Ziektu: Pu Zarzolien Keivom.
Sikul thra ei ti chu zirtirtu thra umna a ni deu tak awm. Chuong ang sikul thraa chun ei nauhai inkaitir tumin nu le pahai chun a hnai a hla dawn loin ei dap vel a, ei tlin baka khom puk chen huomin thrang ei lak hlak. Thiemna le varna tienga khawvel intlansiekna an sang ta em leiin mi neka thiem filor deuhai ta ding naw chun sin thra hmu zo ruol a ni ta nawh, Hi lei hin mi tam tak chun chawm le enkol zo long inlauin nau an nei tam ngam ta naw hiel khom niin an lang. Nu le pa hmangaina hi chu a lo inthuk ngei de aw! Nei bak hiela ei nauhai sikul thraa ei inkaitir baka khom mi nauhai neka an thiem lem dit luot luotin in tienga inchuktirtu ding chen sum tam tak tak sengin ei la ruoi nawk ta pei a. Nu le pa tam tak chu ei nauhai inchukna buoipuiin a thlum a al khom fa phak loiin ei vanglai nihai ring intren rakin ei hmang zo hlak.
Mani in lum suoksana thiem inzir dinga India khawpui hran hrana um thralaihai, khawpui nun inhâka zan meng sawt le zing tho inhnuk leia college nang lo ti um lo dingin thrangharin ngaiven ei tiu. Midang le mani tram hnem khop khom hawn loa kut bentheka in inlawi lo dingin, nu le pa le hnamin a beisei sukpuitling ngei dinga thrang la dingin ei infiel takzet a nih. Nu le pahaiin ka sawl ka kham ti loa thi le thau inpola an sum lam suok po po senga an min chuktir trawk trawk a nih ti theinghil ngai nawng ei tiu. Ei Pathien thuin inchuktirtu chun taima takin inchuktir sien, mi kawktu khoma taima takin kawk raw seh a ti ang khan inchuktuhai khoma taima taka inchuk ding ei nih. Mani sina ringum chu Pathien rongbawltu a ni zing a nih ti hrein, lekha tiem sukbahla thei ding ieng thila khom insukhnok ngai lo dingin inchuklaihai hi fimkhur ei tiu. “Mani sin thiem mi i hmu am? Ama chu lal kuomah sin thawng a ta, Mi naranin sor phak naw ni hai” (Thuvarhai 22:29).
Sikul thra le zirtirtu thra el khela thra nawk zuol, zirtirtu thra Isu chanchin hi la hang hril nawk met ei tih. Johan 15:5 chun Isuin “ka thrang loin iengkhom in thaw thei si nawa” a ti ang khan nu le pahai khoma ei nauhai enkolna dingin sum le pai hau ieng ang inla khom Isu thrang lo chun ieng bar ei chok dok thei nawh ti hi ei theinghil lo dingin dit a um. Isu le naw hin chu thiemna, varna, insangna, thratna dan le felna dan lungrila hung par ding ngei khom chu hluotu suol ral liena inchang thei vong a ni si a. Ei nauhai hmangaia thil thra ei inchuktir nuom a ni chun sikul thra le zirtirtu thra Lal Isu ke bulah thruoi hmasa photin, a ram le a felna zongpui hmasang ei ta, thil dang po po chu a mi pek sa el ding a nih. Thing lera inphok kai ding chun a bula inthoka inphok tran a ngai angin, ei nauhai hi Pathien tri dan inchuktir hmasa phot inla, chu hnungah chun hmun dang dang le ram dang dangah tir suok inla khom hlawsamin an hung inlawi ring a um nawh, Pathien tri chu varna bul a ni leiin mi chu a var phot chun lekha khom hung thiemin sin thra le insang khom hung hmu ngei a ta, voi le changa thil suol thaw ding lo huitu laka khom inveng thiemin, pet hmang ngai naw nih ti hi ring a um a nih. Mi sukhrattu Krista zara iengkim thaw thei a nizie chu Tirko Paula khomin a mi hril (Filipi 4:13).
Hebrai tlangval pali, Babulon varna inchuk dinga thlang suokhai laia mi a hming Daniel chanchin kha ei hriet seng ring a um, a thiemna le a varna kha a ropuiin a mak a nih. Anni rawi sabzek lak kha a tam hmel khop el, lalin a’n don ta phot hril zung zung thei dinga Babulon varna tinreng inchuk a ni top el. An sikul thrat dan ding le zirtirtuhai var dan ding kha a nih hriet nuomum pakhat chu. An sikul naupang ding khom mi naran thla le nau ni lo, lal thla le milien naua khom chu mi naran el la ni nawk lo, pieng fel le hmel thra, thil hrang hrang inchuk thei dinga lungvar nei, hrietna nei thra, thil man zung zung thei mi le lal ina thok tlak mi ni dinghai chauh an thlang a nih. Chuonghai lai chun Daniel le a ruolhai khom kha an thrang sa ve a nih.
Zan khat chu Nebukadnezzarin mang mak tak el a nei a, a ngaituo buoi leiin a in nawk thei ta naw a. A mang chu hril dingin mitdawivai hai, aisanthiem hai, dawithiem hai le arasi hmanga aisanthiem hai chu a ko khawm a, a lung sukzingtu mang le a umzie chu hriet a nuom leia a ko an nih. Arasi rawn mihai chun Aramik trongin “Aw laltak, kumkhuoin dam rawh. I mang chu i siehlawhai hi hril phot la a umzie hril kan ti che” an ti a. Lal hlak chun, “Ka mang le a hrilfiena in mi hril thei naw chun chan nawi vong ning in tih” a ti bur el si a. Arasi rawn mihai chu an khawk dèr a, “Lal thil indon hi a hril thei ding pathienhai chau naw chu khawvelah tukhom um naw ni hai, anni hlak chu mihriem laia cheng an ni ve si nawh” an ta. An thu hril chun lal chu namen loa a suklungsen leiin Babulon rama mi var po pohai chu sukhlum vong dingin thu a pek tah a nih. Daniel le a ruolhai ngei khom chu sukhlum ding lai chun an thrang ve a nih.
Mivarhai sukhlum dinga tir, lal vengtu kawmandar Ariok chu Danielin var tak le thiem takin a lo inbiekpui a. “Iengti dana chuong ang lawma thupek khauh chu lalin a’n suo am a na”? a ta. Ariok chun Daniel kuomah thil um dan iengkim chu a hrilfie a. Chu phing leh Daniel chu lal kuomah a fe a, a mang chu a hrilfie theina dinga hun iemani chen bek la pe dingin a hni a. Daniel chu a inah an lawi a, a ruolhai Hanania (Sadrak), Misael (Mesak) le Azaria (Abednago) kuomah thil um dan chu a hril a. Babulon mivarhai ruola anni khom sukhluma an um ve nawna dingin van Pathien kuomah zangaina ngen a, thu khir chu hril fie theina hni dingin a hril tawl a. Chu zan lá là chun thu inthup chu Pathienin Daniel kuoma chun a hung inhriettir a. Daniel le a ruolhai zarin Babulon rama mivarhai po po khomin thina chu an pumpel pha tah a nih.
Daniel le a ruolhai khan Babulon sikul thra le zirtirtu thrahaia inthoka an thil inchukhai nek daiin van Pathien kuoma an thil inchuk khan varna inthuk lem le inril lem a pek lem daih a nih ti an mang hang hrilfie thei dana inthok hin a chieng hle a nih. Daniel chu ni tinin Jerusalem tieng tukver hongin Pathien kuomah a trongtrai hlak. Chu chu a varna thuruk chu a nih. Eini khom ei lekha tiem ding tawm zat dam, ei sin ding ei tran tawm zat damin trongtrai ve hlak ei tiu. Sam bua a ei hmu angin, Pathien dan thu lawm a, a sun a zana dawnkhawl hlak mi chu tui luong zingna kama thing phun, a hun taka ra insuo hlak, a hna khom vuoi ngai lo, a thilthaw phota hmuingil hlak a nih (1:2,3). Nangni lai tu khomin varna a tlasam chun hal lo le inro loa mi po po kuoma pe hlaktu Pathien kuomah hni sien, pekin um a tih ti ei Pathien thu bokin a mi hril. (Jakob 1:5).
KEIVOM RUN(Greater NOIDA)
29 August 2011.
Sikul thra ei ti chu zirtirtu thra umna a ni deu tak awm. Chuong ang sikul thraa chun ei nauhai inkaitir tumin nu le pahai chun a hnai a hla dawn loin ei dap vel a, ei tlin baka khom puk chen huomin thrang ei lak hlak. Thiemna le varna tienga khawvel intlansiekna an sang ta em leiin mi neka thiem filor deuhai ta ding naw chun sin thra hmu zo ruol a ni ta nawh, Hi lei hin mi tam tak chun chawm le enkol zo long inlauin nau an nei tam ngam ta naw hiel khom niin an lang. Nu le pa hmangaina hi chu a lo inthuk ngei de aw! Nei bak hiela ei nauhai sikul thraa ei inkaitir baka khom mi nauhai neka an thiem lem dit luot luotin in tienga inchuktirtu ding chen sum tam tak tak sengin ei la ruoi nawk ta pei a. Nu le pa tam tak chu ei nauhai inchukna buoipuiin a thlum a al khom fa phak loiin ei vanglai nihai ring intren rakin ei hmang zo hlak.
Mani in lum suoksana thiem inzir dinga India khawpui hran hrana um thralaihai, khawpui nun inhâka zan meng sawt le zing tho inhnuk leia college nang lo ti um lo dingin thrangharin ngaiven ei tiu. Midang le mani tram hnem khop khom hawn loa kut bentheka in inlawi lo dingin, nu le pa le hnamin a beisei sukpuitling ngei dinga thrang la dingin ei infiel takzet a nih. Nu le pahaiin ka sawl ka kham ti loa thi le thau inpola an sum lam suok po po senga an min chuktir trawk trawk a nih ti theinghil ngai nawng ei tiu. Ei Pathien thuin inchuktirtu chun taima takin inchuktir sien, mi kawktu khoma taima takin kawk raw seh a ti ang khan inchuktuhai khoma taima taka inchuk ding ei nih. Mani sina ringum chu Pathien rongbawltu a ni zing a nih ti hrein, lekha tiem sukbahla thei ding ieng thila khom insukhnok ngai lo dingin inchuklaihai hi fimkhur ei tiu. “Mani sin thiem mi i hmu am? Ama chu lal kuomah sin thawng a ta, Mi naranin sor phak naw ni hai” (Thuvarhai 22:29).
Sikul thra le zirtirtu thra el khela thra nawk zuol, zirtirtu thra Isu chanchin hi la hang hril nawk met ei tih. Johan 15:5 chun Isuin “ka thrang loin iengkhom in thaw thei si nawa” a ti ang khan nu le pahai khoma ei nauhai enkolna dingin sum le pai hau ieng ang inla khom Isu thrang lo chun ieng bar ei chok dok thei nawh ti hi ei theinghil lo dingin dit a um. Isu le naw hin chu thiemna, varna, insangna, thratna dan le felna dan lungrila hung par ding ngei khom chu hluotu suol ral liena inchang thei vong a ni si a. Ei nauhai hmangaia thil thra ei inchuktir nuom a ni chun sikul thra le zirtirtu thra Lal Isu ke bulah thruoi hmasa photin, a ram le a felna zongpui hmasang ei ta, thil dang po po chu a mi pek sa el ding a nih. Thing lera inphok kai ding chun a bula inthoka inphok tran a ngai angin, ei nauhai hi Pathien tri dan inchuktir hmasa phot inla, chu hnungah chun hmun dang dang le ram dang dangah tir suok inla khom hlawsamin an hung inlawi ring a um nawh, Pathien tri chu varna bul a ni leiin mi chu a var phot chun lekha khom hung thiemin sin thra le insang khom hung hmu ngei a ta, voi le changa thil suol thaw ding lo huitu laka khom inveng thiemin, pet hmang ngai naw nih ti hi ring a um a nih. Mi sukhrattu Krista zara iengkim thaw thei a nizie chu Tirko Paula khomin a mi hril (Filipi 4:13).
Hebrai tlangval pali, Babulon varna inchuk dinga thlang suokhai laia mi a hming Daniel chanchin kha ei hriet seng ring a um, a thiemna le a varna kha a ropuiin a mak a nih. Anni rawi sabzek lak kha a tam hmel khop el, lalin a’n don ta phot hril zung zung thei dinga Babulon varna tinreng inchuk a ni top el. An sikul thrat dan ding le zirtirtuhai var dan ding kha a nih hriet nuomum pakhat chu. An sikul naupang ding khom mi naran thla le nau ni lo, lal thla le milien naua khom chu mi naran el la ni nawk lo, pieng fel le hmel thra, thil hrang hrang inchuk thei dinga lungvar nei, hrietna nei thra, thil man zung zung thei mi le lal ina thok tlak mi ni dinghai chauh an thlang a nih. Chuonghai lai chun Daniel le a ruolhai khom kha an thrang sa ve a nih.
Zan khat chu Nebukadnezzarin mang mak tak el a nei a, a ngaituo buoi leiin a in nawk thei ta naw a. A mang chu hril dingin mitdawivai hai, aisanthiem hai, dawithiem hai le arasi hmanga aisanthiem hai chu a ko khawm a, a lung sukzingtu mang le a umzie chu hriet a nuom leia a ko an nih. Arasi rawn mihai chun Aramik trongin “Aw laltak, kumkhuoin dam rawh. I mang chu i siehlawhai hi hril phot la a umzie hril kan ti che” an ti a. Lal hlak chun, “Ka mang le a hrilfiena in mi hril thei naw chun chan nawi vong ning in tih” a ti bur el si a. Arasi rawn mihai chu an khawk dèr a, “Lal thil indon hi a hril thei ding pathienhai chau naw chu khawvelah tukhom um naw ni hai, anni hlak chu mihriem laia cheng an ni ve si nawh” an ta. An thu hril chun lal chu namen loa a suklungsen leiin Babulon rama mi var po pohai chu sukhlum vong dingin thu a pek tah a nih. Daniel le a ruolhai ngei khom chu sukhlum ding lai chun an thrang ve a nih.
Mivarhai sukhlum dinga tir, lal vengtu kawmandar Ariok chu Danielin var tak le thiem takin a lo inbiekpui a. “Iengti dana chuong ang lawma thupek khauh chu lalin a’n suo am a na”? a ta. Ariok chun Daniel kuomah thil um dan iengkim chu a hrilfie a. Chu phing leh Daniel chu lal kuomah a fe a, a mang chu a hrilfie theina dinga hun iemani chen bek la pe dingin a hni a. Daniel chu a inah an lawi a, a ruolhai Hanania (Sadrak), Misael (Mesak) le Azaria (Abednago) kuomah thil um dan chu a hril a. Babulon mivarhai ruola anni khom sukhluma an um ve nawna dingin van Pathien kuomah zangaina ngen a, thu khir chu hril fie theina hni dingin a hril tawl a. Chu zan lá là chun thu inthup chu Pathienin Daniel kuoma chun a hung inhriettir a. Daniel le a ruolhai zarin Babulon rama mivarhai po po khomin thina chu an pumpel pha tah a nih.
Daniel le a ruolhai khan Babulon sikul thra le zirtirtu thrahaia inthoka an thil inchukhai nek daiin van Pathien kuoma an thil inchuk khan varna inthuk lem le inril lem a pek lem daih a nih ti an mang hang hrilfie thei dana inthok hin a chieng hle a nih. Daniel chu ni tinin Jerusalem tieng tukver hongin Pathien kuomah a trongtrai hlak. Chu chu a varna thuruk chu a nih. Eini khom ei lekha tiem ding tawm zat dam, ei sin ding ei tran tawm zat damin trongtrai ve hlak ei tiu. Sam bua a ei hmu angin, Pathien dan thu lawm a, a sun a zana dawnkhawl hlak mi chu tui luong zingna kama thing phun, a hun taka ra insuo hlak, a hna khom vuoi ngai lo, a thilthaw phota hmuingil hlak a nih (1:2,3). Nangni lai tu khomin varna a tlasam chun hal lo le inro loa mi po po kuoma pe hlaktu Pathien kuomah hni sien, pekin um a tih ti ei Pathien thu bokin a mi hril. (Jakob 1:5).
KEIVOM RUN(Greater NOIDA)
29 August 2011.
Post a Comment
Comments not related to the news or article may be deleted.