Khuolbuk Chang Lo, Krista

By Rev. Jonathan Pudiate,  TCS Faculty, Sielmat

“Chalta he” mentality neiin poisak an hrol deudeu.

Rawngbawlna le inzoma sin tul a um thut leiin December thlabul khan Senvon ka zun zina. Lampui thatnaw leiin nuom angin kan tlan hrat theinawa. Pherzawl khuo kan zuk tlung chu zan a sawt ta bok le khawsung mihai hang keithoa, zalhmun remna ding hang zong chu in phalam um hle in ka hrieta. Zan khawdei hnuoia tuola khawvar nghak el hlak chu a ni thei bok naw leiin chuongchun zanre hnung chun tlungna ding kan hang zong vela.

Thlasik dei emem hnuoia hmelhriet khom nilo, an kot kik a keitho kan tum lai chun Mary, a naupai inhla tak le a pasal Josefa khuolzin lungrila a hung fu hlok ela. Kum 2000 liem ta laia Krista’n tlungin ding an vai ang bok khan tulai hun a khom hin ringtuhai nunah hin tlungin ding a lan vai zing zie dam ngaituona ah a hung fu a.

Tulai Bluetooth generation a thalai lai hin Krista’n tlungin ding a lan vai hle el. Thalai tamtak lungrila hin Krista chu hnawl in a uma. Ei thawnuom ang thawpui a rem naw leiin Ama chu hnawlin, ei inhoi ti zong thaw dingin Krista chu ei sie hrea. Ei dawn nuom ang dawn pui a rem naw leiin hnoksak um a ei ruota. Isu kan lungril bawngin tlawma hung insieng thar nawk la tia hlaa in awi nekin ei hla ngaisang zawng hlak chu “ham tum ek kamre me bandh he” ti dam a lo ni a. “Chalta he” mentality neiin poisak an hrol deudeu bok.

Ei mobile phone a tlungin hmun insang ei pek hai hlak chu nuhmei pasalna tieng a nun porche a mi thuoi lut thei thilhai khuoltha anga ngaiin hmun insang ei pek bok. Zawlnei Isaiin ei ngirhmun a lo hmulawk “Ama chu mihriemhai hmusit le ditnawin a um a…mihaiin an hmai an hipsan ang chun ama chu hmusitin a um a, eini hlak chun ei ngaisang si nawh” (Isai 53:3) tia a lo hril hi a sukdiktu ei pung deudeu si. Hiengang khawvel setak kara leng ei ni lei hin karhla ruoltha, mani hmun le ram pan loa vairama Lalpieng champha hmangtuhai popo, ei lungrila Krista chu Lal a ruotin, a chunghnung le ropuitak nina in khumtirin 2009 Krismas hi Krista leh hmang dingin ditsakna kan hlan cheu. Lungrila Krista chu chongpu chan in changtirin, Ama chibai ei bukna dingin ei lungril in hlan ei tiu! 2009 Krismas-Krista Leh Aw!