"Missionary Sulhnung: Lekhabu Thlirna" Dawnletna

By Pu Ramthienghlim Varte, Senior Anthropologist

Tarik ni 13-15, December 2010-a Tipaimukh Dam chungchangah Prof. Lal Dena inrawina hnuoia Seminar Rengkai, Churachandpur-a an nei khan ka thangvea. Tarik ni 14, December zantieng Pu L.Keivom leh kan inhmu a. Ka lekhabu siem ‘Rev.THATTINLIEN SUNGTE: Lal Sipai Tha le Ringum’ copy khat a laka, Delhi ka thlung pha hung review ka tih tiin kan inthe a. Thlakhat vel hnungin ‘Missionary Sulhnung: Lekhabu Thlirna’ tiin a hung ziek ta ngeia. Hmasawnna Thar a hnungtieng phek a zawnin February 1-3, 2011 sung a hluobita. Thumal 3,202 a sei a nih. Delhi Thurawn le insuo theina dang dangah a thawn dar bawka, thlirlet thei khawpa alo tiem nuom leiin hi lekhabu buotsai hi a hlawtlingna ropuitak niin ka hrieta, ka lawm ngawt el.

Pu L.Keivom hi lekhaziek mi, a sinthawna le inzawma India ram ai-aw a khawvel hmun hrang hranga umve hlak ani leiin mi hrilna tieng tieng pakai a, zer far raka titi thuoitua thang thei; Pulpit sermon khawm (rau thang am thanglo) darkar hnihai chuh awlsam taka boruok vaikuolna ding hrie a nih. Ngaisang a umin hiengang hmar nau ei um hi ei vang nei em em. Ka tupa ami ti ang ngeiin ka nu hai U-reng, paruol sari laia naupangtak, vangduoithlak takin thlathum vel chau khawvel var a hmu hman chiein a pa’n muol a liemsan ana, Nu chawilien Pherzawl, Churachandpur District, Manipur khuoa seilien ani leiin ‘Zuopa tawnglo’ tia hla mawi le lungsietum taka inzawt suok thei, ka pu tak tak a ni renga. Ka ngaina em em a nih. A sawrkar sinthawna a inthawk pensionin tuhin Delhi ah pension nun chenin a um.

BOOK REVIEW CHUNGCHANG:
Book review (Lekhabu thlirna) chungchangah North East Indian Council for Social Science Research (NEICSSR), Shillong a hin Executive memberin an misie ve hlaka. Journal of NEICSSR neiin tuchen hin tluongtakin a fe zing. Hi Journal a phek tawptieng Book Review zepsa ani hlak. Book review reng reng a ziektu nak kalzawng le do zawngin an ziek ka hmuve ngainaw a, an tukver thlirna a lovin angnaw deu a um ruok chun inza le mawi takin ‘page, annawleh chapter chuongzatna a thil ziek hi hienghin nilem sien atha lem el dim’ tiin thiem takin thurawn angin an suklanga, last para. ah, ‘I must congratulate the author for this book which will be an assets for the student….’ ti damin an suktawp tei hlak.

Thiltha lem ding ngaituoa thahnemngaina suklang tum anni leiin sei detduot khawmin an thaw ngai nawh. Hi chau nilovin, International Journal hieng- Human heredity, Human Biology, American Journal of Physical Anthropology le dang dang office-in kan subscribe hai khawm hiengang hin an hung thaw hlak. Chuongangin, mithiem le pathling lekhabu siem thei chinhai chun an thawa, Inza khawm an um. An tiem rawna, khawvel chanchin an suia, an hriet rawn poleh, an hriet tlawmzie an hrietsuok hlak leiin an inngaitlawma, an uong ngai nawa, an chapo ngai bawk nawh. An hrietnavar inthuktak kha mi khengna le sirdena a hmanglovin, an tlazar hnuoiah mi tam takin damna an hmu lem hlak. Chu nih, Lal Solomonin ‘Ingnaitlawmna hma a ropuina le inza kaina a um’ a ti hlak chuh. Fimkhur takin thu an hrila, an tawnga, an ziek hlak leiin an thu saksuok le ziekhai ngaithlak le tiem an hawiin tiemtuhai hrietna suk zautu, suk hmasawntu le suk bengvartu a ni hlak.

BOOK REVIEW DANGDAI :
Vangduoithlak takin ei mi ropui, mithiem le ziek thiem Pu L.Keivom hin thiemnaa ruolbanlo, hrietna tlawm le thangpui ngaihai sansuok tum nekin a letling zawngin a talent a hervira, lamving versuol ang ela mi khakna le khengna dinga vilik lem changhi a nei hlaka, a pawi thei hle. Lekhabu a thlirna, hieng ‘KOHRAN HRING’, Rev. Lalthankhum Sinate ziek hnuoisie taka ‘ How not to write a book’ ti inruolsiekna um sien chuh lawmman pakhatna a lak ka ring tia a hung thlir pek dam, GOSPEL THROUGH DARKNESS (History and Missionary works of NEIG Mission) Rev. Lalhmuoklien lekhaziek, Rev.Jonathan Pudaite lekhaziek le dang danghai kalo tiemve zeu zeuva. A ziektu hai tangkaipui ding le hrietnaa an dangcharna le phingtam hnemna ding ka hmu ngai der nawh. Chuong nekin rau bova a thiemna le varna suonga, a lepsen HA a lik khumna book review dangdai ani lem vawnga, ei sakhuo thiempuhai khenghi a ching em em. An thatna ziek ding a hrietnaw chun review lovin to tawk tawk sien, min an ngaisang lem hlak ding vei leh, kati hlak.

Amiruokchuh, a dawmdan ei thiem tlang amani, annawleh, ti tlawn, ei tosan liem peia, Hmar nau lai hin a hril le ziek taphawt andik vawng angin a ngai pei nisien a hawia. A tukver thlirna a inthawk Hmarhai hi literature a eiin sang tawknaw khawm ni mei a tih, HLS hotuhai leh hlak Ui le Kel ang, kuongkhata umkhawmpui theilovin a sawisela, a dova. Ieng organization, annawleh Kohran pawl khawm ni rawseh, mimal chenin a nuom nuom a dova, a sawisela, a hervira, a nuom hun hunah ei hawrawp ami chawkchawrawi peka. Mihirem damsung kum dinga Lal Davidin alo hril kum sawmsari khel tienga pension nun a hmangdan hi a dangdaiin a hadamnaw thlak hlein ka hriet. Hnungzuitu battalion tel nei sienla lem chuh hnam tadinga ei thangmawbawk ni ngei atih.

REV. T.SUNGTE LEKHABU TLANGPUI:
February 16, 2010-in Rev. Sungte chun muol a milo liemsan taa, February 1, 2010 kha Bhutan rama a rawngbawlna kum 50, Golden Jubilee ani ta a, ama khawmin a taksa ngeiin a sir hman chie chie. Chubaka, ei ram Kristien hunglut kumza, Centenary Kum ani bawk leiin chuonghai hrietzingna dinga hi lekhabu hi buotsai a nih.

Thuhma a khan a chanchin ziek nasan, Lalpa’n a thuoidan le Lal Krista tadinga a rimsikna le harsatna tam tak a tuorhai, ramthima rawngbawl nuom Kohran le mimalhai tadinga chona dam, huoisenna dam, thangpuitu dam ani beiseina leiin hun indainaw em em kara theitawp suoa, zan tam khawvar khawm pawisa lova buotsai ani thu dam. Kum 2010 sungngeia insuo ngei a tulna san le buoipui nasanhai khawm kimchang takin ziek ana.

Chubakah, hi lekhabu hi Kohran pawl bik le mimal suk langsar tumna leia buoipui annaw zie le Bhutan ramthim Setan a buzawl ner dinga Missionary-a an pekna a hin tu Kohran khawmin an thangpui nawh. IBPM Executive Director Pu, Rochunga Pudaite’n thurawn a pek angin Tuithaphaia Kohran tum tumhai lai rawngbawlna neiin, Pathien rama rawngbawl nuomtuhai kuomah Bhutan rama Missionary-a a fena ding Pathien hmingin kut a dawa, ramtinah an vakvela, a bel tak chuh Pathien le IBPM a nih, ti chiengtaka ziek ani bawk. Chuleiin, thenkhat thlirna ah mark lo hmu thanaw sienkhawm, vawihni vawithum tiem suoka Lalpa malsawmna dawngtu anlo umve a nih ti ei hriet ka nuom nghal bawk.

A Lekhabu hi Bunghnia the ana, a sunga thu um hai chuh:

(i) Thu hma

(ii) Thucha

(iii) Bhutan ram chanchin.

Bungkhatna, Chapter 21-a the, hiengang hin:-

1. Sungkuo le ama chanchin.

2. Pieng le Murna.

3. Kona rawl a hriet.

4. Lohma annei.

5. Kawppui a zawng.

6. Ramthim rawngbawl dinga kona.

7. Setan thlemna. 8.

Manipur a suoksan.

9. Bhutan ram a lut.

10. Bhutan Lalin a pan.

11. India ram a hung kir.

12. Bhutan inzin vawihnina.

13. Bhutan ram mihai nungphung.

14. Bhutan rama um hmun a khuor.

15.Nau hmingphuok.

16.Nuhmei a nei.

17. Jail tang.

18. Jail tang suokna dar.

19. Sukdam rawngbawlna.

20. Pastor conference.

21. Lungdit inthena.

Bunghnina ruok chuh chapter pakhata the ani vet thunga, Rev.Thattinlien Sungte hlahai ti a nih.Hi taka hin a hlaphuok Pathien hla Tonic solfa bukima siemin 56 inchuon ana, khawvel hla a phuok Chunnu India, Republic day hla, Nemrang puon, Pi Burtui L.Keivomin a hung zieklang (Pathien hla a phuok 56 neka a ngai ropui lem) le a hlaphuok hmasatak Laira rieng hai chuh hi taka hin a thangnaw reng a nih. A san thuhma a ka ziek. Chun, a tawptieng ama thlalak le a dang dang zepsa ani bawk.

LEPSENNA DANGDAI :
A kim lovin thu ei hrila, ei zieka. Ei phaktawk angpeiin, Pengpelep nupa insaia anga chunghnung lem inchuna khawvela cheng ei nih. Chuongangin, Rev.THATTINLIEN SUNGTE: Lal Sipai Tha le Ringum’ ti lekhabu khawm hi a baksamna chuh tiemtu haiin a changtupa le ziektu zalen taka nuom ang anga ansang le an hnuoi inkhina funghrawla innghat a nih. Chuh thilmak niin ka hriet nawa; amiruokchuh, hi zalenna hin ramri a nei ti chuh hriet tha mei a tih.

Pa pakhatin ‘Ka upa deu deuva mi sawisel ka hrat deu deuva’, kan veng haiin Pawltindo annawleh, Mitindo ti’n ka dit lem lem thlang dingin ka hming an mi phuok peka, ati ang devin; Putar chier-in-hruoi thaw niawm taka, ‘Rev.THATTINLIEN SUNGTE : Lal Sipai Tha le Ringum’ ti lekhabu chungchangah Pu L.Keivomin a lepsen kam che thlakna ‘Missionary Sulhnung: Lekhabu Thlirna’ ti thupuia hmanga a hung ziek hi review nilovin ‘Rev. Thattinlien Sungte Bhutan ramthima kum sawmthum panga neka tam a rawngbawlna hriet ang anga ziek le buotsai hi ienga khawm ngailova, a sawiselna thu vawng ani lem ti tiemtu hai chun hreseng eita.

Chuleiin, Pathien mihai sawisel le do hi ati umzie hrezinga, a sungrila suol, ama ngeiin a zieklang vet hlak, annawleh ama ngeiin a hril rawp hlak Belzabubin a hung inthawtir ama niding aw ti khawpin a tawng invai rawn hlea. Bhutan rama a rawngbawlna, abul tan dan, ringtu a siemdan le bulthut a siemdan chapter 12, 14, le 15na a khan tlawmte te suklangin a um a. Missionin an chawmhnunga hma a lak peidan chuh zieklang annaw reng a nih. Thiemna le hmathlir thatak neilova Sartuinek tlangvalin Krista hminga thi huoma Ui mawl ram suk ang tak taka Bhutan ramthim a lut chilna a hin chuh, mihriem mihriemna, khawtlang zie le ei chengna ram nunphung enin Tirko Paula hai le hmet kawp chi chuh ni khernaw nih.

Iengkhawm nisien, lekhabu thlirtu’n a chanchin hi alo hriet tam raknaw ani khawmin Shillonga a ruong vuiliem nia an khawmna Kohran le a hnam chanpui hai chuh hrillo, tawngdang hmang tam takel a ruong chunga an thlana thucha hriltuhai a inthawk le hmun dang danga sunna thu le sunna message lo hmu le hriethai ringawt khawm khan rawng a i bawlpek Lalpa chun a chawimawi a, ‘Pathien mi thienghlim an nawh’ tia hmusit chi chuh annaw kha tie. Hieng thu hi a lekhabua hin hriet ang ang zieklang vawng a nih. Rawngbawl dinga kona rawl a hriet ang sukpuitling dinga an rimna hi a ropuia, tukhawma ei thluklo ani ti hrezinga, a tuklul insuoa a ditna lai lai theta, a thlirna tukvera inthawk ara beisei ang hmu naw leia a chunga roreltu ni awm taka mark nuom zat zat peka in fail tir ringawtel chi chu ani ka ring nawh. A ti angin a chanchin ziektu hi a tupa ka ni bawk leiin a nuom leh a dittawkin mi rit lem sien tha ding ana.

Chun, Rev. T.Sungte hin Bhutan simtieng India ramri bul Deothong khawpui besana Bhutan ram hmun hrang hranga kum sawmthum panga neka sawt rawngbawlna a nei a nih ti hrezinga, kum 2005 intiempui Deothonga mihriem umzat 2644 le Kristiena mi siem zat 3000 bawrvel ni dinga a ring compare and comparison ami hei thawpek el lem hi chuh awmnaw khawp ela. Custom department a Asstt. Collector sin thlaruk neka sawt hienglai hin a alo thawk leia hre lema an sie chun indik thei bawknaw nih. Thiemna le varna Pathienin ami pek hi Pathien mihai sawisel, annawleh dona dinga exercise na chi ani naw khawpel. Chubakah, an khawmna (Kohran) NEIGM Coleman pawl ani leia a theida zie ziekhi a chak dawp dawp hlein an langa.Chuh, hi lekhabu thiltum annaw zie vawiduoilo thuhmaa zieklang a nih.

Chun, Missionary hmasa tak thu le inzawma tiktlai ami tihi tiksiet nek chun lawmum katia; amiruokchuh, tiktlaina dangdai ti le inzawma HSA thuoitu kani hma daia Dr. Thanglung Father of Hmar Literature nina lallukhum anlo inkhumtir kha a remnaw sa sa’n thailangin a hung sawisel chiem reka, hienga tiktlai ami ti rau rau si hin chuh ama khawm The great father of Hmar Critic lukhum inkhum tir ve el inla iem a pawi ding aw!.

THUMAL LEPSEN :
A thil hung thlirna lai po povah awm kati pawl tak chuh thumal ziekdan chungchang hi a nih. Hmar tawngin lekha ramtin kalo ziekve zeu zeu taa, ei tawng intakzie hi ka ziek rawn po leh ka hriet zuola. Ka thil ziek a hnunga kabi nawk pha andik lem dinga inlang ka hmusuok rawp hlak. Hmar tawng indiktaka ziek thiem Hmar lai hin mi sawm khawm ei um phak ka ringnawa, chuonghai khawm chun style nei seng bawk ding ani leiin an hrietdan le ngaidan in ang vawng chuong naw nih. Saptawng ang tak taka Hmar tawng hi fe pui vawng thei ani bawk si nawh. Football la pet ngai derlo puotienga lo entu’n, a pet thiemhai thawsuolna a hmu thei em em angin, thu le hla a khawm mi thawthat hmu tum reng renglova mit suk kawkal tlata, a thluka buoipawl ei umnaw theinaw a nih. Hmar tawng Inchukbu einei tha tawknawa, English Medium a lekha inchuk suokhai tading lem chun thumal ziekkawp ding le dingnaw, ‘h’ belna ding le dingnaw etc. thiem an takin a harsa nawk zuol.

Chuleiin, hi lekhabu ka buotsai khawm hi ‘A thluka buoi lo ding’ tiin thuhmaa ngenna ka siem mawl mawl reng a nih. Hiengang hin “Hmar tawng ziek danah tawng inchukna lekhabu ei nei tha tawknaw leiin tawnglamkei le hieng punctuation, noun, verb, adverb, adjectivehai, thumal keikawp ding le dingnaw chung changah ngaidan le hriet dan an angnaw ferfur tawla. Hmar tawng thiemhai lekhaziek khawm ei bi veng veng chun an ang vawng chuong nawh. Hmar Baibul Edition/version pathum ei nei hai dam lem hi chuh a bung le chang tin deuthaw an ang tawlnaw amani ti thei a nih.

Chuong angin hi lekhabu khawm hi a sung thu le a pawimawna ngaituo mang lova Thumal lepsen ha zang vilikna tukvera tlir ding chun sawisel hlawlo lekhabu khawlai nau chuh ani ka ring bik der naw a; amiruokchu, a thlukah buoi lovin a lekhabu thiltum le ei buotsai nasan tak hi khukpui tum inla” tiin (Thuhma P-xi-xii). Chuleiin, Hmar tawng thiem, ziek thiem le tawnglamkei hre rawn pa chun thil dang dangah inper kalanga, mi thilthaw sawisel lovin Tr thanglo Hmar tawng inchukbu misiempek sien, inchaw sup sup eita, inchuk mur mur el naw mani. Hi a thawding awm tak khawm niin ka hriet.

PARAKRAF LEPSEN :
Chun, hi lekhabu thlirtu’n parakraf dangdai tia ramtin a hung lepsen hi chai buoi khawp niin an lang nawa. Chuneka a let tama dangdai lem nia ka hriet, mi po po hriet dinga ka dit chuh tulaia lekha a ziek taphawta parakraf khat bekah, Pathien Lekhabu inthieng Hmar Baibul, Bible Society le BFTW inlet hai dova, annawleh sawisela, Baibul Delhi version Edom rimtui leh buoinuoia inlet hrilmawina thu thanglova a zo thei dernaw hi a nive thung. A hmawr ei phawr laklaw…, la hei tuihni met ka tih. Tukhawmin Delhi version Baibul hi zieka an sawiselna kala hmu nawa, kei ruok chun tawngbauvin Pu (Prof). Lal Dena kuomah thahnem kangai pui leiin ramtin ka hril hlaka. Entirnan: Vervek–lemder, Grep hrui-Grep kungpui, titakzetin-thutak tak, Pathien biek-Chawibiek etc.etc. haihih andik chie dim aw tiin. Iengkhawm nisien, a tha taluo, Hmar tawng khawm a thiem, amiruokchuh, hi Baibul buoipuitu’n tha ti hle sienkhawm inngup muta pulpita phar ngam chi ani am, ani nawh tihi min an hriet a ringnaw mani. Thiemna le varna hmangsuol, mani kuong hre lova mi kuong nawr hi a pawi khawpel. Mi hlimsuol eiti hai nekin ti an um lem. Mivar le lekhathiema hril chu nilo, Pathien mi ropui, Pu Thanngurin-

‘Lalpa thlarau a naw hin chu, Varna, thiemna, insangna,
Thatna dan le felna dan lungrila hung par ding ngei chu;
Hluotu suolral lien an chang thei’.

Ti hla alo siem hi ava hei indik ngei de. Chuleiin, thiemna le varna hi a hmangsuol le thiemnaw hai tading chun muolphona, Vawkpui hnara Lunghlu inhlitir, a nuom leh chirhaka an buolpui a, a nuom leh a bufak ding nawr nan a hmang hai ang chau a nih. Pathien thlarauva piengtharna nei lo, thiemna le varna a vanram inhuot kai tum pawlhai hi hnam ta ding khawmin nghawk an um nuom khawpel.

Ei rama chanchintha hunglut kumza thlingna lawma anri thei le puok thei po po hmanga eiin phu mur mur lai, chu chanchintha rasuok Bhutan ram suk-engna dinga Hmar nau Krista tadinga pasaltha, a vanglai huna a chanchin Zoram khawvel run hlaktu, a hriselna’n tlum tieng a pana, re vang vang el tah kha; hiengang a chanchin le a rawngbawlna lekhabu buotsai dinga a hnung suizuitu ding dam ama (LK) thanglova eilo um chun inpaka, lawm em em lem ding a nih. Kohran tin deuthaw’n Centenary Souvenir tha tak tak el ei buotsaia; chuongangin hi lekhabu Gospel centenary hrietzingna dinga buotsai, thangtharhai Pathien rama rawngbawlna le hnam chanchin sui nuom hai tadinga lukhawng nei le lekhabu pawimaw chuh la hung nive ngei a tih ti ka ring tlat.

A thawtu ding um inla lem chuh, ama naw khawm thangthar haiin awlsam taka sulhnung an sui theina dingin ei mihlui milo boralsan tah Pathien mi, hieng - Rev. Thangngur, Dr. Thanglung, Rev. H.L.Sela, Pu (Upa) H.L.Daka, Rev. H.Daia, Rev. Chawnga Pudaite, Rev. K.T.Amos, Rev.Thangchuoilo, Rev.Lalkhawmawi, Rev. Lerthansung etc.etc. le mi dang hieng - Rev. Darsanglien Ruolngul, Rev. H.K.Khawlkung, Rev. Rochunga Pudaite, Rev. J.Khuma, Rev. Lalrosiem Songate, Rev. Fimchawnthang, Rev. Ruolneikhum Pakhuongte, Rev. Lalthankhum Sinate, Rev H.V.Sunga, Rev. Hrilrokhum Thiek, etc. etc. hai chanchin chipchier deuva suina lekhabu nei thei vawng inla ei nuom a nih.

(February 16,2011 Rev T.Sungte a thi champha vawikhatna hunser buoitsai ani zana hi lekha hi ziek a nih).