Trongbau thra in siel a man

Ziektu: Pu Lala Khobung. Aizawl.

 

Mi threnkhat chu hei in hmu chang in ieng le in zom mang lo hin “I va thau de” ti trong kam hih ka dong zeu zeu. Fiemthu hin “Ka thau hranpa noh ie, ka lut na kawr a china, ka normar lei a nih” ka ti nawleh na deu trol hin “ka thau le thau naw chuh I mi hril hranpa ngailovin nang nek in ka hriet dai” dam ka ti hlak. Trum khat chu veng tieng a ka hangsuok trum nupui pakhat tu ta hma a ka la hriet ngai khom ni lo hmeraw zor hih kan in ah a hung a “I va zuk thau em em de” a mi tih a, kei chun ka don lem noh. A thu hril chuh ka hriet naw a sawn lei in a mi hung hnai a, a nek a in ring lem in “i va thau de aw” a mi hung ti nawk a. Invet le mawl ka ti em lei in kei chun “ka thau le thau naw chuh I mihril ka ngai noh, nang nek in ka hriet lem dai an naw, ka va hei invet in ka va hei mawl em em de aw I tina a ni chuh” ka hei ti fok el a. Ama chun “iem a ti leh ?” a mi hung tih a. Chuphingleh kei chun thradeu hin ka hei hrilfie a, mi hai an bulah “ I THAU” ti ngailo ding a ni zie hai chuh ka hril fie a. Amanu hin chuh lungril thra tak put pum in ka lawm zawng hri la in ngai in “I va hang hrisel in I fak a va thra de” ti na ah ngai mei a tih. Sap le hnam changkang deu hai choplechila suk lungsen i nuom chun “I VA THAU DE” hei ti roh. An ni chun in hmusit na le in deusaw na ah ngai in “mi invet, ienga khom ka ngai naw che,I mawl in i nal naw taluo,i hrisel na khom ngaituo lo in i hmu le I du du in sumna le chintawk khom nei der lo in i fak tuom tuom el hlak a ni hi tie, i tha khom a bo, mi invet tak I ni hih” ti na ah ngai nghal an tih.

 

Mi kumzat, a bik in nunghak senior deu hai, in don hih an lawm naw tlangpui. Sap le ram chang kang a mi hai chun, trul na le ia mi kum an in don chang “How old are you” ti lo in “How young are you” an ti lem hlak. An ti an nawm, numei hai hi pasal an nei hma chun kum 18 nek in an upa nuom ngai noh. Nunghak seniour deh ta hih a kum an in dona, ama chun khel hril a nuom si noh. “Kum 17 le thla iemani zat” ti in a dona. “Thla ieng zat am ie” an hang ti chun “Thla 36” a tih.

 

A mi threnkhat hai hin NUPUI ti ai ah TARNU ti an hmang hlak. Tar ti tak lem hi chuh Sap hai khun an lawm naw vieu. Haflonga ka zun zin trum in papui pakhat in “Ukil maw I nih” a mi tih a, kei chun “Aw” ka ti a, a ma chun “chu dawha I va hau awm de?”a mi tih...Hotupa Dr.Rochunga Pudaite student a ni lai Leiri khuoa a hang in zin trum in Papui pakhat in “en ta ro, ei Pudaitepa hih a bawkah dawha a um a lo ti khah ka hriet suok. NC.Hills, a bik in Leiri khuo hai in DAWHA an ti hih a thra tieng a VAR an ti na a nih. Amiruokchuh Manipur le hmundang tieng hai chun mivervek,miteplo,vai hai in phakar/chalak an ti na ah an ngai.

 

Trongbau chau lova khom hriet ding a thra chu,mi leh ei lo in biek lak law lai ieng thu am ei lo ti ti ti khom ngaituo lo in an mi hung zom ve chot a, ei lo in biek pui hai mit mei khom veng der lo in “thaw roh in chibai ei tih” an ti le an mi hung ban an ruol a, in chibai le in ruol in ei lo in biekpui hai khah ngaisak derlo in an hril nuom hai chuh hril in an mi hei biek zui el ta hlak a. Ei lo in biek pui hai ta ding khan chuh a hril hai thlak khop el. Hnam changkang hai chun, mi an lo in biek lai a tu lem lem khom an biek nuom chun va paw el lo in an la nghak a, an in hmaw deu an chun hawihawm le inphalam tak in “mi hre thiem un la, lunginsiettak in la hei chok buoi vak thei ka cheu ?” an ti hmasa phot hlak. Rem an ti chun ei biek nuom pa khah ei biek chau hlak. Chun in le pindan a lut tawm a kotkhar kik lo le mi khum pindan a lut mei mei hi chuh a ching ei um ta naw vieu in ka hriet.

 

Thil in zakum le mawi naw em em chu, inkhawm trin tawm a Lalpa trongtraina or benediction hril lai “A nuhnung hnung phung in se” ti ni awm fahran a Biekin/Hall a inthok a suok hum hum mi tamtak in an ching hih a nih. Minute khat vel chau la hei nghak hram hram chuh thil in tak le harsa khom an noh. Lo theilo le emergency thil a chuh thu dang. Naupang ni lai a hotu in trin taro a ti le inruol a inhmaw em em a tlan malam a “kei ka suok hmasatak” ti lai hun le khan an dang lam na a um noh. Hi thil mawinaw tak hi chuh ching tanaw hram ei tiu khai.