A relook at HYA Tuithaphai Jt. Hqrs Conference

By Hmangkhum Songate, Tuithraphai.

A kum le thla chieng takin ka hriet ta nawh a, sakhuona le inzawm nilova mipui inhawrkhawmna ei nei hun kha kum iemani zat fet chu a tla el ta thei. Hang ti ve khanglang lang, ka tlangval ve laia hnam (social) thila ei inhawrkhawm hun le tulaia mi hi a kar chu a hla ve vet hlein ka hriet . A khawvelin a phursuok ve ta hrim hrim khawm ning a ta. Tuta tuma HYA-in inkhawmpui a huoihawt hi ka lo thlir vena tukvera inthawka ei hnam mizie le ei ngirhmun tarlangna hun a nih hi tiin tuta tum chu ei Chanchinbu hang intiel ve hrim hrim ka nuom. Thlir dan le hmu dan inang nghal lo chuh. I thlir ve dan le ka lo thlir dan hi a lo inang naw a ni khawmin a tlanghuot lo ei ti el ding ni naw nim leh.

A tlangpuiin eini rawi hi hunbi ruot ngaipawimaw der lo hnam ei ni phawt el. Programme-a hunbi ruot hrim hrim sir fu thei thak lo me chu. Thuhriltu pakhatin "Hunbi ruot ngai pawimaw lova sukdik ngai lo chu rukru an nih" a lo ti hi a min hrietsuoktir a. Chuleiin, eini rawi hi rukru hnam ei lo ni pal el am ti a
min ngaituotir a.

A pahnina chun, sakhuo thil ei ngaipawmaw ang em em chun Hnam thil ei ngaipawimaw der nawzie suklangna niin ka hriet. A hrim hrim thuah sakhuona lakvung
raka hnam thil hlamsiea iengmalova ei ngai sung chun hnam piengsuol ei ni phawt. Israel, Lalpa hnam thlanghai khawm khu Pathien in a zawlnei hmanga (Eze. 36:16-30) a lo hril tah, a kum sang tel takmeu el mi ram, mi tuiah an chavai hnunga hnam anga an hung intelkhawma khawvel sawrkar tisim ni thei khawpa an hung thonawk theina san khawm an culture le sakhuona lei a nih. Chuongang bawkin saktieng Super Power (USA) khawm la tlan lekhel el thei ding ngirhmuna um China sawrkar ei ti khawm khi iengdang lei an nawh Cultural revolution lei tho a nih. Eini rawi ruok chu lu chau inthanga a dang po inthang lo piengsuol ei nih ti hi inkhawmpui hin a suklang hlein ka hriet.

A pathumna ah hnam Organisation anga ei um chun khaidiet anga inthlung ei ni a. An sanga inthawk an hnuoi-Branch- Headquarters anga inzawm eini zing laiin ei inngaisak nawzie le ei inuksak nawzie a suklang hlein ka hriet. A mal mala eini ning ninga ei ning sung chu inthuruol lo ei nizie ei suklang a. Hiengang zinga ei fe pei ani ngai chun ei hmabak chu beisei a tam naw hle a, Hnam anga ei ngirsuok- na ding chu damsawt thil ning a tih.

A tawpna a dingin ni 27 (inrinni) zana Gospel Centenary le inzawma Musical Nite kha chu kawng khata chuh a hlawtlingin a ropui chur chur khawp el. Thu le hla ah a awm tawkin thalai khawm an phur hle'l. Thuhriltu khawm a siplien a, a thu vaithlak hrim hrim khawm bu tak tling tak a nih. Tu theida lo dingin kha zan khan chu eini rawi hi ei unau hnam danghai neka ei chunghnungna thu le hla a nih tiin ka lo uong hman rek a.
Amiruokchu, hang ti nawk hram lang, hi zan zet hi chu ei Kohran zie le rang, ei ringtu nun lo pawnlangzie ka hmu rek a. Kohran pawl tamlem daia inthawkin thalai an thang laiin Kohran pawl thenkhat ruok chun an lo hmu khawvel hle khawm ning a ta, thang la nuom lo an um. Hi hin ei hnam sung Kohran boruok chuh a tamlem hmu thei niin an lang. Korhan intelkhawm lem chu a la hla vat vat khawpel. Intelkhawm chu hril lo Vanrama khawm ei um hmunkhat thei kher dim chu aw!!

Chubakah mani Kohran fedan phung chau changchawi le ngaihlut a mi kohran fedan siehnuoi a thlarau thil naw taluo a ngaipek hin ei thlarau mi nawzie le ei pawnlangzie ei suklangna a ni lem naw mani aw ti dingin inkhawmpui hin a tarlang hlein ka hriet.
Hril ding a tam, inzawt ding a tama tuta t uma ding chun la dittawk phawt ei tih. Ei hnam le Kohran mizie hi insut chet chet inla mani chau inen lovin mi danghai khawm en vein ei hnam le sakhuona a ei ngirhmun hi insuikirin har suok thei inla nuom a um takzet.
Ka lawm.

Source: Hmasawnna Thar