Keivom Nite to be held on Dec 16

NGENNA (ARTICLE)

(October 22, 2011)

Pathien zar zoin Sinlung Indigenous Peoples Human Rights Organisation (SIPHRO) chun hungtlung ding December 16, 2011 khin Happy Heart School Auditorium, Bethel, Churachandpur (Manipur)-ah Lalthlamuong Keivom (L. Keivom) hla hai hmangin “Keivom Nite” a huoihawt ding a ni a. Pu L. Keivom-in hnam ro hlutak ami phuok le siem pek hai hmangin hla ruoi ei nei el khelah, ama thu le hla haia inthawk “Cultural Revolution” nei ei tum le nuomna ram chu sir ṭan dingin SIPHRO chun an buotsai tlut tlut zing a nih. “Keivom Nite” a hin Pu L. Keivom ram ngai hla hai chu Choir-in sak an ta, a hla lenglawng hai ruok chu Solo Artiste dang dangin sak bawk an tih.

Ei khawvel inlumletdan en zingin ei ram ei hnam-in harna hnawtin ei beisei mek hai khawm hi Pu L. Keivom hlaa inthawk ngawt khawmin hmathlir ram chu penpui le sukhrat ei tum a nih. Hnam ro hlutak haia inthawk ei ram ei hnam tungding ding le keihar dingin Siemtu'n alo ruotremna lampui hai hi hmang thiemna chang khawm hreloin um hlauh ei tih ti inlau a um hle. Ei ram ei hnamin hmatieng ei pen peina kawngah intodelpui ding khawp ro ami pek hai hi eini ngeiin ei hmang hlu le ei hmang ṭangkai a hun takzet tah. Hmasawnna hming chawia thu dang, hmel dang le ri dang dang haiin mi tuelkhawm a run bo mek zing laiin SIPHRO chun eini ngei thawsuok hnam ro ṭha haia inthawk ram le hnam hartharna nei ngei ei beisei el khelah, hiengang hnam ro mi siempektu haiin anmi dampui zing laiin an ṭhangsuona chawimawi malamin hi hunser hi ei rawt nasan tamtak laia mi ani sa bawk.

Chu hun ding chu fumfe takin ei inbuotsai laizingin, hi ni hin L. Keivom puol lieu a siem lekhabu (On Keivom) tlangzar dingin ei buotsai zing a ni a. Hi le inzawmin nang khawmin Keivom le nang am a nih, i hmu dan annawleh ama le inzawmin article (Hmar, English, Lusei) hung thawlawm ve ngei dingin kan hung ngen che. A thei hram chun November 15, 2011 hin hung pe/thawn hman dingin kan hung ngen bawk che.

Ram le hnam ta dinga in thawpui,

Sd/- 
(DAVID BUHRIL)
Chairman
Sd/-
(LALREMLIEN NEITHAM)
Secretary
Note: Sum ṭhangpuina pe nuom hai chun kan mobile number-ah contact thei kan nih. David Buhril (09615839780), Lalremlien Neitham (09582904655)