SUM IBAWM RAM: KAN ZINNA

Ziektu: Prof Lal Dena, Manipur University

Meghalaya (The Abode of Cloud) khawpuiah Hmar Students’ Association, Shillong Joint Headquarters hotuhai fielna leiin 54th Freshers’ Meet–cum-Annual Conference-ah khuolliena thang dingin Thlazing (August) ni 29, 2011 khan fielin ka uma.Thawtanni 29.8.20 khan Ms Mawii Darngawn chun a Maruti carin Alukudam tunga Pu R.Th. Varte, Senior Anthropologist (Physical), Anthropological Survey of India ina tlung dingin HSA hotuhai leh a mi hang phur nghala, a khulangkhang an fuk nghal. Ms Mawii Darngawn hi Upa Neisel le Pi Darzing naunu a nih a, a nu hi a hun laia nunghak hmelthaa inthang, Pherzawl High Schoola inchuklaiha’n “Khaw mie, nunghak hmeltha Darzing chu” tia Ngullien Memorial Football Tournament en changa an en mathlawn lo chu a nih.

Thlazing (August) ni 30, 2011 Thawleni chun zing dar 11-a inthawkin HSA 54th Freshers’ Meet-Cum-Annual Conference chu U So So Tham Auditorium-ah tan a nih a. Hmarhai makpa DNW Momin, Director, Department of Agriculture, Government of Meghalaya, Guest of Honour-in a hung bawk a. Thanghlui Mihrang chanchin le Thangthar Mihranghai (Inchuklaihai) chanchin khaikhi malamin thu ka hril a.

En tum, mihrang pasal thahai,
An Sinlung ram maksanin;
Thlang tieng kawl rawnah an liem a,
Ei ram sanin rinum an do

ti le Pu Rev. Hrilrokhum Thiek hlaphuok “Zaleng kan lawm” tia a chang lina:

Kan ram tuonna an dang hei en ve tum,
Tukram kan tuon run in sunga;
Sawmfang kur nguoi phek za tam,
Valhriem lunglai maw va dawng;
Ruolthar lunglawma lo chang

ti hai sirsanin tulaia lekha inchuktuhai hi metropolitan city haia kai ve phak ta, tribal danghai chauh ti tak lova, Vaihai khawm el phaka thang la ding ei nih; ei thluokhai hi Vaihai thluok neka hnuoi hnunga Pathienin a siem a ni nawh a; Vaihai khum khawpin lekha tiem ei tiu. Mani ta dinga lekha inchuk ei ni lai zingin, degree insang le hlawtlingna insang ei hmu hin hnam ei chawimawia, hnam khawmin a mi uongpui a nih tiin Pu Hrilrokhum hlaphuok chang thumnain ka khar a:

Ka chun nunnem umkhuo insawt naw la,
Hrai thar par ang lawmna chu;
Hran lu ang zuong indawn la,
Hung hawn de ning zaleng lawmna (B.A./B.D./M.A./IAS etc);
Hringkhuo tui ang lo dam sien- tiin.

Hun lai lung chawm khat chawl hadam hnunga, hla thuoituha’n “Aw Kan Hmar ram’ ti hla thlangin kan hei sak nawk a. Kan sak zo charin ‘Tu’m hla thlang nuom’ an heih ti le inruolin ka ban ka phar a, “Kan tlang ram mawi hring dum duoi hi” ti hla thlangin Pu Rohminglien Buhril le Prof L.Fimate platforma kai dingin ka hei fiel nghal a. Nk Naomi Lalnunhlim-hai leh kut inchelin kan heih lam ti ti chu an hawih cham cham ngei! Vel khat chauh an mi sakpuia, vel hni vel thum la heih sak nawn inlang, Naomi kha la heih slow motion-pui met lang ka chak veih leh.

Prof L.Fimate khawmin infuina thu tha tak tak a hril a, na a tlai hle.

Thu le hla kha an kar thlakin fe sien. Ei artist um sun hai hlak chun Gospel Song ruokin an min awi a. Hieng huna hin chu hnam hla, sai hla le hla lenglawnghai sak uor lem inla. Gospel Song-hai hi direct taka Pathien inpakna an nih a; Love Song-hai khawm hi indirect-a Pathien inpakna vawng an nih. Pathien thilsiem laia mawi tak le chunghnung tak mihriem inpak hi Pathien inpak ei nih ti theinghil ngai nawng ei tiu.

Thlazing (August) ni 31, 2011 Nilaini hi holiday a lo ni bawk a. Pu R.Th, Pu Rohming leh ram fang vel dingin kan suok a. R.Th-in car a khal a. Ama hi thu le hlaa ka aihnaphapui, kan titi nuom zawng le kan inhnikna khawm an ang bawk. Pu L.Keivom a tuhai ve ve kan nih a. Amiruokchu, mizie dangdai nei kan nih tlat. R.Th hi thu le hlaah a pu’n (L.Keivom-in ) heih kheng met sien, intimna nei der lova khing let ngam, mi huoisen a nih. Kei hi chu ka dawikawlawk lei amani, “Thiem thu hril thei kan ta nawh” ti hi ka changchawi bur el a. Anni putu hi chu an inngamtuo khawp el a. Pienphunga pa vantlang chunga leng ve ve, inchei nal tawka dung insang le inkhai thli thler thlawr, phaizawl hmun pakhata, Cowboy lukhum par khumin pistol-in heih indraw hai sien, a tum “Clint Eastwood a ta, a tum Lee Van Cliff a ta?” ti hi hril an tak.

Hi kan lengkuol nia hmathuoitu tak chu Pu Rohming IFS, DFO, Working Plan Division, Shillong ni lai zing a nih a. A hming hi a thawkpui Vaihaiin an lam thiem naw leiin “Mr Roaming” ti’n an ko hlak a. Ama hi keia ang bawka pa lien huntawk, lungril lien global heart nei a nih. Mr Roaming hi mi thilphal, lak neka pekin lukhawng a nei lem ti a taka hmangtu a nih. An zin hla po leh, a tlei deuh deuh. New York kawtthlera Cowboy pheikhawk a kekhawng hnunga thirdawt (spurs) um ngei zawnga nuomna tieng tieng New Lambulane le Komrem veng a hrut anga hrut kawi thei mi fel a nih. A hmai hup inla, helicopter-in hriet lo ram khawlai amani parachute-in thlak inla khawm, a hring khawsuokna ding chu huot kaw tho tho a tih. A chunga officer, lua kelsam to rak tah, kum khat hnunga pension el ding pa thuhnethei khawpin a fela, chu pa chun “Mr Roaming. You’re the best friend I have ever met,” zuk ti thei tlat chuh. Bab re bab!

Ama Mr Roaming inrawina hnuoiah Mawdiangdiang, New Shillong City tieng kan pan a. Hi hmunah hin NEIIGRIMS (North Eastern India Indira Gandhi Regional Institute of Medical Sciences) MBBS inchukna hmun a um ta zing a. Tuhin Meghalaya Administrative Training Institute (Govt. of Meghalaya), Directorate of Homeguard and Civil Defence (Govt. of Meghalaya), Rajiv Gandhi Indian Institute of Management (Govt. of India), New NEHU Campus (Govt. of India), Delhi Public School , Institute of Hotel Management under Ministry of Tourism (Govt. of India), Regional Institute of Hindi Training Centre (Govt. of India ), Meghalaya Urban Development Authority (Govt. of Meghalaya) le building pawimaw dang dang tuhin rel/bawl tan mek a nih. Hieng lai hmun kan fang lai hin kei a upa tak, kum 72 chauhva la naupang hi a khawsawt thei tak le a romantic tak ka la zuk ni chu, an khat tawkin,

Tawnmang em ni, lunglem hi ka neih lo,
Ka hawih vela ka tawng si lo;
Zun leng erawh a chame tang laia,
Luahlo lungdi nghil ni awm lo

ti dam ka mobile-a inthawkin ka hmet dawk thul. Hmun romantic deuh far (pine) bil kan hei lut chang.

Lalnunnem ka ngai em che,
Khieng mi awisan naw la;
Tiena ei hlim lai dawn ve la,
Kan vai khuo sei ding leh-

ti dam an khat tawkin R.Th leh kan heih sak ve thul hlak . Mr Roaming inhnikna ruok chu nisien a hawi nawh. Kei nihai ngaituo chun a la tulai em lei ni mei a tih.

Mawdiangdianga inthawkin Barapani tieng kan pan nawk a. E khai! Mi ram kilkhawr lowai an ti khawm ei District khawpuihai nekin an chang kang lem chu tie! Ribhoi District sung Kyrdemkulai fe tlangin Umiam Hydel Project O (Zero)-Point kan zuk tlung a. Ei rama Tipaimukh Dam hung bawl a ni chun, a hlim thla ding awm hi khuoah hin hmu thei a nih. A ram mihai nekin project-a sinthawtuhai an tam lem a. Chu chu eini hmabak khawm a nih. India sawrkar industrial policy dungzui chun a ram mi zaah 80 sin pek ding ti a nih. Vai sinthawtuhai angin a teirei ei pei dim? Hmangaina hlak chun ram ri a nei si nawh. Ei um dan ding chu an lang rawng el. Tipaimukh lam lien bula BRTF capmah an khat tawka Hmar puon inzar ier hin a hrilfie, hril tam a ngai nawh. Hieng tieng pang ka ngaituo chun, lung a mawlin salung a zing.

Umiam Hydal Project hin power MW 60 chauh a pek suok a. A state-in a hmang seng nawh a, a kawl vel state-haiah a thawn suok nghe nghe. Tipaimukh dam hi hisap angin power MW 1500 heih pe suok sien chu, rocket kap theina khawp power a siem suok ding tina a nih. A ropui awm hem hem ngei. Ministry of Environment & Forest, Government of India, North East Region, Shillong-in clearance a pek hma’n Manipur Sawrkar kuoma zawna pathum a pek a, chu sangna chu vawisun chen hin hriet a la ni nawh.

Dam thu zuk hril zara chun ‘Hmar var an hnu’ ti po hi thaw rek ei tih, inlau a um. Khak annawleh bawk dawm meuhin ngaituo tlang ei tiu. Hi dam thuah hin Dacca, Bangladesh, Los Angeles, USA le hmun dang dangah international seminar dam an lo nei tah hlak. Kei khawm Tipaimukh biela pieng le seilien ngei local intellectual-hai ngaidan hre nuomin Rengkai Muolhlum, Churachandpurah nikum ( 2010) khan national seminar le workshop NEC thangpuinain ka huoihawta, ami thlawptuhai chungah lawm thu hi artikul hmangin ka hril. Chun, chu ra suok chuh tuhin DIALOGUE ON TIPAIMUKH DAM ti lekhabu International Standard Book Number (ISBN) inkhenna ngei Thlazing (August) ni 24, 2011 khan Manipur University-ah tlangzar a lo nih tah. Tiem inla, var phana’n hmang inla nuom a um.

Leh, tuta tuma ka Shillong inzin chuh ni dang nekin kawng tam takah ka hlawkpui a, an manhla hle’n ka hriet. Meghalaya hi ‘Scotland of the East’ an lo ti angin a ram mawizie le that zie mi hril ringawt nilovin a tak ngeiin ka fanga, mit ngeiin ka hmu a. Tlangram, phai ram ni deuh si lova tlangzal (plaeateau) deuh vawng ni’n an lang. Kei chun Scotland ka la hmu ve nawh a, Wales ram khu tum hni lai ka lo fang ve tah a, Wales ram leh khawm an ang ngawtin ka hmuh. A ram leilung hi a lo hausa em em el a. Khawlai khawm in bawl ding ni inla, a foundation chona ah khan phaiphin (sand) first class in bawlna dinga hmang senglo an cho suok nghal a nih hlak.

Meghalaya ram chuh limestone (chinai lung le cement siemna lung) tamna, France cement giant, LAFARGE hai khawma an innghatna tak a nih (TOPCEM, STAR cement le a dang dang hai tiemin). coal (lungmeihawl) hlak chuh ni tinin a tlawm takah truck 2000 chuong thawn suok thei khawpa ram hausa a nih. Uranium hlak chuh India rama a tamna le quality thatna tak hmuna ngai a nih.

A boruok an hawih si, ei heih ram suok a, fena tieng tieng zo thlifim damte’n a hrang del del a. Misuol, ramhuoi (ramhnuoi mi) le mipui sukthlabar ching mi hlak um lo; khawsawt mihai ta ding tak takin an hawi zuol. Pension hnungin hienglai hmunah hadam le zalen taka hun hmang ve ka nuom hiel a. Proposal mawi taka siemin ka Home Minister kuomah file ka hei putlut leh, a lo nuom awzawng nawh. “France-ah ei nauhai kuomah bek devan zuk kai ka tih” ka ti khawma a mi amen-pui thei der nawh. A va heih pawih de awwwww!

Sum ibawm ram (Meghalaya)-a kan zinna thu le hla ziek theia um hai po po hi HSA, Shillong Joint Hqrs. thuoituhai le ruolthahai zar a ni leiin an chunga lawmthu a tlampuiin kan nghat tawp el a nih. HSA SHILLONG JOINT HQTRS ZINDABAD!

.