‘Expelled’ HPC(D) president explains his position

Churachandpur, October 6, 2011: Pu Lalhmingthang Sanate lekha, HPC(D) letter head hmanga ziek, a lekha ziekna tarik zieklo, ama suoi thawna thang chu zani zantieng khan hmu a ni a, chu lekhaa chun hieng a hnuoia thuhai hi an ziek:

I Chanchinbu Hmasawnna Thar Vo. 26/294, 1st October 2011 suoka khan ka chungthu, indik lo taka mi pakhat Pu Zosangber in a phuokdawk, David L. Hmar le John F. Hmar hai in an insuo chungchang kha a hnuoia ang hin ka hung dawn. HPC(D) hi kei Lalhmingthan Sanate in ka phun a ni a, a party ngirna san le thil tum hi Chanchinbu a ziektu Zosangber nekin ka hriet chieng lem a. HPC(D) party hi ka khata 1995 kum a ka phun lai khan Pu Zosangber hi ka rawn naw a, khawvela hin a lo um a, kei neka pieng hmasa lem a ni khawm ka la hriet nawh. Party phun kum khawm hi tuchen hin la hre naw nih. HPC(D) party hming a mi tlawmngai, hnam hmangaitu thisen le hringna tam tak chan a ni hnung khawma, hnam hmangaina lungril pai tlat a tuchen hin written constitution um lova la fe zing a nih.

Kum 2008 khan Pu Zosangber hin HPC(D) party hi a hung zawm ve a, a zawm char a inthawkin inremnawna chi thu khel hmangin a tu char char nghal a, mak ka ti thei hle!! Constitution nei dinga Council in thutlukna a siem bawzuiin, inthuoidan (constitution) khawm ka draft a. A hung zawm hnungin 2008 kum vek khan vawikhat ka phar; written constitution nei a rem chang naw thu uor takin a hril a, drafted constitution khawm chu tuchen hin pawm (approved) lo in a la um a nih. A tha zawng a thu thluok lovin, a seitna ding zawngin hma a lak nasa. A hmalaknaa, thua lekha kha insuo a hung nih.

A dawnna a hnoia ang hi ka hung tarlang:

1. HPC(D) in ram le hnam ta dinga thiltum le hmathlir bawsiet ding le zawm bik ding written in a la nei nawh.
2. Inthuoina Dan (Guide-lines) Army Wing hnuoia Cadres hai zui ding bye-law chaunaw chu, a dang written in a nei nawh.
3. Ka remtina (consent) la lova Executive Council ko hi ka pawm nawh.
4. KNO President in mi hohlimpui a nuom feelers hmangin thu a hung thawn a, HPC(D) C-in-C khawm vawihni lai an hmupui ta thu a hril langsa a; inbiekna nei a hung rawt leiin kei chun lungril tluong tak hmangin ka lo pawm a, July, 2011 khan kan hmupui ta a. Chu tum chun iengkhawm ka hril nawh a, tlangmi (Non-Naga Tribals) hai inthuruolna siem a hun ta thu hai a hril uor hle a. Manipur sung a bengvar deu hai in MLR Act chunchangthu an ngai pawimaw zie khawm ka hriet ta bawk leiin, inbiek nawk khawm chu suolin ka hriet nawh. Nasataka KNO President in a mi hung fiel nawk leiin August 31st 2011 khan kan biekpui nawk a, ka thawktpui dang, Commanderin-Chief ti lo midang khawm a lo hohlim pui ta haiin ka kawla an lo intlun vawng ta a sawn thu khawm a mi hril bawk a nih. A nina taka chu chuong thu hai khawm chu tukhawma an mi la hril naw a ni a, mi lai insukmuolpho pal thei a ni leiin lungawp inkai in ka um a nih.

Nasa taka a mi ngen leiin, kei chun hienga agreement siem a phut tlat hi, Pathien remruot khawm ni thei a tih tiin UPF (United People Front) siem dinga agreement sign khawm kha Pu Ropui in a lo thaw tawpa Council in a pawmpui el a. President level chauva dingin thang ka tak UPF tieng a thangna leh inkal tlata ngaina a um chun Council in a pawmnaw khawmin lungawi ka tih ti a in ngaituoin “Deed of Agreement” chu 31st August, 2011 khan ka signed a nih.

Date 12/9/2011 ni khan Finance chungchang ngaituo lai zingin Pu Zosangber in a hung phawr lang a, ka sign nasan khawm ka hrillang nghe nghe a nih. Hi ni hin Hmar Inpui President Pu Lalawilien a conduct a nih a, Deed of Agreement chu lo Cancel or Withdraw dingin thu tlukna Council chun a siem ta a. Chu dungzui chun, ka withdraw na chu Date 18/9/2011 khan KNO President kuoma ka hming signature thawna le chun ka pek a, copy khawm ka la kawl zing.

Date 19/9/11 khan, Council member hai kawlah ka withdraw ta thu ka hril (puong) a mi hrepuitu khawm thangsain. Chu ni tak chun, Pu Zosangber chu Mizoram Palai inbiekpui suonlamin a hung thang nawh.

Dan bawsiet ding party in a la nei naw khawm in bawse in an min tum a; Council thu ka zawm khawm in hnam zawrin an min tum bawk. Hieng po po a inthawk in a san bul det um lo (baseless) a muolpho taka mi thin thlak, mi pakhata inthawka suokin, an tum zie a chieng!!

Tuhin HPC(D) President ka nina ka lan ban nawh a, tu kuom a khawm Presidenship hi charge ka la pek nawh. Inban le charge mi dang pek khawm ka rin tak a ni naw a. Tlang taka ka keithuoina a hril tlang sukfel khawm a tam lem in an nuom chun ka remti thu vawi tam tak ka hril ta a. Amiruokchu, a se zawng taka thu khela Presidentship kan thla dan ding ngaituona hi ka pawm thei nawh, ram le hnam thu le inzawm a ni tlat leiin.

HPC(D) hi mihriem hmangaina le thahnem ka ngainaa kan din chu Krista intuokpui nan ka hmang a, ram hlua chatuon dai kei chun ka chang pha ta a. Tuhin, chu chatuon ram neitu thu hi ngai pawimaw hmasak a tul a nih ti hi ka chieng a. Chu thu ang naw chun, ei hnam tluse ta hi indawk ta naw nih. Hlimhlawpna, zu le sa chen le nuhmei pasalna in hnel puma Hnam thuoi hi bansan a, Pathien dit dan anga indikna le ringumna, hmangaina, taimakna, etc han inthuom a ei tho dawk naw chun, ei hnam a tluse sawng ding a nih. Chuleiin tho ei ta ISU KRISTA le intlawn zing pumin, ei hnam tluse ta hnung hi indin thar nawk ei tiu.

Hi HPC(D) Party hi ka khat chauva 1995 khan kan din a nih. Kei a hamthatna ding khawm ngaituo lovin unau sawm (10 lai a Graduate um sun, ka nu le pa mi hringtu hai khawm kan lekha inchuk sawlra sawr kar nghakhla taka an mi nghak lai rana, Hnam ka hmangai leia kan din a nih. Kum 16 a fe mek khawm a, tlangval tlawmngai, in le lo suoksan a Hnam sin thaw hai le khawsak ang khat rawng in ka lo khawsa a nih. Insung khawm sakdet indo le insukburip khawm ka la tum naw a, ka chengana In Hmarkhawlien a khawm a chung rangva, a bang rap (ruo) hmawn rak tah a ka um a, ka nuhmei nauhai ber rak in an khawsa tawk tawk a.

Sawrkar Officer ka ni thei hun lai khan ka lo lak nisien khawsakna inthlau dan ding ka ngaituo (buktuo) thiem naw bik khawm a ni nawh. Indiklo taka intum ka ni hma khawm khan, ka nina (President) hmang tangkai a hlawkna hnawt thei a nih ti khawm ka hriet hmai bik naw a, a thaw dan khawm ka hriet. Nisienkhawm chuong thlakhla a party hi indin ka ni naw leiin ka thaw tum ngai nawh. Hiengang ka tlin tawk ang peia, mipui hmakhuo ka varna’n a phak ang peia ka thaw hai hi, ka
tanghmasielna lova ka lo um lei hin hmusit ka hlaw pha niin ka hriet a, ka lung a na takzet a nih.

Hnam hming le HPC(D) party hming a iengkhawm thaw ta lo dinga thu an mi rel khum hi Hnam an hmangai naw zie sukchiengtu a nih. Chuleiin thu khel ngawt ka chungthuah an hril hlak ti hi in hriet ka nuom.

A tawp taka chun ka chunga thil tlung leia, zan in lo le bu khawm fa tha pei lo khawp hiela mi lo tuorpui, Pathien kuoma mi lo tawngtaipektu hai po po chungah lawmthu ka hril a. Mi hmangaitu le lunginsiettu in tam zie Path-ien in a min hriettir nuom leia hi thil hi tlung am ani ding ti in ngaituona khawm ka nei hiel a. Ka ta dingin thlamuongna le hlimna a mi pek hlak. Hmar mipui kuoma indikna le ringumna chel tlat a, hmangaina a mani theina seng hmang a, hnam sin thaw dingin lawmthu hril pumin mipui ka ngen a nih.

Mi tlawmngai le huoisen, beidawngna leia kut le ke thlep ta po po hai, hung suok dawk dingin ka fiel cheu a nih. Indikna lal hmawl chawia hmathuoi dingin ka lan pei zing a nih.

Source: Hmasawnna Thar, October 7, 2011