Kan Zinna- II

By Pu Ramthienghlim Varte, Senior Anthropologist

Nupui lo fe inlawi thahnemngaiin lamsak lamthlang ngha vela naupang lawm ding a hmu hmu a vai hmat ang elin tuta tuma ka vengsuok chuh kawp-kai ka hau em ema. Vangneithlak takin Hmar pumhuopa Gospel Centenary Saikawta hmanga khawm ka thangve thei a, lawmum ka ti hle. Hmar lai hin hnam pumhuopa thilthawna ah a thangrawn pawl nive dingin kan ringa. Kha centenary programme kha hril inzen ding a tamin a dangdai hlein ka hrieta. Chuongchuh hrilve ka nuom hieng ang hin.

Hall bawl zo hma deu khan ruopui vangawnin ami hei nuoi phawta, Saikawt haiin Community Hall anlo nei tha hrama, muolpho lovin programme chuh 9^th December 2010 zana inthawk khan ei hei hmang tawk tawka a zing Tarik Ni 10^th December 2010 sun le zan khawm chuong tho. Saikawt khuo In 672 bawrvel huntawk dinga community hall Sawrkarin a bawl pek, a zatve khawm mipui ei bit zonaw el kha mak kati khawpela. Vangneithlak takin 11^th December 2010 zing kawl a hung eng a, khuo inthieng vukin. Zing inkhawm programme chuh Community Hall a bawk neiin Gospel Centenary Souvenir tlangzarna Rev . Lalthankhum Sinate’n a nei a. hi Souvenir paper thlirletna Pu P.C.Lawmkungin a hung thaw ta leiin hun tawkel sien.

Kha ni khan Seminar neiin buk thumin inthe a nia, kei chuh HMAR KOHRAN INPUMKHATNA ( Federal Unity) a khan ka thangvea. Rev(Dr). J.L.Songate’n paper a present nghe nghe. Modurator chuh Rev. Lalrosiem Songate a nih. Federal unity ti chuh Hmar Kohran pawl hrang hranghai mani kohran chita um zinga renga inzawmkhawmna siem kha niin an langa. Chuongang Forum chuh tuta ei nei Zing HCLF kuhi ani elin ka hriettlat leiin ka buoi khawpela. Mi mit kham ding veng derlovin vawi iemani zat ka ngir nghe nghe. Panelist hai lai khan Pu H.Zaneisang tu pawl khawm tan derlova hnam ngirhmun dinga thiltha a hriet a vawrsuok ngam niin Ka hrieta ’Hienga Kohran pawl hrang hrang ei um nasan hi Pathien thu lei nilovin Ledearship lei ana, thiek a, Pawl Kohran po po vuok chim vawng annaw chun …’ ti kha ngir puiin a lungrila an vawi tak tak a hril suokin ka hmu. A ropui ka ti hle. Amiruokchuh, kan thu chai le hril khi chun van boruoka ngaituona a Pucca building bawl khawm a thluk si nawh. Chuleiin, hi seminar a kan thu tawpna chuh Kohran inpumkhatna hi tha kan tia, a hming khawm thlak danglamin power and function hieng neka umzie nei dingin HCLF haiin hung bawzui hai sien, chuh Kohran pawl hrang hranghai rorelna khawlpuiin lo ngaituo ding ti a nih. Bei am sei Run dung.

Zan programme chuh Hall tieng insawn thei an ta a, a tulna leia hun indainaw sa sa a kalo buotsai lekhabu ‘ Rev THATTINLIEN SUNGTE : Lal Sipai Tha le Ringum’ tlangzarna Rev. Hrilrokhum Thiekin a nei a, hun tawite chauh pek ka ni leiin ramhuoi speedin tlan bahrik tak meuvin hun ka hei hmanga, thiem an tak kher el. Hi zan a thuhriltu chuh Rev. Hrilrokhum Thiek a nih. Ka lekhabu siem hi Chanchintha kumza (Centenary) hrietzingna dinga kan hlan, a man hmu ang Bhutan ramthim rawngbawlna ding ti ani bawk leiin a hlutna an hrietpuinaw mani ding aw kati hiela. Amiruokchuh, Live telecast ani leiin mi tamtakin anlo hmu a, beisei neka thahnem zawrsuok a ni a; Chubaka, Rev (Dr) Rochunga Pudaite’n Copy 100 ami lak pek bawka, Lawm a um takzet.

A zing Tarik Ni 12, 2010 (Pathienni) khan chuh Kohran pawl hrang hranghai Biekin khara hi centenary lawma thang seng dinga ngenna siem ani leiin Hall bit hmur theiin a um taa. Hotunu Lalremsiem Exe.Director, NEFRES minute 13 thuhril tawi pek a ni a, tawng inchat derlovin a hun pek let khat neka sei a hmanga, Orissa a rawngbawlna report ang deuvin a neia; chuzova thuhriltu Rev. H.Chungthang Secretary EFI a nih. Ama khawm minute 30 hun pek a ni vea chuh a hun pek let thum neka sawt a hmangve a nih. Keikhawm khang khan lo thaw ve lang tha ding. Inkhawm tinin Seminar buk thuma neihai thu thlukna kha Saikawt EFCI biekin ah hriltlangi a ni a, Dr (Upa). Lalsiemlien Pulamte’n paper a present bawk. Hi tuma hril rawntak chuh vai rama rawngbawlna suklien ding ti a nih.Delhi tienga thalai hunghai le Hmarram Lelte an thaw tha, hi Centenary suk buriptu an nih. Hall le physical arrangement a mawphurtuhai an sawlin inpak an um bek bekin.

A tumtiek zantieng hin Hotupa Joseph Lalrothang ZEO, Churachandpur District-in Kel thatin lekhabu release lawmpuina tiin bufak tlang a rawta, Delhi a inthawk Pu L.Keivom le Prof. Lal Dena Imphal inthawk Tuipaimukh Dam chungchanga Seminar Programme nei dinga an hungsuok leh kan intuok khawm vawnga. Hmar Gospel Centenary programme Saikawta zan programme a thangve dingin kan fe a, Hall lut tawm tepin ngai pawimaw deuvin Pu L.Keivom kuomah ‘Chibai Bukna thucha (Greeting) hril dingin an ko thut thei che a nih inring deu raw aw’ ka tia, chun Hall a kan lut ta a. Hi zana Greeting petu chuh Pu Lal Hossan E.M. ADC, Churachandpur District a nia, Thuhriltu Rev (Dr). H.M.Songate Director, NEICORD ani ve thung. Hi centenary lawmna programme ka thangna pova Chibai bukna thucha hriltu hai chuh : Dr.Lallukhum Fimate, Dr.Chalton Lien Amaw, Pu Ngursanglur Sanate, Rev. John Pudaite, Pu Lal Hossan hai an nih.

Hi zan inkhawm ah Prof. Lal Dena le Pu L.Keivom hai dam an inkhawm vea, hnam tadinga an pawimawna le ptotocol am colnaw, a ieng tukver a tlir khawmin mipui laia inngir tira chawimawi puon hei insiltir ve kha chuh an phu hlein ka hriet a. A thawlawm pe rawn rawn kha a changpar anni mani ta khawm ka hriet nawh. Chun, ei Kristienna kumza tling hnam pumhuopa lawm nisiin hi hun sunga taksa rama ei milien le ropuihai eiin huop tir zonaw ani khawmin Pathien ram suklienna dinga rawngbawltu pawimaw zuol, tu thik phaklo dinga record nei bikhai, hieng – Rev.Thangngur, Rev. Hrilrokhum Thiek, Dr(Rev). Rochunga Pudaite, Dr. Thanglung, Rev. Thattinlien Sungte etc. hai ang bek chuh chawimawina thilpek siem inla tha hle dingin ka ring. A sanchuh, centenary ei lawm nawkna ding kum 2110 khi ani chau ta leiin vawisun a mihai pakhat khawmin ei hmang phak tanaw ding a ni thlat leiin hnam history a dinga inchik le zieklang dinga event thlingphak pawimaw em em; thangtarhai hriet thei dinga siethat ngei chi a nih. Chuleiin, Centenary lawm a pawimawna khah ei hretnaw/ngaituo naw mani ding aw kati hiel. Hnam history a pawimaw, a huou huou ringawta zo el chi chuh niin an lang nawh. Kum 2008 a Sielmat a Gospel Centenary Committee inkhawm tum khan ka thangve, Dr.Chalton lien Amaw’n a ngai pawimaw em leiin riruong ziek ngeiin hung siema a tiemsuok khan, kum za sunga hnam le Pathien tadinga sinthaw tha hai po po chawimawina thilpek siem ding le kawl-awkhai chen suokna dar vuok khawm a rawt ei ngai thlaka ei amen sengin ka hriet sia. Chuong tiengpang reng reng hril a um ta dernaw kha a san iem ani ding. Seminar thu tlukna hai bawzuia ra thatak ansuo thei chun lawm um hleng a ta, chuong aninaw lem chun kha Hmar Gospel Centenary Celerbration ei hmang kha ei tu le tehai kuoma hrilsawng thei dinga inchik ding le hrietzing thlak a lukhawng ieng tak kha mani ding chu aw tihi ka ngaituo a nih.

Tarik Ni 14, December 2010 khan Tipaimukh Dam chungchangah Prof. Lal Dena inrawina hnuoia Seminar, Rengkai a khan ka thanga, English le Hmar tawngin paper iemanizat present ania. Kha seminar kha NEC-in pawisa tamtak senga a hung buoipui ania, sawrkar chun chawl lova fetleng pui ngei a tumna leia ramtin a hung rawt a nih. Kha ni a Vai putar Salderji pension pakhat khawm ei ngamnaw ani kha tie. A paper kha en thatnaw lem chun insuo chi ninaw nih.Tipaimukh dam bawl dinghi Hmarhai tlankhur ding ang hiela hrila ditnaw tu haihin ieng dinga a hril hunlai khan hrilin ei buoipui naw mani ding aw. Ai-aw tu MLA ei neinaw khawm nilo.

Tarik Ni 16, December 2010 khan Rengkai Community Hall ah HYA kum 25^tha tlingna Silver Jubilee HYA Gen. Hqrs.huoihawtna hnuoia hmang ania, Silver Jubilee dar ka vuokve a, ka lawm khawpel. Khani khan ei MLA Pu Ngursanglur Sanate le MDC hai an kim thap a mawi khawpel. Souviner siem ania, a buoipuitu haiin hmawsarum tak meuva an buoipui ani thu Pu L.Ruoivel Pangamte Editorin thuhmaa a ziek le tlangzarna nei dinga a hril kha an dik hle’n ka hriet. Rengkai Lal Pu J.C.Chawngkhawlienin HYA Gen.Hqrs.ofis dingin Rengkai Community Hall hnungtieng room lien tawktak a pek leiin lawm a um khawpel,- May his great social service be honored.

December 17,1010