Hmarram: Indin thar nawk ei tiu!

[By Bungstar* for INPUI.com]

“Sharon par I la mawi zo nawh,

Hmartlangpui inthim chunga hin...”

Ei Hmarram lungsietum hi thununna dawnglo nau ang el an ta a. A nuom a ningin an let vel el a ni tak a nih. Kei chu KHA pawl, CHU pawl tia eiin the de’n duon kui hi ami suk KHA tu tak chu ni dingin ka ring thlat. Mani mimal hlawkna ding seng zawngin eiin lap vela; damna tak tlansan siin. Mi thlirtu ta ding chun nuizat bur chau ei nih.

Sun pachang laiin ei nunghakhai tuolpara, ramdang mihaiin an mi sawisak peka, an nuoma ningin an mi pal ziel tah hi te! Mi hmusit le sawp ziel el dinga ei um hi khak dawm meua inngaituo a tul an tah. “Kan hnam kan damna” ei ta. Khawm a mawina? A va zuk thlawmthlak ngei de maw, sun pachang zawla khawm doral muong ta lova nu le nau thlabara an zuk um el ta chu! Hransar an mi lam khum ani tah hi.

“HMAR PASALTHA” Sahrang hmaa zam ngailo hai kha khawlai am an um zo ta leh? Tap rawl ngawt naw chu siksikrieu an hram el ani tie. Ei Hmartlangmawi hi ei damna ni ta lovi tuorna’n eiin changtir tawl el a hawia. Keini pawl, nangni pawl tia inkhik in khalna a sip liem el tah si a. A khawlaitak am ana a Mawina? Ka suong vei tliet leh, suong ding mumal a va umnaw de. A hrut ani hi tie.

Kohran rama hlak an ang tho. Lal rawngbawl le kohran rawngbawl eiin zat rawng ti ding manih. Kohrana hring sia pathiena hringlo khawm kui hi ani tie ami suk Ap tu chu. A ram le felna zawng hmasa lovin kohran eiin din tawla. Bak vuongtum benthlak ang char.Intau intau nek hin Gospel hin inkeithuoi in la chu eng pem pum naw manim maw.Chanchintha ei hmuna hlak chu kum za ni ta raka, Where is the Justice done to the years we called ourselves Christians? Buoipui lo ding ei buoipuia, tlanginsampui lova, ip tawk tawk ding kha ei khekindur puia.(ei hmur themthiem tawlna zawng tak) Thiem ei changnaw na chu a ni pang el hi.

HNAM tlawm terek, ei thlatu hai khawm an thlan haia hadamin zalhmun rem tang an tim aw? Ei ti chauva hienghin eiin cheibawl ta a. Mi hung hmu chie hai sien la, an mi uongpui ding am? ‘Kan thlahai in nih’ khawm an mi ti nuom ping ping dim maw!

Ei ram hi ei hmangai tak tak chun, hung ro, tan thang ei tiu. A sietnawna hrim hrim a um ta nawh. Eiin khawkpui le inkhawkpuiin, muolpho le muolphovin, mitinin mani nun sengah tan in, in siemth’ang ei tiu. Vawisun hin Lalpa’n ei tawng ngeiin ami biek annaw maw? Tum hrilfie ngai chu?

(*The writer is a veteran Hmar chatter at INPUICHAT room. This is his first article).