By L.Keivom*
Tu kum March khan Rev. Lalthankhum Sinate lekhabu buotsai, phek 500-a sa, KOHRAN HRING ti a suok a. A phek hmasa taka chun, “A complete history of the development of Mission fields in Manipur South and Northeast India since 1910-2000” tiin an ziek.
A bu sung ei hang phêt ruok chun ‘complete history’ ta nekin, kohran chanchin saisa taka bong rem ruma a nuomna naa a thun khawm, a lu le mong khom hriet harsa khopa a rem pol a nih. Hieng anga lekhabu buoi le inchin hi ka la hmu ngai nawh. ‘How not to write a book’ ti kompetison um sien, hi lekhabu hin lawman pakhatna a dong chieng ngot ka ring. Church history mumal tak nei ei mamaw zing laiin hieng ang Church History hi chu ei mamaw naw khop el. Chun, history ziek hmain history hi iem a na? ti hriet hmasak phot thra ngotin ka ring. Pûm titi le hmeithai thukhawchang ni awm tak tak fom khawm nia inlang, history anga ziek hi a him nawh. Thri be chin lem chun an fak naw khop el.KOHRAN HRING tiemtu chun hi Kohran, dollar, thu khêl le tak inpola chawm lien amanih ti el ding hi a hrivoi a se êm leiin, a bu hming hin a put dik am ti hi indon ngei an tih. A buotsaitu ngei khomin chu hrivoi chu na takin a pai ti a thu khûkpuia inthokin ngairuot thei a nih. Walter Bahegot-in, “Nothing is more unpleasant than a virtuous person with a mean mind” a ti dam kha ei hriet suok rum rum el.
Hi hi KOHRAN HRING ka riviuna a ni nawh; riviu ngam chi khoma ka hriet nawh. Hieng ang hi history ziek dan kalhmang a ni nawzie Delhi tlanga tiemtuhaiin an hriet ka nuom leia ka ziek a nih. Phuok chop history lem chu a tlo naw zuol. Hi lekhabua Introduction dam hin a lekhabu hlutna sukpung nekin a sukporche lem dai niin ka ngai. Poi ka ti tak chu, hi lekhabu buotsaitu hin chanchin poimaw tak tak, lekhabua mawi taka rem khawm thei a konkhawm a, sienkhom ‘sense of purpose, of direction, of history, of balance & proportion’ a’n hmang leiin tuta ang hin a suok niin an lang. Ziek dan thra lem le phuisui lem thurawn petuhai khan iem an inba fuk top am a ni ding maw!
Lekhabu buotsai hi artikul ziek ang mei mei a ni naw a, thil hautak deu a nih. A bikin history ziek hi a’n tak zuol. Court ruling anga thu tlukna siem el thei nawna chin a um a. Aidia (idea) amanih thilthaw (action) in a nghong le kakhawk sawng peihai chu a ziektu historian-in a hmangruo neia inthoka a sui le a hmu dan anga a ziek a na. Thutaka hun pakhata pom khom a hnunga thil hung tlungin thutak lovah an changtir thei. Entirnan, Sorkar Court-a inheknaa chu Watkin Roberts nekin H.H.Coleman-in hnena a chang vong a. Hun a hung fe pei ruok chun Court hmaa Coleman thiemchangna an uongpui em em nekin Watkin Roberts tlawmna khan hnèna a chang lem hlauh a nih. Hieng ang lessons of history hi historian chun tran bik nei lovin a sui chieng a ngai. Thil tle nazong hi rangkachak a ni naw ang bokin hrat nazong hi hnena a ni nawh ti khom historian chun a hriet chieng a ngai. A tawpa chu, thutak a tlo tak.
*The author is a former Indian diplomat and author of Zoram Khawvel series.
Salah, vel khat KOHRAN HRING la tiem tha nawk ka ta, Pu L.Keivom thu ziek an dik le an diknaw enfie na ding hrim hrim. An dik na kawng tam tak a um ka ring hienga huoi taka a phorlang ngam el hih.
ReplyDeletean dik dan taka ding chun; kohran le inzawm a chanchin sui ding hai hi chu, lekha inchuk a research thaw han sui hai sien a tha lem ka ring ngawt el.Kohran sunga mi han an thaw pha pha eiin thena hrivawi kha a kawpsa hlak leiin awna bik an nei tei hlak a ; chuchun ei buoina a bula an tan nawk hlak.Ei thaw ding tak ni a ka hriet chu hihi buoina biel inkuol nghettak a inthawka suok dan ngaituo anih...chuong thil hlak chu Kohran a inthawk in an tan awm si naw a. Bak chu ei la hau khawpel....
ReplyDelete