Nu le pa thu awi hlutzie

By Pu Zarzolien Keivom

Nu le pa thu awi lo inpâng chu trênah a mawng a,

Nu le pa thu awi phunchong chu zawlah a mawng. -Pipu thuvar

Thingtlanga um ve naw hai chun inpâng thing le phunchong thing hi ei hriet da’l thei. Inpâng chu trênbarama naw chu a mawng ngai naw a, chuong ang bok chun phunchong khom zawlah naw chu a mawng ve ngai nawh. Chuleiin upahai chun nau thu awi lohai chu inpâng leh an hrilkhi a, nau thu awi chu phunchong leh an lo hrilkhi hlak a nih. Ei Pathien thu khoma “Naupanghai, Lalpaa chun in nu le pa thu awi ro, chu chu thil indik a ni si a, ‘I nu le pa chawimawi rawh’ ti hi thupek sawm laia thil tiem sa nei hmasa tak a nih. “Chuongchun i ta dingin thrang a ta, hnuoiah khom damsawt bok i tih” a ti a ni kha (Efesi 6:1-3). Pathien thu inchuktir awia nu le pahai thu zawmtu chun thil indik a thaw a nih. Nu le pa chawimawitu chu a ta dinga thil thra thawtu a niba, hnuoia khom dam sawt dinga Pathienin Thupek Sawm a pek laia thil tiem sa nei hmasa tak chu a nih. Chuong ang nau chu an nih phunchong anga zawla mawng, hadam le ralmuonga hnuoia khom dam sawt dinghai chu nih. Ngai ta u, Pain ami lo va hmangai lawm lawm de! Pathien nauhai a min buk hiel ta hi! Lalpa chu inpakin um raw seh.

 

Nu le pa thu awi lo ruok chun thil indik le thra a thaw ngai naw leiin a malsawmna dong dinghai chu a baw buok hlak a, a lampui hraw le a nungchangin a nu le pa a chawimawi ve thei ngai nawh. Lampui thra hrila kawkhmutu chu hnawlin khawdung le khawvai suka nunkhuo phâmin, hun le nihai chun ieng thil am an hung her suok ding ti rêng dawn loin, a hun thra le ni thra hai chu nuomtawlnain a hmang a, a daurap mei mei a, a thranghar ve pha hlak chun hnuoia tui inbaw tah hnung hlak chu rut thei ni ta lo. Tu lai ngirhmuna ding lem chun mimawl tangrang ta ding chun ni khat tha hlaw chu fak khop em ni mawl lo chu, fak a sie chun taksa a chau a, natna chite khom tuorhlaum an chang hlak. Thla hlaw nei phak ve lo le sumhnâr thra nei ve lo hai ta ding chun fak thra fak ngaina a um ta naw a, damnaw changa daktor panna ding le damdawi inchawkna ding tak ngiel khom um lo bok, sung le kuo thrangpui seng zo zai hlak ni ta bok lo ta ding chun tuor thei chen tuor tlok tlok a, thi hun nghak el naw chu thaw dan ding a um mol naw leiin hang dam sawt ngaina um reng lo a! Esauin a naulutir nina bu voi khat faka a zor ang el khan insir a trap ngawi ngawi khomin hun liem ta hnung hlak chu ko kir thei an ta si naw leiin, inpâng ang elin harsa ngawi ngawiin hringnun trênbaramah damlai nihai chu hmang liem makmaw an ta hlak.

 

Nu le pahai chun ei nauhai thratna dingin daktor thiem thiem panin damdawi thra an ti phot ei inchawkpek hlak. Calcium lem hi chu ru le chang ta dinga thra nia hriet lar a ni leiin nu le pa bengvar deuhai chun daktor rawn kher lo khoma an nauhai an pek hlak. Ni dang lai hun ngaituo chun thiemna le varna khom nasa takin a’n sang ta a, daktor thiemna khom insangin a’n ril ta a, damdawi thra le fak ding thra thra hrein ei hmu phak ve ta a, thrangtharhai dolkai khom a tlangpui thua chu ni dang lai nek chun a thra tah lem niin a’n lang. Nu le pahai khoma ei nauhai thratna ding a ni phot chun ei nei ang ang iengkhom inro ei nei naw a, a lo harsa deu khoma ram tin ram tanga indapin ei thaw trawk tawk hlak. Keini khom chuong ang harsatna ngirhmuna chun ka nu le ka pain ureng sawm le pakhat lai an mi lo enkol ve a, piengphunga chu ruol kan ban ve thoin ka hriet a, ka nu le pa beiseina ruok chu kan tling zo naw seng niin ka hriet. Asan chu nu le pa thu kan awi zo tawk naw lei ni takin ka hriet. Kei tak lem hi chu ureng laia nu le pa thu awi lo tak ka ni nghe nghe a, inpâng ang ela trêna mawng ni tak meuin kan hriet hlak chu tie. Ka nu le pa thu lo awi ni lang chu phunchong ang elin zawlah hadam takin lo mawng ka ta, ka nuhmei le nauhai khom hadam an ta ka nauhai khom fak thra fain sikul thraa hai kai veng an ta ruol an ban phak ve ding bah. Tling le tlak naw tak pumin ka naupang hun le ka tlangval lai hun hai chu hmang liem peiin mi hnung hnotin kan ban tung ve treng treng a. Hringmi hi inpâng le phunchong thing ang ema ngirhmun son thei ta reng reng lo chu ei lo ni naw ni naw nim, ka hun sei lem deuthaw ka hmang zo hnungin nu le pa thu awi hnuhnawin, thlarau le nun hung inthlak danglam peiin, khawsakna chen a hung inthlak danglam pha tah a nih. Keima ang boka petek, nun kholrawng taka khawsa mek nu le pahai ta ding khoma Lalpaah nu le pa thu zawm a la’n hnu nawh, Pathien chun malsawm ding chein a thutiemah a la ngir zing. Inhmaw rawh, muong loin ama chu pan vat el rawh.

 

Voisuna nu le pa ngirhmuna ngir mekhai khom hi ei nu le pahai ta ding chun naupang ei la ni zing tho a nih ti inhrein mani nu le pahai chu lo chauin lo ongrop ta hai sienkhom inza tak le duot taka chawimawi ding an nih. Tu chena hnienghnar taka i lo khawsak theina khom kha nu le pa malsawmna zar i zo lei a ni thei ve tlat a nih. Tien lai upahai chun pa hai thi ni hin an hnang khuor hrui khom an thawt a, ran vai le lohma tienga malsawmna chen khom a tla hnuoi hlak an lo ti hiel hlak. Pa malsawmnain thu a phurzie chu Isakin Jakob mal a sawmna le inzoma a malsawmna dong le Esauin a pa malsawmna a dong ve dan dam kha ngaituo ding a nih. Chuong ang bokin Jakobin a nau pasal sawmpahnihai mal a sawmna thu le a hnung peia an thil tonghai kha inchik tlak a tling a nih. Thuvarhai 20:20 chun, Tu khom nu le pa trongse inphurtu chu thim sa lai tak a khawnvar her hlum ning a tih a ti a nih. I nu le pa i chungah an lung a awi naw leiin Pathien malsawmnain a trinsan thei che a nih ti theinghil ngai naw rawh. Sin thra le sum hnar thra i nei lei ela damsung se thei ta lo ding angah i’n ngai el thei a, sienkhom a ni chuong der le! Lalpaa ei nu le pahai thu ei zawm naw hun hunah inpâng anga trênbarama mawng hnuhnaw thei zing a nih, chuonga mawng ta khom chuh ei hnam sunga ngeia hin hmu ding le hril ding ei kat ve nuk an tah.

 

Naupang ta dinga vitamin thra tak chu Efesi 6:1-3 hi a nih, Pathien Thupek Sawm laia malsawmna thu tiem sa um sun a nih. Nu le pahaiin ei nauhai fak ding thra le inhnik hnik ei pek leiin an dolkai le hmel hung thrain, lekha thiemin, sin thra tak khom an hmu el thei a, lawm a um. Hi damsung le thlan khel tieng chena an tluongtlung pei theina dinga fak ding le dawn ding thra tak ruok chu Lalpa thu awi le zawm a nih. Chuong naw chun hi khawvel damsung hun khom hi a dai zo naw el thei a nih. Naupang laia inthoka Pathien thua chawm le enkol tleihai chun danglamna rieu an nei a, an nun khom a tluong deu chawk hlak. In tieng le sikul tienga tu laia ei naupang enkol dan le Baibula naupang enkol dan ding a hril hi chu a’n mil naw hle nin a’n lang. Naupang lungrila invêtna bu khuor chu thununna hmola hnot hmang thei a nih tiin Thuvarhai 22:15 a chun a hril a. Tu lai ruok chu hmola naupang vuok a thrat naw thu ei hril uor ta tlat. Hi lei ma hi ni ta veng a tih tu lai hin upa inza nachang hre lo, tlawmngaina khom nei lo naupang an pung tuol tuol el hi. Tien lai naupanghai kha invêt tutin inlang hai sien khom upa inza dan le tlawmngaina kongah tu lai naupanghai hin a’n khan ta naw hle ti hmu theiin a um. Naupang chu lampui indik inchuktir la, a upat hnung khomin petsan ta ngai naw nih tiin Thuvarhai 22:6 a chun a mi hril.

 

KEIVOM RUN (Greater NOIDA)

28 September 2011.