mi zong a ngai a. Chun, làm tinin san a nei a, a trobul chanchin le an hla sak hlak hai khon khawm a ngai bok a. Hieng po po le a bebawm thil dang dang hai chu zieka inchik le sie pakhat khom a la um naw a. Chuonghai po po chu khon khawm a, Hmar trong le Saptronga zieka sie vong dingin hma kan lak a.

Thil hautak dang chu lâm pawl (artistes) nunghak tlangval hai kha khaw hrang hranga um an ni a, an nu le pahai phalna lak a, an umna hmun senga inthoka thruoia zan thrangah thak nawk vong a ngai a. Kan Secretary L. Rokung kha sumdawng tienga pa hmuingil le neinung pawl tak, hnam ta dinga tiktlai le inphal, ieng lai khoma inthok suok pei zing a ni a. Willis Jeep thar a’n chawk a, cultural làm le thilthawna tinrengah kan hmang nasat èm leiin ‘Cultural Jeep’ tiin a hming kan phuok hiel a. Kan sengso po po deuthaw kha ama tuok a ni bakah ama’n Jeep a khal a, lâm pawl po po kha kan pahniin khon khawmin kan thak nawk vong hlak. Hienga kan hmang le sor inrim, hnam làm tuoithartuhai hi an nih kum 1969 Republic Day lawmnaa Delhi tlanga Manipur ai awa thranghai khah. Hi hi Manipura inthoka Delhi tlanga Republic Day hmanga Hmar cultural dance fe hmasa tak le, ka hriet suol a ni naw chun, fe nuhnung tak an la ni hri.

Kum 1967 November khan sorkar sin, Indian Revenue Service (Customs & Excise) zom dingin Manipur ka suoksana chu hmun danga ka um hnung khomin Chairman dang an thlang nuom naw leiin kum 15 zet khuolrala inthokin ka la chel zom a. Ka suok hmain Hmar cultural dance chanchin le a làm dan chi kim ziekin Hmar trong le Saptrongin ka maksan a. Chu chu cultural dance an thaw ding zata an rawn le an kawpi sawng hlak a ni leiin an haw inlawnnaah a tawpah an sukhmang a, kum 1981-a chawla Saudi Arabiaa inthoka ka suok chun hmu ding a um ta nawh. Hi trum hin sin kan thaw nasat laia pipu thu le hla ka khon khawm le thil dang dang a bua ka siem, Hmar Hla Suina chu Sielmat High School hall-ah kan tlangzar a, a tlangzartu khom HCS-a Vice Chairman-a kan hmang ngar ngar hlak, chuong laia Agriculture Minister Pu Ngurdinglien Sanate a nih. Hi trum hin nuomin nuom naw hai sien, inthlang ka rotpui a, HCS Chairman ka nina chu kum 17 hnungah a tawp tah trawk a nih.

Cultural Mapping

Kha hmaa hnam làm le a bebawm chanchin, zieka kan lo sie, sienkhom kum sawmthum chuong liem taa inhmang tah kha huop lien lem le fumfe lema buotsai nawk vat hi thaw makmaw ei hmaa inkhang chu a nih. Thil hi dap theia a um laia dap suok a, lekhabua hlu lût naw chun a bo vong pha chun law ngaina a um naw a; thrang la hung thar peihaiin hnam invoia tharthaw an nuom khomin thil thei a ni tâk naw leiin mi dang ta hawa hring chu an chana tlu um sun a hung ni a, hnam dangin an chìm nel a, histawri pheka inthokin kumkhuoin an bohmang hlak a nih. Chu lampui chu hraw ve dinga ei inphal si naw chun damna lampui ei hraw a ngai. Saiâr (ostrich) anga phaiphinah lu rol a, ngai sukngam fawm a, “Tritna ka hmu nawh” ti hnam tu khom dam khawsuok an um ngai nawh. A ru no no suokna khawvela hin hnam sandamna hi mani kut ngeia thaw suok a ngai. Chuonga thrang latuhai chauh chu a nih Pathien khoma thrangpui tlaka a ngai. Sap thuvar khomin “God helps those who help themselves” a ti khah.

Hnam làm le a bebawm khon khawm le zieka a bua sie hi a fûn khawm rawn lema ngaiin a hmingah ‘cultural mapping’ tiin ka’n buk a nih. Hi sin hi kha hma neka lien lem le huop zau lema thaw thrang a tih. Tuta Hmar hnathlak ei ti tam tak hi pahnam hminga a hrana India Danpui hnuoia hnam hrana inziek lût le mani sa himna dinga hnam dang anga insâl iemani zat an um ta a, chu chu hriet thiempui ding a nih. Hi pawl hi Zo hnathlakhai lai khom kau khat suok le trong khat hmang pawl, a hrang hranga peng darh tah an ni leiin le thlang tla hmasa, Bengalihaiin ‘Kuki’ tia an lo ko leia hi hming hi put hmasa tak an ni leiin, kum 1900 laia mi optu British Kumpinu sorkar hnuoia an ram op sunga trong hrang hrang hmanghai suina le inchikna Linguistic Survey of India an thaw chun “Old Kuki” hnuoiah an khum khawm vong a nih. Chuonghai chu Aimuol, Anal, Biete, Chawthe (Chote), Chawrai, Chiru, Darlong, Hmar, Halam, Hrangkhol, Kaipeng, Koireng, Kom, Lamgang (Lamkang), Muolsom, Purum, Ranglong (Langrong), Sakachep le a dang dang an nih. Hienghai hi a tlangpuiin Ruonglevaisuo pal tlang pawl an nih.

Ei khawsakna le ei kawl le kienga khawsa, ei indawrpui dungzuiin damten hnam dang nun dan le khawsak dan a sie a thra ei lak lut a, chu chun ei kalcharah zie a hung rol a, ei hnam làm le thu le hlaah a hung inlàr suok hlak a. Chuleiin, thaw makmaw chu hmun hrang hranga chêng dar tah hai chanchin le an làm dan chi hrang hrang khon khawm a nih. Chuonghai laia a thra ei tihai chu lak lut a, ei hnam làm thi dul el hih hringna thara inthuoma thothang thra taka siem phuisui pei ding a nih. Chu sin chu North Tripuraa inthokin tran hmasa tak inla, chu zoah Cachar le North Cachar Hills-ah lut inla, Meghalaya rama Biete Biel chen hrut inla. Hi zoa hin Manipur phaiah chuong tung inla. Chu chu thaw zo pha leh Ruonglevaisuo hmuna ngei Unau Suopui Cultural Meet huoihot inla. Hienga ei thaw chun ei hnam làm le ei kalchar inhmang el ding tam tak hum phana le sukhmasawnna a ni bakah lien lema insung khawmna lampui ei hong ni bok a tih. Pawlitiks ei ti vet laimu le hnama dam khawsuokna chabi chuh ei thil hril sunga hin a’n phùm a nih. Lien lema Zo hnathlakhai ei insung khawm ding chun mani insung senga inthoka tran hmasak phot a ngai. Chuong naw chun mi ngaisak le ngaiven khop rawl insuo thei a ni nawh.

Prawzek

A hmaa ka hril tah ang khan, hi sin hi ka lo thaw tah sa a ni leiin, Pathien zara ka la chakvak sung hin a mi zui pei an um phot chun a’n rang thei anga bawzui dingin ka’n pei a. North Tripura le Cachar le NC Hills hi 2009-a survey ka thaw tah sa a ni leiin olsam taka zo vak thei a ni ka ring. Mi thrangpuitu ding mi pathum- camera man, video shooter, interview recorder- ka mamaw a, chuonghai chu tlawmngaia thaw dinga inpei sa zing khom pasalthra mi ka nei. Fe le hung le khorsaw danga hmang ding sum ei mamaw ding a ni a, chu khom chu thil thra thawna dinga kut kei tîm ngai lo, mi tlawmngai iemani zat inthuruola thaw el thei a ni ka ring bok. Hi prawzek hi hnam ro humhimna le hnam inpumkhat zuolna ding lampui sat hongna ding a ni leiin hnam invoi mi tu khomin ei ngai poimaw seng ka ring tlat. Hi hi ei hlen suok pha chuh hnam histawri indik lem le huop zau lem nei pha bok ei tih. Sum hmanga hnam damna lampui ei la sat thei sung chun ei la vangnei hle ti hriet chieng a thra. Thil inhnûk hnung chun sum ieng zat seng inla khom tharthaw thei a ni ta nawh. A’n hnûk siet hma hin thawng ei tiu. Hnam damna sin a nih. (February 16, 2011 Delhi)