Car le a pu titi

By L.Keivom, Inpui Columnist

 

A hmun: Garage No. C-408, Purvasha, Mayur Vihar-1, Delhi-91. A hun: March 28, 2004, Pathienni tuk zing dar 6 minit 12. A changtu: Maruti-800, Car No. DL 2 CK 2048 le a pu inbiekna thu chu:

 

Khawfingchat ruolin ka tho a. Thingpui inlum zoa no ka dom ruolin ka e-mail hong dingin ka kompiutor ka sukhring a, hmun hrang hranga inthoka thu hung sawmthum chuong a lo um a. Inrang taka ka tiem zo hnungin thil tolna bawmah Hmar tronga Baibul inlet thar, Thuthlung Ram, Sam le Thuvar inkop, Delhi Version mawi tak el chu ka rem sip a. Sawng linaa um kan ni leiin in hnuoia ka car siena garage tieng chun lift-ah ka tol thlak a, ka car hnung tieng chun fimkhur takin ka rem a. Chuong ang zat bok chu ka hang tol thlak nawk a, car hnung tieng chun ka rem sip hmar a.

 

Hi Delhi Version hi chawhnung dar thuma Apostles’ Methodist Church, Sector IV, R. K. Puram, New Delhi-a Hmar Christian Fellowship, Delhi (HCFD) inkhawma Pathien kuoma inhlan dinga rem iengkim ruot sa diem a na, inhlantu le tlangzartu dinga fiel Rev. Hrilrokhum Thiek khom Haflong-a inthokin a hung tlung dèr tah a. Ama hi Manipur Sim thlang biel Sartuinek khuoa pieng, Hmar hnathlak laia sulsutu poimaw, First Division-a letter mark hmua Matriculation tling hmasa tak (1952), B.Sc hmasa tak (1956), B.D hmasa tak, Zo hnathlakhai laia M.Th hmasa tak le USA-a a lekha inchukna Seminary-a Saphai rikawt zu khûm vongtu, Cachar Hill Tribes Synod hnuoia lu tak nina Executive Secretary chel sawt tak (1974-1996) le Bible Society of India sut Hmar Baibul buoitsaitu Hmar Bible Translation Committee-in Chief Translator-a a hmang, mi thiem filor a ni bakah HSA hlapui, ‘Zaleng kan lawm nunkhuo hrui ang sei sien” (1955) ti phuoktu a ni bok. Hi a phuok kum bok hin All India Radio-ah hla, “Amin ruoi ropui an thre a” ti a khum a, AIR-a hla rikawt hmasa tak a nih.

 

Baibul inhlànna hun dinga ruot ‘dar thum’ hril tâka chun ei thupuia ei lut hmain, fe malama bawngin lam sîra hlo hna a pet lawr angin hi thil hi hang pet lawr vak inla. Isu’n tlanna sin hlena a thlarau a’n thla hun, Thuthlung Hlui le Thuthlung Thar inramrina hun poimaw tak el le HCFD chawibiek inkhawm hun chu chawhnung dar thum a nih. Hi hun hrilnaa trongkam ei hmang chieng le chieng naw thu hi hang bi vak inla. Baibul inlet hmasatuhai chun hi dar thum hi ‘zantieng nisa inher’ hun amanih ‘vaimim tui suong hun’ tiin an mi siepek a. Chieng lo deua Thairanchongin a pasal Sura kuoma, “Nisain hmawng lêr/ kotkhar bieng a khaw pha leh zan bu ding lo suong rawh” a ti hun tho kha a ni awm. Hi hun hi a nih a threnin ‘voisun zantieng inkhawm’ amanih ‘voisun chawhnung inkhawm’ tia chieng lo deua ei hril hlak hi.

 

Isu an hemde nia thim a zing hun kha ‘sun bu fak huna inthoka zantieng nisa inher chen’ tiin Bible Society Version (BVS) le Rochunga Pudaite Version (RPV) a chun an sie a. BSV chun sut nuhnung takah chieng lema sie tumin, ‘nisa inding huna inthok zan bu suong pha chenin’ tiin an siem thra a. Chun, nisa inher hun ti kha Mat. 27:45-a chun ‘vaimim tui suong pha vel’ an ti nawk bok a. Betlieng mu trawl hi a chang leiin a hmin intak a, bu tak suong hma neka inhmain an suong tran hlak a, chu hun chu Lusei tronga chun ‘behliang mun hun’ an ti a, a umzie chu bu tak suong hun pangngai neka inhma tina a nih. Chu chu Lusei tronga inthoka inlet ei Baibula chun ‘vaimim tui suong hun’ tiin inthuruol takin an sie thung a. Vaimim inhro trawl chu a hmin intak a, suong sawt a ngai a, bu suong hun pangngai neka inhma daiin an suong tran hlak leia hi trongkam hi an hmang a ni ring a um.

 

A chieng naw thu chu a ni niin lo ni ta sien, ‘vaimim tui suong hun’ le ‘zan bu suong hun’ inanga ei hril hin harsatna pahni a um a. Pakhatna, vaimim tui suong hun le bu tak suong hun pangngai a’n ang nawh. Pahnina, vaimim suong hun hril loa ‘vaimim tui’ suong hun ei hril tlat hi chik taka ei sui chun nuizatum deu a nih. Arin tui a nei ang bokin vamim chun tui (egg) a nei ning a ti? Ieng leia a vaimim suong loa a ‘tui’ (water, soup) ei suong tlat am a na? Vaimim ‘tui’ suong hun bik a um am a ni? Hieng zawnahai hi a umzie hre thiem nawhaiin indon ta hai sien la, ei buoi nghal a ni el. Kei khomin vaimim ni loa vaimim ‘tui’ suong ta tlat el chu a ngaina tak ka hriet naw khop el. Chun, ‘vaimim tui suong hun’ ti aia ‘nisa inher hun’ ti ei hmang khom hi a chuong liem bik nawh. Nisain inher hun bik a nei am a ni? tiin zawna indon ta inla, “A nei nawh” ti hi ei donna a ni vong ka ring. Chun, ‘sun bu fâk hun’ ti khom hi khawpuia umhai chun chawhnung dar 1-2 inkarah ei ngai vong ring a um. Ei pi le puhai khan hun, thil hlatzie, rikzie, lienzie, chinzie le a dang dang inkhina le bukna chieng tak an nei naw leiin an ngirhmun le inmila an hriet thiem thei zawng dingin an lo hril hlak a. Hrietna tienga ei hung changkang pei ruolin bukna le inkhina ei hmanghai a hung chieng deu deu hlak a. Chuleiin, Delhi Version chun hi hun hi ‘sun dar 12 vela inthoka chawhnung dar 3 chenin’ tiin le betlieng mu le vaimim inhro trawl an insuongtir hun kha ‘chawhnung dar thum velah” tiin a sie ta lem vong a nih.

Chuleiin. DHCF chawibiek inkhawm hi thlasika chuh dar 3-a tran a ni hlak leiin nisa inher hun amanih, zan bu suong hun amanih le vaimim tui suong huna inkhawm ni loin, ‘zantieng’ inkhawm khom ni bok loin, ‘chawhnung’ inkhawm a ni lem a, chuong ang tak chun hril tum seng ei tiu. HCFD hnunga chawibiek inkhawm Kuki Worship Service ruok hi chu zantieng dar 5-7 inkar a ni tak leiin ‘zantieng’ inkhawm an ni ta thung a, anni hnunga inkhawm chuh, Delhi hun tiem dana chuh ‘Zan’ inkhawm a nih. Chun, hi chawibiek inkhawma hin thawlawm ‘dawl’ amanih ‘khon’ ta loin, Pathien kuoma ei ‘thilpekhai lakkhawmna’ nei ta lem inla; ei ‘veng tieng’ chanchin ripawt loin ei ram tieng le ei khuo tienga thil tlunghai chanchin ripawt ta lem bok ei tiu. Trong hmang indik lo hi mi mawl thuomhnaw a ni a, a’n dik nawh ti hre zinga hmang lui tlat lem chu mi tuklul le mi rilo nungchang a nih. Thingtlang nu mawl pa mawla ei ngaihai thu hril hi hang ngaithla inla, an kam suok tinah ei trong mawi takin a hung par suok a. Mani trong thiem naw tawk charh, Saptrong thiem hman loa uongna tawk chauha inchuk silhai trong ei ngaithlak pha hin, ka hla phuoka, “Lung a dam nawh, ningtel a na” ti tlara khan a mi khal lut zie hlak a nih.

 

Ei pet lawr sawt ta bok leiin ei thupuiah lut nawk zain rêl ta inla. March 28 Pathienni tuk nisa suok ruola (0612 hrs) ka car hnung tienga Baibul thar ka rem lai chun ka car chun hieng ang hin a tiin ka hriet a:

 

Car: Ka pu hin ieng lungril top am a put a ni ta ding maw? Ni dang chu Pathienni tuk hin a min chawl hadamtir hlak a. Voi tuk khom hadam taka chawl ka tum lai, zing hmâng hmàngah ka ngal khang tliek vang khopin thil rik a mi’n phurtir el hi! Kum sari chuong hiel a mi not let ta a, ka ru le changhai khom a rop zo ding a ni tah. Ka pu hin chu a mi va hang duot naw ngei de aw! A ruolpa Tawnluoi car ni lang chu, Sailo vok chal chawm thau ang elin, inah hadam takin ka chawl veng veng el ding a ni vei leh.

 

A pu: Ka car, chier inthluok naw rawh. I vangneizie i hriet naw a ni hi. Ieng lai khoma thlak thei che ka na, sienkhom kum sari chuong top ngaina taka ka kol che hi vangnei inti thlawt rawh. Tlân dinga siem i na, tlàn chu i piengsan le i sin a nih. Garage nghak dinga siem i ni nawh. Cheng nuoi thum chuong man petrol i dawn tah a, kilometer nuoi khat i tlan tah hi i rongbawlna a nuoi zawnga tiemin i hlen tah tina a nih. Chun, hi hi hre rawh. I tlan po po zaa sawmruk neka tam hi chawibiek inkhawm le Baibul inlet ennon dinga i pi le i pu i phur lei a nih ti hre rawh. Sande sikula kai tam lawmman an lak khom kha i rongbawlna ra a nih ti hre bok rawh.

 

Car: Chuong chu a lo ni maw! Ana chu, ka phurin a mi del rik êma a ni hi tie! Fe tawm beka i min phurtir chu ni sien, a ngaina tak ka hriet a, zing hmâng hmânga i mi’n phur lawktir hi chu a ngaina tak ka hriet nawh. Ka kawla car po po hi en la, kei anga rikphur an um der nawh.

 

A pu: I voi tienga car hi en rawh. Mercedes Car, nanga let sawmlia man to lem le car inhoi lem a ni hi. I pu hin kum 17 chuong a lo khal ta hlak leiin nang nek daiin a chanchin a hriet lem a nih. Amiruokchu, hi hi hre rawh. Hi Mercedes car let tam hin nang chu i vangnei lem a nih.

 

Car: Chu chu iengtin am ni thei a ta? Ka tuolbawmpa Mercedes hi chu a puin a duot a, a khal suok mei mei ngai naw a, hadam takin a thrung veng veng el a nih. Thil rik khom a’n phurtir ka hmu ngai nawh. Kan inkarah tong khat vel chauh a um leiin ka hriet chieng annawm.

 

A pu: Awl hadam mei mei amanih, hmang loa um trok trok amanih, mamaw bak nei amanih hi suol a nih. Um trok trok hi natna lei a ni ngot naw chun suol a ni hrim hrim. Chun, hi Mercedes car hi inhnar naw rawh. A neitu hi i hriet naw khom a ni el thei. India rama State lien taka Chief Secretary ni ta hlak, mi neinung, sungkuo inzaum taka inthoka hung a nih. Amiruokchu, milem be mi a nih ti i hriet am? Sam 115-ah milem betu chu a milem biek leh angkhat an nih a ti kha. I pu ruok hi chu Pherzawl tlanga inthoka vok êk dûra inthoka hung suok ni sienkhom Chanchin Thra leia khawvel sawsaiti insang taka chetla phak dinga hlangkai, Isu Krista zara chatuon hringna rochungtu a nih.

 

Car: Chu chu ka ta dingin iem a danglamna a um? Ka rikphur hi a mi sawkzang pha chuong lèm!

 

A pu: Ngai rawh, i rikphur hi lawm hle rawh. Mercedes car hin a phur tawp chu a pu ek tum a ni el. Car tam lem hin a chuongtuhai ek tum bàk chu an phur le! Paikawnga rik tak tak an phurhai khom hi ek tum ding tho a nih. Nang chun chatuon hringna bu, Hmar tronga Baibul inlet thar, Thuthlung Thar, Sam le Thuvar inkop chu i phur a nih. Ek tum phur ringot le Hringna Bu phur tu am an vangnei lem a? Krista thrang loa nun hmangtu po po phur chu mani ek tum bak a ni ngai nawh. Mihriemin a rimsikpui po po hi a tawpa chu ek tuma liem vong a nih. Hi Mercedes car hin tawpna niah a pu a zui ve vai chun hremhmuna inling kumkhuo ding a na, nang chu chatuon chawlnaa lut ding i nih.

 

Car: Pu, ka lawm taluo. Tuhin ka vangneizie ka hriet chieng chauh a nih. Car po po laia car vangnei tawp ka lo ni chu tie! Hringna bu phur ka ni phot chun ka hnung tieng chauh khom ni loin, thrungna po po hluo sip dingin hung sie sa rawh. Ieng anga rik khom ni sien, ka ke koi hiel ding khomin, lawm tak, hadam tak le zâng takin phur ka tih.

 

A pu: Amen. Chu chu a nih hringna neituhai thunon chu. Chatuon hringna neituin “Nangni rimtong le rikphurhai, ka kuomah hung unla, keiin sawldamna peng ka ti cheu. Ka ringkol bat unla, ka kuomah inchuk ro; mi zaidam le lungrila inngaitlawm tak ka ni si a, chuongchun in thlarau ta dingin sawldamna hmung in tih. Ka ringkol a hadam a, ka phur khom a zâng a nih” (Mt.11:28-30) a lo ti hrim a ni kha. Ka car, chu sawldamna angsunga cheng ei ni leiin ei vangnei chungchuong a nih.

 

(March 28, 2004 Delhi)