Khuplal Sawngate (1882-1975): Mi hrat khawkheng

Prof Lal Dena*, Inpui.com Patron

Tiena tlanga inthawk khan Hmar lai hin suon khatah awi um naw khawpa hrat le thilthaw thei hi an lo pieng rawp hlak a. Saizahawl Hmar, lal Pawibawi khuo Khawruliena lo um hlak kha mi hrat khawkhenga hriet hlak a nih. Amiruokchu, ama hratna kha chu Sim le Hmar indo laia a chipui Hmarhai ta ding mi hnawksak um a nih. Khang lai vel hun bawk khan Khawliena mi hrat hmingthang Thangsabut (Buta) Hranngul a um bawk a. Ama kha inbuon hrat le thilrik dawm hrata hriet a nih. Khawdungseia pa inkhai thli thler thlawr feet ruk le inche sari vela insang Tumpang Hrahsel a um bawk a. Mizorama ama hnetu ding awm Tumpang hin mi a hmu zo nawh a ni awm. Ni khat chu Buta le a ruolhai kuli sinthawa inhlaw hai chun Tumpang an inhmupui ta tlat el. Buta kha Tumpang neka dung inhnuoi lem ni sien khawm, pa pieng dan thiem dar par tha deuh el a nih a. A hei inthung dam hin a darin a sin khup el a nih an ti hlak. A ban rek le savawm sum nga an intie tawk an ti chu! Hmunlet zawlbukah Buta le Tumpang an heih inbuon chu, mit a tlai hle an tih. Tumpang chu che hman der lovin Buta’n a heih pawmkang vur vur el chu, Tumpang chun “Buta ka hne naw hi Mautam nekin pawih ka ti lem” a ti hiel. Ring lo takin, Pu Thanher Taite (Pu Zauvapa) khawm kha a hun lai chu inbuon hrata hmingthang ve a nih. Kha lai hun bawk khan inbuon hrata hril ve Ratu khuoa Aichhinga Khiangte a um ve a. An heih inbuon tan hlim chun Thanher chun hrat naw tehlem thawin a heih inkang vur a. Chu hnunga ruok chun Thanher chun thang a hei lak tak tak ta a, “Vervek tieng nghain aw” a heih tia, a phawi kang a. Tum hninaah “Pherzawl tieng nghain aw” a ti nawka, a phawikang nawk a. A vawithumnaa, “In veng Ratu tieng nghain aw” a heih ti nawk a, a nuom hun huna Thanher chun Aichhinga chu a phawikang el a nih. Hrat tak a nih.

 

Pet hla ta lovin ei hril nuom tak, Parbung khawsuok Khuplal Sawngate chanchin a tlawm a zawng heih suih met ei tih. Ama hratzie hi Manipur ram sungah chauh khawm ni lo, India hmar sak pumpuia hriet a nih. Ama hi Hmuntha khuoa kum 1882 khan a pieng a; a pa khawm pa lien vantlang chung Khangzakhup Sawngate a nih. Khuplal nu hming hi ei hriet nawa chu, Leiri pahnama Pulamte nunghak lien, dung insang le hmelthaa inthang a nih. Thingkung a tha chun a ra khawm a tha nge nge an ti hlak angin Khangzakhup nau pasal Khuplal, Thangsunlien (Pu Thangsawihmang-pa) Enga tia hriet le a nau nuhmei pathumhai kha vantlang chung vawng an nih.

 

Khuplal chanchin ei suih hma’n a sangpa Enga chanchin la zuk suih met ei tih. Pu Enga dung insangzie chu feet nga le inches sari vel a nih. Kum 1917-1919-a Kuki helna lei khan British sawrkarin Kuki Punitive Measure, (Kuki helhai do letna) an dina, chu takah chun Pu Enga khawm a thang ve nghe nghe. Ei pi le puhai chun kha helna kha “Haokip Kap” an tia, unau danghai chun “Zo Gal” an ti thung. Khang lai khan Imphalah thil rik dawm inelna an nei a, Pu Enga chun bufai md hni chu awl takin a dawm var var. Ama hi sinthaw taima a nih a, Pu Thangsawihmang mi hril dan chun lo an hei vat khawmin, rawva bul pa vantlang kutring neka lien hai chu vawikhatin a but thuta a fik pei a, a kawl hnaia a phun nghat nghat el a nih. Pathien thu a hung awi hnungin Tinsuonga Pu Enga hi Upa ordainna H.K.Dohnun kutah a chang nghe nghe. NEIGM sunga buoina leiin Pu Tlangval tantu pawl chu sawrkarin biekin bawl khawm a khap tlat leiin. Germanthanpa le biekin bawl dinga thi khawm huoma inpe an nih.

Awleh tuhin Pu Khuplal chanchin ei hriet ang ang zuk hril ei tih. Ama hi pang set tut el, pieng nal tak, sa tha tak, a dung chu feet nga le inches sawm pakhata insang, a awm par lienzie chu ama sum ruk, a rikzie chu mawnhni hni neka rik a nih. A h

ratzie ngaituo chun pate hrat ti ding a nih.

 

Chawnga (Tuovungpa) chun, “Ka pu Khuplal kan hnarna tak chu hreiha zawng a nih. Ama chun ruo bulhai chu hlo phawiin a phawi el a nih” a ti chu! A saihli chu ruova chang ban ruol phel phawk a nih. Chu saihli chun sazaw, awrrang, zawng, saha le savawm vate ang lekin a per hlum hlak. Khuplal tupa Thavel chun a pu chapopuiin hieng ang hin hla a lo phuok nghe nghe:

Vanthang hlienga, vanthang hlienga,

Saw sim tienga I sakhming;

Vanthang hlieng aw sim tienga,

Tlangram pau viel viel hai pheiruon kan sai;

Phuoivawm a hrang in ti po, sul ang kan tum.

Changkam le mankhawng daw dingin ruol a fiel ngai nawh. Hieng sanghal, sazuk le savawmhai dam a awk hlak. A mankhawng rikzie chu sakhi, zawng le saruolhai dam chu mazu ang chauhvin a del per pawt hlak. Inbuon a thiemin a hrat em em a, “Ka vanglai chu mihriem a tunga lawn taphawt chu ti ka nei nawh” a ti tawp el. Mizoram Khawlien Zawlbuk buonzawla Khawlien tlangval hrat takin a lo cho veih a, naupang sawisak takin a the ziel zak el, tlangval dang tu khawmin a cho ngam a um ta nawh. Taithu le Senvawna inbaw hrat parukin an baw hrawna, an hne nawh; ralsamkuoi kutring ruol ruol intan hmawk hmawkin lam thlanga a deng thlak tawl. Vai mi hrat pakhat an ti pa leh Ruongvaisuoah an inhmu a. ruo sangkhat pum suntlang an inel a, Khuplal chun awl takin a suntlanga, Vaipa ruok chun a suntlang zo nawh.

Mautam kum awle fun sari Khuplal-in a kap hliema, tui sunga lut a tum lai a meia a mana hmawltum ang lekin hnuoi vuokna’n a hmang. Taithu khuoa a um laiin siel a ki nguntang chen a kia manin chawrsawnga inthawkin a khai zo. Sumphuk kaitena an thung a, siel a ki tawng khata sei an vuok tal a, a thungna insawn der lovin a man tang thei. Parvachawm khaw kawla siel hel a ki tawng chena sei a kia manin lo fing khat dungah a keiphit. Lungthulien khaw kawla lungpui pathum mawn nga neka rik, a lusipah an chuon zo. Chu lungpuihai chu vawisun chen hin hmu theiin an la um. Hi lungpui pakhat khawm hi pasal tam fe khawma inzawn zo ring a um nawh.

 

Parbung khuo lal bu sung niin zu bel khap sawmpahnia lien, a sunga zu sungbita um, a kutpui le a kutchal khap khingkhat chauhin dung chena insangin a chawi kanga, zu chu inbuo der lovin a dawn kuong kuong. Taithu le Tipaimukh inkara bufai quintal khat a phur zo. Keivawm muol lova an nei tumin a ruolhaiin an chophawk a, kherseu thing pa vantlang kutring ruol changkawlin a her bawk.

 

Mi hrat panga Kailal, Khuonga, Zosel, Bawngte le Thanghrim-in Khuplal an baw hrawna, an rengin hnuoiah an zal vawng a, a tho hmasa sa chu a ben zal pei. Ni khat chu Senvawn lal inah tlangval po po inthuruolin Khuplal suknat an tuma, anni laia pakhatin an ring naw kar a dara a sir a, a heih che met chun panthlang bang a deng rawk nghal. Chu phing leh mi danghai chu an inrel hmang vawng.

 

Leisen khuoah a rawipa Hmangthatsung le lova an fe tumin, Khuplal chu tlangvalhai hmu hawiha an sukphawk deuh a, kherseu tuoi ban ruol a ek thliek a, ek ther fungin a hmang. Tum khat a sangpa Enga (Thangsawihmang-pa) leh an ban saknaa an insuklungsen a, insie thing ril pakhat a sangpa elpui chadena hmangin an sak zo vawng. Kum 1967-in putar kum sawmriet panga a ni hnungin Parbung khuo tlangval po po thaw thei naw thirtieng riktawk tak a kutpui le a kutchal chauhvin a hmet ding var var zo. Tar kuna funghrawl a thun hnungin bawngchal tuoiin a lo baw a, a ki pahniah a mana, lam thlanga a the thlak. A tupa a ma hmingchawi ngeia a iphuok (late) Khuplal Lalkhawthang Infimate (Ruia naupa, Manipur University-a Section Officer lo ni tah) kum sawmpali mi a ni lai a kut khing khat chauhvin a char zo var var.

 

Manipur Rengin mi hrat a fiel khawm tumin Khuplal khawm, a sangpa Enga leh an hang fe ve a. Hmar Company kawl Vaihai hotela bu an du zat zat fa dingin an chophawk a, thawkkhat lovin an unauvin thleng sawmpanga ve ve an zuk fak zo nghal a, hotel neituhai mi a arinta zak el, an khawp hma’n an tho pek hlawl el. Vawi khat an lo rieknaah Khuplal nuhmei a dam naw a, a nuhmei nu vantlang zet chu lo hla taka inthawkin a manspuiin in a hung pai tlung dak.

 

Kristien a ni hma chun Khuplal hi zu le sa chena nun khaw nuom mi a nih. A naupang laia inthawka mi tlawmngai thei, khawtlang ta dinga thahnemngai le neka upahai inza thiem mi a nih. A hung tlangval a, a hratzie mihai hril a ni ruol ruolin, a nun innemzie hrilsa tei a ni hlak. Mi le inhal le insuklungsen nekin a tlawm lem ni an chu hlak. Nuhmei a hung nei a, a tlawmngai theina leiin khawsungah hotu ninaa hlangkai a ni nghal a. Tlang ruvuokna, ngawidawna le sahliem suihnaa a hmasa tak niin hma a thuoi hlak. Zu hmuna hai hla a sak thiem a, a lam thiem bawk leiin mi sukhlimtu tak a ni hlak. Chun, rimawi hieng khuongben, darbu sut, dengduong le rawsem muthai a thiem vawng bawk. Mi daizai tak chu a nih.

 

Khuplal chu a hung upa deuh deuhva, Kristien a ni hma chun “Khuonu” ko thla thei khawpin thiempu sin khawm hlawtling tak le ropui takin a hung thaw pei a. Natna khir tak takhai dam a sukdam a, bawlhmunah a rawngbawlna leiin mihai inza le inpak a hlaw hlak. Kum 1940 khan Lakher pakhat Pathien thu hrilnain a hne hle ni ta veng a tih, a pieng thar a, Kristien ringum, ngilnei le Pathien ram ta dinga tangkai ni zing pumin kum 1975 khan Pathien kuomah a lo chawl tah.

 

Khuplal hratna hin Hmar hnam chauh ni lovin, tlang mi po pohai hming a suktha a. Hrietzingna (memory) a nei tha em em a, Sikhawvar October thlasuoka Pu L.Keivomin a ziek ang khan, a hrietzingna kha library (lekhabu sie khawmna) ang tluk a nih. Amaa inthawk khan Hranchawn hla le pipu hla hlui tam tak le nun rohlu tam tak hriet le inchuk ding a um a, chuonghai chu thangthar mi thiemha’n a tharin la hung ziek pei an tih. Ama hratna leiin hnam a him a, do le ral kara khawm mi pakhat chauh hratna le huoisenna khawmin mipui sang tamin damna an hmu hlak. Saizahawl hratna chu hnam ta dinga thina a ni a, Khuplal hratna ruok chu hnam ta ding damna a ni thung. Pu Khuplal hrietzingnain Tipaimukh bielan football tournament dam an buotsai hlak a. Tipaimukh biel chauh ni lovin Pu Khuplal hrietzingna dingin hnam pumpui khawmin iemani thaw ei bat a nih. Pu Khuplal thatna, a nun innemna, a tlawmngaina le mi dang ta ding an pumpekna hai chu hun phaiphinah a hniekhnung a mi lo maksanpekhai hi zuiin, thiltha thawin ei nun suksip tum veng ei tiu.(Pu Khuplal chanchin hi Thuro, February-March issue, 1986-a insuo tah kha siem danglam meta hung insuo nawk a nih-LD)

About the author: Prof Lal Dena is a historian teaching at Manipur University, Manipur, India. He is a regular contributor to this portal for the last three years.