Steering Fail

Ziektu: Ramthienghlim Varte

Meghalaya le Assam ramri ah Umlaper khuo a um a, Hilai ram deltu chuh Nepali (Bawngpuhai) an nih. Hmar in 13-18 bawrvel an um a, Kohran EFCI le ICI an um nghe nghe. Umlaper khuo hi Umpanai Development Block, Karbi Anglong District, Assam hnuoia um a nih. Hienglai hmuna hin a hma khawmin ka fe zeu zeu ta hlak a, khaw kawlvel tlangram incham deiduoi le ramngawpuihai ka fang chang ‘Buonnel ram dai, Lung tih lentu...’ ti hlasak thiem Pu C.Vansangin a rawlte lek thang derlo, a key insang deu, khawk riei rieiin, mawi le hne em ema a sak veng veng hi ka hrietsuok hlak. Asanchuh, Buonnel ram hi hmakhawsang pipu hun laia ramngawpui hring chamduoi el, tuklo ram, ramsa chitinreng lungruol tak le lungphanglova nun khuo an phamna, ramnel umlo, ram pilril, mimirin an dai ngamlona, hnam pasaltha le huoisen haiin sahrang thlunglu la a, an buon thlukna le hnena hlado an insamna hmun a nih. Chu le inzawma hi hla hi siem a ni tlat leiin ka hei belsa met a nih. Chu tieng chuh hun sien la.

Umlaper ram le a sevel lei lung hi a tha a, a hmun an hawiin, ning-in-tel changa ramsuokna dinga hmun remchang tak a nih. Chuleiin, a ram belchieng tumin Pu Rohminglien Buhril IFS leh hienglai hmun le sevel a hin kan ramsuok a, kan thil hmu le an hawi le rinum kan inbuonpui dan chanchin tlawmte ka hei tarlang nuom chuh a nih.

Pu Rohminglien Buhril IFS hi India sawrkarin ram leilung humhal le enkawlna sin thawdinga alo thlangsuok Hmar nau ah Indian Forest Service (IFS) hmasa tak ani a. Kum 1994 batch a ni nghe nghe. Assam le Meghalaya Cadre hmuin, tuhin Meghalaya state hnuoiah DFO, Working Plan Division, Shillong a sinthaw mek a nih.

Tarik Ni 8^th July 2011 zingkar Motor Bolero Invader ramhnuoi a che ding hrim hrim a Company-in a siem ni awm tak, det-in-do le hrat chuh khalin Shillong a inthawk Umlaper panin kan fe suok ta a. Umlaper hi Shillong a inthawk Kilometer 69 ana, lampui Meghalaya tiengpang chuh NHAI ( National Hay way Authority of India )-in an siem mup mup a. East-West Corridor, Central Government Look East Policy a thangve, khawsak rambunghai le infepawna dinga riruong, kum 2014-a hmang hman ngei dinga hma lak mek chuh a nih. Assam ram tieng ei hei lut nawk chun Assam sawrkarin Road Roller hmangin a bei thluk thluk bawk. Infepawna lampui chuh a sawrkar neitu ve vein an ngaipawimaw hle. Ram changkang ding chun a pawimaw hmasatak chuh infepawna (communication) hi a ni reng a. Manipur a Hmarram (Tipaimukh biel) lampui NH- 150 Motor a tlan thei ta hlawlnaw a, HYA haiin tlawmngaiin an siemtha mek tivel le khan chuh an angnaw khawpel.

Inhma deuva suok kan ni leiin sun dar 12:00 hma’n Umlaper kan tlunga, kan fe hmasak a Ruo le Thingkak kung tam fut el EFCI le ICI kohranhai phun dinga kan phur pekhai le hienglaia unauhai phun ding Lawngmawt dam kan phur pekhai kha a tha le thanaw kan en malam pei a.

Pu Rohming hi forest department a sinthaw, vengtienga ramhnuoi mi eiti hai ang nilo, ramhnuoi mi indiktak nisi, mit inlen a, a tlang le muol le a tuomtu thing le ruohai hmu kan nuom leiin Umlaper khel Assam ram sungtieng chun kan tlan phei nawk ta pei a. Lamsak-lamthlang ramngawpui hring depdup chun lung a min len a, kan fe hla deu deu kan phur deu deu.

Ka ruolpa hi khel le thudik inpawl neinuoi a nuom nuom hril pur pur chi nilo ana, ha-hipa hohlimpui ding chun a subject inhnik zawng ngaituo veng venga bei fet a tul hlak. Amiruokchuh, rannung humhalna thu le ram leilung hnieng-in-hnar dan annawleh, sik-le-sa inher danglamin ram ngawpui a siemthat le suksiet dan hai chanchin sermon ding ruok chun ienglai khawmin an pei zing a. Ruo le thing chi hrang hrang, annawleh, rannung, hieng- Ramsai, Sakei, Sazuk, Sakhi chi hrang hrang Hmar tawnga an hming ei hrietnaw tam tak hi English le Scientific hming chenin a hriet deu vawng a. An chetdan le nunphung annawleh, an cheng nuomna hmunhai chenin sunnithlaka hril ding a hrietve thung. Chuleiin, tuta tuma kan ramsuok a khawm hin titi thuoitu’n a thanga, hlim takin kan fe pei a. Kei ruok chun Sermon ngaitlak le Driver Babu sin ka thawve thung a.

Umlaper a inthawk kilometer 23 bawrvel dingah Umpanai khuo kan tlung nawk tah a. A khuo mi hai hril dan chun Assam ramsunga Kirstien sakhuo lutna hmasa pawltak ni’n an hril a, Kum 150 Kristien an tlingna khawm an lawm der tah. Chun, hi khuoa chenghai chuh Karbi (kha hma a Mikir ei ti) an tam taka, Khasi khawm an um nuol. A kawlvela Karbi khuo danghai chuh Hindu sakhuo bie an nive nawk tlat chu tie. Chun, a khawsung kawtthler hi a fai em em a, infepawna lamlien Pucca Road khawm a tha. Kawtthler le an lampui a fai tha em leiin ka ruolpa thil fak Rajhniganda bawm ruok khawm dehawn ngamlovin a pai tlawt el a nih. A makve khawpel. Mipui khawsak le chetdan ruok chuh an sang bek bekin an lang naw a, an hawk-dak em em ve thung.

Kan ramsuok chuh inhawi kanti leiin hmatieng panin kan tlan phei nawk tah a, hi khuo (Umpanai) a inthawk Kilometer 10-vel chen kan tlan hnungin kir kan rawt a. Intieng panin kan hung hung tlan nawk ta zar zar a, Zantieng dar 2:15 Vaimim tuisuong hun vela chun lampui tlunna, tlangzal lamsak-lamthlang remchangna lai taka ti ni awm takin, Tortoise Speed (speed 10-15km/hr)-a muongchanga tlan, ka ruolpa sermon inhniklai tak chun, fimkhur le duot taka ka tuoilet ka tuoilet lai zing kan Motor Steering chun lunglai ami hel san thuta, vawi tiengpang lamthlang tuilo an siemna Canal ah, damte’n kan inher liem tah a. Vengtu zarin thisen suok khawpa hliemna kan neinaw a, ka ruolpa chuh a hmatieng Darthlalang leh an infawp (Kiss) na deu hlek leiin a hmur an vung met a, a pawi kher el. Chuzet chun, kan ti tina subject chuh inring hman derlovin Steering Fail tia thlak danglam a hung ngai tah a. A hunghai kuomah lo thei lova sermon pek a ngai pei leiin iemani chen chuh ti ti thuoitu’n ka thangve thung tah a nih. Hi hi a nih Steering Fail thusep hungsuk dan chuh.

SAMARI MITHA CHUH:

Chuonga kan in-ham buoi lai chun Shri Budheswar Kro, Umbarmon Karbi khuo a Teacher sinthawa um, a khuo mi haiin Masterji tia an ko hlak pa chuh Motor Bike-in a hung tlan a, a chawl nghala, thei ang anga mi thangpui dingin ami thlamuong a. Umpanai Kilometer 8-9-vela hla dinga chun Pu Rohming chuh thuoiin, vangneithlak takin Shri J.Aggarwal, Engineer, North East Cable Corporation/Company a sinthaw, Kolkata mi, Umpanai Block a Rural Electricity Supply Centre, an hawng thar tum mek, an sinthaw en kai dinga hunghai leh an hang intuok hlauva.

Anni hi Prime Minister Rural Electrification Programme hnuoi a mirethei thangpuina Central Government a inthawka Scheme pawimaw tak le inzawma Hmarsak rama sinthaw mek an nih. Hi block sunga um mipuihai tading a buotsai ana, Umlaper a ei unauhai chenin an sawr ding chuh a nih. Below Poverty Line (BPL) hnuoi a umhai po chun a tlawnin an sit thei ding a na, Above Poverty Line (APL)-hai ruok chun electric fee pek dan pangaia pein sit theive thung an tih. Shri J.Aggarwal, Engineer le a rawihaiin Electrict khawlpui test na ding Machine lien deu el Recovery Vanin an hung phur a, chu recovery Van chuh alo remchang ta pei leiin Canal a kan Bolero Invader chuh sawt bawk hman lovin kan laksuok thei nghal a. Hieng po po hih Masterji zar lieu lieu a nih. A felzie chuh hienganga ami thangpui bak nilovin sum chenin kan mamaw a ring leiin inro der lovin a min hmang tir a nih. Ama ngei hi a nih, Samari Mitha chuh.

Shri J.Aggarwal hi mifel, lungril zau, pa tawng nuom deu el ana, hienganga buoina kan tuok mi hrepuiin, Recovery Van a min hmang tira, khang lawma a mi thangpui hnung khawmin, ramhnuoi, tu hrietphaklova beidawng taka kan um ding chuh ami phal der nawa. Inphal em emin, Bu an milo suong kep hrim khawm nilo, a min fak tira, a rawihai chuh kan zalna ding puon an pha tira thlamuong takin hi zan hih kan hmang liem thei tah a nih. ‘Kan phing a tamin fak ding…, kan dang a charin dawnding….., insuk lumna ding kan neinaw leh puon imi peka’ ti kha an sukdik a nih. Shri J.Aggarwal le a rawihai hi Samari Mitha an nih. An damsung nun hlim taka hmang pei dingin ditsakna kan inhlan naw thei nawh.

Zingkhuo a hung vara, Umpanai Gaonburah (Lal) a hung a, ami ngaituo em ema, an rang thei anga hilai hmun kan suoksan danding ngaituo’n an virkuol a. A zingah Shillong a Mechanic hai hmangin kan hung kirnawk thei tah a nih. Ama hi Samari Mitha tuta tuma kan tuok pa thumna a nih. Madanrting Area, Shillong , Meghalaya Gaonbura ( Headman) le vengtieng khuo thenkhata Lal (Hausapu)-hai le an inthlau zie chuh sun le zan ang a nih.

‘Samari mitha’ hril takah chun kan venga upa pakhatin hi thu hih a sermon a, an vai pap pap a, a bei nasa khawpela. ‘Hi thu hi ei rawngbawlpui, pansak-panthlang ei chi le kuonghai kuoma hmang dinga Baibulin a ti ana. Meitei, Vai le ringnawhai chunga ruok chuh an nuom leh Val-upa leh khawtlang thuoitu haiin thawve hai sien a hun’, ami hei ti pek kha ana. Pui tak a nih. Pathien thu ei fepui dan a hriltu chienglo, a ngaithltuhai chieng bawklo, maimarawla ei suortluon el hi alo va tam awm de aw.

THU TLANGKAWMNA :

Leh, Mihriemin nuom le ditdan ang tlapin um danding le khawsak relna ah program ei siem kuol dep dup hlak a, hlawtlingna le sukpuitling theina ruok chuh Pathien kuta um lem a nih. Chuongangin, Steering fail thusep khawm hi mihriem program khelram chanchin ziektu ngei khawma a ngaituo phaklova inthawka hungin irsuok a nive tlat. Hiengang thil hi mi tam tak chunga khawm lo tlung tah hlak, tlung zing le la hung tlung pei ding chuh a nih. Beidawngna, harsatna, vangduoina eiti hai hih tuok rawn leia hneban thei chi annaw a. Ei tuok rawn po leh, a nawk hung tlungding tung ana ting el. Chuh, mihriem nuna inphum tlat, lak hmang thei derlo a nih.

Sienkhawm, ala tuok ngai dernaw hai nek chun lo inbichilpui rawp ta hlakhai chun nun hi an hrietchienga, hrietthiemna an hau leiin puitling nun inzirna thatak a nive thung a, an thil tuok tah a inthawk khan mi thlamuong dan an thiem a, an kawla um khawm an hawi hlak. Chubakah, hringnun kalphunghi an hrietchienga, an ringneka nasa lem harsatna, mihriemin vangduoi tawpkhawka ei ngaihai chen tuok chang um sienkhawm kam petin an tuor fan fana, inbuonpui dan an thiem hlak bawk a nih. Chuongangin, hi thusep mawl takel, phuokfawm nilo hi a tak ram ah, a septu le tiemtu mi tuelkhawm harsatna chi hrang hrang tuipuiin a i chimvelhai kuomah thlamuongna thucha inngup mata inhlan thei dingin, puitling nun inchukna thatak ni thei sien chuh a hlawkna nive mawl tang a tih. Chu ding chun nguk taka bi seng dingin aw.

24^th August 2011