INPUI: Hmar News & Info

By Ramthienghlim Varte

Mihriem hi rannung anga a ruol ruol a inpawl (social animal) le khawsa a khawtlang dan le dun mumal tak leh chengna le umna hmunbik neiin khawvel hmun hrang hrangah Sungkuo bing bingin ei um tlang a. Ei ni khawm ei khuo le veng-ah Hnam-khat tawng hmunkhat khawm ni inla Sungkuo bik neiin ei khawsa a. Chuleiin, Sungkuo le Kristien Sungkuo a pawimawna Kum 2007 khan ziekin Khawnvar Le Thuhriltu Journal/Magazine-a insuo ani tah nghe nghe. Tuta tum ruok chuh Mihriem Nunphung hung intan dan le bulthut, chutaka inthawka Sungkuo hungsuok danhai hi hrietchieng a pawimaw hle’n ka hriet a, Mihriem tobul le insiemdan mithiemhai tlirna tukver ah tanin tawite te’n hei suklang tum ei tih.

EVOLUTION THEORY :

Scientist-hai chun leihnuoi hi Kum Makteduoi 400 B.C. neka upa ni dingin an zeldin a. Kum Makteduoi 300 B.C. laivel khan khawvel hi hringna nei pakhat khawm um lova re thuop anga ngaiin chuhnung kum iemani chen a thilhring chite a hung inlang a, chu Bacteria tiin an inbuk a; Mit lawnga hmutheilo, Enlenna (Microscope) hmanga hmuthei hringna nei an nih. Chu thilhrik chite inthlapung peiin umna/chengna boruok angin piengphung hrang hrang nei a chi intlasawngpei ni dingin an ring. Chu hung inthlakdanglam pei chun thilhring danglam le mak tak tak an hungsuok a chuonghai lai a Ransa ke pali nei le piengpui varna nei Mihriem le inhnai hrietthei hmasatak chuh Mammals hi a nih. Hieng rannung-hai lai a nau pai a hringve chi, Nu nenetui a chawmlien Kut, Ke, Lu, Thluokbawm, Thin, Chuop, Thisen lum nei Ransahai chuh ani leiin Animal (Ransa) tiin an inbuk tah a nih. Mammal eiti a khawm hin piengzie in-ang naw, Sungkuo chi tum tum an hungsuok nawk pei a.

Hieng Ransa ( Animal) eiti hai hih Kum Makteduoi 64 B.C. laivel khan khawvel an hluo tan a, an ni lai a var tak chu Zawng chi hi a nih. Zawng hi chi hrang hranghai hi a huhouva (Group)/Sungkuo a khawsa chuh an nih ti vawisun chen khawm hin hmutheiin an um reng a nih. Hun iemani chen hnunga Zawng lien chi thenkhat Chimpanzee, Gorilla le dang danghai chuh Thinglera khawsa talovin hnuoia fak zawngin, Ke pali-in an lawn phawt a, chu hnungah Ke pahni-in an hung lawn tan nawk a, an Ke hnungtieng chuh lawnnaa hmangin, an hmatieng ruok chuh nuom nuom thawtheina le hmangruo siemna Kut-in an hung hmang ta pei a, a tawp a chun Mihriem angin an hung ngir-tlun at thei tah a. Chuh, Mihriem hmasa HOMO ERECTUS (Homo-Mihriem, Erectus-Ngil)/APE MAN tiin chuonglaia a var le hriet lar deua ngai an Ru hieng- Luru, Malpuiru, Khakru, Kut le Ke ru-hai an hmu/chosuokna hmun dungzuiin an hming an siem pekin hieng- Java Man, Peking Man, Nebraska Man, Piltdown Man, Neanderthal Man le dang dang ti a hung nih.

Chuleiin, Zawng Sungkuo hi Kum Makteduoi 27 B.C.vela um ni dingin an ring a. Hun a liempei a, kum 40,000 B.C.vel liemta khan an khawsak le nun a changkang ta vieu a. Chu inthlasawngpei chuh Mihriem nun intanna a hung ni a. Kum 12,000 B.C. hnungtieng lem khan chu Lo neina chang hrein Wheat, Barley, Maize dam chingin Beram dam Kel dam vaiin an khawsa ve ta a. Chuleiin, Baibul puotieng suinaa inthawka tlir chun Mihriem nunphung le Sungkuo intanna hi Kum 8000-7000 B.C. vel khah ni dinga ring a nih. Mihriem chanchin suitu (Anthropologist) hai khawmin Mihriem nunphung le Sungkuo (Family) a hung intanna le hungsuok dan hi chipchier deuvin an sui dawk thei bik chuong nawa chuh khawvel inthlakdanglam peiin a hung relsuok ngei chuh an ringdan a nih. Sungkuoa inenkawlna bik a um hma chun ransahai ang bawkin mumal umlo takin nuhmeiin nau an nei khawma Pa bik umlova nun inpher neinuoia um hlak khah, nuhmei-pasal bik neia nauhai le khawsakna ding ngaituo’n Puk le hmun remchang zawngin Ransa dang laka invenghim nachang le mumal nei taka Sungkuo siema khawsak relna chang an hung hriet ta pei a nih. Hi Evolution Theory-a Mihriem hung intan dan le Sungkuo suok dan an ring le hmu dan tlangpui a tawi thei anga ei hei tarlang chuh a nih.

CREATION THEORY :

Mihriem Zawng thla nia suisuoktu Charles Darwin le mithiem dang danghaiin an pawm thei derlo chuh Baibul-a ei hmu ‘A tirin Pathienin hnuoi le van le a sunga um po po a siem a, Nikhat a inthawk Ninga sung khawvela thil um po po a siem zo vawng hnungin ama angpui Mihriem Adam le Evi (pasal le nuhmei) nupa a siem’ ti hi a nih. Chun, Mihriem a siem ruol ruolin Sungkuo hmasatak an din pek nghal bawk a. Mihriem a siemhai umna dingin Eden huon a buotsai pek a; Chutaka chun inhawi takin an khawsa a, theira chitinreng hnieng-in-hnar taka an fakding a buotsai pek bawk. An sungkhuo khawsak danding chenin a rel pek a, thaw ding le dingnaw, fak ding le ding naw, chu chau nilovin khawvel a Ransa le thil dang danghai chunga thuneina khawm a pek a, mal a sawm a, a Mihriem siem Adam le Evi-hai nupa chuh an chetdan le an Sungkuo khawsak dan chuh a hmuin a lung a awi a, tha a ti bek bek a, a en nghawk nawh a, an kuoma um zing a nuomin, a kan hlak ti a nih.

Amiruokchu, khawvel mithiemhai tlirna tukver hi Baibul thiem tamtak haiin tlawp naw hai sienkhawm a tirin Pathienin Hnuoi le Van a siem a (Gen.1:1) ti hi an ring naw lei ni lovin Gen. 1: 1na le Gen. 1: 2na inkar hih kum zabi zawng a sui khawma hun sawt tak ni dinga ngaidan an nei ve tho. A san chuh, a thilsiem duthusam le thafamkima a ngai chuh Setan (Lucifar) suktlawmna dingin Hnuoi le Van a siem chuh suksiet vawngin a um a, hremna namenlo tuokin Zingtieng naupa lei chun Hnuoi le Van ruok huoiin a hun sawt tak a sie hnung a Gen.1:2 hin a sunzawm anga ngaidan an nei a, chuh, GAP THEORY ti a nih. Chun, mithiem haiin DAY AGE THEORY an ti Niruk sung a thilsiem khawm hih “Nang a ngai chun Kum sangkhat hi zan vengkhat ( Nikhat) sung ang chau a nih (Sam No. 90 : 4) “ ti le “ Lalpa ngaia chun Nikhat khawm Kum sangkhat ang a na, Kum sangkhat hi nikhat ang chau a nih” (II Peter 3:8 ) ti a ni si chun hi theory nikhat a ti hih Kum sangkhat sung pei khawm a ni thei leiin Niruk ati hih Kum 6,000 vel khawm thil ni thei dinga ringna nei pawl khawm an um ve tho.

Chun, kum thua hin Scientist-hai sui anga Kum upat dan sui thei dingin Baibul hi ziek a ni ve naw tlat leiin ‘a tirin’ tihi innghatna ding chu ni’l a ta. Ei chengna khawvel upatzie ei mithiem (Scientist) haiin Mihriem le Sungkuo insiem tanna hi Kum Vaibelse tamtakin suisuok hai sienkhawm ‘a tir’ ti neka upa hi a ni thei chuongnaw leiin khawvel mithiemhai suidan le khaikhin dingchun ‘a tirin’ ti chu an bul lem hrim hrim a, mithiemhai tlirna le ringdan po po a pei/hnawl tlak vawng ni’n an lang.

Iengkhawm nisien Mihriem nun intanna le Sungkuo insiemdan a chunga Theory pahni tlawmte te ei hei tarlanga inthawk Creation Theory Baibul-a ei hmu neka inril le chieng fek fawka inziekna chuh khawvel mithiem haiin ramtin ramtang kei fanin thaw hai sienkhawm belchieng dawl, hmu theia ziek le zawm ding Evolution Theory-a hin a um nawh a. An suia an ziek rawn po leh pawm dan, ngaidan le inselna a tam a, a buorchuorin a dal deu deu el. Chuleiin, Mihriem nun le Sungkuo chanchin sui ding chun Creation Theory/Creation hi ei pawm ding le Sakhuonaa khawm Christien-hai thuring bulpui chuh a nih.

SUNGKUO (FAMILY)

A chunga ei thu inbuonpui le inzawm hin Mihriem hi khawvel hluobit tuding le a chunga rorel dinga Pathienin alo ruot ei ni leiin Sungkuo bik nei a mumal um taka khawsa ding le cheng dinga ami siemhai ei nih. Chuong nilovin ka Nu, ka Pa, ka Nau ti bik umlovin mani tlat tlatin mumal um der lovin khawsa/tla ta mur mur inla Ransa-hai ang mei meiin inditsakna, hmangaina, lunginsietna umlovin ‘A ru no no suok’ thaw’n insuol, inhal, invuokhlumna/inthatna tam a ta, pung hratnaw hleng ei tih. Entirnan – India rama khawm Andaman and Nicobar-a Jarwa, Shampen hnam hnufuol, Sawrkar thangpuina khawm hmang tangkai nuomlova ning ninga khawsahai hi an population pung nekin tlawm tieng a panpei a, Jarwa hai lem chuh an rengin 600-700 bawrvel chauva ngai an ni tah.

Chubakah, mani a fak zawng theilo Pitar, Putar damnaw natna khirkhan nei le piengsuolhai tading lem chun thi nghak seng seng rin a um zuol hle ding ning a tih. Chuleiin, Mihriem hi khawvela thilsiem po po chunga rorel dinga ruot, ama (Pathien) angna neia siem, a hringna intawmpui eini leiin rorelna mumal tak nei a inrem tlang diel diela Sungkuo indin a inhawi taka nun chen a van nun intem-lawkna ding a Pathien thuruk inthup le a thiltum chuh a nih.

Chuongangin, nunphung umzie nei, nundan mawi, khawtlang rorelna tha le thildang Mihriemin ei mamaw zuolhai chu Sungkuo inchuktirna ah an tan phawt a tul leiin khawtlang nun inchukna (Sociology) tienga mithiemhai chun ‘Mihriem Ransa-hai neka ei hlutna chuh hieng- Nundan tha le mawi, Inza umna, Hlutna, le dang danghai hih ana, chu Inchukna School pawimaw hmasatak chuh Sungkuo hi a ni a; khawvel hi Mihriem chengna dinga siem a, chengna tlak a inbuotsaina hmun/institution pawimaw tak chu Sungkuo (family) hi a nih’ an tih. Chuongangin, “Sungkuo eiti chu a bika in-enkawlna Buzawl nei, chengna hmun bik um a, hotu pakhat rorelna hnuoia mi iemanizat um khawm hi a nih”.

SUNGKUO ( FAMILY) CHI HRANG HRANGHAI :

Anrian Wilson chun ‘Thisena inzawmna nei le khawtlang dan siemin a phuor tang tlat, hmunkhata cheng, fak le dawn a sem sem dam dam thaw a, in khata inlawi hlakhai hi Sungkuo’ (family) a ti bawk a. Chuongang chun Sungkuo ro-in-rel dan hi khawvela hnam chi hrang hrangin ei hmangdan an angnaw a, hieng a hnuoia anghin.

i) Hnamkhat, thlatu hming chawia suon thumna chen Sungkuo pakhata tiem pawl an um a, chuh Sungkuo huopzau/lien (Extended family) ti a nih.

ii) Sungkuo Nu-pa le nau hai chau chengna insung a um a, chuh Sungkuo hlang/inhlir (Nuclear family) an tih.

iii) Sungkuo Pa lutak ni a, nuhmei nau le insung thuomhnaw pasal thuneina pahai hnam nuhmei le nauhai intawmpui a um a, chuh Pa thuneina Sungkuo (Patriarchal family) an tih.

iv) Sungkuo Nu lutak pasal le nau le insung thuomhnaw nuhmei thuneina le Nu hnam pasal le nauhai intawmpui a um nawk a, chuh Nu thuneina Sungkuo (Matriarchal family) ti a ni nawk a.

v) Sungkuo nau pasal upatakin nulepa chanvo changa rorelna insung a um nawk a, chuh Nau Lutir thuneina Sungkuo (Fratriarchal family) ti a nih a.

vi) Sungkuo memberhai thuneitu bik um chuonglo, pa ruokchu nu neka thuneina insang lem nei patriarchal family ni si lo a um a, chuh Thuneina intawm Sungkuo (Egalitarian family) ti ani nawk a,

vii) chun Sungkuo memberhai mimal zalenna nei a um bawk a, chuh Mimal zalenna Sungkuo (Atomistic family) ti a nih.

Hienghai naw khawm tamtak a um. Eini ruokchuh Sungkuo Pa lutak ni a nuhmei nau, ro thil le insung thuomhnaw Pasal thuneina le pahai hnam nuhmei le nauhai intawmpuia um, Pa thuneina Sungkuo (patriarchal family) chu ei na, Baibul-a ei hmu angin khawtlang le Sakhuo thil kawng iengkima roreltu ding le hmathuoitu ding chuh Pasal ei nih.

PATHIEN SUNGKUO :

Sun hun a hmun hrang hrangah sinthawin ei fe khawm a, zantieng mani chengna hmun sengah Sungkuo bikin ei inlawikhawm nawk diel hlak hin vantlang le khawtlangnun a suk thienghlimin nun venghimtu thatak a nih. Chuleiin, Thutlunghlui hun a, Biekin ala um hma lem khan chuh Sungkuo nuna inthawk Kohran hung piengsuok a ni leiin Sungkuo le Kohran hi Pafa anga pumkhat an nih an ti hiel.

Pathienin Sungkuo a lo remkhawm dan hi an thuk em leiin insung khawsak relfello chun Kohran le khawtlang nun an fuk thei tak tak ngai nawh. Sungkuo neilo Ransahai chuh an hung piengsuok a, hun sawtnawtea inthe darin, an nuom nuom an inse-khek hlak. Mihriem ruok chu ei hung piengsuok a, Nu mal chunga Kumli vengvawng hmangai le duot takin nundan mawi, nungchang tha le thiltha an hriet taphawt an min chuktir a, ei chengna khawtlang, nundan le chetdan ang dungzuiin ei hung inthanglien hlak. Chuleichun, Sungkuo Skul (Family Institution)-a Zirtirtu pawimaw le naupang ta dinga an Inchuk Bu le Nun Robu pawimaw tak chuh Nu le Pa anni leiin ei Baibul khawm hi Sungkuoah a tan a Sungkuo bawkin khar a nih.

Nunghak-Tlangval inditna hi suol a ni nawh a, Pathien remruot a ni lem. Chuleiin, Pa thuneina Sungkuo (patriarchal family) ei nih a, Pathien remruotna a Nuhmei-Pasal innei a Pasal chu alu tak le roreltu (Head of the family) ni’n Sungkuo hi indin a nih. Pasal le Nuhmei mihrang dai Nupa pumkhata siem, man le muol inpek lei el khawm nilo inhmangai le indit em em, Pathien hming lama kut insuina, Pathien Thutlung SA-Ui ei tanna ang a ni leiin ‘Pathien Sungkuo’ ei nina dinga thuruk inthup, hmu theia Lal remruot le vanram hawl phak a Pathienin a nina an puongsuokna tak tak a nih tihi hre a, Lalpa ditdan anga Sungkuo ditum ni dingin ei inbuotsai a pawimaw. Pathien Sungkuo ni dinga a naua inbuk ei ni si a.

(Tawnmang Mawl )

Ramthienghlim Varte

Nunghak Andy Rose le kan inhmelhriet hnunghin inngaina takin kan inbiek zeu zeu hlak a. A nungchang le a lungril ka hriet vawng nawa chuh, a hmel, a piengphung, a tawngkam inhmisal le innem riei ka hriet hnung hin chuh sawiselna ding reng reng ka hriet naw a, ka ta ding chun a tlingzo a nih. Chun le zuo nunrawng thlipuiin a nuoivel leiin a hmangai em em le an karah buoina sumpui a zing a; a hmangai tak leh nuom anga leng hmun khat thei lo, chu hmangaina Tupui-a inhlieu, pil vang vanga nun rinum tak hmang mek, lungril pangai khawm put thei lova um, nu lungsietum a nih.

Ama hi damlai lampuia lo tlusil tah hmangaina kuta kei tho tum nekin tlangram khuo kawtsuo bula Inkhieng thing a nuom nuomin an khaw, an deng, an sat, chilsak khum le sawisak ang; an khawtlang zanthima leng, mi sirde tlawk tlawk, chek ek le khiksaw a nih ti ka hriet hnunglem hin chuh a nun hih ka tuor puiin ka hrietthiem pui nawk zuol a. A chanchin a min zawt khum rawn po leh ka hmangaiin ka lunginsietna a zuol hlak. Nuhmei thenkhat mizie hi a mak bek a, bau le mit inro der lo, Beram anga nunnem lungril ruok chuh Malaria damdawi anga kha lo tawng tah ka ni leiin fimkhurna’n ka sip naw thei ngai naw a. Amiruokchu, keikhawm ama ang bawka damlai chirdum lo palve hrep tah, hmangaina no thlum tak khawm tur kha em ema hung inchang dan lo hrechieng tah ka ni leiin Andy vangduoina nopui hi dawmpui theitu ni dinga inngaina ka nei lei nin ka hriet hieng em ema kan inngainat hi. Kan thusep nuom an ang a, kan hei inbiek chang hin phurrik a zang huoi huoi hlak an nawm. Chuleiin, a lak a hin chuh ka khawnghat a tawiin ka mit an del a, ka fimkhur seng naw nih.

Vawikhat chuh zan Dar 12:00 velin a hung phone a, ieng thil am a ni ding tiin ngaipawimaw takin Mobile/Phone chuh ka pick up nghal a. A pa hi mi zaidam, tawng tam lo le mi inngaitlawm tak nisienkhawm an khawtlang nuhmei rorelna insunga khawsa, lungril intar taka um hlak a ni leiin a beidawng chang chuh a dawmve zeu zeu hlak a ni awm a. Hi zan hin chuh a lem rawn deu hlek lei ni mei a tih a nu le an inhal buoi thu a mi hril nuom leia mihung phone a lo ni zing a.

NU rorelna insung hi buoithlak deu el a na, an hnam innei danah nuhmeiin pasal an thuoilut lem a ni tlat leiin, Pa’n insungah thuneina changphaklo, thiltha thawding hre sienkhawm nu ngaidan an naw chun thawthei ni lo, insung thil le thuomhnaw reng reng nuhmei hminga um vawng a nih. Chuleiin, PA hin insungah thuneina an nei tlawm em em a, khawtlang le puotienga thawding a um ruok chun hmathuoitu pasal ni hlak ang reng si hi Kristien thuring bulpui leh khawm an kal tlata a ngai leiin a pa khawm an khawtlang nun hi a ngaidan a ni naw bakah a pawmzam thei lo tam tak a um a. Andy khawmin a dit naw leia pasal nei naw pha reng a nih.

Chuonga a nulepa insel ri a hriet chun room-a inthawk hung suokin tha taka um dingin a hril a. Lungawi naw deuvin a pa chun “I rorel dan indik naw le mumal naw leiin ei naunu khawm vawisun chen hin pasal khawm nei lo a ni hi “tiin chier pumin room tieng a pan a. A nu hi nu naran chung, ro rum tak el, an insunga ding chun Sakeibaknei ang a nih. An hnam nunphung hi nuhmei inlalna a ni leiin a tlangpuiin nuhmei hi an hrohrang a na em em a, pasal ngirhmun hi an hnuoi a, an rimsi em leiin an hringnun a tawiin Putar hmu ding an tam naw em em el hih hieng lei khawm ku hi ani’l awm de aw ti dam ka ngaituo a.

Chuongchun, a nu khawm chuh an room-ah lutin a pasal chuh rau pumin a riek khawm phal lovin, a hung nam suok a, an insungah buoina sumpui a zing a nih. Andy Rose chun a pa a lunginsiet em leiin a room-a inriek tir a tum hlak chun a nuom bawk si nawh. Common room-a khawvar nghaka um, a beidawng thu a mi hung hril a nih. A pa ti ang chun Andy hi a nu thu hrat leia a hmangai tak nei lo a ni leiin apa hin a khawvel nun hi a hriet puiin a lunginsiet a, thawi dam tumin kawng hrang hrang dapin a hnem hlak. Insung nei nung, hausa, chang kang, nuom nuoma in-vilik le dit dit nei thei ni inla khawm a sunga chenghai thu le hla an vuok fuk naw chun Tingtang her mil lo angin a ri a sie a, nun hi rin a um a, bei a dawngin hremhmun intem lawk ei ni zing hlak ti dam ka ngaituo neu neuvin a pawi kati pui em em a, keikhawm ka in thei bik nawh.

TAWNMANG MAWL:

Hun a liem pei a, keikhawm Ofis thil le inzawmin Kolkata, Nagpur le Mysore-a inzinin ka thang hmang nawk a, hi sunghin chuh chanchin kan inhrietpaw bek naw a. Ka sinthaw dinghai ka thaw fel vawng ta leiin vengtienga hung dingin kan siem a, hi zan hin mang mak tak el ka nei a.

Ka mang chun “Ka farm kan dingin ka lo suok a, lampui ka fe lai chun Andy Rose’n ka Farm hi hmu nuoma fe dingin a mi fiel hlak vei leh, vawisun hin hungve sienla chu an hawi awm de aw ! tia ngaituo neu neu pumin ka tlan pei a. Ka Farm Gate ka tlung chun nuhmei pakhat a lo ngir a, a sam thla hrep-hrupin a hnungtieng a min nghat tlat a, ka Jeep khal chuh chawlin ka en ta zing a, hun iemani chen hnungah a hung ngha a, mi lungsietum Andy Rose a lo ni zing el. Motor-a inthawk ka tum a, Gate ka hei hawng tum chun tawng lovin a mi lo hawng pek a ‘Hung lut rawh’ ti ni awm takin kut a hung vai a. Ka hei biek hlak chun a mi dawn nuom der nawh. A hmel chuh thil ngaituo rik tak nei angin a hlim naw hlea chuh a hmelthatna hi ka mita ding chun a chuoi chuong naw a, ka tading chun Rose parmawi tak ang a ni zing a. A rawlmawi le innem rieiin inphisala a mi hei biek changhin ka dam sawng sawng hlak a nih.

Ka hmaa chun a ngir a, a mi en vawng vawng a, a biengah mitthli hung luongsuokin a tap ta ngawi ngawi el a. Andy iem! ieng dinga i tap am, a san mi hril rawh ka ti a, chungtieng a khik ringawt a, chun vantieng ngha’n a kut a phar a, a tap sunzawm pei a, ka lunginsiet taluo leiin kan sumzo hlawl naw a, a beidawngna hnem tumin ka kuo vawng vawng a, ka tangnemah an bei a, an hniek fat fat a. Iem harsatna i nei, iengdinga hi lai hin ilo um ringawt ? tiin kan dawn nawk khawm chun mi sang lovin an hniek fat fat zing a, thla invaiin a mi kuo tawt tawt a. Lungngai der naw rawh, Andy, I harsatna po po phurpuitu ding kei ka um, hadam takin inbei rawh tiin ka thei ang angin ka thlamuong a. Hun iemani chen hnung chun a thuok le pangsa a hung re a, bo riei rieiin a chat thla tah a. Andy ! Andy ! Andy ! mi maksan naw “ tiin a ka khek suok a.

Chun, ka thanghar a Andy Rose hi nu vangduoi tak el a ni leiin a ringkawl bat hi rik a ti em a, a nun nghawkin a phurzo ta ngang naw a, khawvel var hmua dam zing khawm pei ta lovin beidawng-mangangna khel pielral rammawiah a thlarau chawl hadam rawng rawng lem ta dingin a hringnan khawvel a lo suoksan el tah dinga ringna lien tak ka nei tlat a; annawleh, keiin chu ngirhmun chuh chang lem dinga a mi lo hmu lawk pek lem am an ta ding ti dam ngaituo’n ka in thei tah reng reng nawh.

Bengaluru International Airport-a inthawk ka hung vuong ding khawm chuh um inden lo tutin ka um pha a, ka Ticket cancel hiel khawm ka nuoma chuh an hnu velvawng tah bawk si. Lungril sawl le ngaituona mumal nei thei mang lovin Guwahati himtakin ka hung tlung hram a, chun kan tuok huoi a. Airport-a inthawk Shillong tieng panin kan hung tlan ta vang vang a, Nongpoh-a thingpui kan dawn a, chuzova muongchangin kan hung pei a. Umiam (Barapani) kan tlungin Barapani Nga an lo khai fer-fur rek a, Andy Rose kan chawk pek khah kala hrietzing leiin kan chawl a, Andy Rose biek hmasa phawt nuomin ka Mobile ka hei zawnga ka hmuzo ta reng reng nawh. Nongpoh-a sunghai ka phone khah ka hmang tawpna nin ka hriet a, midang hei intum dingin Driver pa le chau kan ni bawk si. A number bek khah lo inchik lang tha ding a na. Ka biek thei naw phingin Nga khawm inchaw ta lovin kan hung tlan ta pei el a nih.

In ka tlungin ka Mobile sukhmang ka hril a, ka thuomhnaw phurhai kan hei phawrdar vawng a, fiemthua an hril vet Hmeithai khuoa Sertan ding zawng ang el a nih, kan hmuzo der nawh, an hmang tak tak chuh a ni el. Ka ruolhai biek thei pakhat khawm ka nei ta naw leiin lung indenlo tuta zal tumin room ka pan a, in thei lovin khum chungah kan tal kan tal a, beidawngin ka thova ka in thei tak duoiin tin zal pumin ka hla dittak “I am sailing…. Across the sea..!!” ti Rod Steward sak ni lo lem Nk. Tracy Huang-in zun thanga innem rieia awmbawra inthawka sipliem a hung mut suok hem hem ngei khah damte ten ka ngaithlak ta lem a. Ka taksa khum chungah zalin ka thla ruok chuh a hla i zirin van boruok le tuipui chungah an leng vel a.

“Tuifawn insawk bur bur chungah, Damlai Lawngin kan tawl ,

Hnuoi rinum hnusawnin, ka thla invai takin an leng der der,

I kuom ralmuong hmuna chawl dingin, Ka hung pan che….,

Mu anga vuongin, luoithli leh lungngaina sumpuihai ner tlengin,

Hnuoi rinum hnusawnin, ka thla invai takin an leng der der,

I kuom ralmuong hmuna chawl dingin, Ka hung pan che….,

Nun Thlaphang khek le inrumna khel rammawi chu ngaiin,

Hnuoi rinum hnusawnin, ka thla invai takin an leng der der,

I kuom ralmuong hmuna chawl dingin, Ka hung pan che….,” Andy Rose

tiin suongtuona’n ramtin a dap kuol vel a, ka hriet naw kar zanmu chuh kan tuorem thei tah hram a nih.

RISANG MUOL LIEM :

Ka taksa bunga pawimawna nei le mi suk hrattu tak ni naw sienkhawm ka ngaipawimaw laia mi Andy Rose ka biek thei naw hin ka umdan a mi suk khawrin kan khawnghat khawm an mit sel sulin ka hriet a. Ofis-a khawm muong matin kan thung hlei thei naw a, a ruolnu Kong Anita number hlak ka lo inchik bawk nawh. Number pangai an rang thei anga buoipui el naw chuh thawdan ding a um nawh. Ka buoipui sunghin karkhat zet a liem hman nawk tah a. Ka mang khah ka ngaituoin ka lung hi a kap zuol a, mi hrietpui lovin ka chung hi rik tupin helhawl invawiin ka nun hi ka hmang a, phone call ka nghakhla tak nisi’n ka huphur ruk hle bawk a. A hmaa kan inbiek chang in-a leng dingin a mi fiel hlak a, a nu le pa lakah a Hembawk inchang lem pal kan lau leia kalo nuom naw hlak khah pawi kati thar ta em em el a.

Kalo tung em em ka huphur bawk Kong Anita’n a mi hung phone ta ngei a, “Iem i chang a, Andy chanchin i hriet am, Inzin kar a pa a boral ti hung hril che ka tuma chuh ka phone thei der naw che a, Andy khawmin a phone thei bawk naw che ni khah. A pa ruong an vuiliem hma po keikhawm kava um a, ka ruolnu lungsiet umzie hi chu aw ! A pa hi a lungngai-beidawngna le harsatna iengkim an tlunna a na, ata ding chun vanpui chim ang a nih“ tiin. Chuphingleh, ka Mobile sukhmang le ka beidawngzie ka hei hril mawl mawl bakah ka manga ka hmu dan iemani tak a tuok ni ka ring reng thu ka hril mawl mawl a, Andy number a mi hung hril nghal a. A pa hi ka manga Andy ka hmu zan char khah a nih Risang muol a liem ni chuh. … Andy Rose -III ( Luahlo Lungdi ) - Next.

30^th June 2015.

By L.R.S. Puruolte, Rengkai

Ei Pathien iengkim thawthei a thu thienghlim- Holy Bible ngunthluk taka ei tiem a, ngunthluk taka ei suizui pei bawk chun, a hmangaina inthuk zie, ei vangnei zie chau an le ei hmusuok! Ei Pathien thu lo inril zie, a thil tum inthuk zie, a that zie, a tium zie, a ropui zie hmusuok ding tamtak a um a nih!

Ei thupui le zawna inrutak el, tulai Hmar nau Kristienhai laia ngaidan tum tum suok mekna Local Church (Tuolsung Kohran) le Christian Fellowship (Kristienhai Inpawltlangna/inpawlkhawmna) hi ei Bible bu 66 sung a thu hmangin anina tak hei dawn ei tih aw.

Zawna:  Local Church/Christian Fellowship hi Kohran a ni am?

Dawnna: Aw ni ê a!

Thilthawhai 2:42-47; 4:32-37,1 Korinth 12:12-28; Efesi 4:7-16 ah an lang chieng hle. Ei Bible in kohran a i ti tak chu ei Lalpa Isu Krista ringtu le ama hnungzuitu/a taksa hai- eini mi piengthar indiktak (Followers’/Believers’) hai hi ei nih. Ngunthluk taka ei Bible ei sui (Study) chet chet chun ama ringa, a hnungzuituhai inkhawmna- Local Church (Tuolsung Kohran) le Christian Fellowship (Kristienhai Inpawltlangna/inpawlkhawmna) a memberhai hi ‘Kohran’ a ti tak chu a lo nih! Efesi Kohran, Smurna Kohran, Pergamos Kohran, Thuatira Kohran, Sardis Kohran, Filadelfia Kohran, Laodikei Kohran, Filipi Kohran, Beroi Kohran le a dang dang tamtak a hril teu a. Thenmuol Kohran, Tinsuong Kohran, Imphal Kohran, Guwahati Kohran, Bangalore Kohran, Delhi Kohran, … ti leh thuhmun char an nih. Beroi kohran ngat lem hi chu an fimkhur khawp el a. Khang hun laia Pathien mi hmang, inlar le ropui tak el, International Speaker hmingthang le rawngbawltu ropui tak el, Krista Pasaltha, tu i tluk ruollo, Tirko Paula thu hril meu khawm phurtaka an dawng ruol ruol in, a’n dik le indik naw chiengna dingin Pathien Lekha thu nitin an tiem a (an fie nawk) hlak nghat a nih, ti chieng em em el in Thilthawhai 17:10-12 ah ei hmu a nih.  Kha a rawngbawlna hring em em el lei khan Juda mi tam tak le Grik mi challang tamtak a nuhmei a pasalin Lalpa Isu an ring pha bawk a ni kha. Tulaia eini rawi ‘Kohran’ ti hlak hai ang ang chi a hril na hmu ding umsun khawm a sawiselna le a kawk deu fawkna a ni lem nawk dai a nih!!... Chuchu, 1 Korinth 3:1-23 sung a khan chieng takin ei hmu a. 1 Korinth 3:4-na a chun, ‘Nangni lai “Kei Pawla pawl ka nih, kei Appolo pawl ka nih” ti dam in la um sung chun in la tisa mi hle tina a ni naw maw?’, ti a a kawk fawkna ei hmu a. Chuleiin, Mihriem indin fawm pawl, eini rawi thenkhatin Kohran ei ti Denomination a hring lem lem hi chu le! Ei Bible in a dovin, a khap hmak lem a nih. Pawla pawl, Appolo pawl, Kifa pawl… a phal teu teu le! Chu a phal naw lai zing chun Kohran thenkhat lem chu khel le in pawl a thilthaw khawm pawisa der lo dam hmu ding an um rawp hlak bawk.

A pawimaw tak le ei thaw ding tak chu, eini Krista hnungzuituhai (Mi Piengthar indiktak hai) hi inthuruol taka, inrem taka um a, a rawng bawl tlang a, ama ei biek le chawimawi tlang hi a nih. 1 Korinth 12:12-28 a ei hmu angin- ‘Taksa pumkhat, bung hrang hrang, inpengtuoin taksa pum khat, Kristaa chun pum khat ei nih, thilpek hran hran nei ei nih’, ti chieng em em el in a mi hril a nih. 

Ei Bible in a mi’n chuktir chu inpumkhat a um a, Kristien Inpawltlangna/inpawlkhawmna (Fellowship) hun nei rawp hi a lo nih! Christian Fellowship Chi Li ei Bible ah ei hmu a. Iengtin am an hmang hlak a? ti chu hei belchieng ei tih:-

Thilthawhai 2:42-47 ah ei en chun, 42 Tirkohai inchuktirna chu ngaithlain, tawngtaiin an inpawl khawm hlak a... Hi hi eini Ringtuhai Khawsak dan ding a tha ngaidan a mi hrilna ringawt nilovin a praktikal a ei hmang le zawm ngei ngei dinga a mi’n chuktir a nih.

Thilthawhai 4:32-37 ah Ringtu hmasahai nun a mi hril nawk a- 32 Ringtuhai chu lungril hmun khat le ngaituona hmunkhatin an um a, an ni lai tukhawmin an thil neihai chu ‘Ka ta bik a nih’ an ti naw a, thil iengkim an intlang a… ti ei hmu a. A ropui hle. Hiengang taka Kohran indik le entawn tlak, ei Lalpa Isu Krista dit dan ang taka nun hi vawisunnia Hmar nau Kristienhai lai a paw phak hi tamtak hei um tah inla chu nuom a va hang um ngei de!

Tulai hun a Fellowship ei ti ve bawk hi chu. Insukhlim, innui dur dur le hlasak tlang a ni tak el awm. Hieng lei khawm hi ning a tih. Mi thenkhat in Fellowship chu Kohran a ni thei naw a an lo ngai pha hiel nasan khawm ku hih! Kohran hmasa ha’n Fellowship programme an lo hmang dan Bible-a ei hmuhai chu tawite’n lo thlir inla. Thilthawhai 2:42-47 le Thilthawhai 4:32-37 a chieng em em el in ei hmu a nih.

1.   Inchuktir le ngaithlain an um:

Pathien thu tak inzirtirna (Bible Study) hun ah an hmang hlak. Hi hi an Item pui tak a nih. Bible an ngaina a, chu chun ringna tiengah a suk in thanglien hrat em em el a nih.

2.   Bei Khawia fa tlangin hun an hmang hlak:

Bei/Bu an faktlang a, an thil neihai an intawm vawng a, tukhawma ta bik khawm nei lovin Tirkohai ke bulah an the khawm a, initsikna le inelrelna um lovin hlimtakin an fakin an dawn tlang diel diel hlak a nih.

3.  Tawngtaina hun in an hmang hlak:

Pathien pawlna le Pathien kuom a’nthawka hratna lakna hun a di’n an hmang hlak a nih.

4.   Inpawltlangna/Inpawlkhawmna (Titi lengkhawmna) hun in an hmang hlak:

Inhriltuona (Sharing) hun a dingin an hmang bawk. Lawmna amani, harsatna amani an neihai chu inhriettir tawnin an infui tawn hlak.

An Fellowship programme hi a hring thei em em a. Mitinin inhawi an ti a. an hlawkpui bawk a. Chu chau khawm chu nilovin ringnawtuhai khawmin thang ve an chak a. Nitin an pung tuol tuol el a nih! Kristien Fellowship indik tak hi hmang thei hlak inla chu ei harsatna tamtak hi suk kiengin um a t’a. Kohran hi hringin, inhawi a ta, Khawvel mihai/ringnawtuhai khawmin Kohran hi an hung bel taktak ding a lo nih.

Thukharna: Kum 3 le thla 2 (2001-2004) laia Area-Coordinator, Church Ministries, Indian Evangelical Mission (IEM) a Pathien leia India rama Mission Excellency Award lo dawng thei ve ngat Pawl lien ve tak pakhat a ka lo thang ve sung khan Local Church/Fellowship Church a ngir that zie hi tam tak ka hriet le hmu a lo um tah a. Eini hnam sung a khawm chuonganga um chu tlawmte 3/4 vel chau ei la um a. Tulem hin chu an pung pei a. India ram le khawvela missionary tir suokna kawng a khawm an hrat em em. Krista hung nawk hmakhat a ei sin ding indiktak- “Thil siemhai po po kuomah Chanchintha hril”,- Marka 16:15 hi an lak ursun hle. Tu pawl kha pawl tilovin an chawm a, pawlah an hring ve ngai nawh. Social-Gospel Activity ah khawm an hrat em em. Local Church/Christian Fellowship Church that zie hi inzawt ding tamtak a um: Krista dit dan a rawngbawl theina kawt lien tak chu a nih. Krista dit danin Lungril a zau a. Mani intodel an uor a, Missionary chawmna le kawng dang dang a luong suok an hrat thei lem dai a, Sum a tama thaw thei an hau lem hlak. Ei sir el a um, ei unau a var deu hai chu- Hnam changkang hai angin Centralize a um lovin, Localize/Fellowship in an inthuoiin, an ngir zing lem a. Pawl danghai leh Fellowship (Inpawl tlangna) le Rawngbawlna zau lemna ding a Affiliation (Inthlungkhawm) a rawngbawl tlang diel diel chu an thaw lem a nih. Sawrkar le Hmar Inpui amani hmalakna khawm a ngai naw a. Hang tum tak tak, inla lem chu a thei em em awm vei leh, ei Lalpa Isu Krista Remna Lalpa inrawina hnuoiah Thuring (Doctrine) in ang hai bek hi chu Kohran Pakhat in la hang um nawk inla chu ei rawngbawlna chu a va hlawk awm ngei de maw? Local ma ma hi la hang hril nawk pei inla; Nikum (2013) lai el khan ka sui peina a chun, hi hi ka hmu dawk a nih. Rengkai Local Church (ei hriet dan dingin Rengkai a Local Kohran Pakhat, Pu Dr. G.F. Tuollai DACO, Dist. Hospital, CCPur hai Kohran) in 28, mi 250 chauh-in Missionary 15 an Chawm (Support) phak chu tie! Rengkai Kohran lien pahni ha’n an tlukna dingin an memberhai hisapin 240 le 192 bek an chawm phak ve a ngai a nih! (An Kohran hming hi chu hril dal ka tih. A awm chu ngaituo thei an nit ho... (?).

Local/Fellowship a ngir ka hriet a dingchangnaw hrim ka la hmu nawh! Khawvela kohran luongsuok hrattak a hril hlak Peoples’ Church, Toronto dam Local Church an nih. India, S. Korea, USA le ram dang dang a khawm hi dan hi an hraw nasa. Eini India ram ngei a khawm, midang le rawngbawltlang an uor a, entirna’n- hieng Indian Evangelical Mission, FMPB, EFI, EHA, EFICOR le a dang dang a hai hin kut an rawl nasa em em. An detdo tawl em em bawk. Hril ta ro ro a chu, Tu mi theida lo dingin, (theida leh pawilo, thudik a ni tlat si) Pathien hming hmanga thilsuol tak thaw pawisalo ei tam! Muslim hai hin an Pathien hminga thilsuol thaw hi an rin naw hle a, hi khawvel a hin tamtak an lo thaw rawp ta hlak, Pathien hming mi’n a sam lei el a kal ngamlo a um ding an nawh. Pathien hming bawkin thudik chu ei hrilin, ei ngirsuok pui lem ding a nih. Chu chau chun ei ram le hnam, ei insung le khawtlang le ei kohran chu hmasawnin, ei mihriem hotuhai ditdan mei mei ringawt ni ta lovin, Ei Lalpa Isu Krista dit dan lemin um tang ei ta. Chu zet chun an nawm ei lo lungkham rak rak hlak, a thi ei lo inlau em em el hlak, ei RAM, ei HNAM el bakah, ei TAWNG, ei KOHRAN, ei INSUNG le ei KHAWTLANG a DAM VAWNG VAWNG TADING CHUH!!...

Local Church/Christian Fellowship chu Lalpa Pathien mi dit dan ang taka rawngbawl theina kawt lientak umsun a ni si a. Pathien in tul le tha a ti ang peiin malsawm pei raw se!