GOOD FRIDAY LE EASTER EI HMANG DAN KHA

By Pu Zarzolien Keivom*

Good Friday le Easter Sunday hi ngun taka ei sui chun kristienhai ta dinga hun poimaw tak a ni leiin ursun taka ruoithrea umni khama hmang a phu hlie hlie a nih. Kristmas vor lâr raka a thi ni le a tho nawkna ngaithà dam hi Kristienhai laia Setan hmangruo hmang a nih ti hriet a poimaw hle. Krista thina le thonawkna hi Pathien thiltum lien tak a nih. Isu hi piengin thi loin thonawk ta si naw sien chu, Pathien thiltum le ei ringna chu a thlawn der ning a tih ti hi ka hril nuom laia pakhat chu a nih.

Chuong chu a lo ni ang hrimin, ei kohran thruoituhaiin Good Friday hi ursun taka thuhril rongbawlnaa hmang thraa an hriet leiin Sakramen khom kum danga ei thaw dan naw angin ei lo kil hmalawk a ni kha. Amiruokchu Good Friday inkhawm ei hmang dan kha ngun taka ei ngaituo chun ei hotuhai hmathlir leh chu an intu ta naw hle niin a’n lang. Mipui ngirin Pathien inpakna hla ei hang sak a. Ei miuzik a thûm thra a, hla sak khom an hoi. Kel rawl suok vanga hla inzawttu khom a rawl an ring thra. A threnin chung tieng thlir a, Krista tuorna leia mithli parol kuonga hla sak a, Isu’n ei suolhai a phur hmang tah leia hlim le lawma ban an vawr sieu sieu laiin, a thren ruok chu ieng ieng amanih baua thun mol mol pawl khom ei bo nawh. A thren mobile lo zat mol mol khom ei um bok.

Pi Lawmi inkhawmpui fe inhoi ti taluoin Isu khom a hriet fuk naw hiel an ti ang khom ei hoi angreng. Khanga ei tui cheng hlim sung khan hun hlaka mi lo nghak lo, ei hun nei darkar hni chauh kha a sei lem a lo liem tah. “Ka hun sei lem ka hmang zo hnung” ti hla ang deu khan thuhriltuin pulpit a chang ve phak khan chu ei hun sei lem ei hmang zo ta a thuhril rongbawlna ding èm hun ei nei thei ta nawh. Tui inbaw hnung hlak rut thei ni ta lo. Ei Pastor-in a beramhai chawmna dinga Pathien meu buona rawsot a lo sie khawl chu hang semna ding hun a um thei ta nawh. Phingsip, voi thei si lo, mi hnaw ang le satel inhmaw ang elin a hei bei ngiel tum khoma an tawl hla hman ta nawh. Chokchawnal  bongin a bong top el a ni kha. Khanga hun a nei tlawm ding ti khah lo hre lawk ni sien chu, tawi fel deuin tak lalin a min ba tawl ding bah. “Hun a tawi taluo ie hnuoi nun lawmna par” tia ramsuok hlawsam inlawia inlawi ma naw chu thaw ngaina um ta lo chu!

‘Bei am sei, Run dung’ ti angin Easter Sunday bek chu thlarau ruoi, phinghmul inkhat raka kil beiseiin, motor rizap man khom mena thlakin, Biekin tieng bok kan pan nawk a. “Voisun chu Krista zara Pathien hmaa thiem ei changna ni a ni bok a, Lalthrungpha hmaah ami’n thiem tah ti hla kha thlang ngei ngei ka tih” tiin ka’n sè ru a, anachu ka che hman nawh. Buon hrat naw ang el ka nih. Ka trongtrai zo hma’n ei hla thruoitu’n “Mipui ei renga ngirin, Aw mi sang tamtak hla sak ding ti kha hang sak ei tiu” a hang ti a. A karlaka bek ka hla dit ka thlang hman rawm ka ti leh, “Thrung loin mipui kha la ngir zing ei ta, Aw ropuitak Halleluijah kha hang sak nawk ei tih” a ti nawk a. Ei sak zo khan ei inthrung tading ka sawn leh, “Mipui ngir zingin, Thlan thimah a zal tah ti kha sak ding a ti nawk pei. Hienga hla pathum sak chen chen an min ngirtir el hi ieng dan am ni tang a ta? tiin ka ngaituo neu neu a, a san awm hrim ka ngaituo suok zo nawh. An thlarau chang a dang deu dam a ni el rawm ti dam chu ka ngaituo a.

Thralai le upa hratna inang nghal lo, an pei chen chen ngir hai sien ti ngaituona neiin kei chu kan thrung ta chot a. Thawlawm ei lak khawm sunga ei hla sak leh, thralaihai hla pawl pahni sak leh, a hmaa hla pathum kha vel hni vel seng ei sak le khan chu hla pakuo sak leh a’n hen a nih. A ke nat leia hung inkhawm ve thei lo ka U Muong ka hei hril leh, “Lungtrau ruol ei che rek a hoi baka! Vel nawk chu in thaw hmain biek ina hruol le hriemhrei um po po kha hre hmasa phot ro. Palm Sunday lem khan chu hla inkawkal vong an mi sakpui a, a tawpah mithi vuina hlain kan tawp dèr a nih. An hla inzawttu kel rawl inthler ri khan ka na-dâr (eardrum) a la khawk buoi zing a nih” a ti sam et a!

Iengkhom chu ni sien, thuhriltu’n a hun a hung lak meu khan chu Good Friday ni ang bokin ei hun sei lem ei hmang zo nawk tah. Thuhriltuin mak dangdai taka darkar khat sung khoma fel deua hang hril suok zo lo ding, hun tawite sung thupui inhrol deu deu “Krista thonawkna leia ei hamthratna” kong li zet el, kim fel em em, paikawnga buhum sawi dèn tral anga Baibul changa delkil khak sia a hang phor lang zung zung el kha chu a ropui ka ti ngei. Lalpa’n ropuina chang sien. A hun nei tawi ding a lo hriet lawk a, tawi fel deua hril dinga a lo inbuotsai a ni khomin a ropui hrim hrim. Kana khuoa Isun tui uoiin-a a’n changtir dam kha a hoi ka ti  rum rum chu tie.

Awleh, ieng po khom ni sien, iengkim tadingin hunbi ruot a um a, van hnuoia thil iengkim hin hunbi a nei seng a” (Thuhriltu 3:1) ti ang khan, hlasak lengkhawm hun dam, thuhril sawt lo hun dam, hla ruoithre hun dam le hunbi neia thilthaw a um hlak a, chuong huna chun item dang suktlawm dan dam le thuhril rongbawl huna hlasak suktlawm dan le hun hmang thiem dam inchuk inla nuom a um. Ei thuhriltuhaiin tlanbahrika thu an hril ta ngai nawna ding le ei inkhawm a phuisui nawk zuol theina ding beiseiin ka hmu ve dan ka hung thai lang met a nih. Chun ni bik neia hai hin ei ni inser le inhme zawng thu le hla hrilin sak hlak inla chu thra nawkzuol a tih. Kum za kristien ei lo ni hiel tah si hin chu nene tui ring ta loin buchangrumin inchawm tang ei tiu.

(*Pu Mallsawmthang Keivom a pa a nih. April 8, 2010, Greater Noida).