GOSPEL CENTENARY CHALLENGE AWARD !!

By Dr Chaltonlien Amo

Lekhabu tiem rawn le ziek rawn tak tak ei tam hle tah a, ei thuring Holy Bible hi kut ngeia ziek suok ei um ta dim chu aw ! ti ka ngaituoa. Lekha ei tiem pha leh ei hriet hlaka, a zieka ei ziek lem chun ei hriet chieng nawk zuol hlak. Chuleiin, ei ni ringtuhai khawm ei thuring Bible thu hi vawi tamtak tiemsuok ta khawm um mei ei ta, a la tiem suok naw khawm tamtak ei um ka ring tho. Lo tiem suok tahai chu inpak an um em em, taima tak an nih. Bible thu hrietna tieng khawm an hlawkpui hle ka ring. A ziekin ziek suok ngathai sienla lem chu Bible thu hrietna zau nasa ngawt a tih.

Mi tuhaiin amani Holy Bible “Thuthlung Hlui le Thuthlung Thar” bu hi lo ziek suok vawng sien chu an hlawkpui danding le an tangkaipui danding hieng ang hin ka ngaituoa :-
1. Pathien thu leia hun hmang rawnna ning a ta, a bikin |halaihai.
2. Pathien thu(Bible thu) hriet chieng pha bawk, Pathien thlarau pawl tharna chang bawk anta.
3. Lekha inchuksang le inchuksang nawhai lekhathawn hmu rawn pawl tak ni mei ka ta, Hmar tawng thumal an ziek diknaw zie, ziek kawp ding-ziek kawplo, inkawp loding ziek kawp le sipelling ziek diklo ka dawng rawn, ka khat khatin kalo sawlpui, kei hlak thiem bik bawklo. Hienghai popo hi Bible zieksuok zakhai chun an tangkai pha hle ding niin ka hrieta.
Chuleiin, tukum -2010 hi Gospel Centenary kum a ni bawka, thupuia ka hung hmang anghin “Challenge” ka siem nuom a nih. A san chu, Gospel Centenary lawm dingin nasa takin ei in buotsai tawla, mimal, khawbing, kohranbing le inzawm khawm damin kumbul tienga lawm pawl, lawm mek le kum tawp tieng chena lawmna program khawm la um pei ding anga hriet a ni bawk.

Centenary hiel ei lo tlung anta leiin a lawmna el cho nilovin a bawzuina(Follow-up) ti ang rengin, hmalakna chikhat hang rawt hrim hrim ka nuoma. Kohran mi tuel khawm ti bik umlovin a nuom le pei, inhnikna nei taphawthai ta dingin Bible Societyin a sut,Holy Bible pumpui(Thuthlung Hlui le Thuthlung Thar), tukum sunga ziek suok an um chun an sawr hle ding a ni bakah LAWMMAN keiin siem pek dingin Pathien ringsanin kan tiem a nih.

Lawmman ding le thaw danding a hnuoia ang hi ning a tih:-
1. Mani kutziek ngeia zieka, lekhatui rawng khawm in ang ding a nih.
2. Midangin an ziekpek/pui pawm ni naw nih. Kutziek an ang vawng ding a nih.
3. Ziek ni tarik inchik le ziek pei nisien, April 1,2010 hma a ziek chu pawm ni naw nih.
4. Kum 2010 sunga ziek zo ding a nih, Bible changkhat khawm bawkan ding a ni nawh.
5. Endiktu ding – Hmar Christian Leaders Forum(HCLF) thuoituhaiin maw mi phur pek sien.
6. Ziekzotahai reportna le peklutna ding chu Rev.Rohminlien Pakhuongte, Secy. HCLF,nisien.
7. Lawmman: Ziekzo hmasa indawtin 1) First Prize Rs.8,000/- 2) Second Prize Rs.7,000/- le
3) Third Prize Rs.6,000/- ning a ta.Thildang khawm a remchang ang ang ngaituosa ning a tih.
8. Lawmman hming chu “Gospel Centenary Challenge Award” ti ning a tih.
9. Lawmman hmu thei ding an lo um a ni chun Inhlanna Program a ropui thei ang taka buotsai
ning a tih.
10.Lawmman tumtu ding Dr Chaltonlien Amo, Ex-Minister & President, Hmar National Union.