Hmar Khawbung Dohnuna (HK Dohnuna) Chanchin

Ziektu: Pu Lala Khobung, Aizawl.

 

Hmar Gospel Centenary Souvenir-a Dr. Lalkhawlien Pulamte in “HMAR KHAWBUNG DOHNUNA” (The Patriach of the Hmar Christians) ti thupuia hmangin H.K.Dohnuna chanchin a hung ziek a, a thra thawkhat vieua chu chanchin indik lo tam tak a um sa a. Mi chanchin indik lo ziek meua insuo hih tu khomin ei lawm ngai naw bakah threnkhat lem chun Court ah Defamation case chen khom an siem hlak. Dr. Lalkhawlien hin tum reng le lungril sie puta a ziek lem chuh a ni ka ring der nawh; a thu laknain a zir naw lei a ni lem ka ring. Mi chanchin ziek le insuo kongah fimkhur a trul.

 

Dr. Lalkhawlien Pulamte ziek dan chun – “Pu Dohnun hi a pieng ni, thla le kum, ziek ding a um naw a, kum 1880 vel bawra pieng ni dinga ring a nih…a piengna khuo chu Zielung a ni a, …. Dohnun le a nu chu chavai deuin an khawsa a…hun iemani chen hnunga chun rethei luot leiin a nu chu, Khuongzang Lal Ngullien bawiah a lut ta hiel a…Dohnuna naupasal Bawichhuaka pieng hma ngei chu ning a tih, ama hin a pi bawi intang suok hming a put pha a nih….. H.K. Dohnuna chu Aizawl Assam Rifles 1^st Battalion hmunpuiah bel nawtin an hlawfa a…Commandant Lock sap-in a lunginsiet leiin skul an kaitira…dawr khawm an kaitir nin an hril…a nuhmei hi mi indu tak mani pasal hnama devan kai nuom lo khawpa mi lulul a ni a, chu chu Pu Dohnuna hin tuor harsa a ti zawng tak a nih. Mak dan ding lampui a dap a, missionary saphai kuomah nuhmei mak phalna a hni a, anni hlak chun Pathien thu awiin nuhmei mak a thieng naw thu an lo hrilpui leiin a bei a dawng a, a tawpa chun kohran dan neka a sie le thra hrietna chu zawmin a nuhmei chu a mak tah a, Chu chauh chu ni lovin kohrana inthawka an hnawtdawkna tawk charin Babulon lengmaser tui a dawn bawka. A nuom ang ngeiin kohranin an hnawtdawk pha tah a….. A nuhmei mak le zu dawnin pielral a hawl buoi naw ding a hriet lei ningei a ta, sirbehekin iemani chen a petek a, Nuhmei the le zu dawn leia vanram kai thul el dinga ngaituhai chun, Dohnuna hi ngaituo thei hleng an tih. Ama hi ei ngaituo ding a ni chun Hosea, nawchizawr neitu, Bob Pierce, World Vision indintu, a thi chena a nuhmei le inthe song dam…. H.K. Dohnuna chun inlamletna remchang a hmu nghal a, Pathien tieng ngha kirin, a lungdumpui dingin Ralte nunghak Roziki a nei nawk a……… Commandant Lock Sap zara hung changkangin kum 1912 khan Kulikawnah dawr a siem a…… R. Dala, Aizawlah a vanzina, Dohnuna chu a rongbawlnaa sin thaw tlang dingin a fiela…… Rengpui ram (Tripura) a hnamchawm lai a rawngbawl dingin a sunghai leh an suok tah a.”

Hi a chunga Dr. Lalkhawlien Pulamte thu ziek laia threnkhat chauh ka hung ziek suokhai hi thudik le inzawl lo umin a’n lang a, chuonghai chu hung thlur bingin, thu indik lem nia ka hriet vehai chu, a ziektu inza tak pum zingin, ka hung tar lang tum a nih. H.K.Dohnuna thlatuhai ngei rikawt dan chun an inthla sawng dan chu hieng ang hin a nih: Kamsing-in Kamlal a thla a, Kamlal-in Mannei, Mannei-in Mankhawkam, Mankhawkam-in Chawnsiem, Chawnsiem-in Lalthangner, Lalthangner-in Thatthrieng, Thatthrieng-in Tawka, Tawka-in Sunga, Sunga-in H.K. Dohnuna (a hnunga hin chuh a tawi zawngin HKD tiin ziek a nih) a thla. Anni sungkuo hi mi naran chung an nizie inlangna pakhat chuh hieng chen an thlatuhai sui theia an um hih a nih. Chavai naw tak an nih. HKD pa Sunga (Official record a chun CHHUNGA tiin an ziek) lem hi chu Sailo Lal thla laia ropui taka ngai Kairuma Sailo, Biahte Lal khawnbawl poimaw le var taka an hril nih. Vai trong le Saptrong khom tlawm azawng hmang thei a ni leiin Lushai Expedition 1871/1872 (Vailien) lai khom khan Lal Kairuma hminga British sipaihai lo dawrtu taka an hmang a nih. Mi tam tak chun HKD khan a pa chuh a tluk nawh an ti hlak. Chuong ang bok chun H. K. Bawichhuaka Ex. CEM khom khan a pa HKD chu a tluk nawh an ti bok. Sunga hih mi var le fel tak a ni leiin British sorkarin inlalna dingin Khawbung tlang hih an pek a, chutaka chun an hnam hming chawia KHAWBUNG khuo indinin a op nghal a. Hieng lai huna dar-hla pakhat chu, ”A khua pawh-Khawbung, a Lal pawh-Khawbung, Bung bawk, Bung bung bawk bung leh bawk” ti a nih.

 

HKD hi a pa khaw sat le inlalna KHAWBUNG khuo-ah April 17, 1884 (Baptisma a changna register a ziek danin) khan a pieng a. Salvation Army Brig. Sapliana lekhabu “Bible Tobul” a ruok chun a pieng kum hi 1885 tiin a ziek. Ama hih naupangte a ni laia inthokin mi fel tak a nih. An khuo-ah Lt. Col. G.H.Loch a van zin trumin an inhmu a, mi fel tak a nih ti a hrietin Aizawl tieng lekha inchuk dingin a thruoi a, lekha an chuk sungin âr vaina (poultry farm) an enkoltir a, Mizo hnathlak Lower Primary passed hai laia a hmasa pawl tak a nih. A fel leiin Lushai Hills Superintendent, Borsap tia ko bok chun 1905 khan trong inlettu/Circle clerk sin a pek a, hieng lai huna Mizo hnathlak laia sorkar sin chel (kamding) laia insang tak a nih. Mi hausa ni a nuom leiin a sorkar sin chuh maksanin Nisapui khuoa Hauruma poisa Rs. 400/ pûkin bul a tran a, Aizawl Kulikawn-ah Dawr a hong a. Hi lai huna hin Chhawni leh an innei a, an naupa chuh Zohnathlak laia Doctor puitling hmasa tak Dr. H.K. Thanglura khah a nih. Chhawni le hin sawt innei lovin an inthre a, hi lai huna hin HKD hih kristien a la ni nawh. Chuleiin, “A nuhmei mak a nuom leiin Missionary hai a rawn” ti thukhawchang hi thu bel chieng dawl lo a nih.

 

Hieng ang bok hin Dr.Bob Pierce, World Vision indintu khah a thi chena nuhmei le inthre song ni awma hril khom hih thu bel chieng dawl lo a nih. Hmangaina hau le Pathien rongbawlna tienga a hun tam lem hmang hlak a ni leiin a nuhmei kha chuh a lung a awi ngai rak naw hriim niin an hril. A thi tawm Hospitala a um laia a naunu le a nuhmeiin an hang kan dinga an vuongna kal man tumpektu khom Dr. Rochunga Pudaite a nih. Kum 2011 khan Sielmatah Dr. Bob Pierce naunu Marilee Pierce Dunker, a pa chanchin Man of Vision ti ziektu kha ka’n hmupui a, Lalkhawlien artikul hih ka tiem tah leiin a nu le pa chungthu pehel deuvin kan don a, a ziek dan le thil um dan a mi hril leh an inpersan deuh a nih. From Jerusalem to Irian Jaya ziektu Ruth A. Tucker-in, “He died in September of 1978, just days after a memorable family reunion” (p.471) a ti hin thudik zawl lem a tih. Chun, Lushai Hills-ah ieng tik lai khom Sipai officer amanih Borsap “Lock Sap” ti hming put an um ngai nawh.

 

HKD chanchina bok lut nawk inla. A pa khan a dam sawtpui naw a, amiruokchu a pa thi khan ama chuh Aizawlah sorkar sin thra tak chel a ni tah. An inlalna khuo Khawbungah kir nawk a, lala va thrang nekin Aizawla hmun khuor nghet khah thra lema a ngai leiin a lalna chuh a dit thlangnain hnawl tah lem a nih. Lalkhawlienin “An chavai em leia Khuongzang Lal Ngullien bawia lut” ni awma a hril lem hi chu thu indik lo hulhuol a nih. A reng reng thuah, an khuo Khawbung hih Champhaia inthoka hla lo te a ni a, Khuongzang khuo hi chuh Manipur rama mi dai a ni bok si leiin, Lalkhawlien hin HKD nu le HKD nuhmei nuhnung lem Roziki, Ngopa lal hai bawia inthoka HKD-in an tlan suok chanchin leh khan a hriet buoi khom a ni el thei. Chuleiin Roziki hai chanchin hih ziek sa trulin ka hriet.

 

HKD nuhmei Roziki (Bawia inthoka suok a ni leia a naupa hmingah H.K. Bawichhuaka an phuok) hih nu var, tumru le rem hre tak a nih. An hnam hi Ralte ni loin, Pawi-Sasem a nih. A pa’n a thisan inhma leia lo thei lo thila lal bawia lut an nih. A pu Haulianthanga hun lai lem chu ruol inhnar bik loa khawsa thei sungkuo an nih. A pa Zakhenga kha mi danglam tak a ni a, lekha inchuk khom ni lo le khawvel hmun dang le an insir paw hma (vailien hma) si khom khan ngaidan hranpa nei phak tah a nih. Thlavar hnuoia papui ruol inpawlkhawmhai kuoma hin “Arasi, nisa le thlapa dam khih en ta u, khawsak tienga inthokin an suok a, khawtlang tieng an tla niin ei hrieta chuh an ni nawh, ei umna hnuoi hih khawsak tienga inthokin khawthlang tieng an her a, ei inher liemsan lem a nih” a ti hlak a, sienkhom an awi chuong lem nawh. Zakhenga khah a thiin a nauhai pathum a thisan a, a nau upa tak Liankunga chu a tlangval trantir a ni a, a sang hai Roziki le Robawihi kha chu naupang, tuithei khir thei chauh an la nih. An insang inkhat lei am a ni ding, an inkarah a thi an um lem, an u Liankunga chun nuhmei a nei a, nau pasal Kaphnuna (a hnungah P.S. Dahroka) thlaruk mi chauh a niin a thisan el ta leiin an u nuhmei le nautesen le chun an um tah a nih.

 

Chuong lai chun Ngopa khawper Khumzawla um an nih. Anni unau chuh lo sin thaw dingin an la naupang leiin an u nuhmei lo fe kar chun a nau Kaphnuna chuh in tieng an lo don hlak a. An ruol hai leh inhnela pawi an inkap chang hin an bul lai an hei sie rok el hlak a, a ning ningin a lo um ve el hlak leiin DAHROKA tiin an ko a, hmingin a put song tah a nih. An ta dingin khawsak ngaina hlol a um tak naw leiin kum 1901 khan Ngopa lal bawi (suok) ah an lut tah a nih. An u nuhmei thisan chun bawia inthoka suok dok a nuom leiin pasal a nei a. Ama lo suok ta sienkhom Roziki hai unau le Dahroka kha chuh bawi an la ni zing. Dahroka chuh lal phalnain a nu kuomah a um a.

 

A pahron chun a nu hriet loin a suknomna thei em em a, sienkhom a nu kuomah a hril ngam ngai naw leiin a nu chun iengkhom a hriet noh. Ama khata riek hrang thei a la ni naw leiin a nu hai kuoma chun a riek hlak a, a pahron chun puonri hnuoiah na deu deu hin a sik hlaka chuh na khom ti ngam ngai loin a tuor el hlak a nih. A in tahnung dam hin a pahron chun phak le phak lo hin a hei ban hram hram hlak a, imu dukdak khom a hmu ngai nawh. Iemani chen hnungah khum hrana a riek ve hnung khom chun a pahron chun a tho hmasak changin trul der lo hin a imu inhnik lai dam hin a kei tho a, meilum a hei awi ve chang khom hin a hmel dam a’n sietkhum hlak a, chaiche damin na deu deu hin a chep hlak a, sienkhom a trap ngam ngai nawh. A nu um lai suknomna ngam naw sienkhom a um naw charin a thei ang angin a suknomna ngat ngat a, a nu fena nei chang dam hin a pahron chun sunbu a fak khom a phal ngai nawh.

Ni khat chu a ruolhai leh hlim takin an inhnel a, a ruolhai sunbu fak a nghak zoin a ruolhai thruoiin sunbu fa ve dingin an in tieng a fe a. A pahron chu a um naw sawnin bu fa dingin bel a hei hong a. A pahron chuh a lo um hlau el a, a ruolhai um lai chun, “Iem a na i hung zong? I kutbawr khah ka tanbong ding a nih, tlanhmang dai roh” tiin a hal ta hrep el a. Ama naupang phingtram chun bu khom chu fa ngam ta loin a to trok trok a. Amiruokchuh a ruolpa Khailinga chun thil um dan hai chuh a nu kuomah a hril vong a, Khailinga nu chun Dahroka nu kuomah a hril sawng a. Chu phing leh Dahroka nu chuh a lung a sen ta em em el a, a pasal chuh a hal a, “Hienga ka naupa i thaw chun i ina inthokin suok nghal kan ta, lal bawiah um nawk el kan tih” a ta, chu hnung chun a pasal chuh a zie a hung um ta deu.

 

Dahroka chuh a hung lien a, a tha sor thei a hung ni chun lal hmei, in hrana um kuoma chun an sie a. Roziki hai unau khom chuh lal bawi ni hai sienkhom Ngopa khawper Kawnzar khuo op dinga lalin a sung hnaihai a sie Hrangkima kuoma chun an sie nawk ta pei a. Bawi ni ta hnung khoma “Hmei” le “Khawper optu bawi” la hei ni nawk pei chuh tlawm thlak deu an tah. An ta dingin thawngaina dang um nghal lo chuh, an tuor tlok tlok el a nih. Ni khat chu Kelsih khaw lal makpa sorkara kamding Liannawla C.I chu Ngopa khuoah a van zin a, nau don ding mi a dit thu Ngopa lal kuomah a hril a. Ngopa lal chun a lo biektlonna khom ni rawi naw ni’m, Roziki khah a thruoi a phal a. Kelsih khuo hih Aizawla inthoka hnai tea um a nih. Roziki khah Kelsih a a um laiin Aizawla Zosap (missionary) hai sinthaw dan a hmuin a U Robawihi leh anni kuoma an chun chun lekha inchuk thei dan lampui umin a hriet ta tlat el a. Ngopa tieng a hung kir nawk hnung chun a u le chun a rûka lal bawia inthoka suok dan ding an phan ta a. Ni khat chuh an pi Awithangpuii rawia thing phura an fe trumin thing lakhawm dinga inhlemin Aizawl tieng panin an fe ta dai el a. Lampuia chun lal khawnbawl an intuokpui hlau el a, ama hih an chipui Pawi pahnam a nih. Ama kuoma chun an harsatna le thiltumhai chuh an hril a, an thiltum chuh tu kuoma khom hril lo dingin a lunginsietna an hni a. Ama chun a lunginsiet tawl em em a, tu kuoma khom a hril nawh.

 

An fe pei a, pa pakhat ramvak Chalhanga an intuokpui nawk a. Ama lem hi chuh lal hai chipui Rokhum hnam a la ni nawk nghal. Ama kuoma khom chun an thiltum chuh tlang takin an hril bakah a lunginsietna an hni hnungin a’n fe tlangtir ta a. Roziki hai ngirhmun le mi lungsietum le vangduoi an nizie hi chuh tlang hriet a nih. Muol an liem fel vel chauh chun lalin hnotzui le man dinga a tirhai leh Chalhanga chuh an intuok a. Chalhanga chun an kuomah “Tlung hla ta vieu an tih. Tu lem hin chuh Hlieppui khuo khel daih tang an tih. Hnotzui nuom tingtang ta naw ro. Nakie Aizawl tieng hmu la tum lem ro” a ti leiin anni khom chuh an kir ve ta a. Khang lai huna khan chuh khaw kar lam khom mumal a la um naw a, vadungte zui le vokkongrau ei ti ang mei mei, ramsa fe thrangna dam an zui mei mei a ni a, pasal thrang naw lem chun nuhmei khat fena ngam khom a ni ngai nawh.

 

Anni chuh lampui mumala khom fe ngam loin, ramhnuoiah fein Hlieppui khuoah an riek a. Chuongang chun tri dor dor zing puma fe peiin chau takin Kelsih an tlung a. An fe pei a, an chau ta em leiin an la hriet ngai khom ni lo, Aizawl Kulikawna Nu-i inah an tlu lut top el a. Nu-i hih nu thra tak a ni a, an chanchin an hei hril chun a lunginsiet ta em em el a. A ina chun a’n umtir ta a. Nu-i hih HKD nuhmei hmasa Chhawni (Dr.H.K.Thanglura nu) zuorpuinu a nih. Hi lai huna hin HKD le Chhawni hih Mizo dana an inthrena kum thum lai a lo ni tah a. HKD chuh dawrkai hausa a nih.

 

Hun a hung liem pei a, ieng tin tin amanih HKD chuh Roziki leh an hung inhriet a. An chanchin HKD-in a hei hriet chun a lunginsiet ve ta em em el a. An unau chun Ngopa lal bawia inthokin sum pe-in a’n tlansuok a. HKD le Roziki chuh an hung inngaizawng a, kristienah an inpe a, a ruolin May 31, 1907 khan baptisma an chang a, hi kum vek hin kohran dan thienghlimin an innei tah a nih. Hieng lai huna hin, abikin a chengna Kulikawn-ah kohran ban a ni takzet a. C. Vanlallawma buotsai ‘Tun kum za chhunga Mizo hnam Puipate (1894-1994) phek 240-a a inthoka ei hmu danin, Durtlang lal Suoka, mi poimaw le trangkai èm ém kha ringtu a hung ni dan chu 1907 December 20-a Aizawl Venghluia muol inkhawma Vaithawia pa sumphuk tlanga inthoka HKD-in Pathien thu a hril a ngaithlaka inthok a nih. Pathien thu a hril lai hin Suoka chun a hmaah Isu Krista hemde a hmu a, chu chun a lungril koi dar vong khopin a hne a. Kar khat hnungah baptisma a chang thu Suoka ngeiin a ziek. Kristien a hung nia inthokin HKD kha nasa takin Pathienin a hmang tran nghal a nih ti a chieng.

 

HKD chun Kulikawn-ah dawr a siem a, chuong laia Aizawla um mingo le hnam dangin an pan tak a nih. 1908 December-a Watkin Roberts (Saptlangval) le a pu Dr. Fraser an hung tlung khom khan ruol thrain an inman nghal a, a hnungah rong bawl tlangin, HKD thi chenin an inthlop tlat a nih. HKD hih kristiena an pek hnung le Roziki leh kohran dana an innei hnung hin Babulon lengmaser tui (hi hih iemanih ka hriet nawh) a dawn thu le nuhmei tienga tlak nawna a nei ti hriet a ni nawh. Chuong nek hmanin, a sumdawngna thra tak maksanin kum 1917 khan Saptlangvala misawn Thado-Kuki Pioneer Mission-a Field Superintendent sin chel dingin Tripuraah a lut a, Jampui Hills-a Tlangsang khuoah hmunpui indinin, kum 1918 khan TKPM Presbytery hmasa tak an hmang a, chu taka chun pastor-a namdet a nih. Ama inrawina hnuoiah Rengpui ram, Satikang (Chittagong Hills Tract) le Arakan rama hai chen chanchin thra an phur lut a, June 17, 1931-a muol a liem chenin kohran thruoitu poimaw tak a ni zing. Saptlangval lem khan chuh Pathien rongbawlna tienga “Mingo misawnari sawm nek khoma thawk hlawk lem” a ti hiel a nih.

 

Roziki u Robawii khom khah HKD-in bawia inthoka an tlansuok hnung khan pasal thra deu el, kamding ‘Khawchhiar’ Saiawia leh an innei a, an thla peia mi threnkhat hai chu ziektu inlar Lalhmingliana Saiawi I.A.S (1964 batch), Rochila Saiawi I.A & A.S le Mizorama inthoka nuhmei Indian Foreign Service tling hmasa tak Lalmuanpuii I.F.S. hai hih an nih.

 

Roziki hai unau khah bawia inthokin suok ta hai sienkhom an U Kaphlira naupa Dahroka khah an ngaituo thei em em el a, a suok ve dan ding an ngaituo hlak a. Trum khat chu a suok ve dan ding zongin inhmuna ding hun le a hmun an ruot a. Robawihi chu Ngopa tieng a hang fe a, sienkhom an intuok rem thei naw leiin kut ruokin a hung kir a. Ni khat chu an ring phak der loin Dahroka khah Aizawlah parva zawr dingin a hung a, an inhmu hlauh el a. Roziki hai unau chun an lo lawm em em el a, a kir nawk ding chuh an phal ta naw a. HKD bokin 1909 khan bawia inthokin Rs.40/- in an tlan dok a, Aizawl, Shillong le Calcutta-ah lekha an chuktir a, hung inchuk sang peiin Zohnathlak laia Ran Doctor puitling hmasa tak le lekhabu poimaw ‘Mizo Thawnthu’ buotsaitu a nih. A hmaa ei hril tah ang khan a hming tak chu Kaphnuna a ni-a chuh sikula a hming ziek dan P.S.Dahrok ti khah a put song tah a nih. P.S ti hi Pawi Sasem tina anih. Dr.P.S.Dahrok a thla pei mi threnkhat hai chu Thansiami w/o Brig.T.Sailo Ex-Chief Minister, Lalhmangaiha I.R.S, Dr. Lalrinliana hai dam hih an nih.

 

HKD chanchina bok khan lut nawk ta inla. A hmaa hril ta ang khan, a thlatuhai hi suon 8 chen sui theiin an um a, a pa Sunga khom Khawbung khaw lal, Sap le Vai trong chen khom hmang thei, Dar-hla chen khom lo nei a nih. Ama HKD hlak chu ama hun laia Zohnathlak laia sorkara sin chel insang tak le dawrkai hausa, English, Hindi, Bengali, Urdu hai khom hnesaw tak, Hmar trong le Lusei trong khom inang chara thiem, Hmar tronga Inchuktran Bu (Buhmasa) le hlabu siem hmasatak, Rev.Thangngur khom Hmar tronga hla phuok dinga infuitu a nih. Khang lai huna khan chuh lekha ziek le kristien thu le hlaa reng reng Lusei trong vong hmang dinga ngai a nih. HKD chun “Hmar trong hih Pathien siem a na, eini thu an nawh” a ti tlat. A naupa Dr. Thanglura khom Hmar nunghak, Parbung khaw mi, Darsunkim (Deknu) an neitir a nih. Dr. Rochunga Pudaite-in Tlangval (Watkin R. Roberts) thu hril a hril sawng, Guwahati Hmar Chrtistian Fellowship Gospel Centenary Souvenir-a a ziek dan chun HKD khah Lushai Hills a hausa tak a ni a, 1917-ah patlingin ni khat hlaw Duli a ni lai khan a Bank A/C ah Rs.200000/-(Two Lakhs) a nei tah.

 

HKD hih kristien a nia inthok hin a nuhmei Roziki leh thrahnem an ngai thei em em el a, an hausain an tik a tlai bok a, kohran ban poimaw an ni takzet. Tlangval le khan an inhriet chiengin an inthuruol em em el a. Tlangvalin Tripuraa kristien ringthar té tè hai inrawi ding le enkoltu ding mi fel deu el lo ngaituo pui dingin a ti a. Mi remchang a zuk hmu el naw leiin a nuhmei Roziki leh an inrawn a, nasa taka an trongtrai hnungin Pathienin anni ngei a konaah ngaiin Thado-Kuki Pioner Mission hnuoia-ah Tripuraa rongbawl ding chun an inpeh tah a nih.

 

Pathien kohranhai chuh nakie tieng peiah ram danga inthoka thrangpuina ringsan nek hmana mani intodel a, misawnari tir suok a, mi danghai thrangpuitu ni thei dinga siem tung tum chu Tlangval le Dohnuna hmathlir a nih. Chu ding chun Kristien thrahai chuh iengkimah, sumdawngna tienga hai khom thrangpui a, anni chuh Kohran Ban la hung ni dinga buotsai an tum a nih. Tripura tienga misawnaria fe dinga an nupaa thutlukna an siem fel zo chun Kristien thra le mi ringum Pachhunga, Hmar-Hrangchal-Suomte kuomah a sumdawngna chuh an hlan a. Kum 1917 khan ama poisa Rs.14000/- le chun Tripura a pan a, Jampui Tlanga ringthrahai umna dinga khaw thar an siem Tlangsanga chun umhmun a khuor a, TKPM Field Superintendent a hung ni tah a nih. Chu hnunga Lakhipur vela rengthei chinga fakzongna ngelnghet hung trantu khom HKD a nih.

 

HKD hih mi tu khom a chunga sie bik lo a nih. A thla khat hlaw dinga an siem chu, khalai huna Lushai Hills a sorkar tienga hlaw tam tak hai hlawzat a nih. Rev.L.T.Sinate’n Kohran Hring ti lekhabua a ziek danin Rs.125/- p.m a nih. Mi threnkhat chun Rs.250/ an tih. December 26, 1914 a Thado-Kuki Pioner Mission Senvon a Presbytery Resolution dungzuiin an thoktu Tirkohai thla khat hlaw chu Rs.6/ a nih. Khalai huna khan Lushai Hills a Supertindent (Borhsap) hai chun khuol an inzin changin puok phurtu (kuli) hih an thruoi dumdum hlak a. Chu ang bokin HKD chun an sungkuo thruoitu ding (L. Keivom ziek Zoram Khawvel-6 a ei hmu danin) Raja Hrangvunga Sailo, Lushai Chief of Jampui Tlangsang kuomah Kuli 20 hung tir dingin a zuk incha a nih. Amiruokchuh hi a hlaw le inzinnaa sengsohai hih Mission poisa ni loin ama le ama a’n tum vong a nih.

 

H.H.Coleman phierna leia kum 1929-a inthoka NEIG Mission sunga buoina namen lo a hung suok leia kohran a hung koi dar khan HKD chun indik lema a hriet Tlangval tieng a thrang a. Anni tiengin Saprama inthoka poisa hung khah an hmang ve thei ta naw lei khan, thoktu an hau ve si, an harsa ta em em el a. HKD poisa chun anni tieng chuh an inenkol a, a hnungah rul nawk ti khom a um chuong ta nawh. June 17, 1931 a Lakhipur a a thi tawm khan a nuhmei Roziki kuomah “Ei poisa nei sun hai hlak chuh ei hmang zo tah a, ei hmu nawk naw khoma Lalpa’n a mi enkol dan ding a hriet” a tih. Chu chu ringnaa kalchawihai ngirna a ni zat zat. Tlawm le chau let dêra mi ngaihai khom hi a phuntu Lalpain an thlahai chena zung an kei dan ding a hriet a, ama dit zawng thawtuhai chu a la hung kei suok tho tho hlak. HKD khom hi thrang la hung thar peihaiin a nina an hung bel chieng pei ruolin chawi sang la hung ni deu deu a tih. A chanchin chîk lema hre nuom chun Zoram Khawvel-6 tiem dingin ka’n fui.