Krismas poi Tawk

By Pu L.Keivom*, Inpui columnist

Krismas ei tlung nawk trèp ta a, khaw lai hmuna um hai khomin inthuruol taka lungrila Bethlehem dai ei fang tlang hun le nau le te hau deuhai ta dinga lungngaina hapta a ni leiin, thil dang tieng ngaituona a pet thei naw a ni tak. Chuong chu a ni lai zingin, ei Baibul inlet suol leia thil poi ei tawk rawn ding rekzie daih ka ngaituo a, ka trim uoi uoi a. Ei fimkhur theina dingin, hre fu loa poi ei tawkna hlak tam tak laia threnkhat chauh a hnuoia hin ka hung thur suok a nih:

(1) Luka 1:31 : “Ngai rawh, inrai i ta” ti hi a nih. Hi taka thu mal hmang ‘inrai’ ti hin holy conception theology a bawsiet a. ‘Inrai’ chu nuhmei le pasal inpawlna ra suok a na, chu inpawlna chu um si loa Mari chunga thil tlung hi Pathien remruot dan thutak anga ei inlet ding a ni chun “Ngai rawh, nau pai (von) i ta” ti ding a ni lem. Hieng ang hin Delhi Version-a chu sie a nih. Mari kha in vitro technology hmanga Pathienin nau a’n paitir a nih; inrai a ni nawh.

(2) Luka 1:46 ‘Ka nunin Lalpa a chawimawi a” ti hi Thuthlung Thara chang ei sermon suol rawn tak laia mi a nih. ‘Mari nun hi a mawiin a thienghlim a, Pathien a sukropui a, eini khomin Mari angin ei nun danin Pathien ei chawimawi ding a nih’ tiin nuhmei chu hril lo, ei thiempu un tak tak khomin zer far duon duon khopin an sermon hlak. Luka ruok chun Mari nun mawi thu hril a tum nawh. Khawvel sandamtu ding vontua ruot a ni leiin Mari chun vangnei chungchuongah a’n ngai a, a hlim chiri a, lungril le thlaraua Pathien chawimawia lawmthu a hrilna a nih. Mari’n mani le mani inpak a, a nun mawinain Pathien a chawimawi thu a hrilna a ni nawh. Hril pal sien chu, a chungah Pathienin lawm kher naw nih. Pathien lawmzawng ni a thra a, Pathien hmaa mani le mani inpakin kongro a suk nawh. Mizo tronga Baibul inlet nuhnung taka chun, “Lungril takin Lalpa ka chawimawia” tiin an sie a; DV-a chun, “Ka thlain Lalpa a chawimawi a” tiin kan sie thung. A ieng ieng khom hin Saptronga “My soul magnifies the Lord” ti chu a’n let zo chie nawh.

(3) Luka 2:14 “ A chunghnung takah Pathien ropui takin um raw se” tia ‘tak’ zoa ‘ah’ ei bel chun Pathien chu a chunghnung takah ei sie naw leia ropui tak ni dinga promotion ei pek chop a kawk. “Chunghnungtaka Pathien” ei ti ruok chun ama neka insang lema um an um naw thu ei hril a nih. Chun, “hnuoi chunga a lawm em em” ti hi ngaituo tham a nih. Adam bawsietna leiin mi po po an lo suol ta a, hnuoi chunga hin Pathien suklawm thei an um ta naw lei taka Isu Krista a hung an naw maw? Ni e, hnuoi chungah a lawm bek bek an um thei ta naw lei taka Isu kha hung a nih. Hnuoi chunga ama lo lawmtu le pomtuhai kuoma chauh a ni lem inremna a tlung chuh; mi tin ta dinga hung ni sien khom ama hnawltuhai chungah Pathien a lawm thei naw leiin thiem naw changin an um zing a nih. Ei baihat tlor tah lei le indik awma ei hriet leiin a’n dik pha chuong nawh.

(4) Isai 9:6 Lusei tronga Baibul an lo inlet suol chu a kawi a ngila zuiin, rawl sukno fawmin, “Ei ta dingin naupang a hung pienga” ti nawk duol duol mei ei tih. A thri be china ngai pastor-hai hlei hlei hi a uortu an nih. Naute ni loa naupang inpiengtir chu mihriem pieng dan phung a ni nawh. Chuong ang thil chu, ei trong thiem nawna chauh naw chun, tu nu tuorselna khomin dawl zo naw nih. Chun, thilmak hi ei lawm bok a, a hming Maka, Remruottu tiin, thu chaua hril loin hlaa sakin inawi mup mup rek ei tih. Isu hming dinga Zawlnei Isai kuoma hrila um hi title pali, thu mal pahni inkop vong a ni leiin Remruottu Mak, Pathien Hrat, Chatuon Pa, Remna Lal ti lem ding a nih.

(5) Johan 1:14 “Thu chu tisain a hung inchang a” ti hi ei sam rawn pawl tak a ni bok. Hi hin Pathien thu a kal a nih. Tisa thil reng reng chu thlarau thil le inkal, Pathien lawm naw zawng a ni leiin (Rom 8:1-11), ‘Thu’ chu tisain inchang sien chu Pathien theida zawng tak le a kal zawng tak ning a ta, tu khom sandam ni naw bok ei tih. THU chu mihriem ‘taksa’ putin a hung inchang a, mihriemhai lai intlanna sin thaw dingin a hung a ni lem. Chu chu a nih 100% Mihriem Naupa, 100% Pathien Naupa a ni theina san le Ama leia Pathien le mihriem ei inzom nawk theina san chuh.

Tiemtu po po Krismas inhoi tak le hlawk taka hmang seng dingin ditsakna le inremna chibai vochuom ka buk cheu, Kum thar chibai leh.

=============
[*Editor's Note: INPUI columnist Pu Keivom is a retired Indian Foreign Service officer, respected Hmar Mizo litterateur and author of 'Zoram Khawvel' series. This article is dated Dec 18, 2009, Delhi]